1. Dirava ena hesiai taudia ibounai idia ura dahaka idia karaia bona dahaka dainai? (Rau 1 ai ia noho laulau itaia.)

IESU KERISO ese iena murinai idia raka taudia ia haganidia, ia gwau: “Umui lao, bese ibounai taudia be hahediba taudia ai umui halaoa.” (Mat. 28:19) Dirava ena abidadama hesiai taudia ibounai idia ura Dirava ena ‘hesiai gaukara idia hagugurua momokani’ dalana idia diba. (2 Tim. 4:5) Iseda mauri ai unai gaukara be mai anina bada bona ita karaia haraga be namo. To, nega haida ia auka iseda haroro gaukara ai eda nega bada ita gaukaralaia totona.

2. Iseda hesiai gaukara ita karaia lalonai edena hekwakwanai idauidau ita davaria?

² Iseda mauri ai ita karaia gaudia haida be mai anina bada bona unai ese iseda goada bona nega ia abia diba. Reana dina ta ai hora momo lalonai moni gaukara ita karaia, unai amo ita bona iseda ruma bese ita naria. Eiava ia auka iseda ruma bese lalonai maduna ibounai ita huaia totona, eiava ita gorere, ita lalometau o ita buruka dainai ita abia hisihisi idauidau ita haheaukalaia noho. Edena dala ai iseda hesiai gaukara do ita karaia namonamo, ena be iseda mauri lalonai hekwakwanai idauidau ita davaria?

3. Iesu ena hereva Mataio 13:23 ai dahaka ita dibaia?

³ Bema iseda mauri lalonai unai bamona hekwakwanai ta ia vara dainai Iehova hesiai henia karana dekenai, nega bada ita henia lasi, namo lasi ita lalomanoka. Iesu ia diba Basileia hesiai gaukarana karaia namonamo totona, iseda goada bona ita atoa hora be idauidau. (Mataio 13:23 duahia.) Iehova ese iena hesiai gaukara lalonai ita karaia gaudia ibounai ia laloa bada. (Heb. 6:10-12) To nega haida do ita laloa iseda noho dalana be ia namo dainai do ita ura nega bada ita atoa iseda hesiai gaukara ita karaia totona. Inai atikol ai, iseda mauri ai eda hesiai gaukara ita atoa guna dalana, gau momo ita tahua lasi bona haroro  bona hadibaia gaukara hanamoa daladia do ita herevalaia. Iseda hesiai gaukara ita karaia namonamo ena anina be dahaka?

4. Iseda hesiai gaukara ita karaia namonamo ena anina be dahaka?

⁴ Iseda hesiai gaukara ita karaia namonamo ena anina be haroro bona hadibaia gaukarana dekenai iseda nega bada ita gaukaralaia. To iseda nega sibona be hegeregere lasi. Iehova dekenai, haroro gaukara ita karaia ena badina be mai anina bada. Iehova bona iseda dekena taudia ita lalokau henidia dainai mai kudouna ibounai ida Keristani hesiai gaukara ita karaia. * (Mar. 12:30, 31; Kol. 3:23) Mai kudouna ibounai ida Dirava ena hesiai gaukara ita karaia ena anina be, iseda goada bona diba ita gaukaralaia ia ita hesiai henia totona. Bema haroro gaukara ita karaia ena hahenamo ita laloa bada, do ita gaukara goada taunimanima ibounai dekenai sivarai namona ita harorolaia totona.

5-6. Dahaka oi karaia diba unai amo emu haroro gaukara be mai anina bada gaukarana ai oi halaoa totona? Haheitalai gwauraia.

⁵ Mani inai oi laloa. Mero matamata ta be gita gadaralaia karana ia moalelaia bona nega idauidau ai unai ia karaia. Wikeni haida lalonai (café) kofi inua gabuna ta dekenai ia lao bona unuseniai iena gita ia gadaralaia, unai be iena moni gaukara. To, ia abia moni be ia hegeregere lasi gau ma haida edia davana ia karaia totona. Unai dainai sitoa badana ta dekenai Monday ia lao Friday cashier gaukara ia karaia. Ena be sitoa dekenai ia gaukara to ia be miusiki ia ura henia bada. Unai dainai ia ura gita gadaralaia karana dekenai ena diba ia habadaia bona iena nega bada ia atoa gabu idauidau ai gita ia gadaralaia totona.

⁶ Unai hegeregerena, reana haroro gaukara dekenai nega bada oi henia lasi. To oi be haroro gaukara oi ura henia bada. Oi ura ma haida oi durua sivarai namona idia kamonai totona, unai dainai oi gaukara goada emu haroro dalana oi hanamoa. Emu mauri ai gau momo oi karaia dainai oi mamia nega be lasi, to unai bamona negadiai dahaka oi karaia diba emu  haroro gaukara be mai anina bada gaukarana ai oi halaoa totona.

7-8. Edena dala ai haroro gaukara totona Iesu ena haheitalai ita tohotohoa diba?

⁷ Iesu be iena haroro gaukara ia laloa bada. Iena mauri lalonai Dirava ena Basileia herevalaia karana ia laloa bada. (Ioa. 4:34, 35) Ia be haroro gaukara karaia totona daudau gabudia dekenai ia lao. Dala idauidau ia gaukaralaia ruma dekenai bona taunimanima idia noho gabudia ai ia haroro totona. Iesu be ena mauri ibounai lalonai haroro gaukara ia karaia.

⁸ Namona be Keriso ita tohotohoa, anina be sivarai namona be gabu bona nega idauidau ai ita harorolaia. Unai dainai iseda mauri lalonai sibona eda ura gaudia haida ita dadaraia bona haroro gaukara dekenai nega bada ita atoa. (Mar. 6:31-34; 1 Pet. 2:21) Kongrigeisen ai, haida be spesel, regula o heduru painia gaukara idia karaia diba. Bona ma haida be gado idauna idia dibaia o haida be pablisa be momo lasi gabudia dekenai idia lao. To, haroro gaukara idia karaia taudia momo be pablisa taudia, edia goada hegeregerena haroro gaukara idia karaia. Herevana haroro gaukara ai iseda nega bada ita henia o lasi, to Iehova be ita ia doria lasi ita karaia diba lasi gauna ita karaia totona. Ia ura ita ibounai be iseda hesiai gaukara helagana ita moalelaia bona “moale Diravana ena hairai sivarai namona” ita harorolaia.​—1 Tim. 1:11; Deu. 30:11.

9. (a) Edena dala ai Paulo ese iena haroro gaukara ia laloa bada ena be nega haida moni gaukara ia karaia? (b) Paulo ese ena haroro gaukara Kara 28:16, 30, 31 ai be edena bamona ia laloa?

⁹ Aposetolo Paulo be ena mauri lalonai haroro gaukara ia laloa bada. Iena misinari loaloa iharuana lalonai Korinto dekenai ia noho neganai, moni dalanai ia hegeregere lasi dainai nega haida palai ia turia. To iena nega bada be palai turia gaukarana dekenai ia haorea lasi. Unai gaukara ia karaia unai amo iena haroro gaukara lalonai Korinto taudia be do idia hekwarahi lasi iena ura gaudia idia hoia totona. (2 Kor. 11:7) Paulo be moni gaukara ia karaia, to haroro gaukara ia laloa bada bona Sabati dinadia ibounai lalonai taunimanima ia haroro henidia. Unai dainai, ia ese ena “nega bada ia gaukaralaia Dirava ena hereva ia harorolaia totona, Iuda taudia dekenai ia hamomokania Iesu be Keriso.” (Kara 18:3-5; 2 Kor. 11:9) Gabeai Roma ai sibona ena ruma lalonai idia hadiburaia, to Paulo be ia idia vadivadi henia taudia ia haroro henidia bona revareva ia siaia. (Kara 28:16, 30, 31 duahia.) Paulo ia ura lasi gau ta ese iena haroro gaukara do ia hadikaia. Ia gwau: “Dirava ese . . . inai hesiai gaukara be ai dekenai ia henia, unai dainai ai hesiku lasi.” (2 Kor. 4:1) Paulo bamona, ena be moni gaukara ita karaia, to iseda mauri lalonai Basileia gaukara be mai anina bada gaukarana ai ita halaoa diba.

10-11. Bema ita gorere o hekwakwanai haida ita davaria, edena dala ai iseda haroro gaukara ita karaia namonamo diba?

¹⁰ Bema ita gorere eiava buruka dainai ruma-ta-ruma-ta haroro gaukara ita karaia diba lasi, haroro gaukara karaia daladia ma haida ita tohoa diba. Keristani ginigunadia be taunimanima idia noho gabudia dekenai idia haroro. Idia ese dala idauidau idia gaukaralaia, ruma-ta-ruma-ta ai, taunimanima idia noho gabuna bona nega bona gabu idauidau ai hereva momokani idia harorolaia totona. (Kara 17:17; 20:20) Bema gabu daudau raka totona ita hegeregere lasi, vadaeni pablik gabuna ta dekenai ita helai bona idia raka hanai taudia ita haroro henidia diba. Eiava nega bona gabu idauidau ai ita haroro diba, hegeregere revareva ita torea o telefon amo haroro gaukara ita karaia diba. Pablisa haida be ruma-ta-ruma-ta  haroro gaukara idia karaia momo lasi badina idia gorere o hekwakwanai haida idia davaria. To ita herevalaia haroro daladia idia moalelaia diba.

¹¹ Ena be oi gorere o hekwakwanai haida oi davaria, emu haroro gaukara oi karaia namonamo diba. Mani aposetolo Paulo ena haheitalai ita laloa lou. Ia gwau: “Lau dekenai siahu ia henia tauna amo goada lau abia gau ibounai lau karaia totona.” (Fili. 4:13) Paulo be ena misinari loaloa ta ai ia gorere neganai, unai bamona heduru ia abia. Galatia taudia dekenai ia gwau: “To umui diba egu gorere dainai, unai ese dala ia kehoa nega ginigunana umui dekenai sivarai namona lau gwauraia.” (Gal. 4:13) Unai hegeregerena, emu gorere eiava hekwakwanai ma haida dainai, unai ese dala do ia kehoa hegeregere doketa taudia, nesi, bona oi gorere neganai oi idia durua taudia dekenai sivarai namona oi harorolaia totona. Unai bamona taudia be pablisa taudia ese ruma-ta-ruma-ta haroro gaukara ai idia davaria lasi badina idia be edia gaukara gabudiai dekenai idia noho.

12. “Gau tamona sibona” ita raraia ena anina be dahaka?

¹² Iesu ia gwau: “Tauanina ena lamepa be matana. Bema emu matana be gau tamona sibona ia raraia, emu tauanina ibounai be do ia diari.” (Mat. 6:22) Iesu ena hereva ena anina be dahaka? Anina be, iseda mauri lalonai gau momo ita tahua lasi, to gau tamona o ita ura karaia namonamo gauna sibona ita laloa bada. Iesu be haheitalai namona, ena mauri ibounai lalonai haroro gaukara ia karaia, bona ena hahediba taudia ia hadibaia Iehova bona Iena Basileia harorolaia gaukara idia laloa bada.  Iesu ita tohotohoa diba bema iseda mauri lalonai haroro gaukara be mai anina bada gaukarana ai ita halaoa, bona ‘Dirava ena Basileia bona ena kara maoromaoro do ita tahua guna.’​—Mat. 6:33.

13. Dahaka ese ita do ia durua iseda haroro gaukara ita laloa bada totona?

¹³ Iseda haroro gaukara ita laloa bada dalana ta be, anina lasi gaudia dekenai iseda nega ita haorea kava lasi unai amo nega bada ita gaukaralaia diba haida ita durua Iehova idia dibaia bona idia lalokau henia totona. * Hegeregere, moni gaukara gabuna ai gaukara ia do hamatamaia lasi o laga-ani negana ai, unai hora oi gaukaralaia oi haroro totona, a? Eiava nega bada idia abia moale karadia haida oi dadaraia, a?

14. Elda ta mai ena adavana ida be dahaka idia karaia, unai amo nega bada idia gaukaralaia haroro gaukara totona?

¹⁴ Elda ta Elias bona ena adavana be dahaka idia karaia? Elias ia gwau: “Matamanai ai ruaosi be painia gaukara ai karaia diba lasi, to gau haida ai haidaua unai amo emai nega bada be haroro gaukara dekenai ai gaukaralaia. Hegeregere, emai moni ai gaukaralaia namonamo, nega bada idia abia moale karadia haida ai dadaraia, bona emai bosi ai noia emai gaukara ena sediual ia haidaua totona. Unai ai karaia dainai, ai be adorahi ena haroro gaukara ai karaia, Baibel stadi momo ai hamatamaia, bona hua ta lalonai nega rua wiki ena haroro gaukara ai karaia diba. Unai ai moalelaia bada!”

15-16. Timoteo Ginigunana 4:13, 15 ena hereva bamona, edena dala ai iseda haroro dalana ita hanamoa diba? (Inai maua “Haroro Gaukara Lau Karaia Namonamo Totona Egu Tahua Gaudia” itaia danu.)

¹⁵ Iseda haroro gaukara ita karaia namonamo dalana ta be, iseda haroro daladia  ita hanamoa. Gaukara diba momo taudia be edia gaukara idia karaia namonamo bona edia diba idia habadaia noho totona, treinini idia abia be namo. Basileia idia harorolaia taudia danu be unai bamona. Iseda haroro dalana ita hanamoa totona, diba ita abia noho be namo.​—Aon. 1:5; 1 Timoteo 4:13, 15 duahia.

¹⁶ Edena dala ai iseda haroro dalana ita hanamoa noho diba? Wiki ta ta ai iseda Haroro Bona Mauri Dalana Hebouna ai ita abia hadibaia herevadia ita kamonai namonamo. Unai hebou ai ita abia mai anina bada herevadia ese ita do ia durua iseda haroro bona hadibaia daladia ita hanamoa totona. Hegeregere, bema hebou ena seamani ese kahana idia henia taudia dekenai sisiba ia henia, unai sisiba amo ita be haroro hanamoa daladia dekenai diba ita abia. Ta dekenai sivarai namona ita herevalaia neganai, unai haroro daladia ita tohoa diba. Heduru totona grup naria tauna ita nanadaia eiava ia ida ita gaukara hebou, o haroro ia diba namonamo pablisa ta, painia ta, o sekit naria tauna ida ita gaukara hebou karana ese iseda haroro dalana ia hanamoa diba. Hadibaia Gaukara Ena Tulu Idauidau ai idia noho tulu ta ta ita gaukaralaia namonamo neganai, iseda haroro bona hadibaia gaukarana do ita moalelaia.

17. Bema emu haroro gaukara oi karaia namonamo, dahaka hahenamo do oi abia?

¹⁷ Ita moale badina ita be Iehova ida ita “gaukara hebou” unai be hahenamo badana! (1 Kor. 3:9) Haroro gaukara lalonai “mai anina bada gaudia” ita laloa bada bona ‘mai moale ida Iehova ita hesiai henia.’ (Fili. 1:10; Sal. 100:2, NWT) Oi be Dirava ena hesiai tauna dainai, oi diba momokani herevana oi gorere o hekwakwanai haida oi davaria Iehova ese oi do ia durua emu haroro gaukara oi karaia namonamo totona. (2 Kor. 4:1, 7; 6:4) Herevana nega bada be haroro gaukara ai oi gaukaralaia eiava lasi, to bema mai kudouna ibounai ida haroro gaukara oi karaia oi “moale” diba. (Gal. 6:4) Bema emu haroro gaukara oi karaia namonamo, oi hahedinaraia oi be Iehova bona emu dekena tauna oi lalokau henia. “Unai bamona oi karaia neganai, oi sibona bona oi dekenai idia kamonai taudia do oi hamauria.”​—1 Tim. 4:16.