1. Edena dala ai Dirava bona gavamani ita kamonai henia diba?

BAIBEL ia gwau tanobada gavamani do ita kamonai henia, to ma ia gwau Dirava do ita kamonai henia to taunimanima lasi. (Kara 5:29; Tito 3:1) Unai hereva rua idia hakoikoia heheni, a? Lasi! Unai hakaua hereva idia noho dainai ita be siahu taudia ita matauraia. Iesu ia gwau: “Kaisara ena gaudia be Kaisara dekenai umui henia, to Dirava ena gaudia be Dirava dekenai umui henia.” ^[1] (Mat. 22:21) Edena dala ai Iesu ena hereva do ita badinaia? Gavamani ena taravatu ita badinaia, ena gaukara taudia ita matauraia, bona takisi ita henia. (Roma 13:7) To, bema gavamani ese ita ia hamaoroa Dirava ita kamonai henia lasi totona, mai hemataurai ida ena hereva do ita dadaraia.

2. Edena dala ai ita hahedinaraia politikol karadia amo ita gini siri?

² “Dirava ena gaudia be Dirava dekenai [ita] henia,” anina be inai tanobada ena politikol karadia amo ita gini siri. (Isa. 2:4) To, Iehova ese gavamani dekenai maoro ia henia idia lohia totona, unai dainai idia ita dadaraia lasi. Bona bese o tano abia isi karadia lalonai ita vareai lasi. (Roma 13:1, 2) Ita  ura lasi gavamani ita haidaua eiava memba taudia edia lalona ita veria, bona eleksen negana ai ita vouti o memba ta ai ita lao.

3. Dahaka dainai politikol karadia amo ita gini siri?

³ Politikol karadia amo ita gini siri ena badina haida be Baibel ese ia gwauraia. Hegeregere, ita ese Iesu Keriso ena hahediba herevadia bona haheitalai ita badinaia. Oibe, ita be inai “tanobada ena lasi” dainai, politikol karadia eiava tuari lalonai ita vareai lasi. (Ioa. 6:15; 17:16) Unai amo ita hahedinaraia, ita ese Dirava ena Basileia ita durua. Unai dainai ita haroro neganai, mai lalomamina goevana ida taunimanima ita hadibaia Dirava ena Basileia sibona ese iseda hekwakwanai do ia haorea. Danu, tomadiho koikoidia be politikol karadia idia durua dainai, edia taunimanima idia parara, to tomadiho momokani ese ita ia durua unai bamona karadia amo ita gini siri totona, unai dainai tadikaka oreana lalonai lalotamona ia noho.​—1 Pet. 2:17.

4. (a) Edena bamona ita diba do ia auka ita gini siri totona? (b) Dahaka dainai hari ita hegaegae be namo?

⁴ Iseda tano ai, gavamani be ita ia doria lasi politikol karadia lalonai ita vareai totona, bona tomadiho momokani ia koua lasi. To, Satani ena tanobada ena dokona ia kahirakahira noho lalonai, reana do ia auka politikol karadia amo ita gini siri totona. Hari taunimanima “idia ura lasi gwauhamata idia karaia” bona “idia kwara auka,” unai dainai lalotamona be lasi. (2 Tim. 3:3, 4) Tano haida ai, iseda tadikaka edia gini siri karana dainai, dagedage idia davaria. Ita dekenai unai ia vara diba, unai dainai ita hegaegae be namo. Bema ita naria ela bona unai bamona hekwakwanai ita davaria, reana ita moru diba. Vadaeni edena dala ai inai tanobada amo do ita gini siri? Mani gau foa ita herevalaia.

5. Iehova ese taunimanima gavamani be edena bamona ia laloa?

⁵ Gau ginigunana be, Iehova ese gavamani ia laloa hegeregerena idia ita laloa. Iehova ese taunimanima ia karaia neganai, idia dekenai maoro ia henia lasi taunimanima idia lohiaia totona. (Ier. 10:23) Taunimanima edia gavamani ese bese abia isi karana idia hagoadaia, bona unai ese taunimanima ia hapararaia. Oibe, ena be gavamani ese gau momo ia hanamoa, to hekwakwanai ibounai ia haorea diba lasi. Danu, lagani 1914 amo, taunimanima edia gavamani ese Dirava ena Basileia idia inai henia. To, unai Basileia ese kahirakahira bese ibounai do ia hahemaoro henia.​—Salamo 2:2, 7-9 duahia.

6. Edena dala ai gavamani ena siahu taudia ita kara henia be namo?

⁶ Hari, Dirava ese gavamani ena gaukara ia koua lasi, badina edia heduru dainai maino ia noho, bona Basileia ena sivarai namona ita harorolaia diba. (Roma 13:3, 4) Danu, Dirava ia gwau siahu taudia dainai do ita guriguri, unai amo mai maino ida ia ita tomadiho henia diba. (1 Tim. 2:1, 2) Paulo hegeregerena, siahu taudia ita noia diba kota maorona idia karaia totona. (Kara 25:11) Ena be Baibel ia gwau Satani ese tanobada gavamani ia biagua, to ia gwau lasi ia ese memba taudia o gaukara taudia ta ta ia biagua. (Luka 4:5, 6) Unai dainai namo lasi ita laloa Diabolo ese gavamani ena gaukara tauna ta ia  biagua. To, “gavamani bona siahu taudia” ita hereva henia neganai, “ta do [ita] gwauraia dika lasi.”​—Tito 3:1, 2.

7. Dahaka lalohadai ita dadaraia be namo?

⁷ Dirava ita kamonai henia dalana ma ta be, memba ta, eiava politikol oreana ta ita abia dae lasi, herevana unai ese namo ia havaraia diba. To, unai ese iseda gini siri karana ia tohoa diba. Edena dala ai? Reana gavamani ta ena lohia dalana dainai taunimanima ibounai, Dirava ena taunimanima danu, be hisihisi idia davaria, bona momo idia ura unai gavamani idia kokia. Ena be gavamani idia gwau-edeede henia taudia oi bamoa lasi, to edia lalohadai do oi abia dae, a? (Efe. 2:2) Namona be tanobada amo ita gini siri, iseda hereva bona kara amo sibona lasi, to iseda kudouna ai danu.

8. Bema ia auka ita gini siri totona, edena dala ai do ita “naria namonamo” bona “manau”?

⁸ Tanobada amo ita gini siri dalana iharuana be Baibel ese ia gwauraia: “Do umui naria namonamo, gaigai bamona, bona do umui manau, pune bamona.” (Mataio 10:16, 17 duahia.) Bema iseda gini siri karana dainai do ita davaria hekwakwanai ita lalohadailaia guna, unai tarapu lalonai do ita moru lasi. Unai hekwakwanai haida bona ita hanaidia dalana mani ita itaia.

9. Ita herevahereva neganai, dahaka dainai ita naria namonamo be namo?

⁹ Herevahereva: Taunimanima ese politikol karadia idia herevalaia neganai, namona be ita naria namonamo. Hegeregere, ta ida Basileia ita herevalaia neganai, namo lasi politikol orea ta o memba ta ena kara ita hanamoa o gwauraia dika. To, hekwakwanai ena badina ita herevalaia, bona gavamani ese unai hekwakwanai ia haorea dalana ita herevalaia lasi. Bena Baibel amo oi hahedinaraia Dirava ena gavamani sibona ese unai hekwakwanai do ia haorea. Bema ruma tauna ese tau rua o hahine rua idia headava karana o bogana lalonai natuna hamasea karana ia herevalaia, Baibel ena hakaua herevadia oi hahedinaraia bona iseda mauri ai unai ita badinaia dalana oi gwauraia. Emui herevahereva lalonai, politikol karadia herevalaia lasi. Bema ia ura taravatu ta idia kokia o haidaua, unai lalohadai oi durua lasi, bona oi doria lasi emu lalohadai ia abia dae totona.

10. Nius ita itaia o duahia neganai, edena dala ai ita gini siri diba?

¹⁰ Nius halasia oreadia. Nega haida nius halasia oreadia be sibodia edia lalohadai o politikol karadia idia herevalaia. Unai dainai Keristani taudia ese unai bamona nius o ripota ena hereva dainai idia naria namonamo be namo. Sibona oi nanadaia, ‘Nega momo ripota ta ena hereva lau ura henia, badina iena lalohadai politikol karadia dekenai lau abia dae, a?’ Namo lasi politikol karadia idia herevalaia nius oreadia ita kamonai, to namona be ita kamonai herevadia be Baibel lalonai idia noho “hereva momokani ena lalohadai badana” ida ita hahegeregerea.​—2 Tim. 1:13.

11. Dahaka dainai nega haida do ia auka ita gini siri totona?

¹¹ Moni bona kohu. Bema moni bona kohu ita laloa bada, hahetoho negadiai, do ia auka ita gini siri totona. Lagani 1970 murinai, Malawi ai Witnes taudia be dagedage idia davaria neganai, haida be unai idia karaia. Ruth ia gwau: “Edia mauri namona idia rakatania diba  lasi. Haida be ai ida idia lao, to gabeai politikol oreana idia durua bona edia ruma dekenai idia giroa, badina idia mamia refiuji kamepa ai mauri be auka.” To, Dirava ena taunimanima momo be idia gini siri, ena be edia moni be bada lasi o edia kohu ibounai idia haboioa.​—Heb. 10:34.

12, 13. (a) Iehova ese taunimanima be edena bamona ia laloa? (b) Dahaka ese do ia hahedinaraia ita be iseda tano ita hekokorokulaia?

¹² Hekokoroku. Vaia taunimanima be edia bese, iduhu, mauri dalana, taoni, o tano dainai idia hekokoroku. To bema iseda iduhu, mauri dalana o bese ita hekokorokulaia, unai be Iehova ena lalohadai hegeregerena lasi. Oibe, Iehova ia ura lasi ita ese iseda mauri dalana ita laloa maragi. To laloatao, ena be ita ibounai be bese idauidau, to Dirava ena matanai ita ibounai be hegeregere.​—Roma 10:12.

¹³ Iseda tano ita hekokorokulaia karana be tano abia isi karana. Ita dekenai unai ia vara diba. Badina aposetolo edia negai ia noho kongrigeisen ai, haida ese idau bese taudia idia dadaraia. (Kara 6:1) Edena bamona do ita diba ita be ita hekokoroku? Bema idau tano tadikaka o taihu ta ese ena lalohadai ia gwauraia, maoromaoro do oi dadaraia, bona oi laloa, ‘Iniseni ai badinaia dalana be namo’? Namona be ita ibounai ese inai sisiba ita badinaia, ia gwau: “Mai manau ida do umui laloa ma haida ese umui idia hereaia.”​—Fili. 2:3.

14. Edena dala ai guriguri ese ita ia durua, bona edena Baibel sivaraina ese unai ia hamomokania?

¹⁴ Ita ia durua gauna ihatoina be, Iehova ena heduru ita noia. Lauma helaga totona ita guriguri, unai amo ita haheauka bona sibona ita biagua diba. Bena gavamani ena koikoi daladia do ita dadaraia. Danu, Iehova amo aonega oi noia, unai amo emu Keristani gini siri karana idia tohoa gaudia oi hanaia diba. (Iam. 1:5) Bema tomadiho momokani oi badinaia dainai, dibura ruma ai oi idia atoa, o idia panisi, Iehova oi noia oi dekenai goada do ia henia, unai amo oi davaria hahetoho oi haheaukalaia diba.​—Kara 4:27-31 duahia.

15. Baibel ese edena dala ai ita do ia durua? (Maua ladana “Baibel ese Idia Ia Durua” itaia danu.)

¹⁵ Iehova ese Baibel amo ita ia hagoadaia diba. Hahetoho negadiai oi do idia durua siridia oi laloa dobu. Unai siri oi lalodiatao, unai amo gabeai oi dekenai Baibel ia noho lasi neganai, unai siri ese oi idia durua diba. Danu, Baibel ese emu helaro vaira nega totona ia hagoadaia diba. Hahetoho ita haheaukalaia totona, do ita abia hahenamo ita lalodia be mai anina bada. (Roma 8:25) Paradaiso ai oi ura moalelaia hahenamo oi laloa, bona emu lalona ena matana amo unai oi itaia.

16, 17. Dirava ena abidadama hesiai taudia amo dahaka ita dibaia? (Laulau ginigunana herevalaia.)

¹⁶ Ita ia durua gauna namba 4 be, Iehova ena abidadama hesiai taudia edia haheitalai. Edia haheitalai amo aonega bona goada ita abia diba. Hegeregere, Sataraka, Misaka, bona Abetenigo be Babulonia ena gavamani ia laulaulaia kaivakukuna tomadiho henia karana idia dadaraia. (Daniela 3:16-18 duahia.) Edia sivarai ese Witnes taudia  momo ia durua mai gari lasi ida edia tano ena pepe tomadiho henia karana idia dadaraia totona. Danu, Iesu be taunimanima idia hapararaia politikol karadia amo ia gini siri. Ia diba ena haheitalai ese ena hahediba taudia do ia durua. Ia gwau: “Umui goada! Lau ese tanobada lau halusia vadaeni.”​—Ioa. 16:33.

¹⁷ Hari Witnes taudia momo be tanobada amo idia gini siri. Idia haida be hisihisi idia mamia, dibura ruma ai idia atodia, bona edia abidadama dainai idia hamasedia danu. Edia haheitalai ese ita ia durua diba. Barış be Turkey ai ia noho, ia gwau: “Inai tadikaka matamata, Franz Reiter, be Hitler ena ami ia bamoa lasi dainai, ia idia hamasea. Ia do mase lasi hanuaboina ai, iena sinana dekenai ia torea revarevana, ese ia hahedinaraia ia be Iehova ia abidadama henia. Bema unai bamona hahetoho lau davaria, lau ura iena haheitalai lau tohotohoa.” ^[2]

18, 19. (a) Edena dala ai emu kongrigeisen tadikaka taihu ese oi idia durua diba? (b) Emu lalona oi hadaia dahaka oi karaia totona?

¹⁸ Emu kongrigeisen ai idia noho tadikaka taihu ese oi idia durua diba. Oi davaria hekwakwanai be elda taudia oi hamaoroa, unai amo idia ese Baibel amo oi idia durua diba. Bema kongrigeisen ai idia noho tadikaka taihu be emu hekwakwanai idia diba, idia danu ese oi idia hagoadaia diba. Oi noidia oi totona do idia guriguri. Bema ita ura iseda tadikaka ese ita idia durua bona ita totona idia guriguri, namona be idia totona unai ita karaia danu. (Mat. 7:12) Iseda websait jw.org ena atikol ta ladana, “Jehovah’s Witnesses Imprisoned for Their Faith​—By Location” ese oi ia durua diba. (Oi lao NEWSROOM > LEGAL DEVELOPMENTS.) Unuseniai dibura ruma ai idia atoa Witnes taudia edia ladadia idia noho. Ladana haida oi makaia, bona idia totona oi guriguri.​—Efe. 6:19, 20.

¹⁹ Tanobada gavamani edia dokona be kahirakahira dainai, ita hoa lasi bema Iehova bona ena Basileia badinaia dainai ita idia dagedage henia. Unai dainai namona be hari iseda lalona ita hanaia inai tanobada amo ita gini siri totona.