Winston, mani ai oi hamaoroa edena dala ai Dirava oi dibaia?

Lau be Australia Queensland ai tomadiho idia laloa bada lasi ruma besena ta ai lau tubu daekau. Emai noho gabuna be taoni amo ia daudau. Egu mauri lagani be 12 neganai, lau ura Dirava lau dibaia. Ia lau guriguri henia bona ia lau noia lau ura iena hereva momokani lau diba. Daudau lasi murinai emai fam lau rakatania bona South Australia Adelaide dekenai moni gaukara ta lau davaria. Sydney ai egu holidei lau abia noho lalonai, Pam ida ai hedavari, unai negai egu mauri lagani be 21. Ia ese lau dekenai British-Israel ena tomadiho oreana ta ena sivarai ia gwauraia, bona ia gwau unai orea be Israela besena amo ia matamaia. Unai tomadiho oreana ia gwau unai bese be not-kahana ena basileia ena iduhu ten, bona unai bese be lagani 800 B.C.E. ai igui hesiai gaukara idia karaia. Adelaide dekenai lau giroa lou neganai, egu gaukara turana ida lau herevalaia, unai negai ia be Iehova ena Witnes taudia ida Baibel ia stadilaia matamaia. Hora momo lalonai ia ida lau herevahereva murinai​—Witnes taudia ese idia abia dae gaudia ai herevalaia momo​—lau laloparara lau maragi neganai lau gwauraia guriguri ena haere lau abia. Egu Havaraia Tauna bona iena Basileia ena hereva momokani lau dibaia! Lau ese “dava bada pel nadi” lau davaria vadaeni.​—Mat. 13:45, 46.

Pam oi danu oi maragi neganai unai dava bada pel nadi oi tahua. Edena dala ai oi davaria?

Lau be New South Wales, Coffs Harbour ena taoni ta ai lau tubu daekau. Egu tama sina bona egu tubuna tau bona hahine be British-Israel ena tomadiho oreana edia hahediba herevadia idia abia dae. Lau, egu tadina merona, egu kakana bona egu kasin haida be British ena tomadiho  amo ai abia dae Dirava be British taudia sibona ia ura henidia. To, unai hahediba herevadia lau abia dae lasi bona lau mamia lau be Dirava kahirakahira lau lao lasi. Egu mauri lagani be 14 neganai emai gabu dekenai idia noho dubu idauidau hegeregere, Anglican, Baptist, bona Seventh-day Adventist dekenai lau lao. To unai ese lau ia durua lasi Dirava lau dibaia totona.

Gabeai, egu ruma bese ida emai noho gabuna ai haidaua bona Sydney dekenai ai lao, unuseniai Winston lau hedavari henia, ia be unuseniai ena holidei ia abia. Matamanai lau gwauraia bamona, tomadiho gaudia ai herevalaia dainai Winston be Witnes taudia ida ia stadi matamaia. Ai ruaosi ai turana lalonai lau dekenai ia siaia revareva ai siri momo ia torea. Matamanai lau be unai revareva lau ura henidia lasi. To gabeai lau laloparara unai revareva amo Dirava lau dibaia matamaia.

Lagani 1962 ai, Adelaide dekenai lau lao, bona lau noho gabuna be Winston ena noho gabuna kahirakahira. Dala ia karaia dainai lau be Witnes headava tau bona hahine Thomas bona Janice Sloman ida lau noho​—idia be guna Papua New Guinea ai misinari gaukara idia karaia. Unai negai egu mauri lagani be 18, to idia ese lau idia naria namo herea, bona lau idia durua bada Dirava lau dibaia totona. Unai dainai Dirava ena Hereva lau stadilaia matamaia bona hereva momokani lau dibaia. Lau bona Winston ai headava murinai, maoromaoro Iehova ai hesiai henia matamaia​—unai hesiai gaukara ai karaia herevana hahetoho ai davaria to ai dekenai unai dava bada pel nadi laloa bada karana be mai anina bada.

Winston, mani ai oi hamaoroa Iehova oi hesiai henia matamaia neganai dahaka ia vara?

Lau bona Pam ai headava bona daudau lasi murinai, Iehova amo asainmen idauidau ai abia. (1 Kor. 16:9) Tadikaka Jack Porter, ia be emai kongrigeisen ai sekit naria tauna, ese ai dekenai emai asainmen ginigunana ia henia. (Hari ia be Australasia Brens Komiti ena memba ta.) Jack bona ena adavana Roselyn ese ai idia hagoadaia regula painia gaukara ai karaia totona bona unai gaukara be lagani faiv lalonai ai moalelaia. Egu mauri lagani be 29 neganai, lau bona Pam idia hamaoroa ai be South Pacific motumotu ibounai dekenai, sekit gaukara do ai karaia, unai motumotu ibounai be Fiji brens ofesi ena naria henunai ia noho. Unai motumotu be American Samoa, Samoa, Kiribati, Nauru, Niue, Tokelau, Tonga, Tuvalu, bona Vanuatu.

Unai negai, motumotu haida ai idia noho taudia be Iehova ena Witnes taudia dekenai idia daradara, unai dainai ai naria namonamo bona ai aonega be namo. (Mat. 10:16) Motumotu ai noho gabuna davaria totona be ia auka bona unuseniai tadikaka taihu be momo lasi. Unai dainai hanua taudia ai noia bema ia hegeregere idia ida ai noho, bona idia ese ai idia abia dae.

Winston, oi be hahanaia gaukarana oi ura henia, mani ai oi hamaoroa edena dala ai unai gaukara oi karaia?

Unai negai, Tonga ai idia noho tadikaka dekenai be Tonga gado buklet bona pepapepa haida sibona idia noho​—unai gado be Polynesian gado. Haroro gaukara ai English gado stadi bukana, The Truth That Leads to Eternal Life idia gaukaralaia. Unai dainai hua ta lalonai elda sikuli ai abia neganai, unai gabu ai idia noho elda toi, idia be English gado idia diba sisina be idia lalotamona Truth bukana be Tonga gado dekenai do ai hahanaia. Ai hahanaia bukana be Pam ese ia torea bona United States brens dekenai ai siaia lao idia printaia totona. Wiki eit lalonai unai buka ai hahanaia. Herevana ai hahanaia namonamo lasi, to unai buka ese Tonga taudia momo ia durua hereva momokani idia dibaia totona. Lau bona Pam be hahanaia gaukara ai diba namonamo lasi, to unai ese ai ia durua unai gaukara ai laloa bada totona.

Pam, motumotu ai oi noho ena mauri bona Australia ai oi noho ena mauri be edena dala ai ia idau?

Motumotu ai noho ena mauri be idau momokani! Herevana edeseniai ai noho, to gabu momo ai inai gaudia ai haheaukalaia, hegeregere, namo (mosquitoes), dina ena siahu, bita, gorere bona nega haida emai aniani ia hegeregere lasi. To, dina ibounai ai emai haroro gaukara ai karaia murinai,  Samoa gado dekenai idia gwauraia fale​—ia be patapata bamona to ia be mai ena guhi bona haba be lasi​—dekenai ai giroa lou bona ai laga-ani neganai davara ai itaia diba. Hanuaboi haida ai, hua ia diari neganai, niu audia ai itaia diba bona ai itaia hua ena diari ese davara ia hadiaria. Unai bamona negadia ese ai idia hagoadaia ai laloa dobu bona ai guriguri, bona ai karaia diba gaudia sibona ai laloa.

Natu maragidia ai ura henia bada, edia hebamo karana ai moalelaia bada bona nega haida ai idia raraia auka. Niue motumotu ai vadivadi neganai, mero maragina ta ese Winston ena imana ia dogoatao bona ia gwau: “Emu imana ena huina lau ura henia.” Momokani, unai be ena nega ginigunana unai bamona tauna ta ia itaia bona ia diba lasi edena bamona do ia gwauraia!

Taunimanima edia noho dalana ai itaia neganai ai hebogahisi bada, badina idia momo be ogogami taudia. Edia noho gabuna be mai hairai to idia gorere neganai hospital be lasi bona idia inua ranu be ia goeva lasi. To iseda tadikaka taihu be unai gaudia idia lalohekwarahilaia lasi. Idia dekenai unai be edia noho dalana. Idia moale badina edia ruma bese ida idia noho, idia dekenai tomadiho gabuna ta ia noho bona Iehova tomadiho henia karana be hahenamo badana ta. Edia haheitalai ese ai ia durua gau tamona sibona ai laloa bona kohu momo ai tahua lasi totona.

Pam, umui be motumotu ai umui noho neganai, oi sibona ese ranu oi abia bona oi nanadu karana be edena dala ai oi manadalaia?

Lau moale badina lau maragi neganai egu tamana ese lau ia hadibaia. Ia ese ai dekenai idia noho gaudia amo lau ia hadibaia, hegeregere, lahi karaia bona aniani nadua dalana. Nega ta Kiribati dekenai ai vadivadi neganai, ai noho rumana ena guhi be ava amo idia karaia, bona ia be miri latanai idia haginia, danu baubau amo haba idia karaia. Aniani lau nadua totona, miri ai guri ta lau geia bona niu ena bunu (coconut husk) amo lahi lau karaia. Ranu abia totona, hanua hahinedia danu lau gini bona naria. Guri ai ranu abia totona, idia ese au latana ta ena lata be 2 mita bamona bona varo ta idia kwatua unai au ena dokona kahana ai, iena toana be kimai auna bamona. Unai varo ai baketi maragina ta idia atoa. Bena hahine ta ta be guri lalonai au latana mai ena baketi idia negea diho neganai, maoromaoro baketi be ranu ia abia. Lau laloa unai be auka lasi. To nega momo unai baketi lau negea diho neganai, ia be ranu ataiai ia noho sibona to ranu ia abia lasi. Hahine ibounai be unai idia itaia neganai, lau idia kirikirilaia, to gabeai hahine ta be lau ia durua. Unuseniai idia noho taudia be hanaihanai ai idia durua.

Umui ruaosi be motumotu ai emui hesiai gaukara umui moalelaia. Umui moalelaia gaudia haida umui ura gwauraia hedinarai, a?

Winston ia gwau: Lagani haida murinai motumotu ai noho dalana ai manadalaia. Hegeregere, aniani negana ai tadikaka taihu be ai dekenai aniani ibounai do idia henia. Matamanai, ai laloa unai aniani ibounai be ai totona idia henia. Unai dainai idia henia aniani ibounai ai ania haorea! To gabeai ai idia hadibaia idia henia aniani be ma haida ese do idia ania danu. Ena be nega haida ai kerere to tadikaka taihu be unai idia lalopararalaia. Bona idia moale badina ai be hua siks murinai edia kongrigeisen ai vadivadi henia diba. Unai nega ai lau bona Pam sibona be unai motumotu edia kongrigeisen ibounai ai vadivadi henia.

Emai vadivadi karana dainai unai gabu ai idia noho taudia be sivarai namona idia kamonai diba. Hanua taudia momo idia laloa Witnes taudia edia tomadiho be idia sibona ese idia hamatamaia tomadiho ta. Tadikaka bona taihu ese hanua taudia idia hamaoroa Witnes taudia be tanobada ena kahana ibounai dekenai idia noho, to hanua taudia be unai idia abia dae lasi. To lau bona Pam be motumotu dekenai ai lao neganai, hanua taudia be idia hoa bada bona unai nega amo idia hamomokania Witnes taudia edia orea lalonai taunimanima be ta ta idia laloa bada.

Pam ia gwau: Kiribati dekenai ia vara gauna ta lau laloatao. Unai motumotu ai ia noho kongrigeisen ta lalonai tadikaka bona taihu be momo lasi. Elda ta, Itinikai Matera ese ai ia naria namo herea. Nega ta, basket ta lalonai egg ta ia udaia bona  ia abia mai. Ia gwau: “Inai be oi totona.” Unai negai kokoroku edia egg davana be bada dainai nega momo ai abia lasi. To tadikaka ese ai dekenai ia hahedinaraia kara namodia do ai laloaboio lasi.

Pam, lagani haida murinai emui beibi ia mase. Dahaka ese oi ia durua unai oi haheaukalaia totona?

Lagani 1973 ai South Pacific motumotudia dekenai ai do noho neganai lau rogorogo. Unai dainai Australia dekenai ai giroa lou. Hua foa murinai emai beibi ia mase. Lau bona Winston be ai lalohisihisi bada. Hanaihanai unai lau laloa bona lau lalometau, to April 15, 2009, ena Gima Kohorona lau duahia neganai, lau ia hagoadaia. Unai magasin ai ia noho atikol ladana, “Duahia Taudia Edia Henanadai” kahana ai ia noho henanadai, “bema beibi ta be sinana ena bogana lalonai ia mase, do ia toreisi lou, a?” lau duahia. Unai magasin ena kahana ai duahia neganai, ai diba Iehova be ia diba dahaka do ia karaia bona ia karaia gaudia ibounai be dala maorona ai do ia karaia. Inai tanobada ai ita davaria hisihisi ibounai do ia kokia bona iena Natuna do ia gaukaralaia “Diabolo ena gaukara ibounai ia haorea momokani” totona. (1 Ioa. 3:8) Unai magasin ena atikol ese ai ia durua unai amo ai diba Iehova ena taunimanima ese idia davaria “pel nadi” be dava bada gauna! Bema Basileia ena helaro ai diba lasi, reana ai be Iehova do ai hesiai henia lasi.

Emai beibi ia mase bona daudau lasi murinai, ful-taim hesiai gaukara ai karaia lou. Hua haida lalonai Australia ena brens dekenai ai gaukara bona gabeai sekit gaukara ai karaia lou. Lagani foa lalonai New South Wales bona Sydney ena taoni maragidia ai emai hesiai gaukara ai karaia murinai, lagani 1981 ai, ai idia boiria lou Australia brens ofesi dekenai ai gaukara totona.

Winston, oi laloa South Pacific motumotu ai emu hesiai gaukara ese oi ia durua Australasia Brens Komiti gaukarana oi karaia totona, a?

Oibe, dala idauidau ai lau ia durua. Ginigunana be, guna Australia brens be American Samoa bona Samoa edia tiokratik gaukara idia naria. Bena gabeai New Zealand brens ofesi be Australia brens ofesi ida idia hatamonaia. To hari, Australasia brens ese inai Pacific motumotu edia brens ofesi idia naria, hegeregere, Australia, American Samoa bona Samoa, Cook Islands, New Zealand, Niue, Timor-Leste, Tokelau, bona Tonga. Lau moale badina unai brens ofesi momo lau vadivadi henia vadaeni. Unai motumotu ai idia noho tadikaka taihu ida gaukara hebou karana ese lau ia durua bada, unai dainai hari Australia brens ofesi amo idia lau durua diba.

Momokani, lau bona Pam emai ekspiriens amo lau diba, taunimanima badadia sibona lasi, to matamata taudia danu idia ura “dava bada pel nadi” Dirava dibaia karana unai idia diba. Herevana edia ruma bese taudia be hereva momokani lalonai idia noho lasi. (2 Kin. 5:2, 3; 2 Siv. 34:1-3) Iehova be lalokau Diravana bona ia ura ita ibounai, buruka bona matamata taudia ese mauri hanaihanai idia abia!

Lagani 50 gunanai lau bona Pam be Dirava ai dibaia neganai ai diba lasi ai be inai bamona dala ai ia do ai hesiai henia. Basileia ena hereva momokani be dava bada pel nadi bamona! Emai lalona ai hadaia unai dava pel nadi do ai dogoatao auka noho!