1. Efeso 6:10-13 ena hereva bamona, edena dala ai Iehova be mai lalokau ida ita ia laloa? Gwauraia hedinarai.

IEHOVA ese mai lalokau ida ita ia laloa dalana ta be, ita ia durua iseda inai taudia ita dadaraia totona. Iseda inai taudia be Satani bona ena demoni. Iehova ese iseda inai taudia dadaraia daladia ia hadibaia bona ita ia hamaoroa namona be iseda inai taudia dainai ita naria namonamo. (Efeso 6:10-13 duahia.) Iehova ena heduru ita abia dae bona ia ita abidadama henia momokani neganai, ita ese Diabolo ita halusia diba. Paulo ena abidadama karana ita tohotohoa diba, ia gwau: “Bema Dirava be iseda kahanai, daika ese ita do ia tuari henia?”​—Roma 8:31.

2. Inai atikol ai dahaka do ita herevalaia?

² Ita be Keristani taudia momokanidia dainai, namo lasi Satani bona ena demoni dainai ita laloa momo. To, namona be Iehova bona iena hesiai gaukara idauidau dibaia daladia ita laloa bada. (Sal. 25:5) To, namona be Satani ena koikoi karadia ita dibaia danu. Dahaka dainai? Unai amo ia ese ita do ia koia lasi. (2 Kor. 2:11) Satani bona ena demoni ibounai ese taunimanima idia koia dalana be inai atikol ese do ia herevalaia. Bona, ita ese edia koikoi karadia do ita dadaraia daladia do ita herevalaia danu.

3-4. (a) Meamea karadia ena anina be dahaka? (b) Edena dala ai tanobada hegegemadai meamea karadia be idia bada idia lao noho?

³ Satani bona iena demoni be meamea karadia idia gaukaralaia unai amo taunimanima idia koia. Meamea karadia idia karaia taudia idia laloa idia be taunimanima ese idia diba lasi gaudia idia diba bona biagua. Hegeregere, haida idia laloa idia ese vaira nega o ta ena mauri lalonai ia vara gaudia idia gwauraia diba.  Bona ma haida be idia karaia gaudia amo idia hahedinaraia idia be mase taudia idia hereva henia bamona. Haida be meamea karadia idia gaukaralaia ta idia hadikaia o ta dekenai gorere idia havaraia totona. *

⁴ Edena dala ai tanobada hegegemadai meamea karadia be idia bada idia lao? Tahua gaukara ta ai, Latin America bona Caribbean ena tano 18 ai idia davaria, taunimanima toi toi amo idia ta ta be meamea karadia idia abia dae bona momo idia laloa demoni ida idia herevahereva diba. Danu Africa ena tano 18 ai tahua gaukara idia karaia. Idia davaria, taunimanima rua rua amo idia ta ta be meamea karadia idia abia dae. Momokani herevana edeseniai ita noho, to namona be meamea karadia dainai ita naria namonamo. Badina Satani be “tanobada ibounai ia hakaua kerere noho.”​—Apok. 12:9.

5. Iehova ese meamea karadia be edena bamona ia laloa?

⁵ Iehova be “kara momokani ena Dirava.” (Sal. 31:5) Unai dainai ia ese meamea karadia be edena bamona ia laloa? Ia inai henia momokani! Iehova ese Israela taudia dekenai ia gwau: “Umui ese emui natudia be lahi dekenai do umui gabua lasi. Meamea kara do umui karaia lasi, puripuri bona vada danu do umui karaia lasi. Puripuri gaudia danu do umui gaukaralaia lasi, bona mase taudia edia laumadia dekenai do umui nanadaia lasi, bona idia danu do umui herevahereva lasi. Lohiabada, emui Dirava ese unai bamona kara bodaga idia karaia taudia ia badu henia noho.” (Deu. 18:10-12) Keristani taudia be Iehova ese Israela taudia dekenai ia henia Taravatu henunai idia noho lasi. To ita diba, idaunegai ema bona hari Dirava be meamea karadia ia inai henia momokani.​—Mal. 3:6.

6. (a) Edena dala ai Satani ese meamea karadia amo taunimanima ia hagaria? (b) Hadibaia Tauna 9:5 ena hereva bamona, Baibel ena hereva momokani be dahaka?

⁶ Iehova be ita ia hadibaia meamea karadia dainai ita naria namonamo, badina ia diba Satani be unai ia gaukaralaia taunimanima ia hadikaia totona. Satani be meamea karadia amo iena koikoi karadia ia hahedinaraia​—hegeregere taunimanima idia mase neganai gabu ma ta dekenai idia mauri noho. (Hadibaia Tauna 9:5 duahia.) Danu Satani ese meamea karadia amo taunimanima ia hagaria bona idia gari dainai Iehova idia abidadama henia lasi. Satani ia ura meamea karadia idia karaia taudia be demoni idia gari henidia, bona Iehova idia abidadama henia lasi.

7. Iehova ese ita dekenai dahaka ia hadibaia?

⁷ Paragraf ginigunadia ai ita herevalaia bamona, Satani bona ena demoni edia koikoi karadia dadaraia daladia be Iehova ese ita dekenai ia hadibaia. Satani bona ena demoni ita tuari henia daladia mani ita herevalaia.

8. (a) Edena dala ai Satani bona ena demoni edia koikoi herevadia ita dadaraia diba? (b) Edena dala ai Salamo 146:4 ese Satani ena hahediba herevadia ia hakoikoia?

⁸ Dirava ena Hereva duahia bona laloa dobu. Unai ita karaia neganai, ita ese Satani bona ena demoni edia koikoi karadia ita dadaraia diba. Dirava ena Hereva be tuari kaia bamona, unai dainai ita duahia bona laloa dobu neganai Satani ena koikoi herevadia ita dibaia. (Efe.  6:17) Hegeregere Satani ena koikoi herevana ta be, mase taudia be mauri taudia ida idia herevahereva diba. (Salamo 146:4 duahia.) Baibel ese ita ia hadibaia Iehova sibona ese vaira negai do idia vara gaudia ia gwauraia diba. (Isa. 45:21; 46:10) Bema hanaihanai Dirava ena Hereva ita duahia bona laloa dobu, unai ese ita do ia durua Satani bona ena demoni edia koikoi herevadia ita dadaraia bona inai henia momokani.

9. Edena bamona meamea karadia ita dadaraia be namo?

⁹ Meamea karadia iboudiai lalonai oi vareai lasi. Ita be Keristani taudia momokanidia dainai, meamea karadia idauidau lalonai ita vareai lasi. Hegeregere, namo lasi meamea taudia ita tahua o dala ma ta amo mase tauna ita hereva henia. Stadi atikol 16 ai ita herevalaia bamona, fineral ena kastom karadia haida ita dadaraia, badina unai bamona kastom karadia ese idia hahedinaraia mase taudia be gabu ma ta dekenai idia mauri noho. Bona ita be vaira nega ai do idia vara gaudia dibaia totona, hisiu stadilaia taudia o vaira negana gwauraia babalau taudia dekenai ita lao lasi. (Isa. 8:19) Ita diba unai gaudia ibounai be Satani bona ena demoni amo idia mai bona ita idia hadikaia diba.

10-11. (a) Keristani taudia ginigunadia haida be hereva momokani idia dibaia neganai dahaka idia karaia? (b) Korinto Ginigunana 10:21 ena hereva bamona, dahaka dainai Keristani taudia ginigunadia edia haheitalai ita tohotohoa bona edena dala ai unai ita karaia diba?

¹⁰ Meamea karadia idia hahedinaraia kohudia oi gabua. Keristani ginigunadia edia negai, Efeso ai idia noho taudia haida be meamea karadia idia karaia. Hereva momokani idia dibaia neganai, karaharaga gau ta idia karaia. Baibel ia gwau: “Meamea karadia idia karaia taudia momo be edia buka idia haboua bona taunimanima ibounai vairanai idia gabua.” (Kara 19:19) Unai taudia idia ura bada Satani bona ena demoni idia dadaraia momokani. Idia gabua bukadia be dava bada bukadia. Unai buka ibounai be idia hoihoilaia lasi o haida dekenai idia henia lasi, to ibounai idia gabua ore. Badina idia ura Iehova idia hamoalea, to unai buka ibounai edia davana idia laloa lasi.

 ¹¹ Edena dala ai Keristani taudia ginigunadia edia haheitalai ita tohotohoa diba? Aonega karana be, meamea karadia totona idia gaukaralaia gaudia ibounai ita gabua. Unai bamona gaudia haida be inai: Taunimanima idia laloa Satani bona ena demoni amo sibona gimaia totona, idia dekenai idia noho gauna ta o ageva eiava imana ai idia kwatua au bamona gauna ta bona gau ma haida.​—1 Korinto 10:21 duahia.

12. Moale karadia ita abia hidi neganai, ita sibona dekenai edena henanadai ita henia diba?

¹² Emu moale karadia oi sekea namonamo. Oi sibona oi nanadaia: Lau be meamea karadia lalonai idia gaukaralaia bukadia, magasin o intanet ai idia noho atikol lau duahia, a? Lau kamonai miusiki, TV ai idia halasia muvi bona program o lau gadaralaia vidio games be edena bamona? Unai gaudia ese meamea karadia idia hahedinaraia, a? Ita kamonai, duahia bona itaia muvi ese vampire, zombies, o magic bamona gaudia idia hahedinaraia, a? Moale karadia ai unai gaudia ese meamea karadia bona herevadia idia hahedinaraia, a? Momokani, gori sivaraidia idia hahedinaraia muvi haida be meamea karadia idia hahedinaraia. Emu moale karadia oi sekea neganai, namona be abia hidi maorona oi karaia, badina unai ese oi do ia durua Iehova ese ia inai henia karadia ibounai oi dadaraia totona. Ita ura Dirava vairanai “lalomamina goevana” ita abia.​—Kara 24:16. *

13. Dahaka ita karaia lasi be namo?

¹³ Haida dekenai demoni edia sivarai herevalaia lasi. Ita ura Iesu ena haheitalai ita tohotohoa. (1 Pet. 2:21) Iesu be tanobada ai ia do mai lasi neganai Satani bona ena demoni edia kara ia diba namonamo. To ia be Satani bona  ena demoni ese idia karaia gaudia ia herevalaia lasi. Iesu ia ura taunimanima dekenai Iehova ena sivarai ia herevalaia, to Satani ena sivarai lasi. Namona be Iesu ita tohotohoa, Satani bona ena demoni ese idia karaia gaudia edia sivarai be taunimanima dekenai ita herevalaia lasi. To, iseda hereva amo ita hahedinaraia ita ura “hereva namo herea,” hereva momokani unai, ita herevalaia.​—Sal. 45:1.

14-15. (a) Dahaka dainai Satani bona ena demoni dainai ita gari lasi be namo? (b) Dahaka ese ia hahedinaraia hari inai negai Iehova be ena taunimanima ia gimaia noho?

¹⁴ Satani bona ena demoni dainai ita gari lasi. Inai tanobada dikana lalonai ita noho dainai ita dekenai gau dikadia idia vara diba. Ita diba lasi negadia ai, aksiden ita davaria, ita gorere o ita mase diba. To namo lasi ita laloa unai gaudia be Satani bona ena demoni ese idia havaraia. Baibel ese ia hahedinaraia, “nega dika idia davaria noho, bona inai dika ia vara kava noho.” (Had. 9:11) Iehova ese ia hahedinaraia vadaeni, iena siahu ese demoni edia siahu ia hereaia momokani. Hegeregere, Dirava ese Satani ia hamaoroa Iobu do ia hamasea lasi. (Iobu 2:6) Mose ena negai, Iehova ese ia hahedinaraia iena siahu ese Aigupito ena meamea taudia edia siahu ia hereaia. (Eso. 8:18; 9:11) Iehova ese Iesu dekenai siahu ia henia dainai guba amo Satani bona ena demoni ia kokidia bona tanobada dekenai ia negedia diho. Bona vaira negai, Iesu ese guri dobu masemase lalonai Satani bona ena demoni do ia negedia diho unai amo taunimanima do idia hadikaia lou lasi.​—Apok. 12:9; 20:2, 3.

¹⁵ Hamomokania gaudia momo ese idia hahedinaraia hari inai negai Iehova be iena taunimanima ia gimaia noho. Mani inai oi laloa. Ita be tanobada hegegemadai hereva momokani ita harorolaia bona hadibaia noho. (Mat. 28:19, 20) Unai amo ita ese taunimanima dekenai Diabolo ena koikoi karadia ita gwauraia hedinarai. Bema Satani ena siahu be bada, ia ese iseda gaukara ibounai ia koua diba, to unai ia karaia diba lasi. Unai dainai namo lasi Satani bona ena demoni dainai ita gari. Ita diba momokani, “[Iehova] ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.” (2 Siv. 16:9) Bema Iehova ita abidadama henia momokani, Satani bona ena demoni ese ita do idia hadikaia lasi.

16-17. Erica be dahaka ia karaia unai amo Satani bona ena demoni ia dadaraia totona?

¹⁶ Iseda turadia o varavara be ita idia inai henia neganai, nega momo ia auka Satani bona ena demoni ita dadaraia totona. Bona idia laloa bema idia ita bamoa lasi, gau dikana ta be ita dekenai do ia vara. To mai gari lasi ida unai bamona hekwakwanai idia hanaia taudia be Iehova ese ia hanamoa. Ghana ai ia noho kekeni ta ladana Erica mani oi laloa. Iena mauri lagani be 21 neganai Baibel stadi ia abia dae. Iena tamana be pris tauna to meamea karadia ia karaia, unai dainai edia kastom hegeregerena iena tamana ese ia tomadiho henia kaivakuku dekenai idia bouboulaia vamu be Erica ese ia ania be namo. Erica ese unai ia dadaraia neganai iena ruma bese idia laloa ia ese edia tomadiho karana ia hadikaia. Iena ruma bese idia laloa, edia dirava ese idia ibounai dekenai gorere do ia havaraia.

¹⁷ Erica ena ruma bese be ia idia doria edia kastom karadia lalonai ia vareai totona, ena be ia diba ruma amo ia do idia lulua to edia hereva ia dadaraia. Witnes taudia haida ese edia ruma dekenai ia idia abia dae. Momokani, Iehova ese dala ia kehoa dainai ruma bese ma ta ese Erica idia naria​—unai ruma bese be Witnes taudia bona idia be iena tadikaka bona taihu korikoridia ai idia lao. (Mar. 10:29, 30) Herevana iena varavara ese ia idia dadaraia bona iena kohu idia gabudia, to Erica be Iehova ia badinaia, bapatiso ia abia bona hari ia be regula painia ta. Ia be demoni dainai ia gari lasi. Erica ese ena ruma bese ia herevalaia neganai inai bamona ia gwau: “Hanaihanai lau guriguri badina lau ura egu ruma bese be Iehova idia dibaia bona iseda lalokau Diravana hesiai henia gaukarana amo ia mai hahenamo idia mamia danu.”

18. Iehova abidadama henia karana amo dahaka hahenamo ita abia diba?

¹⁸ Ita ibounai be unai bamona hahetoho ita davaria lasi. To, namona be Satani bona ena demoni ita dadaraia bona Iehova ita abidadama henia. Unai bamona ita karaia neganai, hahenamo momo do ita abia bona Satani ese ita do ia koia diba lasi. Danu, demoni gari henia karana ese iseda hesiai gaukara Iehova totona do ia koua lasi. Gau badana be, iseda hetura karana Iehova ida do ita hagoadaia noho. Hahediba tauna Iamesi ia gwau: “Dirava henunai umui noho, to Diabolo umui inai henia, bona ia be umui amo do ia heau siri. Dirava kahirakahira do umui lao bona ia be umui kahirakahira do ia mai.”​—Iam. 4:7, 8.