1, 2. (a) Naboto bona ena natuna memero dekenai dahaka ia vara? (b) Inai stadi ai edena kara rua do ita herevalaia?

MANI inai oi laloa. Kota ai tau ta idia samania koikoi, idia gwau ia be kerere badana ta ia karaia. Kara dika tatau rua edia samania hereva koikoidia dainai ia be unai panisi ia abia. Unai dainai ena ruma bese bona turadia be idia hoa bona lalohisihisi bada. Unai kerere lasi tauna bona ena natudia memero idia hamasea neganai, kara maoromaoro idia ura henia taudia be idia moale lasi. Unai be sivarai momokanina. Iehova ena hesiai tauna, Naboto, dekenai unai ia vara, ia be Israela ena king, Ahaba, ia lohia negana ai ia noho.—1 Kin. 21:11-13; 2 Kin. 9:26.

² Inai stadi lalonai ita ese Naboto ena sivarai sibona do ita herevalaia lasi, to aposetolo edia negai ia noho elda tauna ta ese ia karaia hahemaoro kererena, do ita herevalaia danu. Inai Baibel haheitalai ese do idia hahedinaraia manau karana be mai anina bada, bema ita ura Iehova ena kara maoromaoro ita tohotohoa. Bona bema kongrigeisen lalonai kara gagevana ia vara, mai ura bada ida unai ita gwauatao dalana do ita herevalaia danu, unai amo Iehova hegeregerena kara maoromaoro ita hahedinaraia.

3, 4. Naboto be edena bamona tauna, bona dahaka dainai ia ura lasi ena vine umana ia hoihoilaia?

³ Naboto be Iehova ia abidadama henia, to Israela taudia momo be King Ahaba bona ena adavana dikana, Kwini Iesebele, ena haheitalai dikana idia badinaia. Unai Bala tomadiho henia taudia be Iehova idia matauraia lasi eiava iena hakaua herevadia idia laloa bada lasi. To, Naboto ese iena hetura karana Iehova ida ia laloa bada, ena be ia diba ena mauri do ia haboioa.

⁴ King Taudia Ginigunana 21:1-3 duahia. Ahaba ia ura Naboto ena vain umana ia hoia eiava ia dekenai vain uma matamatana ia henia neganai, Naboto be unai ia abia dae lasi. Dahaka dainai? Mai hemataurai ida ia gwau: “Lohiabada ia ura lasi lauegu tubuna taudia edia tano oi dekenai do lau henia.” Oibe, Naboto be Iehova ese Israela besena dekenai ia henia taravatuna ia badinaia. Unai taravatu ese sene taudia edia tano hoihoilaia karana ia taravatua. (Lev. 25:23; Num. 36:7) Unai ese ia hahedinaraia, Naboto be Iehova ena laloa dalana hegeregerena ia laloa.

5. Naboto hamasea totona, Iesebele be dahaka ia karaia?

⁵ Naboto ese ena vine umana ia hoihoilaia lasi dainai, King Ahaba bona ena adavana ese ia idia kara dika henia. Iesebele ia ura iena adavana totona unai vine umana ia abia dainai, Naboto totona samania hereva koikoi ia gwauraia, bona gabeai Naboto bona ena natudia memero idia hamasea. Unai kara gageva dainai Iehova be dahaka do ia karaia?

6, 7. Edena dala ai Iehova ia hahedinaraia ia be kara maoromaoro ia ura henia, bona dahaka dainai unai ese Naboto ena famili bona turadia ia hagoadaia?

⁶ Karaharaga Iehova ese Elia be Ahaba dekenai ia siaia lao. Elia ese Ahaba ia hahemaoro henia, ia gwau ia be ala-ala bona henaohenao tauna. Vadaeni Iehova be dahaka ia karaia? Naboto bona ena natudia memero dekenai ia vara gauna be Ahaba, ena adavana, bona ena natudia dekenai ia vara danu.—1 Kin. 21:17-25.

⁷ Ena be Naboto ia mase dainai ena famili bona turadia idia lalohisihisi, to idia diba Iehova be ia vara kara gagevana ia diba bona edia kerere davana do ia henia. To idia vara gaudia haida ese edia manau bona Iehova abidadama henia karana ia tohoa.

8. Iehova ena hahemaoro herevana dainai, Ahaba be dahaka ia karaia, bona dahaka ia vara?

⁸ Ahaba ese Iehova ena hahemaoro karana ena sivarai ia kamonai neganai, “iena dabua ia darea, puse dabua dikana ia atoa, aniani ia ania lasi, bona unai puse dabua lalonai ia mahuta. Bona ia ese danu mai ena lalona metau bona manau danu ia raka.” Ahaba be sibona ia hamanaua! Unai dainai dahaka ia vara? Iehova ese Elia ia siaia lou, hahemaoro herevana ma ta ia gwauraia totona. Ia gwauraia herevana be inai, Ahaba be Dirava vairanai ia manau dainai, iena mauri dinadia lalonai Iehova ese ia perovetalaia hisihisina do ia mailaia lasi. (1 Kin. 21:27-29) Iehova, “kudouna ia tahua tauna,” be Ahaba dekenai hebogahisi ia hahedinaraia.—Aon. 17:3 NWT.

9. Dahaka dainai manau karana ese Naboto ena famili bona turadia ia gimaia diba?

⁹ Unai abia hidi dainai, Ahaba ese ia karaia kara dikana idia diba taudia be edena bamona idia laloa? Reana unai ese Naboto ena famili bona turadia edia abidadama ia tohoa. To manau karana ese idia ia gimaia bona hagoadaia diba, mai abidadama ida Iehova idia tomadiho henia noho totona,  bona do idia abia dae momokani Dirava ena kara be maoromaoro. (Deuteronomi 32:3, 4 duahia.) Iehova ese kara maoromaoro taudia ia hatorea isi neganai, Naboto, ena natudia bona famili ese Dirava ena hahemaoro goevana do idia itaia. (Iobu 14:14, 15; Ioa. 5:28, 29) Danu, namona be ia manau tauna be inai ia diba, “Dirava ese iseda kara ibounai do ia kota henia, kara namodia bona kara dikadia, hunia dekenai ita karaia gaudia danu.” (Had. 12:14) Oibe, Iehova be ta ia hahemaoro henia neganai, ia ese gau ibounai ia lalohadailaia guna, ita diba lasi gaudia danu. Unai dainai manau karana ese kerere lasi taudia ia gimaia diba, bena edia abidadama be do ia dika lasi.

10, 11. (a) Dahaka ese iseda abidadama ia tohoa diba? (b) Edena dala ai manau karana ese ita ia gimaia?

¹⁰ Bema elda taudia ese idia karaia disisen ta ida oi lalotamona lasi eiava oi lalopararalaia lasi, dahaka do oi karaia? Hegeregere, bema oi eiava oi lalokau henia tauna ta be ena hahenamo ia haboioa? Eiava bema emu adavana, emu natuna mero o kekeni, eiava emu turana namona be orea amo idia atoa siri bona oi be idia karaia disisen ida oi lalotamona lasi? Eiava reana oi laloa elda taudia ese kerere tauna dekenai idia hahedinaraia hebogahisina be kerere? Unai ese iseda abidadama Iehova bona ena  orea ena heau dalana dekenai ia tohoa diba. Unai bamona hahetoho ita davaria neganai, edena dala ai manau karana ese ita ia gimaia diba? Mani inai dala rua ita laloa.

¹¹ Gau ginigunana be inai, bema ita manau do ita laloparara ita be sivarai ibounai ita diba lasi. Ena be ia vara gauna ita diba namonamo, to Iehova sibona ese ta ena kudouna ia itaia diba. (1 Sam. 16:7) Bema unai ita diba, do ita manau, bona do ita laloparara, iseda diba be mai ena hetoana, bena ia vara gauna dainai iseda lalohadai do ita haidaua. Gau iharuana be, bema ita manau, ita idia hakaua taudia do ita kamonai henia bona mai haheauka ida Iehova do ita naria ia vara kara gagevana ia hamaoromaoroa totona. Baibel ia gwau: “Dirava idia gari henia taudia be do idia namo, to . . . kara dika tauna be do ia namo lasi, iena mauri be do ia ore haraga.” (Had. 8:12, 13) Oibe, manau karana ese namo bada ia havaraia diba.—1 Petero 5:5 duahia.

12. Edena sivarai do ita herevalaia, bona dahaka dainai?

¹² Aposetolo edia negai, Suria Antioka ai idia noho Keristani taudia dekenai ia vara gauna ese edia manau karana sibona ia tohoa lasi, to ma ta ena dika gwauatao karana ia tohoa danu. Ia vara gauna mani ita laloa, unai ese ita do ia durua ma haida edia dika ita gwauatao totona bona do ita laloparara dika gwauatao karana be Iehova ena laloa dalana ida ia hegeregere.

13, 14. Aposetolo Petero be dahaka hahenamo ia abia, bona edena dala ai gari lasi karana ia hahedinaraia?

¹³ Keristani kongrigeisen lalonai, aposetolo Petero be momo ese idia dibaia elda tauna. Ia be Iesu ia bamoa tauna ta bona ia ese mai anina bada gaukarana ia abia danu. (Mat. 16:19) Hegeregere, lagani 36 C.E ai, Petero ese Korenelio bona ena ruma taudia dekenai sivarai namona ia harorolaia. Korenelio be kopina utua lasi Idau Bese tauna. Korenelio bona ena ruma bese be lauma helaga idia abia neganai, Petero ia gwau: “Inai taudia be ai hegeregerena lauma helaga idia abia vadaeni, unai dainai daika ia gwau ranu lalonai bapatiso idia abia diba lasi?”—Kara 10:47.

¹⁴ Lagani 49  C.E. ai, aposetolo taudia bona Ierusalema ai idia noho elda taudia idia haboua, badina idia ura diba bema Keristani taudia ai idia lao Idau Bese taudia ese edia kopina do idia utua eiava lasi. Unai hebou ai, Petero be mai gari lasi ida tadikaka ia hadibaia, lagani haida gunanai, kopina idia utua lasi Idau Bese taudia haida be lauma helaga idia abia danu. Petero ena hereva ese aposetolo edia negai idia noho hakaua oreana taudia ia durua abia hidi idia karaia totona. (Kara 15:6-11, 13, 14, 28, 29) Ma danu, Iuda bona Idau Bese Keristani taudia be Petero ena gari lasi karana dainai idia moale. Oibe, ia auka lasi idia ese Petero idia abidadama henia totona!—Heb. 13:7.

15. Petero be Suria Antioka ai ia noho neganai, dahaka kerere ia karaia? (Laulau ginigunana herevalaia)

¹⁵ Lagani 49  C.E. ai idia karaia hebou ia ore murinai, Petero be maoromaoro Suria Antioka ia vadivadi henia. Unuseniai, ia ese iena Idau Bese tadikakadia ia bamoa. Momokani, Petero ena hereva bona ekspiriens ese idia ia hagoadaia bada. To Petero be idia ida ia aniani lou lasi neganai, idia hoa bona lalohisihisi. Kongrigeisen ai idia noho Iuda taudia haida, hegeregere Banaba danu be Petero ese ia hakaua kerere dainai unai ia karaia. Dahaka dainai unai elda  goadana be unai bamona ia karaia, ena be ia diba unai ese kongrigeisen ia hapararaia diba? Ia vara gauna amo dahaka ita dibaia, bona bema elda ta ena hereva o kara amo iseda lalona ia hahisia, dahaka do ita karaia?

16. Petero dekenai dahaka ia vara bona dahaka henanadai idia vara?

¹⁶ Galatia 2:11-14 duahia. Petero be taunimanima ia gari henia dainai unai tarapu lalonai ia moru. (Aon. 29:25) Ena be matamanai Petero be Iehova ena lalohadai Idau Bese taudia dekenai ia lalopararalaia, to Ierusalema dekenai idia noho Iuda Keristani taudia dekenai ia gari. Lagani 49  C.E. ai, Ierusalema dekenai idia karaia hebouna ai aposetolo Paulo ia noho danu, unai dainai Antioka ai ia ese Petero ia hereva henia bona ena hekokoroku karana ia hahedinaraia. (Kara 15:12) Petero ena kara kerere dainai Idau Bese Keristani taudia be dahaka do idia karaia? Iena kara ese idia do ia hahekwakwanaia, a? Petero ena kerere dainai, iena hahenamo do ia haboioa, a?

17. Iehova ena gwauatao karana dainai, Petero be dahaka hahenamo ia abia?

¹⁷ Petero ia manau bona Paulo ena sisiba ia abia dae. Baibel ia gwau lasi ia ese ena hahenamo ia haboioa. To ita diba gauna be lauma helaga ena heduru amo ia ese revareva rua ia torea bona unai be Baibel lalonai ia noho. Iena revareva iharuana ai, ia ese Paulo ia gwauraia “iseda lalokau tadikaka.” (2 Pet. 3:15) Ena be Petero ena kara ese Idau Bese taudia edia lalona ia hahisia bada, to Iesu, kongrigeisen ena kwarana, ese Petero ia gaukaralaia. (Efe. 1:22) Dika gwauatao karana dekenai kongrigeisen taudia ese Iesu bona ena Tamana edia haheitalai idia tohotohoa be namo. Namo lasi goevadae lasi tauna ta ena kara kerere ese oi ia hahekwakwanaia.

18. Edena bamona negadia ai Iehova ena kara maoromaoro ita tohotohoa diba?

¹⁸ Aposetolo edia nega hegeregerena, hari Keristani kongrigeisen lalonai, goevadae elda tauna ta ia noho lasi, badina “ita ibounai be nega momo ita kerere.” (Iam. 3:2) Unai be momokani, to dahaka do oi karaia bema emu tadikaka ena kara ta ese emu lalona ia hahisia? Iehova ena laloa hegeregerena do oi laloa, a? Hegeregere, bema elda ta ena hereva amo ma ta ia hadikaia, dahaka do oi karaia? Eiava elda tauna ia laloa namonamo lasi bona ia gwauraia hereva ta amo emu lalona ia hahisia neganai, do oi lalomanoka, a? Unai ia vara neganai, do oi laloa unai tadikaka ena elda maduna idia kokia be namo, eiava mai haheauka ida Iesu, kongrigeisen ena kwarana, do oi naria? Tadikaka ese ia karaia kererena do oi laloa eiava lagani momo lalonai ia karaia hesiai gaukarana do oi laloa? Bema oi ia hahekwakwanaia tadikakana ese ena elda maduna ia haboioa lasi o hahenamo ma haida ia abia, ia ida do oi moale, a? Mai ura bada ida ma ta ena dika oi gwauatao neganai, oi be Iehova ena kara maoromaoro oi tohotohoa unai.—Mataio. 6:14, 15 duahia.

19. Namona be ita hekwarahi dahaka ita karaia totona?

¹⁹ Kara maoromaoro idia ura henia taudia be Iehova ese Satani bona ena tanobada ese idia havaraia kara gageva ibounai do ia haorea negana idia naria noho. (Isa. 65:17) Unai nega ita naria noho lalonai, namona be ita hekwarahi Iehova ena kara maoromaoro ita tohotohoa totona. Namona be ita abia dae iseda diba be mai hetoana, bona mai manau ida ma haida edia kerere ita gwauatao.