Lalona Ena Matana Gaukaralaia Namonamo Gau ta ena metau be kilogram 1.4 sibona bona “iunives ibounai lalonai, gau ta be ia hegeregerena lasi.” Unai gauna be dahaka? Iseda harana. Ia be hoa gauna, ani? Iseda harana stadilaia karana ese ita ia durua, Iehova ena “hoa” karadia ita laloa bada totona. (Sal. 139:14) Iseda harana ena gaukara ta mani ita laloa​—lalona ena matana.

Lalona ena matana be dahaka? Diksenari ta ia gwau, ia be “emu lalona ai laulau o lalohadai matamata oi karaia bona itaia karana.” Unai anina ese ia hahedinaraia oi be hanaihanai emu lalona ena matana oi gaukaralaia, ani? Hegeregere, oi do lao lasi gabuna ena sivarai oi duahia eiava kamonai, a? Unai gabu be emu lalona ena matana amo oi itaia, a? Momokani, ita itaia, kamonai, mamia, dogoatao, eiava bonaia lasi gauna ita laloa neganai, iseda lalona ena matana be ia gaukara.

Baibel ia gwau Dirava ese ena toana hegeregerena taunimanima ia havaraia. (Gen. 1:26, 27) Unai ese ia hahedinaraia Iehova danu be mai ena lalona ena matana, a? Ia ese ita dekenai lalona ena matana ia henia dainai, ia ura ita gaukaralaia ena ura ita laloa totona. (Had. 3:11) Edena dala ai iseda lalona ena matana ita gaukaralaia namonamo diba eiava ita gaukaralaia kerere diba?

(1) Nega kererena ai o gau kereredia lalohadailaia.

Gau ta ita lalohadailaia be kerere lasi. Tahua gaukarana ese ia hamomokania gau ta lalohadailaia karana ese namo ia havaraia diba. To, Hadibaia Tauna 3:1 ia gwau, gau “ibounai be mai edia nega,” unai dainai nega kererena ai gau kererena ita karaia diba. Hegeregerena, bema kongrigeisen heboudia ai o sibona emu stadi ai gau idauna oi laloa, oi laloa emu lalona ena matana ese oi ia durua diba, a? Iesu ese gau dikadia laloa karana ena dika ia herevalaia, hegeregere matabodaga karadia. (Mat. 5:28) Iseda lalona ena matana ai ita itaia gaudia haida be Iehova ese ia moalelaia lasi. Bema matabodaga karadia oi laloa, unai kara oi karaia diba. Namona be emu lalona oi hadaia, emu hetura karana Iehova ida do ia hadikaia gauna ta do oi laloa lasi!

(2) Reana oi laloa, kohu momo abia karana ese oi do ia gimaia.

Kohu be mai ena namo bona ita ia durua. To bema ita laloa kohu momo ese noho namo bona moale ia havaraia, ita sibona ita koia unai. Solomona ia gwau: “Kohu momo tauna ena kohu bona moni, be hanua aukana hegeregerena ia dekenai, bona ia laloa idia be magu badana bamona, idia ese ia idia gimaia noho.” (Aon. 18:11) Mani oi laloa, September 2009 Philippines dekenai medu bada  ia diho bona Manila ena gabu momo dekenai abata ia vara. Kohu momo taudia idia heau mauri, a? Ena kohu momo ia haboioa taga tauna ta ia gwau: “Inai abata amo taga bona ogogami taudia be dika bada idia davaria.” Momokani, reana do ita laloa kohu momo ese ita do ia gimaia. To unai be momokani lasi.

(3) Idia vara diba lasi gaudia lalohekwarahilaia karana.

Iesu ia gwau, namo lasi ita “lalohekwarahi.” (Mat. 6:34) Bema ita lalohekwarahi momo, reana gau momo do ita lalohadailaia. Reana nega bada do ita haorea kava, do idia vara lasi hekwakwanai ita lalohadailaia totona. Baibel ia gwau, unai bamona lalohekwarahi karana ese lalomanoka ia havaraia diba. (Aon. 12:25) Unai dainai namona be Iesu ena sisiba ita badinaia, bona dina ta ta ena metau ita huaia.

(1) Dika idia havaraia diba gaudia dadaraia.

Baibel ese ita ia hagoadaia ita aonega totona. (Aon. 22:3) Abia hidi ta ita do karaia lasi neganai, iseda abia hidi dainai ia vara diba gauna ita laloa guna. Hegeregere, bema moale karana ta dekenai oi idia boiria, emu lalona ena matana ese edena dala ai oi ia durua diba? Inai gaudia hegeregere, daidia do idia lao, taunimanima hida do idia lao, edeseni bona edena nega ai do idia karaia oi lalohadailaia murinai, sibona oi nanadaia: ‘Unuseniai dahaka ia vara diba?’ Unai moale hebouna ai Baibel ena hakaua herevadia do idia badinaia, a? Unai amo unai moale hebouna be emu lalona ena matana amo oi itaia diba. Bema unai oi karaia, abia hidi maorona do oi karaia, bona dika do oi dadaraia.

(2) Hekwakwanai badadia hanaia daladia laloa.

Lalona ena matana ese ita do ia durua “hekwakwanai ta ita hanaia bona hamaoromaoroa” totona. Bema kongrigeisen ai tadikaka ta o taihu ta dekenai oi badu, edena dala ai ia ida maino oi karaia diba? Gau haida oi laloa diba. Hegeregere: Unai tadikaka o taihu ena herevahereva dalana be edena bamona? Edena nega be nega namona  unai hekwakwanai ai hamaoromaoroa totona? Edena bamona hereva eiava gado regena do lau gaukaralaia? Unai oi lalohadailaia neganai, do oi diba edena dala namona do oi gaukaralaia unai hekwakwanai oi hamaoromaoroa totona. (Aon. 15:28) Bema unai oi karaia, kongrigeisen lalonai maino do ia noho. Unai amo oi hahedinaraia emu lalona ena matana oi gaukaralaia namonamo.

(3) Emu Baibel duahiduahi bona stadi karana hagoadaia.

Dina ta ta ai Baibel oi duahia be mai anina bada. To, Baibel oi duahia sibona be hegeregere lasi. Namona be Baibel lalonai idia noho herevadia ita laloa dobu bona iseda mauri lalonai ita badinaia. Baibel duahiduahi amo ita hahedinaraia ita ese Iehova ena kara ita ura henia. Iseda lalona ena matana ese ita do ia durua. Edena dala ai? Imitate Their Faith bukana mani oi laloa. Unai buka lalonai idia noho sivaraidia duahia karana ese iseda lalona ena matana ia durua diba. Oibe, ita ia durua Baibel negadia ai idia noho taudia ta ta edia noho gabuna ita itaia, ia vara noho regena ita kamonai, aniani bona tubutubu gaudia edia bonana ita bonaia, bona unai taudia edia hemami ita laloa diba. Unai dala amo Baibel sivaraidia ita hamauria bamona, bona unai sivarai amo goada ita abia diba. Bema iseda lalona ena matana amo ita duahia o stadilaia gauna ita itaia, namo bada do ita davaria.

(4) Ma haida edia hemami laloa.

Ma ta ena hemami laloa karana ena anina be iseda kudouna lalonai iena hisihisi ita mamia. Iehova bona Iesu be ita idia laloa dainai, namona be idia ita tohotohoa. (Eso. 3:7; Sal. 72:13) Edena dala ai unai ita karaia diba? Dala hereadaena ta be iseda lalona ena matana ita gaukaralaia. Reana iseda Keristani tadikaka o taihu ese ia davaria hekwakwanai ita mamia lasi, to ita sibona ita nanadaia diba: ‘Bema unai be lau, egu hemami be do edena bamona? Dahaka do lau abia be namo?’ Bema iseda lalona ena matana amo unai henanadai ita haerelaia, do ita diba edena dala ai iseda tadikaka o taihu ita durua diba. Oibe, bema ma ta ena hemami ita laloa, unai ese iseda Keristani maurina, haroro gaukara, bona iseda hetura karana tadikaka taihu ida do ia hanamoa.

(5) Lalona ena matana amo tanobada matamata itaia.

Baibel ese Dirava ia gwauhamatalaia tanobada matamatana ia herevalaia namo herea. (Isa. 35:5-7; 65:21-25; Apok. 21:3, 4) Iseda buka bona magasin momo edia laulau namodia ese unai idia hahedinaraia danu. Dahaka dainai? Badina laulau ese iseda lalona ena matana ia durua, unai amo Dirava ese ia gwauhamatalaia hahenamo ita lalodia diba. Iehova, iseda lalona ena matana ia Havaraia tauna, ia diba ia karaia gauna ese ita ia durua diba. Bema iseda lalona ena matana amo tanobada matamata ita itaia, do ita diba momokani unai gwauhamata be do idia guguru bona unai ese iseda abidadama do ia hagoadaia, bona hari ita davaria hekwakwanai ita haheaukalaia diba.

Iehova be mai lalokau ida ita dekenai lalona ena matana ia henia. Oibe, lalona ena matana ese ita ia durua dina ta ta ai Iehova ita hesiai henia totona. Bema unai harihari gauna ita gaukaralaia namonamo, ita hahedinaraia unai harihari gauna ia Henia Tauna ita tanikiu henia.