Heberu ai inai siri ena anina be dala momo ai ita lalopararalaia diba. Henunai idia noho hamomokania gaudia ese ita do ia durua, unai siri ena anina ita lalopararalaia namonamo totona:

1. Salamo ena siri haida mani ita laloa. Siri 12 ai inai hereva “ai” ena anina be siri 12 ia lao 14 ese idia gwauraia hahenamo namodia be kara maoromaoro taudia dekenai ia herevalaia​—⁠idia ura dika amo ‘do ia hamauria’ taudia unai (siri 11). Inai lalohadai be siri 15 ese ia hahedinaraia danu, unai siri ai inai hereva “moale” be nega rua ia gwauraia bona unai ese kara maoromaoro taudia ma ia herevalaia lou​—⁠badina ‘edia Dirava be Iehova.’

2. Inai lalohadai be Baibel ma haida edia hereva Dirava ese iena abidadama taudia totona ia gwauhamatalaia hahenamodia ida ia hegeregere. Inai salamo ese Davida ia abia dae helarona ia hahedinaraia unai be Dirava ese Israela taudia be edia inai taudia amo ia hamauridia murinai, Ia ese ena taunimanima do ia hanamodia bona do idia moale. (Lev. 26:9, 10; Deut. 7:13; Sal. 128:1-6) Hegeregere, Deuteronomi 28:4 ena hereva bamona: “Lohiabada ese natuna momo umui dekenai do ia henia. Emui uma ese edia anina momo do idia havaraia, bona emui boromakau bona mamoe danu be do idia momo herea, Lohiabada ese ia hanamodia dainai.” Bona momokani, Davida ena natuna Solomona ia lohia negana ai, bese ibounai be maino bona mauri namona do idia moalelaia. Danu, Solomona ia lohia neganai idia vara gaudia ese Mesia ena lohia dalana ia laulaulaia.​—⁠1 Kin. 4:20, 21; Sal. 72:1-20.

3. Dokonai, Salamo 144 lalopararalaia karana ese ia hahedinaraia Iehova ena hesiai taudia edia noho hanaihanai helarona ia hahedinaraia goevagoeva​—⁠unai helaro be; Dirava ese kara dika do ia haorea vaitani bona unai murinai, kara maoromaoro taudia be maino ai tanobada dekenai do idia noho ela bona hanaihanai.​—⁠Sal. 37:10, 11.