1, 2. (a) Dahaka gaudia ese ia hahedinaraia taunimanima be idia hekwarahi noho sibona edia ura idia hagugurua totona? (b) Ena be idia hekwarahi to dokonai dahaka ia vara?

HARI inai negai, momo idia gwau taunimanima ibounai be hegeregere, bona idia be mai edia maoro sibona edia ura idia karaia totona. Tano momo ai, idia ura lasi dagedage karadia, inai heheni karadia, bona ogogami idia vara. To, ma haida idia ura sibona edia lalohadai idia gwauraia hedinarai, abia hidi idia karaia bona sibona idia biagua. Unai dainai gabu ibounai dekenai taunimanima momo be sibona edia ura idia karaia bona edia ura dalana hegeregerena ai edia mauri idia moalelaia.

² To, taunimanima ese unai ura idia hagugurua totona hekwakwanai momo idia havaraia. Momo be noho daladia hanamoa totona eiava politikol karadia dainai protest idia karaia, bona unai ese gwau-edeede bona heiriheiri karadia ia havaraia. To unai ese edia lalohekwarahi ia hamaoromaoroa, a? Lasi. Badina nega momo dika idia davaria bona edia mauri idia haboioa danu. Unai gaudia ibounai ese King Solomona ena hereva ia hamomokania, ia gwau: “Taunimanima haida ese ma haida idia biagua noho, bona idia hisihisi henidia noho.”​—⁠Had. 8:9.

3. Moale korikori bona mauri namona ita davaria totona, dahaka ita karaia be namo?

 ³ Keristani hahediba tauna, Iamesi, be moale korikori bona mauri namona davaria dalana ia herevalaia. Ia gwau: “Taravatu goevadaena, ura kwalimu gauna unai, ia itaia noho bona ia badinaia noho tauna be unai bamona ia karaia dainai do ia moale.” (Iam. 1:25) Iehova, unai taravatu goevana ia henia Diravana, be taunimanima ese moale bona mauri namona do idia davaria dalana ia diba namonamo. Tau bona hahine ginigunana idia moale totona, Iehova ese idia dekenai gau ibounai ia henia​—⁠ura kwalimu korikorina danu.

4. Adamu bona Heva ese edena bamona ura kwalimu idia moalelaia? (Laulau ginigunana herevalaia.)

⁴ Genese karoa 1 bona 2 ita duahia neganai, ita itaia Adamu bona Heva ese idia moalelaia ura kwalimu be hari inai negai taunimanima ese idia ura henia ura kwalimu​—⁠hegeregere sibona abia hidi idia karaia diba, gau ta dekenai idia gari lasi, bona ta ese idia ia dagedage henia lasi. Adamu bona Heva be aniani, moni gaukara, gorere, bona mase idia lalohekwarahilaia lasi. (Gen. 1:27-29; 2:8, 9, 15) To Adamu bona Heva ese idia moalelaia ura kwalimu be mai ena hetoana, a? Mani ita itaia.

5. Taunimanima be dahaka idia karaia be namo, edia ura kwalimu idia moalelaia totona?

⁵ Hari inai negai, taunimanima momo idia laloa ura kwalimu korikorina be, idia sibodia ese abia hidi idia karaia diba, herevana idia diba unai abia hidi ese dika do ia havaraia. Buka ta ladana The World Book Encyclopedia ese ura kwalimu ena anina be inai bamona ia herevalaia, ia gwau, “taunimanima be sibodia edia abia hidi idia karaia diba bona hagugurua diba.” Ma ia gwau: “Taunimanima be idia noho namonamo diba bema gavamani ese hahemaoro maoromaoro taravatudia idia atoa, bona anina lasi taravatudia, eiava ita badinaia diba lasi taravatudia idia atoa lasi.” Unai ese ia hahedinaraia, taravatu haida idia atoa karana be mai anina bada taunimanima ese edia ura kwalimu idia moalelaia totona. To henanadai be inai: Daika sibona be mai ena maoro kara maoromaoro taravatudia, mai anina bada taravatudia bona ita badinaia diba taravatudia ia atoa totona?

6. (a) Dahaka dainai Iehova sibona ena ura kwalimu be hetoana lasi? (b) Taunimanima ibounai ese edena bamona ura kwalimu idia moalelaia diba, bona dahaka dainai?

⁶ Ura kwalimu ita herevalaia neganai, namona be ita laloatao Iehova Dirava sibona ena ura kwalimu be hetoana lasi. Dahaka dainai? Badina ia be gau ibounai ia Havaraia Tauna bona Siahu Ibounai Diravana. (1 Tim. 1:17; Apok. 4:11) King Davida ese ia hahedinaraia Iehova sibona ena lohia dalana be idau momokani bona guba amo gau ibounai ia biagua. (1 Sivarai 29:11, 12 duahia.) Unai dainai, guba bona tanobada ai mauri gaudia ibounai be sibona totona abia hidi idia karaia diba, to edia ura kwalimu be mai ena hetoana. Namona be idia diba Iehova Dirava sibona be mai ena maoro hahemaoro maoromaoro taravatudia, mai anina bada taravatudia, bona ita badinaia diba taravatudia ia atoa totona. Unai be Iehova Dirava ese matamanai tau bona hahine ginigunadia totona ia karaia gauna.

7. Taunimanima be dahaka gaudia haida idia karaia diba idia moale totona?

⁷ Ena be Adamu bona Heva ese edia ura kwalimu be dala idauidau ai idia moalelaia diba, to taravatu haida idia badinaia danu. Unai taravatu haida be Dirava ese idia ia karaia neganai, edia lalona dekenai ia atoa. Hegeregere, iseda tama sina ginigunadia idia diba idia mauri noho totona idia hahodi, aniani, mahuta, bona gau ma haida idia karaia be namo. Unai idia karaia neganai, ia hahedinaraia edia ura kwalimu idia haboioa, a? Lasi, Iehova ia diba hanaihanai unai gaudia idia karaia neganai, do idia moale bona do idia lalohekwarahi lasi. (Sal. 104:14, 15; Had.  3:12, 13) Ita ibounai be lai ena hodahoda namona ita abia, aniani namona ita ania, eiava hanuaboi ai ita laga-ani namonamo neganai, do ita moale, ani? Ita ia biagua o hahekwakwanaia lasi dainai, unai gaudia be mai moale ida ita karaia diba. Adamu bona Heva be unai bamona idia mamia danu.

8. Dirava ese Adamu bona Heva dekenai dahaka hahegani ia henia, bona dahaka dainai?

⁸ Iehova ese Adamu bona Heva ia haganidia bese do idia havaraia, tanobada do idia hahonua bona do idia naria. (Gen. 1:28) Unai hahegani ese sibona abia hidi do idia karaia karana ia koua, a? Lasi! Unai hahegani ia henidia unai amo edia Havaraia Tauna ena ura do idia hagugurua diba, anina be tanobada be paradaiso ai do idia halaoa bona goevadae taudia ese do idia noholaia ela bona hanaihanai. (Isa. 45:18) Hari inai negai, taunimanima haida idia ura lasi headava eiava idia headava to natuna idia havaraia lasi, unai abia hidi be idia sibona ese idia karaia diba bona unai ese Iehova ena ura ia koua lasi. To, taunimanima momo be idia headava bona natudia idia havaraia ena be idia diba ia be mai ena hekwarahi. (1 Kor. 7:36-38) Dahaka dainai? Badina nega haida unai ese idia dekenai moale bona maino ia henia. (Sal. 127:3) Bema Adamu bona Heva ese Iehova ena hahegani idia badinaia edia headava bona famili maurina idia moalelaia diba ela bona hanaihanai.

9. Dahaka dainai Dirava ena hahegani Genese 2:16, 17 ai be maoro, mai anina bada, eiava ita badinaia diba?

⁹ Iehova ese Adamu bona Heva dekenai hahegani ma ta ia henia, danu do idia badinaia lasi ena dika ia herevalaia, ia gwau: “Namo bona dika dibaia auna ena huahua oi ania lasi, badina oi ania dinana ai do oi mase momokani.” (Gen. 2:17, NWT) Unai hahegani be maoro lasi, anina lasi, eiava idia badinaia diba lasi, a? Unai ese Adamu bona Heva edia ura kwalimu ia koua, a? Lasi. To, Baibel idia diba momo taudia ese unai hahegani ena badina bona ena namo idia herevalaia. Hegeregere, diba bada tauna ta ia gwau: “Dirava ena hahegani [Genese. 2:16, 17] ai ese ia hahedinaraia Dirava sibona ia diba dahaka be namo . . . taunimanima totona bona Dirava sibona ia diba dahaka be dika . . . idia totona. Taunimanima ese ‘namo’ idia davaria totona, Dirava idia abidadama henia bona idia kamonai henia be namo. Bema idia kamonai henia lasi, idia do ia rakatania idia sibona ese dahaka be namo . . . bona dahaka be dika idia abia hidi totona.” Unai be maduna metauna badina taunimanima be idia hegeregere lasi sibona abia hidi idia karaia totona.

10. Dahaka dainai ura kwalimu, be namo bona dika abia hidi karana ida ita hahegeregerea lasi?

¹⁰ Taunimanima momo be Iehova ese Adamu dekenai ia henia hahegani idia duahia neganai, reana do idia gwau Iehova be Adamu dekenai maoro ia henia lasi ia ura karaia gaudia dekenai sibona ena abia hidi ia karaia totona. To bema inai bamona idia laloa, idia ese ta ena ura kwalimu ia gaukaralaia ena maoro, bona namo bona dika ia abia hidi karana edia idau be idia lalopararalaia lasi. Adamu bona Heva dekenai unai ura kwalimu ia noho abia hidi do idia karaia Dirava do idia badinaia eiava lasi. To, Iehova sibona be mai ena maoro idia totona dahaka be namo bona dahaka be dika ia abia hidi diba, unai be Eden umana ai ia noho “namo bona dika dibaia auna” ese ia laulaulaia. (Gen. 2:9, NWT) Ita diba lasi ita karaia abia hidi ese anina namona do ia havaraia eiava lasi; bona ita gwau lasi ita karaia abia hidi ibounai ese namo do ia havaraia. Unai dainai nega momo ita itaia taunimanima be mai laloa maoromaoro ida abia hidi o disisen idia karaia, to nega haida unai ese hisihisi, dika badadia, o lalohisihisi ia havaraia. (Aon. 14:12) Taunimanima ese idia karaia gaudia ibounai be mai edia hetoana. Iehova ese Adamu bona Heva dekenai ia henia hahegani amo, ura kwalimu  korikorina gaukaralaia dalana be mai lalokau ida idia ia hadibaia. Edena bamona unai ita diba, bona idia ese unai hahegani idia badinaia, a?

11, 12. Adamu bona Heva edia abia hidi dainai dahaka ia vara? Haheitalai gwauraia.

¹¹ Iseda tama sina ginigunadia be Iehova idia gwau-edeede henia. Satani ese ia gwauraia gwauhamata koikoina be, “emui matana be do idia kehoa, bona umui be Dirava bamona do umui lao, bona namo bona dika do umui diba.” Heva ese unai koikoi herevana ia abia dae. (Gen. 3:5, NWT) Adamu bona Heva be idia karaia abia hidi dainai namo idia davaria, a? Lasi. Idia abia hidi gauna be Satani ese idia dekenai ia gwauraia hegeregerena ia vara lasi. Bona, gabeai idia laloparara Iehova ena taravatu idia dadaraia bona edia ura idia badinaia dainai dika bada idia davaria. (Gen. 3:16-19) Dahaka dainai? Badina Iehova be taunimanima dekenai maoro ia henia lasi idia sibona totona dahaka be namo bona dahaka be dika idia abia hidi totona.​—Aonega Herevadia 20:24; bona Ieremia 10:23 duahia.

¹² Unai sivarai be peleini taria tauna ida ita hahegeregerea diba. Do ia lao henia gabuna dekenai ia ginidae namonamo totona, idia atoa vadaeni peleini ena heau dalana ia badinaia be namo. Ia ese peleini lalonai idia noho tulu idauidau do ia gaukaralaia bona peleini ena roho dalana idia naria taudia ida do ia herevahereva be namo, unai amo ia ura lao henia gabuna ai ia ginidae diba. To, bema peleini taria tauna be unai hakaua herevadia ia badinaia lasi, dika bada ia davaria diba. Unai peleini taria tauna bamona, Adamu bona Heva be idia ura sibodia edia ura idia badinaia. Dirava ese idia dekenai ia henia hakaua herevadia idia dadaraia. Dahaka ia vara? Dika bada ia vara. Idia gwau-edeede dainai idia bona edia natudia dekenai kara dika bona mase idia mailaia. (Roma 5:12) Sibona edia ura idia badinaia dainai, Dirava ese idia dekenai ia henia ura kwalimu korikorina idia haboioa.

13, 14. Edena dala ai ura kwalimu korikorina ita abia diba?

¹³ Taunimanima idia laloa bema ta ese idia ia biagua lasi, edia mauri idia moalelaia diba, to unai ese dika bada ia havaraia. Mani inai oi laloa, bema tanobada ai taravatu ta ia noho lasi, taunimanima  edia mauri be do ia dika momokani, ani? Unai dainai Buka ta ladana, The World Book Encyclopedia, ia gwau: “Orea ta ta ibounai be mai edia taravatu, unai ese idia dekenai ura kwalimu ia henia gau haida idia karaia totona bona idia ia hadibaia gau haida idia karaia lasi totona.” Oibe, unai be taravatu aukana. Taunimanima ese idia torea taravatu bukadia momo mani oi laloa, namona be loea bona diadi taudia ese edia anina idia herevalaia bona taunimanima ese idia badinaia dalana idia gwauraia hedinarai.

¹⁴ Iesu Keriso ese ita dekenai ura kwalimu korikorina ita abia dalana ia hadibaia Ia gwau: “Bema egu hereva umui badinaia, umui be momokani egu hahediba taudia, bona umui be hereva momokani do umui diba, bona hereva momokani ese umui do ia ruhaia.” (Ioa. 8:31, 32) Iesu ese unai ura kwalimu abia daladia rua ia gwauraia: Ginigunana be, ita dekenai ia hadibaia hereva momokani ita abia dae, bona iharuana be iena hahediba tauna ai ita lao. Bema unai ita karaia, ura kwalimu korikorina do ita moalelaia. Edena dala ai? Iesu ma ia gwau: “Kara dika idia karaia taudia ibounai be kara dika ena igui hesiai taudia. . . . Bema Natuna ese umui ia ruhaia, umui do ia ruhaia momokani.”​—Ioa. 8:34, 36.

15. Dahaka dainai Iesu ese ia gwauhamatalaia ura kwalimu korikorina ese ita do ia “ruhaia momokani”?

¹⁵ Ia hedinarai goevagoeva, Iesu ese iena hahediba taudia dekenai ia gwauhamatalaia ura kwalimu korikorina be hari taunimanima ese idia tahua gauna ia hereaia. Iesu ia gwau: “Bema Natuna ese umui ia ruhaia, umui do ia ruhaia momokani,” ena hereva ena anina be ia ese “kara dika ena igui hesiai” amo taunimanima do ia ruhaia. Kara dika ese ita ia koua dainai ia auka kara maoromaoro ita karaia o kara dika ita dadaraia totona. Unai dainai ita be kara dika ena igui hesiai taudia, bona unai ese badu, lalohisihisi, hisihisi bona mase ia havaraia. (Roma 6:23) Aposetolo Paulo be unai bamona hisihisi ia mamia danu. (Roma 7:21-25 duahia.) Kara dika do ia ore momokani neganai, iseda tama sina ginigunadia ese guna idia haboioa ura kwalimu korikorina do ita abia lou.

16. Edena dala ai, Iesu ese ita do ia ruhaia momokani?

¹⁶ Iesu ese ia gwauraia herevana, “bema egu hereva umui badinaia” ese ia hahedinaraia, ita ia ruhaia dainai, ia atoa taravatudia ita badinaia be namo. Ita be Iesu ena hahediba taudia dainai, sibona eda ura ita dadaraia bona Keriso ena hakaua herevadia ita badinaia. (Mat. 16:24) Iesu ia gwauhamata hegeregerena, vaira negai, iena mauri davalaia boubouna ese do ia mailaia hahenamo ita abia neganai, ita do ia ruhaia momokani.

17. (a) Dahaka ese ita dekenai moale korikori bona mauri mai ena anina ia henia diba? (b) Stadi gabena ai dahaka do ita herevalaia?

¹⁷ Ita be Iesu ena hahediba taudia dainai, ena hadibaia herevadia ita badinaia neganai, unai ese ita dekenai moale korikori bona mauri mai ena anina do ia havaraia. Unai ese kara dika bona mase ena igui amo ita ia ruhaia dalana ia kehoa. (Roma 8:1, 2, 20, 21 duahia.) Stadi gabena ai, do ita itaia edena dala ai iseda ura kwalimu do ita gaukaralaia namonamo, unai amo Iehova, ura kwalimu ia henia Diravana, ita hanamoa diba ela bona hanaihanai.