VANEGAI lagani, tanobada hegegemadai Iehova ena Witnes taudia huanai, tadikaka tausen momo idia abia hidi elda bona hesiai taudia ai idia lao totona. Bema oi be unai tadikaka ta, emu hesiai gaukara matamatana oi moalelaia.

To danu, reana do oi lalohekwarahi sisina. Elda matamata ta ladana, Jason, ia gwau, “Nega ginigunana lau idia abia hidi neganai, lau mamia maduna momo do lau huaia.” Mose bona Ieremia be Iehova ese edia asainmen matamata ia henidia neganai, idia mamia idia hegeregere lasi. (Eso. 4:10; Ier. 1:6) Bema emu hemami be unai bamona, edena dala ai unai oi hanaia diba bona oi gaukara goada noho? Keristani hahediba tauna Timoteo ena haheitalai mani oi laloa.​—⁠Kara 16:1-3.

Timoteo ena mauri lagani be reana 20 bamona neganai, aposetolo Paulo ese ia boiria iena loaloa gaukara lalonai do ia bamoa totona. Matamanai, Timoteo be matamata dainai, reana ia gari bona ia daradara iena asainmen matamata ia karaia totona. (1 Tim. 4:11, 12; 2 Tim. 1:1, 2, 7) To lagani ta murinai, Paulo ese Filipi kongrigeisen ia hamaoroa: “Lau naria noho bema inai be Lohiabada Iesu ena ura, vadaeni kahirakahira Timoteo be umui dekenai do lau siaia . . . Badina be lau dekenai ta ia noho lasi Timoteo hegeregerena.”​—⁠Fili. 2:19, 20.

Dahaka ese Timoteo ia durua elda namona ai ia lao totona? Iena haheitalai ese oi ia durua diba daladia siks mani oi laloa.

1. Ia be taunimanima ia lalodia bada. Paulo ese Filipi ai idia noho tadikaka ia hamaorodia: “[Timoteo] ese umui do ia durua momokani.” (Fili. 2:20) Oibe, Timoteo be taunimanima ia lalodia bada. Danu ia ura idia be Iehova kahirakahira idia lao, bona ia gaukara goada idia ia durua totona.

Namo lasi oi be momo ese idia dibaia basi taria tauna bamona, ia ura bus stop iboudiai dekenai nega korikori ai do ia ginidae to pasendia ia abidia lasi. Lagani 20 lalonai elda gaukara ia karaia tadikaka ta ladana, William, ese elda bona hesiai taudia matamatadia dekenai inai sisiba namona ia henia, ia gwau: “Tadikaka bona taihu umui lalokau henidia. Edia dabu gaudia dekenai idia umui durua, to kongrigeisen lalonai do idia karaia gaudia sibona umui laloa lasi.”

2. Ia be haroro gaukara ia laloa bada. Paulo ese Timoteo ena haheitalai be haida ida ia hahegeregerea neganai, ia gwau: “Ma haida be sibodia edia ura idia tahua noho, to Keriso Iesu ena ura idia tahua lasi.” (Fili. 2:21) Paulo be Roma amo unai revareva ia torea. Ia itaia unuseniai idia noho tadikaka, be sibona edia ura tahua karana idia laloa bada. Nega haida edia hesiai gaukara idia laloa bada lasi. To Timoteo be unai bamona lasi! Dala ia kehoa sivarai namona ia harorolaia neganai, ia be Isaia bamona, ia gwau: “Lau inai! Lau oi siaia!”​—⁠Isa. 6:8, NWT.

Edena dala ai sibona emu ura gaudia bona emu elda o hesiai tauna ena maduna oi huaia namonamo diba? Ginigunana be, Paulo ia gwau, “mai anina bada gaudia do [oi] diba.” (Fili. 1:10) Dirava ese ia laloa bada gaudia oi atoa guna be namo. Iharuana be, gau haida oi haidaua. Hegeregere, emu nega bona goada idia haorea gaudia oi dadaraia. Paulo ese Timoteo ia hagoadaia ia gwau: “Matamata taudia ese vaia idia abia ura idauidau amo oi heau siri, to . . . kara maoromaoro, abidadama, lalokau, bona maino do oi tahua noho.”​—⁠2 Tim. 2:22.

 3. Ena hesiai gaukara helagana lalonai ia gaukara goada. Paulo be Filipi tadikakadia ia hadibaia: “Umui diba, Timoteo ia hamomokania ia be ia hegeregere, bona natuna ta be tamana ida ia gaukara hebou bamona, lau ia durua sivarai namona harorolaia gaukarana ai habadaia totona.” (Fili. 2:22) Timoteo be ia lahedo lasi, to Paulo danu ia gaukara mai goada ida, bona unai ese edia hetura karana ia hagoadaia.

Hari Dirava ena orea lalonai gaukara be bada herea. Unai gaukara ese moale korikori ia havaraia bona emu tadikaka taihu ida oi hetura namonamo diba. Unai dainai emu lalona oi hadaia nega ibounai “Lohiabada ena gaukara do [oi] karaia goadagoada” totona.​—⁠1 Kor. 15:58.

4. Ia dibaia gaudia ia badinaia. Paulo be Timoteo ia tore henia, ia gwau: “Oi ese egu hadibaia herevadia, mauri dalana, tahua gauna, abidadama, boga-auka, lalokau, bona haheauka karana oi badinaia namonamo.” (2 Tim. 3:10) Timoteo be ia dibaia gaudia ia badinaia dainai, ia hegeregere maduna badadia ia huaia totona.​—⁠1 Kor. 4:17.

Oi be lo tadikakadia oi tura henidia, a? Bema lasi, unai bamona tura namona ta oi tahua. Lagani momo elda gaukara ia karaia tadikaka ta ladana, Tom, ia gwau: “Elda gaukara ia diba momo tadikaka ta ese lau ia laloa bada bona treinini namona ia henia. Nega momo heduru totona ia lau noia bona ena sisiba lau badinaia. Unai ese egu abidadama ia hagoadaia.”

5. Hanaihanai sibona ia treinia. Paulo ese Timoteo ia hagoadaia, ia gwau: “Emu tahua gauna be Dirava badinaia karana oi hahedinaraia.” (1 Tim. 4:7) Heau helulu tauna be mai ena hadibaia tauna, to ia sibona ese treinini ia abia danu be namo. Paulo ese Timoteo ia hagoadaia, ia gwau: “Namona be oi gaukara goada taunimanima vairanai oi duahiduahi noho, sisiba oi henia noho, bona oi hadibaia noho. . . . Unai gaudia oi laloa dobu, idia dekenai emu lalona ibounai oi henia, vadaeni taunimanima ibounai do idia itaia oi be oi goada oi lao noho.”​—⁠1 Tim. 4:13-15.

Namona be oi danu emu diba oi habadaia noho. Dirava hesiai henia karana oi goadalaia, bona kongrigeisen lalonai orea ese ia karaia senisi matamatadia oi diba be namo. Danu, oi hekokoroku lasi, reana oi laloa emu diba be bada dainai gau ibounai oi karaia namonamo diba ena be tahua gaukara oi karaia lasi. To Timoteo bamona, “oi sibona bona emu hadibaia hereva dekenai oi naria namonamo.”​—⁠1 Tim. 4:16.

6. Iehova ena lauma helaga ena heduru dekenai ia tabekau. Paulo be Timoteo ena hesiai gaukara ia laloa bada dainai, ia hadibaia lou: “Oi dekenai ia henia dava bada gauna be lauma helaga amo do oi naria namonamo, unai lauma helaga be ita lalonai ia noho.” (2 Tim. 1:14) Unai dainai, Timoteo ese ena hesiai gaukara ia karaia namonamo totona, Dirava ena lauma helaga ena heduru dekenai ia tabekau be namo.

Lagani momo elda gaukara ia karaia tadikaka ta, Donald, ia gwau: “Idia abia hidi elda bona hesiai taudia ese edia hetura karana Dirava ida idia laloa bada be namo. Unai bamona idia karaia neganai edia goada be do ia bada ia lao noho. Bema Dirava ena heduru totona idia guriguri bona lauma helaga ena huahua idia hahedinaraia, edia tadikaka dekenai idia be haheitalai namona.”​—⁠Sal. 84:7; 1 Pet. 4:11.

Elda bona hesiai taudia matamatadia momo ita itaia Iehova ena hesiai gaukara idia goadalaia neganai, unai ese ita ia hagoadaia bada. Matamanai ita herevalaia elda ta ladana, Jason, ia gwau: “Elda gaukara lau karaia negana amo, gau momo lau dibaia bona lau gari lasi. Hari egu asainmen lau moalelaia bona lau dekenai ia be hahenamo hereadaena!”

Iehova hesiai henia karana do oi goadalaia noho, a? Namona be oi hekwarahi Timoteo oi tohotohoa totona. Bema unai bamona oi karaia, Dirava ena taunimanima dekenai oi be hahenamo ta.