1, 2. (a) Inai tanobada dikana bona taravatu utua tauna be edena dala ai idia hegeregere? (Laulau ginigunana herevalaia.) (b) Dirava ese inai tanobada dikana ia hadikaia ore murinai, dahaka do ia vara?

“MASE TAUNA IA RAKA INAI!” Gadi taudia ese taravatu utua tauna dikana be dibura ruma amo idia hakaua raka-lasi, bona auri iduara be ena murinai idia koua neganai, unai hereva idia gwauraia. Dahaka dainai gadi taudia be unai bamona idia hereva? Ena be unai tauna be ia do mauri noho bona ia gorere lasi, to gadi taudia ese ia do idia hamasea gabuna dekenai ia idia hakaua lao noho. Unai be hegeregerena unai taravatu utua tauna be ia mase vadaeni. *

² Hari inai nega oromana be ena mase dinana ia naria noho tauna bamona. Oibe, Dirava ese idaunegai inai tanobada ia gwauraia dika vadaeni. Baibel ia gwau: “Tanobada . . . be do ia ore.” (1 Ioa. 2:17) Inai nega oromana ena dokona be do ia vara momokani. To, inai tanobada ena dokona bona dibura tauna hamasea karana be idau momokani. Dibura tauna idia ura hamasea neganai, reana haida do idia laloa ia abia  hahemaoro be maoro lasi, bona ia mase lasi be namo. To, inai tanobada dikana ena dokona be guba bona tanobada ena Lohiabada ese ia gwauraia vadaeni. (Deu. 32:4) Bona tanobada hadikaia negana be gau ta ese do ia koua lasi, bona do ia vara gauna be ta ese do ia daradaralaia lasi. Inai tanobada dikana idia hadikaia ore murinai, guba bona tanobada taudia ibounai do idia abia dae Iehova ena hahemaoro karana be maoromaoro. Bona ibounai do idia moale bada!

3. Inai stadi ai dahaka do ita herevalaia?

³ “Ia ore” noho “tanobada” be dahaka? Dina ta ta ai inai tanobada dekenai idia vara gau dikadia be do idia ore. Unai be sivarai dikana, a? Lasi momokani! Ia be “Basileia ena sivarai namona” ena kahana badana. (Mat. 24:14) Inai stadi ai, Dirava ena Basileia ia mai neganai, do ia haorea gaudia 4 do ita herevalaia. Idia be kara dika taudia, idia kara gageva oreadia, kara kereredia, bona inai mauri dikana. Unai gaudia 4 amo inai do ita dibaia, (1) hari iseda mauri idia haidaua dalana, (2) Dirava ese unai gaudia dekenai do ia karaia gauna, bona (3) dahaka ese edia gabu do idia abia.

4. Edena dala ai kara dika taudia ese iseda mauri idia haidaua?

⁴ Kara dika taudia ese edena dala ai iseda mauri idia haidaua? Aposetolo Paulo ia gwau “dina gabediai nega aukadia do idia vara.” Ma ia gwau: “Kara dika taudia bona koikoi taudia ese edia kara dika do idia habadaia momokani.” (2 Tim. 3:1-5, 13) Unai peroveta herevadia be hari ia guguru, a? Ita momo be kara dika taudia amo hisihisi ita abia, hegeregere dagedage taudia, ma haida idia inai henia taudia, bona raskol taudia. Idia haida be idia karaia kara dikadia idia hunia lasi, bona ma haida be koikoi karadia idia karaia. Ena be ita haida dekenai unai ia vara lasi, to idia karaia karadia ese iseda mauri ia haidaua diba. Hegeregere, idia ese natudia, buruka taudia, bona goada lasi taudia dekenai idia karaia kara dikadia edia sivarai ita kamonai neganai, ita lalohisihisi bada. Unai kara dika taudia edia kara be dika momokani, animal eiava demoni edia kara bamona. (Iam. 3:15) To, ita moale badina Iehova ena Hereva ese ita dekenai helaro ia henia.

5. (a) Nega ia do noho kara dika taudia be dahaka idia karaia totona? (b) Edia kara idia ura lasi haidaua taudia dekenai dahaka do ia vara?

⁵ Iehova be dahaka do ia karaia? Hari Iehova be nega ia henia kara dika taudia be edia kara idia haidaua totona. (Isa. 55:7) Ena be inai nega oromana be kahirakahira do ore, to idia be edia hahemaoro ginigabena idia do abia lasi. To haida be do idia ura lasi edia kara idia haidaua, bona inai nega oromana do idia durua ela bona hisihisi badana ia ginidae. Idia dekenai dahaka do ia vara? Iehova ia gwauhamata tanobada amo kara dika taudia ibounai do ia kokia. (Salamo 37:10 duahia.) Reana kara dika taudia do idia laloa idia dekenai unai do ia vara lasi. Momo be idia karaia kara dikadia idia hunia, unai dainai panisi idia abia lasi. (Iobu 21:7, 9) To Baibel ia gwau: “Dirava ese, taunimanima edia mauri daladia ibounai ia itaia noho. Edia kara ibounai ia itaia noho. Dibura gabuna ta ia noho lasi, kara dika tauna be unuseni do ia hunia totona.” (Iobu 34:21, 22) Oibe, Iehova Dirava amo ita hunia diba lasi. Kara dika taudia ese idia karaia gaudia ibounai be ia itaia diba. Bena Aramagedono murinai, reana kara dika taudia edia noho gabuna ai idia do ita tahua, to do ita davaridia lasi. Idia be do idia ore momokani!—Sal. 37:12-15.

6. Daidia ese kara dika taudia edia gabu do idia abia, bona dahaka dainai unai be sivarai namona?

 ⁶ Kara dika taudia edia gabu be daidia ese do idia abia? Iehova ia gwauhamata, ia gwau: “Manau taudia ese noho gabuna tano do idia abia, do idia helai namonamo, mai moale bona mai maino danu.” Ma ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Sal. 37:11, 29) “Manau taudia” bona “kara maoromaoro taudia” be daidia? Manau taudia be mai manau ida Iehova ena hahediba herevadia bona hakaua dalana idia abia dae taudia; kara maoromaoro taudia be Iehova Dirava ena matanai kara maorona idia ura karaia taudia. Hari inai tanobada ai, kara dika taudia be momo herea, to kara maoromaoro taudia be momo lasi. To tanobada matamata ai, manau bona kara maoromaoro taudia sibona do idia noho, bona idia ese tanobada be paradaiso ai do idia halaoa!

7. Idia kara gageva oreadia ese edena dala ai iseda mauri idia haidaua?

⁷ Idia kara gageva oreadia ese edena dala ai iseda mauri idia haidaua? Inai tanobada ai idia vara kara dika momo be tau tamona ese ia havaraia lasi, to orea idauidau ese idia havaraia. Hegeregere, tomadiho orea momo ese taunimanima milioni momo idia hakaua kerere. Dirava ena kara dainai koikoi hereva idia gwauraia, idia gwau Baibel do ita abidadama henia lasi, bona tanobada bona taunimanima edia vaira nega dainai koikoi herevadia idia gwauraia. Danu, idia kara gageva gavamani oreadia ese tuari bona bese ma ta dagedage henia karana idia hagoadaia, bona ogogami bona goada lasi taudia idia hahisia. Idia ese laloani moni idia abia dae bona haida sibona idia kara namo henia dalana amo edia taga idia habadaia. Ma danu, mataganigani kampani idauidau be ma haida idia laloa lasi bona tanobada idia hamiroa, davara bona tano ai idia noho gaudia idia hadikaia, taunimanima idia koia, unai amo haida sibona be taga taudia ai idia lao, to momo be idia ogogami. Momokani, tanobada ai idia vara dika momo be idia kara gageva oreadia ese idia havaraia.

8. Baibel ia gwau hari idia noho orea idauidau dekenai dahaka do ia vara?

⁸ Iehova be dahaka do ia karaia? Politikol oreadia ese tomadiho koikoi oreadia, ariara hahinena ese ia laulaulaia gauna ladana Babulonia Badana unai, idia tuari henia neganai, hisihisi badana be do ia matamaia. (Apok. 17:1, 2, 16; 18:1-4) Unai tomadiho oreadia be do idia hadikaia ore momokani. To, idia kara gageva orea ma haida be edena bamona? Baibel ia gwau idia be goada herea, ororo bona motumotu bamona. (Apokalupo 6:14 duahia.) To ma ia gwau gavamani bona orea ma haida, Dirava ena Basileia idia durua lasi oreadia unai, be do idia hadikaia ore. Unai be hisihisi badana ena dokonai do ia vara. (Ier. 25:31-33) Unai murinai, idia kara gageva oreadia be do idia noho lasi!

9. Dahaka dainai ita abia dae tanobada matamata ai gau ibounai do idia heau namonamo?

⁹ Idia kara gageva oreadia edia gabu be dahaka ese do ia abia? Aramagedono murinai, tanobada ai orea ta do ia noho, a? Baibel ia gwau: “Iena gwauhamata hegeregerena, ita ese guba matamata bona tanobada matamata ita naria noho, bona unuseniai kara maoromaoro sibona do ia noho.” (2 Pet. 3:13) Guba bona tanobada gunana, idia kara gageva gavamani oreadia bona idia biagua taudia unai, be do idia ore. Edia gabu be dahaka ese do ia abia? Inai hereva  “guba matamata bona tanobada matamata” be gavamani matamata bona ia ese do ia lohiaia taudia ia herevalaia. Unai Basileia be Iesu Keriso ese do ia lohiaia bona ia ese Iehova Dirava ena kara do ia hahedinaraia goevagoeva, gau ibounai ia karaia namonamo Diravana unai. (1 Kor. 14:33) Unai dainai “tanobada matamata” ai gau ibounai be do idia heau namonamo. Tatau namodia ese gaukara ibounai do idia naria. (Sal. 45:16) Idia be Keriso bona ia ida do idia lohia 144,000 taudia ese do idia hakaua. Mani oi laloa, unai nega ai idia kara gageva oreadia be do idia noho lasi, to orea tamona sibona do ia noho, bona ta ese do ia hadikaia lasi!

10. Oi noho gabuna ai, edena kara kereredia be bada, bona unai ese edena dala ai oi bona emu famili ena mauri ia haidaua?

¹⁰ Kara kereredia ese edena dala ai iseda mauri idia haidaua? Inai tanobada be kara kereredia amo ia honu. Oibe, inai nega oromana lalonai matabodaga, koikoi, bona dagedage karadia be bada. Tama sina be idia hekwarahi bada unai bamona karadia amo edia natudia idia gimaia totona. Muvi bona miusiki idia karaia kampani badadia momo ese kara kereredia be moale karadia ai idia halaoa, unai amo Iehova ena taravatu kara namo bona kara dika dekenai idia kirikirilaia. (Isa. 5:20) Unai dainai namona be Keristani taudia momokanidia idia hekwarahi unai kara kereredia idia dadaraia totona. Danu, ita be Dirava ena taravatu ia matauraia lasi tanobadana ai ita noho dainai, namona be ita hekwarahi iseda hetura karana Dirava ida ita gimaia totona.

11. Iehova ese Sodoma bona Gomora dekenai ia karaia karana amo dahaka ita dibaia?

¹¹ Kara kereredia dekenai Iehova be dahaka do ia karaia? Sodoma bona Gomora ai idia vara kara kereredia dainai Iehova ese ia karaia karana mani ita laloa. (2 Petero 2:6-8 duahia.) Lota be kara maoromaoro tauna, to ia bona ena famili be edia badinai idia noho taudia ese idia karaia kereredia dainai hisihisi bada idia mamia. Iehova ese unai hanua ia hadikaia ore neganai, ia ese unuseniai idia karaia kara kereredia sibona ia haorea lasi. To ia ese “Dirava idia badinaia lasi taudia dekenai do ia vara gauna ia haheitalaia.” Iehova ese unai nega ai matabodaga karadia ibounai ia haorea hegeregerena, ia ese inai nega oromana ia hahemaoro henia neganai, hari idia vara kara kereredia ibounai do ia haorea.

12. Inai tanobada dikana ia ore neganai, oi ura dahaka gaukara oi karaia?

¹² Dahaka ese kara kereredia edia gabu do ia abia? Tanobada Paradaiso be moale karadia idauidau amo do ia honu. Mani oi laloa, ita ibounai do ita gaukara hebou inai tanobada be paradaiso ai ita halaoa totona, eiava ita sibona o iseda lalokau taudia totona ruma do ita haginidia. Bena mase taudia milioni momo do ita welkam henidia bona idia dekenai Iehova ena dala bona taunimanima ia kara henia dalana do ita hadibaia. (Isa. 65:21, 22; Kara 24:15) Gaukara idauidau do ita karaia dainai, do ita moale bona Iehova do ita hanamoa!

13. Satani, Adamu, bona Heva edia gwau-edeede karana dainai hari dahaka ia vara noho?

¹³ Iseda mauri dikana ese edena dala ai iseda mauri ia haidaua? Kara dika taudia, kara gageva oreadia, bona kara kereredia ese iseda mauri inai tanobada ai ia hadikaia. Danu, iseda mauri be tuari, hitolo, bese abia isi karadia, gorere, bona mase ese idia  hadikaia. Unai hisihisi ibounai idia vara badina kara dika taudia toi ese Iehova idia gwau-edeede henia, idia be Satani, Adamu bona Heva. Edia gwau-edeede karana dainai, hari iseda mauri be ia dika.

14. Iseda mauri idia hadikaia gaudia dekenai Iehova be dahaka do ia karaia? Haheitalai gwauraia.

¹⁴ Iseda mauri dikana dainai Iehova be dahaka do ia karaia? Tuari mani ita laloa. Iehova ia gwauhamata tuari do ia haorea momokani. (Salamo 46:8, 9 duahia.) Gorere be edena bamona? Gorere danu do ia haorea. (Isa. 33:24) Bona mase? Iehova ese mase danu do ia haorea momokani! (Isa. 25:8) Ogogami maurina do ia haorea. (Sal. 72:12-16) Oibe, iseda mauri idia hadikaia gaudia ibounai be do ia haorea. Ma danu, ia ese inai tanobada ena “hodahoda” dikana, Satani bona ena demoni edia lalohadai kereredia do ia haorea.—Efe. 2:2.

15. Aramagedono murinai, dahaka gaudia be do idia ore momokani?

¹⁵ Mani oi laloa, tanobada ai tuari, gorere, bona mase do ia vara lasi. Danu, ami, neivi, bona tuari peleini be lasi! Tuari kohudia eiava tuari taudia edia mase guria gabuna danu be do ia noho lasi. Hospital, doketa, nesi, eiava helt insurens be lasi; mogi, funeral home, mase guria gabuna danu be lasi! Raskol karadia be lasi dainai, gadi taudia, alam, pulisi, loka bona ki be lasi! Gau ta totona do ita lalohekwarahi lasi.

16, 17. (a) Aramagedono amo idia roho mauri taudia be dahaka do idia moalelaia? Haheitalai gwauraia. (b) Inai tanobada gunana ia ore neganai, edena bamona ita diba ita be do ita noho?

¹⁶ Idia vara noho hekwakwanai ibounai idia ore neganai mauri be edena bamona? Unai ita lalohadailaia be auka. Ita be inai tanobada gunana ai lagani momo ita noho bona tanobada ai idia vara gaudia dainai ita mamia hisihisina ita manadalaia. Unai be hegeregere, trein steiseni badinai idia noho taudia be trein ena regena idia manadalaia dainai unai idia laloa lasi, bona momoru negea gabuna kahirakahira idia noho taudia be momoru ena bonana idia laloa lasi danu. To Iehova ese iseda mauri dikana ia hanamoa neganai, do ita moale bada!

¹⁷ Hisihisi ibounai ia ore neganai iseda hemami be do edena bamona? Salamo 37:11 ia gwau: “Do idia helai namonamo, mai moale bona mai maino danu.” Unai hereva ese emu kudouna ia hamarerea, a? Iehova be unai ia ura. Unai dainai, namona be inai nega aukana lalonai oi gaukara goada Iehova Dirava bona ena orea kahirakahira oi noho totona. Emu vaira negana ena helaro oi laloa dobu, bona emu kudouna bona lalona ai ia be gau korikorina ta bamona oi laloa—bona ma haida dekenai unai oi herevalaia! (1 Tim. 4:15, 16; 1 Pet. 3:15) Bema unai oi karaia, inai tanobada dikana ida do oi boio ore lasi. To, do oi roho mauri bona mai moale ida do oi noho hanaihanai!