1-3. (a) Matamata taudia be dahaka hekwakwanai idia davaria, bona dahaka ida ita hahegeregerea diba? (Laulau ginigunana herevalaia.) (b) Edena dala ai Keristani matamata taudia ese unai hekwakwanai idia hanaia diba?

MANI inai oi laloa. Oi be palani oi karaia mai anina bada gauna ta totona gabu daudau ia noho taoni ta dekenai do oi lao. Unai gabu dekenai basi amo oi lao be mai ena daudau. Bona basi naria gabuna ai, pasendia momo bona basi idauidau oi itaia dainai, oi daradara. To, palani oi karaia vadaeni dainai, oi lao gabuna ena basi oi tahua! Oi diba, bema basi kererena oi guia, gabu kererena dekenai do oi ginidae.

² Hari, matamata taudia be unai pasendia momo bamona. Matamata taudia be edia mauri lalonai abia hidi momo idia karaia. Nega haida do idia karaia abia hidi dainai idia daradara. Matamata taudia e, do umui moale bema emui mauri ai abia hidi maorodia umui karaia. Dahaka abia hidi do oi karaia?

³ Inai atikol ese unai henanadai do ia haerelaia, bona matamata taudia do ia hagoadaia edia mauri lalonai Iehova hamoalea daladia idia abia hidi totona. Edia mauri lalonai idia karaia gaudia, hegeregere  sikuli, moni gaukara, famili ena maduna idauidau, bona gau haida ai Iehova idia laloa be namo. Anina be Dirava ena hesiai gaukara lalonai tahua gaudia idia atoa be namo. Dirava idia hesiai henia noho matamata taudia idia abia dae momokani Iehova be idia ia hanamoa bona edia mauri idia moalelaia.​—⁠Aonega Herevadia 16:3 duahia.

4. Inai stadi ai dahaka do ita herevalaia?

⁴ Emu matamata negana ai tiokratik tahua gaudia oi atoa guna karana ese moale ia havaraia. Dahaka dainai? Ita ese badina toi do ita herevalaia. Badina ginigunadia rua ese ia hahedinaraia, Dirava ena hesiai gaukara lalonai tahua gaudia atoa karana ese ta ena hetura karana Iehova ida ia hagoadaia; bona ihatoina ese matamata negana ai tiokratik tahua gaudia oi atoa guna ena namo do ia herevalaia.

5. Dirava ena hesiai gaukara lalonai tahua gaudia atoa karana ena badina badana be dahaka?

⁵ Dirava ena hesiai gaukara lalonai tahua gaudia atoa karana ena badina badana be, Iehova ese ita dekenai ia hahedinaraia lalokau bona ita totona ia karaia gaudia dainai ia ita hanamoa. Salamo torea tauna ia gwau: “Iehova ita hanamoa be namo . . . . Badina be, Iehova e, oi ese emu gaukara amo lau oi hamoalea; emu imana ena gaukara dainai ane lau abia mai egu moale ida.” (Sal. 92:1, 4, BHğ) Matamata taudia e, Iehova ese oi dekenai ia henia gaudia ibounai oi laloa be namo. Hegeregere, emu mauri, hereva momokani, Baibel, kongrigeisen, bona vaira nega ena helaro namona. Dirava tomadiho henia karadia atoa guna karana amo oi hahedinaraia ia henia hahenamo dainai ia oi tanikiu henia bona oi ura ia kahirakahira oi lao.

6. (a) Tahua gaudia atoa karana ese edena dala ai emu hetura karana Iehova ida do ia hanamoa? (b) Oi do matamata lalonai dahaka tahua gaudia haida oi atoa diba?

⁶ Badina iharuana be, bema oi gaukara goada emu tahua gaudia oi hagugurua totona, Iehova ena matanai oi be gaukara namona oi karaia. Unai ese oi ia durua ia kahirakahira oi lao totona. Aposetolo Paulo ia gwau: “Dirava ena kara be ia gageva lasi, ia ese emui gaukara bona iena ladana totona umui hahedinaraia lalokauna, do ia laloaboio lasi.” (Heb. 6:10) Namo lasi oi laloa oi be do maragi dainai tahua gaudia oi atoa diba lasi. Mauri lagani 10 kekenina ladana Christine, be ena lalona ia hadaia hanaihanai abidadama Witnes taudia edia mauri sivaraidia do ia duahia. Mauri lagani 12 merona, Toby, be tahua gauna ia atoa Baibel ena kahana ibounai ia duahia ore murinai bapatiso do ia abia. Mero maragi ta ladana, Maxim ena mauri lagani be 11 bona ena tadina kekeni Noemi be 10 neganai bapatiso idia abia. Idia ruaosi edia tahua gauna be Betele ai do idia gaukara. Unai tahua gauna idia laloatao totona, Betele aplikeisen fom be edia ruma ena haba dekenai idia atoa. Emu tahua gaudia oi diba namonamo, a? Bona unai tahua gaudia oi hagugurua totona oi gaukara goada noho, a?​—⁠Filipi 1:10, 11 duahia.

7, 8. (a) Tahua gaudia atoa karana ese edena dala ai ta ia durua abia hidi maorodia ia karaia totona? (b) Dahaka dainai matamata tauna ta ia ura lasi iunivesiti dekenai ia lao?

⁷ Badina ihatoina be, emu tahua gaudia oi atoa totona, oi karaia abia hidi oi laloa bada be namo. Matamata taudia ese sikuli, moni gaukara, bona gau ma haida dekenai abia hidi idia karaia diba. Abia hidi karana be hegeregere dala rua oi itaia neganai, dala maorona oi abia hidi be namo. Oi ura lao henia gabuna ena dala oi diba dainai, do oi hekwarahi lasi dala maorona abia hidi totona. Unai hegeregerena, bema emu tahua gaudia oi diba, do ia auka lasi abia hidi maorona oi karaia totona. Aonega Herevadia 21:5 (NWT) ia gwau: “Gaukara goadagoada tauna ena palani idia guguru.” Bema emu matamata negana ai tahua gaudia namodia oi atoa, emu palani do ia guguru. Kekeni matamata ta ladana, Damaris, be mai anina bada disisen ta ia karaia neganai unai ia vara.

 ⁸ Damaris be sikuli ai maka namodia ia abia. Reana skolasip ia abia diba bona iunivesiti ai loea ena kosi ia karaia diba, to pat-taim moni gaukara ia abia hidi. Dahaka dainai? Ia gwau: “Egu matamata negana amo egu lalona lau hadaia painia gaukara do lau karaia. Anina be pat-taim gaukara do lau karaia be namo. Bema lau lao iunivesiti bona loea ena kosi amo digri lau abia, reana pei bada moni gaukara do lau abia, to do ia auka pat-taim moni gaukara lau karaia totona.” Damaris be lagani 20 lalonai painia gaukara ia karaia. Ia laloa ia be disisen maorona ia karaia bona unai be tahua gauna namona, a? Ia gwau: “Banika ai lau gaukara dainai hari loea momo ida lau hedavari. Bema loea ena kosi lau karaia idia karaia gaukarana do lau karaia. To, idia momo be edia moni gaukara idia moalelaia lasi. Egu disisen painia totona ese lau ia durua, hari moni gaukara ena lalohekwarahi lau mamia lasi totona bona dala ia kehoa lagani momo lalonai Iehova lau hesiai henia diba.”

9. Dahaka dainai iseda matamata taudia ita hanamoa be namo?

⁹ Tanobada hegegemadai, kongrigeisen tausen momo lalonai idia noho matamata taudia ita hanamoa be namo. Idia be sibona edia ura idia dadaraia bona Iehova hesiai henia totona tahua gaudia idia atoa. Unai bamona matamata taudia be edia mauri idia moalelaia bona idia gaukara goada dala idauidau ai Iehova ena taravatu idia badinaia totona. Sikuli gabuna ai, moni gaukara gabuna ai bona edia ruma bese lalonai Dirava idia badinaia noho. Solomona ia gwau: “[“Iehova,” NW] do oi abidadama henia, mai emu kudouna ibounai.” (Aon. 3:5, 6) Iehova ena matanai, Keristani kongrigeisen ai idia noho matamata taudia be dava bada kohu bamona idia ia laloa bada, lalokau henia, gimaia, hakaua bona hanamoa.

10. (a) Dahaka dainai haroro gaukara ita laloa bada be namo? (b) Edena dala ai emu haroro dalana oi hanamoa diba?

¹⁰ Matamata tauna be ena mauri lalonai Iehova ia hamoalea totona ia ese hesiai gaukara ia laloa bada. Iesu ia hahedinaraia “sivarai namona do idia harorolaia guna be namo.” (Mar. 13:10) Haroro gaukara be mai anina bada dainai, inai gaukara ita laloa bada be namo. Haroro gaukara be emu tahua gauna ai oi halaoa, a? Painia gaukara oi karaia diba, a? To bema emu haroro gaukara oi moalelaia lasi, be edena bamona? Edena dala ai emu haroro dalana oi hanamoa diba? Inai dala rua ese oi do ia durua: Hegaegae namonamo, bona oi hesiku lasi oi dibaia gaudia be ma haida dekenai oi hadibaia totona. Do oi mamia emu haroro gaukara do oi moalelaia bada.

11, 12. (a) Matamata taudia ese dahaka idia karaia diba idia haroro totona? (b) Matamata tauna ta be edena dala ai sikuli ai ia haroro?

¹¹ Reana emu sikuli turadia ese nega momo idia henia henanadai ta ena haere oi tahua. Hegeregere, “Dahaka dainai Dirava oi abidadama henia?” Iseda jw.org websait ai idia noho atikol idauidau ese matamata taudia do ia durua unai henanadai ena haere idia davaria totona. Oi lao BIBLE TEACHINGS > TEENAGERS. Unuseniai, kahana ladana worksheet oi klik bona inai henanadai “Why Do I Believe in God?” oi abia hidi. Inai worksheet ese oi do ia durua unai amo sibona emu haere oi hegaegaelaia diba. Danu idia noho siri toi oi gaukaralaia bona emu abidadama oi herevalaia​—⁠Heberu 3:4, Roma 1:20, bona Salamo 139:14. Inai bamona worksheet idauidau oi gaukaralaia diba henanadai momo edia haere oi hegaegaelaia totona.​—⁠1 Petero 3:15 duahia.

¹² Dala ia kehoa neganai, emu sikuli turadia oi hagoadaia jw.org idia gaukaralaia totona. Mauri lagani 15 mero ta ladana Luca, be unai bamona ia karaia. Ena klas ai tomadiho idauidau idia herevalaia, bona ia itaia edia sikuli textbook lalonai Iehova ena Witnes taudia dekenai idia gwauraia herevadia haida be kerere. Ena be ia hemarai, to ia noinoi bema unai lalohadai kererena ia hamaoromaoroa diba, bona tisa ese ena noinoi ia abia dae. Luca be ia abia dae gaudia sibona ia  herevalaia lasi, to iseda websait be ena klas turadia ibounai dekenai ia hahedinaraia danu. Tisa be stiuden ta ta dekenai homwek ia henia inai katun vidio ladana Sikuli Ai Hahisia Karadia Hanaia Daladia idia itaia totona. Luca be ia moale badina ena klas lalonai ia haroro.

13. Herevana hekwakwanai idia vara to dahaka dainai ita hesiku lasi be namo?

¹³ Herevana nega haida ia auka oi haroro totona, to oi hesiku lasi. (2 Tim. 4:2) Hekwakwanai idia vara neganai, emu tahua gauna oi laloa. Mauri lagani 17 kekeni ta, ladana Katharina, ese iena gaukara turadia ta ta haroro henia karana be ena tahua gauna ai ia halaoa. Nega momo ena gaukara tauna ta ese ia gwauraia dika, to ia gari lasi. Ena be unai hekwakwanai ia davaria to kara namodia ia hahedinaraia noho, unai ese iena gaukara tauna ma ta ladana Hans ena kudouna ia hamarerea dainai, iseda pablikeisen ia duahia, Baibel stadi ia abia dae bona ia bapatiso. Katharina be gabu ma ta dekenai ia lao dainai unai sivarai ibounai ia diba lasi. Katharina ese ia mamia moalena oi laloa. Lagani 13 murinai, ia bona ena famili be Kingdom Hall ai idia helai noho lalonai ia kamonai, pablik tok do ia henia vadivadi tadikakana be Hans! Katharina be haheitalai namona, badina ena tahua gauna ia laloa bada bona ia hesiku lasi ena gaukara turadia ia haroro henidia totona!

14, 15. (a) Matamata taudia haida ese emu lalona idia veria neganai, dahaka do oi karaia? (b) Edena dala ai matamata taudia ese laloani herevadia idia dadaraia diba?

¹⁴ Inai stadi ese oi ia hagoadaia emu mauri ai Iehova hesiai henia gaukarana oi laloa bada totona. Anina be emu mauri ai Iehova hesiai henia tahua gaudia oi atoa. To matamata taudia haida be idia ura sikuli bada idia lao, moni gaukara idia abia bona inai tanobada ena mauri idia moalelaia. Nega haida emu lalona do idia veria unai gaudia oi tahua totona. Namona be idia dekenai oi hahedinaraia oi karaia abia hidi bona oi atoa tahua gaudia be mai anina bada. Namo lasi edia laloani herevadia ese oi idia koua emu tahua gaudia oi hagugurua totona. Mani basi ena haheitalai ita laloa lou. Oi be basi ai do oi guia kava lasi, ena be oi itaia pasendia be basi lalonai idia moale noho.

¹⁵ Matamata taudia edia laloani herevadia oi dadaraia diba. Hegeregere, hahetoho idia havaraia  gaudia oi dadaraia be namo. (Aon. 22:3) Bona sibona oi hadibaia lou, bema hebamo dikadia oi badinaia dika do oi davaria. (Gal. 6:7) Dala ma ta be, oi hahedinaraia heduru oi abia be namo. Bema oi manau, unai ese oi do ia durua emu tama sina bona lo Keristani taudia edia lalohadai oi abia dae totona.​—⁠1 Petero 5:5, 6 duahia.

16. Manau karana ese anina namona ia havaraia ena ekspiriens gwauraia.

¹⁶ Mero matamata ta ladana Christoph, ia manau dainai sisiba maorodia ia abia dae. Ia bapatiso, to daudau lasi murinai eksasais ruma o gym dekenai hanaihanai ia lao. Matamata taudia haida ese ia idia doria spot gadara ta lalonai ia vareai totona. Elda ta dekenai unai ia herevalaia, bena unai tadikaka ese ia hadibaia, abia hidi ia do karaia lasi lalonai, unai spot ese do ia havaraia dika ia lalohadailaia totona, badina kara helulu ena tarapu lalonai ia moru diba. To Christoph be unai spot gadara lalonai ia vareai. Gabeai, ia laloparara unai spot gadara ese dagedage karadia bona mase ia havaraia. Unai dainai elda taudia ia itaia lou bena idia ese Baibel amo ia idia durua. Christoph ia gwau: “Iehova be lau dekenai sisiba taudia namodia ia siaia bona Ia lau kamonai henia, ena be sisiba lau abia dae haraga lasi.” Mai manau ida sisiba namodia oi abia dae, a?

17, 18. (a) Iehova ia ura matamata taudia ese dahaka idia karaia be namo? (b) Dahaka dainai taunimanima badadia idia lalohisihisi bona edena dala ai unai oi hanaia diba? Haheitalai gwauraia.

¹⁷ Baibel ia gwau: “Uhau tauna [o ulato] e, emu matamata negana do oi moalelaia bona emu matamata dinadia ai emu kudouna do ia moale.” (Had. 11:9, NWT) Matamata tauna e, Iehova ia ura oi moale. Inai stadi ese unai moale davaria dalana ta ia herevalaia. Namona be Iehova ena hesiai gaukara lalonai tahua gaudia oi atoa bona emu palani lalonai Iehova oi laloa. Bema emu matamata negana amo unai oi karaia, do oi mamia Iehova be oi ia gimaia, hakaua bona hanamoa noho. Dirava ena Hereva lalonai idia noho hakaua herevadia oi laloa bona inai sisiba herevana oi badinaia: “Emu matamata negana ai, emu Havaraia Tauna Badana oi laloatao be namo.”​—⁠Had. 12:1, NWT.

¹⁸ Ta be do ia matamata hanaihanai diba lasi. Matamata taudia be taunimanima badadia ai idia lao haraga. Madi, taunimanima badadia haida be idia lalohisihisi, badina idia matamata neganai abia hidi kereredia idia karaia bona tahua gaudia namodia idia atoa lasi. To hari matamata taudia be Iehova ena hesiai gaukara lalonai disisen maorodia idia karaia, unai dainai idia tubu daekau noho lalonai edia mauri idia moalelaia. Mirjana ena matamata negana ai, ia dekenai unai ia vara. Ia idia noia tanobada ta ta amo idia mai spot taudia ida do ia gadara helulu, to edia noinoi ia dadaraia bona ful-taim hesiai gaukara ia abia hidi. Lagani 30 lalonai, Mirjana be ena adavana ida ful-taim hesiai gaukarana idia karaia. Ia gwau: “Hairai, hemataurai, siahu bona taga maurina idia ura henia taudia be idia moale diba lasi. Tahua gaudia namodia be, Dirava ena hesiai gaukara karaia karana bona dala idauidau ai taunimanima durua Dirava idia diba totona.”

19. Matamata taudia be edia tahua gaudia namodia amo idia davaria namo oi herevalaia.

¹⁹ Kongrigeisen ai idia noho matamata taudia ita hanamoa be namo, badina herevana hekwakwanai momo idia davaria to idia haheauka bona edia mauri ai Iehova hesiai henia karana idia laloa bada. Matamata taudia ese unai idia karaia totona tahua gaudia idia atoa bona haroro gaukara idia goadalaia. Bona danu edia lalona idia hadaia inai tanobada ena moale karadia ese idia do ia koua lasi edia tahua gaudia idia hagugurua totona. Namona be matamata taudia idia diba edia hekwarahi be mai ena ahuna. Tadikaka bona taihu ese mai lalokau ida idia durudia. Bema idia karaia gaudia ibounai be Iehova ena ura hegeregerena, edia palani ena anina do ia vara.