1, 2. (a) Dahaka dainai aposetolo Paulo ena negai idia noho taudia ese igui hesiai karana bona ura kwalimu idia herevalaia momo? (b) Paulo ese taunimanima ia durua daika amo ura kwalimu korikorina idia abia diba?

KERISTANI taudia ginigunadia edia nega ai idia noho Roma taudia idia laloa edia taravatu ibounai be maoro, edia kota be maoromaoro bona hanaihanai edia ura kwalimu idia badinaia. To Roma Basileiana be mai ena siahu, badina ena gaukara badadia ibounai be igui hesiai taudia ese idia karaia. Unai nega ai, Roma taudia edia popiuleisen amo, 30 pesen bamona be igui hesiai taudia. Unai dainai, taunimanima be igui hesiai karana bona ura kwalimu idia herevalaia momo, Keristani taudia danu.

² Aposetolo Paulo ena revareva lalonai, ura kwalimu ia herevalaia momo. To, iena haroro gaukara ai taunimanima ese idia laloa bada gaudia hegeregere, politikol o taunimanima edia mauri hanamoa gaudia ia herevalaia lasi. Paulo bona ena Keristani tadikaka be unai negai idia noho lohia taudia dekenai idia tabekau lasi, to idia gaukara goada ma haida idia durua, Dirava ena Basileia ena sivarai namona  bona Keriso Iesu ena mauri davalaia boubouna ena namo idia dibaia totona. Paulo ese ena abidadama Keristani taudia dekenai ura kwalimu korikorina ia henia Diravana ia herevalaia. Hegeregere, Korinto Keristani taudia dekenai ena revareva iharuana ai, ia gwau: “Iehova be lauma. Bona Iehova ena lauma helaga ia noho gabudia ibounai, ura kwalimu ia noho.”​—2 Kor. 3:17.

3, 4. (a) Dahaka ia vara dainai Paulo be Korinto 3:17 ai ia noho herevana ia gwauraia? (b) Iehova amo ia mai ura kwalimu ita moalelaia totona, dahaka ita karaia be namo?

³ Paulo ese Korinto taudia dekenai ia siaia revareva iharuana ai, Mose dekenai ia vara gauna ia herevalaia. Mose be Sinai Ororona ai Iehova ena aneru ida ia herevahereva murinai, ororo amo ia diho neganai ena vairana be ia diaridiari noho. Taunimanima be ia idia itaia bona idia gari dainai, Mose ese dabua ta amo ena vairana ia koua. (Eso. 34:29, 30, 33; 2 Kor. 3:7, 13) Paulo ia gwau: “To ta be Iehova dekenai ia giroa neganai, unai dabua ia hekoki.” (2 Kor. 3:16) Paulo ena hereva ena anina be dahaka?

⁴ Vanegai ita stadilaia atikol amo ita diba, Iehova, gau ibounai ia Havaraia Diravana, ia sibona ena ura kwalimu be maoromaoro bona hetoana lasi. Unai ese ia hahedinaraia, Iehova bona “Iehova ena lauma helaga ia noho gabudia ibounai,” ura kwalimu ia noho. To, unai ura kwalimu ena hahenamo ita moalelaia totona, namona be ‘Iehova dekenai ita giroa,’ anina be ia be eda turana korikorina ai ita halaoa. Taunimanima idia noho lasi tanona ai, Israela taudia be Iehova ese idia ia kara henia dalana idia laloa bada lasi. Badina edia kudouna idia ha-aukaia, bona Aigupito amo idia heau mauri murinai sibona edia ura idia laloa bada.​—⁠Heb. 3:8-10.

5. (a) Iehova ena lauma helaga amo ita abia ura kwalimu ese dahaka ia havaraia? (b) Herevana ta be dibura ruma ai ia noho, to Iehova ese ia henia ura kwalimu dainai dahaka ia vara diba? (c) Edena henanadai do ita haerelaidia?

⁵ Iehova ena lauma helaga ese ia havaraia ura kwalimu be igui hesiai amo ta ruhaia karana amo ia idau. Badina taunimanima ese idia karaia diba lasi gaudia be Iehova ena lauma ese ia karaia diba, hegeregere, kara dika bona mase ena igui amo ita ia ruhaia, danu tomadiho koikoi bona ena hahediba kereredia amo ita ia ruhaia diba. (Roma 6:23; 8:2) Unai be moale gauna, ani? Herevana ta be dibura ruma ai ia noho eiava igui hesiai gaukarana ia karaia, to unai ura kwalimu dainai do ia moale diba. (Gen. 39:20-23) Taihu Nancy Yuen bona tadikaka Harold King dekenai unai ia vara. Edia abidadama dainai dibura ruma dekenai idia atodia bona lagani momo lalonai idia noho. Edia ekspiriens be JW Broadcasting ai oi itaia diba. (Oi lao INTERVIEWS AND EXPERIENCES > ENDURING TRIALS.) Namona be sibona ita nanadaia, edena dala ai lau hahedinaraia egu ura kwalimu lau laloa bada? Bona dahaka ita karaia, unai ura kwalimu ita gaukaralaia namonamo totona?

6. Edena dala ai Israela taudia ese idia hahedinaraia Iehova ese ia henia ura kwalimu idia laloa bada lasi?

⁶ Bema ita abia dava bada harihari gauna ta ena namo ita lalopararalaia, unai ese ita do ia durua iseda tanikiu karana ita hahedinaraia totona. Iehova ese Israela taudia be Aigupito amo ia ruhaia neganai idia dekenai ia henia ura kwalimu idia laloa bada lasi. Hua haida murinai, idia ese Aigupito ai idia ania bona inua gaudia idia laloa lou dainai idia ura giroa lou Aigupito dekenai bona Iehova ese ia henia gaudia dekenai idia maumau. Mani oi laloa, idia ese ‘gwarume, kiukamba, meloni, liki, oniani, bona galiki’ idia laloa bada, to Dirava ese ia henia ura kwalimu idia gaukaralaia lasi Dirava momokanina, Iehova, idia tomadiho henia totona. Unai dainai ita gwau diba Iehova be ena taunimanima dekenai ia badu dikadika. (Num. 11:5, 6, 10; 14:3, 4) Unai ese ita dekenai mai anina bada gauna ta ia hadibaia!

7. Edena dala ai Paulo be ena sisiba 2 Korinto 6:1 hegeregerena ia kara, bona edena dala ai ia ita tohotohoa diba?

 ⁷ Aposetolo Paulo ese Keristani taudia iboudiai ia hagoadaia Iehova ese ena natuna, Iesu Keriso amo, ita dekenai ia henia ura kwalimu do ita laloa bada. (2 Korinto 6:1 duahia.) Guna Paulo ia mamia ia be kara dika bona mase ena igui lalonai ia noho dainai ia lalohisihisi. To, mai moale ida ia gwau: “Iesu Keriso, iseda Lohiabada amo Dirava lau tanikiu henia!” Dahaka dainai? Iena Keristani tadikakadia dekenai ia gwau: “Badina lauma helaga ena taravatu ese Keriso Iesu ida idia hakapua taudia dekenai mauri ia henia, unai taravatu ese kara dika bona mase edia taravatu amo umui ia ruhaia.” (Roma 7:24, 25; 8:2) Paulo hegeregerena, Iehova ese kara dika bona mase ena igui amo ita ia ruhaia karana ita laloa bada be namo. Iesu ena mauri davalaia boubouna dainai, Dirava ita hesiai henia diba mai iseda lalomamina goevana bona mai moale ida unai ita karaia diba.​—⁠Sal. 40:8.

8, 9. (a) Iseda ura kwalimu ita gaukaralaia namonamo totona, aposetolo Petero be dahaka sisiba ia henia? (b) Hari dahaka ese iseda ura kwalimu gaukaralaia dalana ia hadikaia diba?

⁸ Danu, iseda ura kwalimu ita laloa bada sibona lasi, to namona be unai ura kwalimu ita gaukaralaia namonamo. Aposetolo Petero be ita ia sisiba henia eda ura kwalimu do ita gaukaralaia lasi iseda tauanina ena ura dikadia ita karaia totona. (1 Petero 2:16 duahia.) Unai sisiba dainai Israela taudia dekenai ia vara gauna oi laloatao, a? Bona hari inai negai, unai sisiba be mai anina bada. Satani bona ena tanobada ese lalona veria gaudia momo idia hahedinaraia, hegeregere dabua hahedokilaia dalana, aniani bona inuinu gaudia, moale karadia bona gau ma haida. Bisinesi taudia ese advataismen ai mai edia hairai taudia idia gaukaralaia, unai amo taunimanima edia lalona idia veria edia kohu idia hoia totona, ena be unai be edia dabu gauna lasi. Bema ita naria namonamo lasi, ita dekenai unai ia vara diba bona iseda ura kwalimu do ita gaukaralaia kerere diba!

⁹ Danu Petero ese ia henia sisiba be mai anina bada ta ena mauri ai, hegeregere edukeisen bona moni gaukara idia abia hidi totona. Hegeregere, hari matamata taudia momo be idia hekwarahi unai amo do idia kwalimu diba sikuli namodia dekenai idia vareai totona. Momo ese idia hadibaia sikuli badadia idia lao neganai, moni gaukara namodia momo do idia davaria, moni momo do idia abia bona taunimanima ese do idia matauraia. Danu, reana infomeisen haida idia henia unai amo idia dekenai idia hahedinaraia haisikuli idia lao taudia be moni gaukara idia davaria lasi, to iunivesiti idia lao taudia be moni gaukara namodia idia davaria. Reana matamata taudia do idia laloa unai abia hidi idia karaia be namo badina unai ese edia mauri do ia durua. To idia bona edia tama sina ese dahaka idia laloatao be namo?

10. Bema ita ura iseda ura kwalimu ita gaukaralaia abia hidi ta ita karaia totona, dahaka ita laloatao be namo?

¹⁰ Haida idia laloa, idia be mai edia ura kwalimu dainai, unai bamona gaudia dekenai sibona abia hidi idia karaia diba bema edia lalona ena mamina ese idia ia kota henia lasi. Reana idia be Paulo ese Korinto dekenai idia noho Keristani taudia ia hamaoroa herevana idia laloa, ia gwau: “Ena be lau be mai egu ura kwalimu, to lau ura lasi ma ta ena lalomamina ese lau ia hahemaoro henia.” (1 Kor. 10:29) Momokani, ita ibounai be mai iseda ura kwalimu abia hidi ita karaia edukeisen bona moni gaukara totona, to namona be ita laloatao iseda ura kwalimu be mai ena hetoana bona ita karaia abia hidi ibounai be mai ena namo bona dika. Unai dainai matamanai Paulo ia gwau: “Gau ibounai be taravatu lasi, to idia ibounai ese namo do idia mailaia lasi. Gau ibounai be taravatu lasi, to idia ibounai ese ita idia hagoadaia lasi.” (1 Kor. 10:23) Unai ese ita ia durua eda mauri ai abia hidi ta ita ura karaia neganai, gau ma haida ita laloa danu be namo unai  amo iseda ura kwalimu ita gaukaralaia namonamo diba mai anina bada gaudia totona.

11. Dahaka dainai Dirava ese ita ia ruhaia?

¹¹ Petero ena sisiba ai ita ia hadibaia iseda ura kwalimu ita gaukaralaia kerere lasi, to danu ita ia hadibaia dala maorona ai ita gaukaralaia. Ita ia hagania namona be “Dirava ena igui hesiai taudia bamona” iseda ura kwalimu ita gaukaralaia. Oibe, Iehova ese Iesu Keriso amo kara dika bona mase ena igui amo ita ia ruhaia, unai amo eda mauri ita gaukaralaia “Dirava ena igui hesiai taudia bamona” ia ita hesiai henia totona.

12. Noa bona ena ruma bese ese ita dekenai dahaka haheitalai namona idia hahedinaraia?

¹² Iseda ura kwalimu ita gaukaralaia namonamo bona inai tanobada ena ura bona tahua gaudia ese ita ia guia lasi totona, eda nega bona goada ita gaukaralaia Dirava ita hesiai henia totona. (Gal. 5:16) Mani Noa bona ena ruma bese ita laloa. Idia be dagedage bona matabodaga tanobadana ai idia noho. To, edia huanai idia noho taudia ese idia karaia gaudia​—⁠hegeregere tauanina ena ura dikadia bona moni bona kohu tahua karana​—⁠idia dadaraia. Edena dala ai unai idia karaia? Idia be Iehova ese ia henia gaukarana dekenai idia bisi, hegeregere lagatoi idia karaia, idia bona animal totona aniani idia haboua, bona taunimanima dekenai abata do ia mai ena sivarai idia hadibaia. Baibel ia gwau: “Noa ese unai bamona ia karaia, Dirava ena hereva ibounai hegeregere.” (Gen. 6:22) Unai dainai Noa bona ena ruma bese be unai tanobada dikana amo idia roho mauri.​—⁠Heb. 11:7.

13. Iehova be ita dekenai dahaka hahegani ia henia?

¹³ Hari, Iehova be ita dekenai dahaka hahegani ia henia? Ita be Iesu ena hahediba taudia dainai, Dirava ese ita dekenai ia henia hahegani be ita diba namonamo. (Luka 4:18, 19 duahia.) Hari, inai nega oromana ena dirava, Satani, ese taunimanima momo edia lalona ia hadiburaia dainai tomadiho koikoi, moni mataganigani henia karana, bona kara dikadia ese idia ia guia. (2 Kor. 4:4) Ita ura Iesu ena haheitalai ita tohotohoa bona taunimanima ita durua Iehova, ura kwalimu ia henia Diravana, idia dibaia bona tomadiho henia totona. (Mat. 28:19, 20)  Momokani, ma haida durua totona be mai ena hekwarahi. Tano ma haida ai, taunimanima be idia ura lasi Dirava idia diba bona ita haroro henidia neganai, idia badu. Ita ta ta sibona ita nanadaia diba, ‘egu ura kwalimu lau gaukaralaia diba Basileia gaukarana lau durua totona, a?’

14, 15. Iehova ena taunimanima ese edia haroro gaukara amo dahaka hahenamo idia itaia? (Laulau ginigunana herevalaia.)

¹⁴ Hari momo idia diba dokona be kahirakahira dainai, edia mauri idia haidaua bona kohu momo lasi maurina idia noholaia bona ful-taim hesiai gaukarana idia karaia. Unai ese ita ia hagoadaia. (1 Kor. 9:19, 23) Haida be edia teritori ai haroro gaukara idia karaia; ma haida be pablisa momo lasi gabudia dekenai idia lao. Lagani 5 gunadia ena ripoti ese ia hahedinaraia, tadikaka taihu 250, 000 bamona be regula painia idia karaia, to hari tanobada hegegemadai painia ibounai be 1,100, 000 bamona. Ita moale badina momo be edia ura kwalimu idia gaukaralaia namonamo noho Iehova idia hesiai henia totona!​—⁠Sal. 110:3.

¹⁵ Dahaka ese inai tadikaka bona taihu ia durua edia ura kwalimu idia gaukaralaia namonamo totona? Mani John bona Judith ita laloa, idia be lagani 30 lalonai tano idauidau ai ful-taim hesiai gaukara idia karaia. Idia laloatao lagani 1977 ai Painia Gaukara Sikuli ia hamatamaia neganai, idia hagoadadia pablisa momo lasi gabudia dekenai idia lao totona. Unai tahua gauna idia hagugurua totona, John ia gwau, ena moni gaukara be nega momo ia haidaua unai amo kohu momo lasi maurina idia noholaia diba. Gabeai, idau tano dekenai idia ginidae neganai, idia mamia Iehova guriguri henia bona ia dekenai tabekau karana ese idia ia durua hekwakwanai idauidau, hegeregere unai tano ena gado, kastom dibaia dalana bona gabu ena siahu bona keru idia haheaukalaia totona. Lagani momo lalonai edia hesiai gaukara ese edena bamona idia ia durua? John ia gwau: “Inai hesiai gaukara hereadaena ai, lau mamia egu nega bona goada lau gaukaralaia namonamo.” Ma ia gwau: “Lau dekenai Iehova be tau korikorina, bona tama lalokauna ta bamona. Hari Iamesi 4:8 ena hereva lau lalopararalaia, ia gwau: ‘Dirava kahirakahira do umui lao bona ia be umui kahirakahira do ia mai.’ Lau diba mauri korikorina lau davaria vadaeni.”

16. Edena dala ai taunimanima tausen momo ese edia ura kwalimu idia gaukaralaia namonamo diba?

¹⁶ Haida be John bona Judith bamona ful-taim hesiai gaukarana idia karaia diba. Ma haida be edia noho dalana hegeregerena nega kwadogina lalonai ful-taim hesiai gaukara idia karaia diba. To, tanobada hegegemadai ai momo idia volantia konstraksen gaukarana idia durua totona. Hegeregere, Warwick, New York ai, eda hedikwota idia ura haginia neganai, tadikaka bona taihu ibounai 27,000 bamona be heduru idia henia. Haida be wiki rua, ma haida be lagani ta bona ma haida be idia noho daudau. Idia momo be sibodia edia ura idia dadaraia, unai amo Warwick ai hesiai gaukara idia karaia diba. Unai be haheitalai namona, badina edia ura kwalimu idia gaukaralaia Iehova, ura kwalimu ia henia Diravana idia hanamoa bona matauraia totona!

17. Vaira nega ai dahaka hahenamo do ita moalelaia bema Dirava ese ia henia ura kwalimu ita gaukaralaia namonamo?

¹⁷ Ita moale badina Iehova ita diba bona ia henia ura kwalimu ita gaukaralaia, tomadiho momokanina ita badinaia totona. Namona be ita karaia abia hidi amo ita hahedinaraia eda ura kwalimu ita laloa bada. Ita ura lasi unai ura kwalimu ita gaukaralaia kerere, to namona be ita gaukaralaia namonamo dala idauidau ai Iehova ita hesiai henia totona. Bema unai ita karaia, vaira nega ai Iehova ese do ia havaraia hahenamo idauidau do ita moalelaia, inai peroveta herevana ia guguru neganai: “Dirava ese ia havaraia gaudia ibounai be dika ena igui amo do ia ruhadia, bona Dirava ena natudia edia ura kwalimu hereadaena do idia abia.”​—⁠Roma 8:21.