1-2. Dahaka dainai Iesu be ia lalohekwarahi bada?

IESU ia do mase lasi dina ginigabena ai, ia lalohekwarahi bada. Ia diba ia be kahirakahira taravatu idia laloa lasi taudia ese do idia hamasea. Ia be ena mase ia lalohekwarahilaia sibona lasi, to iena Tamana ia lalokau henia bada bona ena ura hagugurua karana ia laloa bada. Iesu ia diba bema unai hahetoho badana ia haheaukalaia, ia ese Iehova ena ladana do ia hahelagaia. Danu taunimanima ia lalokau henia, ia diba bema Iehova ia badinaia ela bona ia mase, ita ibounai be mauri hanaihanai helarona ita abia diba.

² Ena be Iesu ia lalohekwarahi bada, to lalomaino ia abia. Iena aposetolo taudia dekenai ia gwau: “Umui dekenai egu maino lau henia.” (Ioa. 14:27) Iesu be “Dirava ena maino” ia abia. Unai maino be ta ena hetura karana Iehova ida ia herevalaia. Unai ese Iesu ia durua ia lalohekwarahi momo lasi totona.​—Fili. 4:6, 7.

3. Inai atikol ai dahaka do ita herevalaia?

³ Ita be Iesu ese ia davaria hahetoho do ita mamia lasi, to ia idia badinaia taudia ibounai be hahetoho idauidau do idia davaria. (Mat. 16:24, 25; Ioa. 15:20) Iesu bamona nega haida ita lalohekwarahi. Dahaka ita karaia diba unai amo ita lalohekwarahi momo lasi bona ita lalomaino noho totona? Iesu be tanobada ai ia noho neganai ia karaia gaudia toi do ita herevalaia bona do ita itaia edena dala ai hahetoho ita davaria neganai ia ita tohotohoa diba.

4. Tesalonika Ginigunana 5:17 ena hereva bamona, Iesu be edena bamona negadia ai guriguri loulou?

⁴ Tesalonika Ginigunana 5:17 duahia. Iesu ia do mase lasi dina ginigabena ai, ia guriguri loulou. Iena mase laloatao  dalana be ena hahediba taudia dekenai ia hadibaia neganai, paraoa bona wain totona ia guriguri. (1 Kor. 11:23-25) Pasova idia karaia gabuna idia do rakatania lasi neganai, iena hahediba taudia ida ia guriguri. (Ioa. 17:1-26) Unai hanuaboi ai ia bona ena hahediba taudia be Olive Ororona dekenai idia ginidae neganai, ia guriguri loulou. (Mat. 26:36-39, 42, 44) Ia do mase lasi neganai ia gwauraia hereva dokodia be ena guriguri herevadia. (Luka 23:46) Unai dina ai idia vara gaudia ibounai be Iehova dekenai ia gurigurilaia.

5. Dahaka dainai aposetolo taudia idia haheauka lasi?

⁵ Iesu be hahetoho ia haheaukalaia ena badina ta be, guriguri amo iena Tamana ena heduru ia abia. To iena aposetolo taudia be unai hanuaboi ai idia guriguri lasi. Unai dainai, hahetoho ia vara neganai, idia haheauka lasi. (Mat. 26:40, 41, 43, 45, 56) Hahetoho do ita davaria, to do ita haheauka bema Iesu ena haheitalai ita tohotohoa bona ita “guriguri” loulou. Dahaka totona ita guriguri diba?

6. Edena dala ai abidadama ese ita do ia durua lalomaino ita abia totona?

⁶ Iehova dekenai ita guriguri unai amo ‘iseda abidadama do ia habadaia.’ (Luka 17:5; Ioa. 14:1) Unai ita karaia badina Satani ese Iesu ena murinai idia raka taudia ibounai do ia tohoa. (Luka 22:31) Bema hekwakwanai idia vara loulou, edena dala ai abidadama ese ita do ia durua lalomaino ita abia totona? Bema gau ibounai ita karaia iseda hekwakwanai ita hanaia totona, ita diba momokani Iehova ese ita do ia durua bona do ita lalohekwarahi lasi. Ita abia dae momokani Iehova sibona be ia hegeregere iseda hekwakwanai lalonai ita ia durua totona.​—1 Pet. 5:6, 7.

7. Robert ena hereva amo dahaka oi dibaia?

⁷ Guriguri karana ese ita ia durua lalomaino ita abia totona herevana hahetoho  idauidau ita davaria. Elda ta Robert ena mauri lagani be 80 bamona, ena haheitalai mani ita laloa. Ia gwau: “Filipi 4:6, 7 ena sisiba herevana ese lau ia durua egu mauri ai lau davaria hahetoho idauidau lau haheaukalaia totona. Nega haida moni dalanai lau hegeregere lasi. Bona egu elda maduna idia kokia to daudau lasi murinai lau abia lou.” Dahaka ese Robert ia durua ia lalohekwarahi lasi totona? Ma ia gwau: “Lau mamia lau lalohekwarahi neganai maoromaoro lau guriguri. Lau abia dae momokani guriguri loulou karana ese lau ia durua lalomaino lau abia totona.”

8. Ioane 8:29 ena hereva bamona, Iesu ia lalohekwarahi lasi ena badina ma ta be dahaka?

⁸ Ioane 8:29 duahia. Iesu ia diba herevana ia idia dagedage henia, to ia lalohekwarahi lasi badina ia diba ena Tamana ia hamoalea. Ena be nega haida ia auka, to ia be Iehova ia badinaia noho. Ena Tamana ia lalokau henia bona ena mauri ibounai lalonai Iehova hesiai henia karana ia atoa guna. Tanobada ai ia do mai lasi neganai, ia be Dirava ena “gaukara karaia tauna.” (Aon. 8:30) Bona tanobada ai ia noho neganai taunimanima dekenai iena Tamana ena sivarai ia harorolaia goadagoada. (Mat. 6:9; Ioa. 5:17) Unai haroro gaukarana ese Iesu ia hamoalea bada.​—Ioa. 4:34-36.

9. Dahaka dainai haroro gaukara ai ita bisi neganai, lalomaino ita abia diba?

⁹ Iesu ita tohotohoa neganai ita be Iehova ita badinaia bona ‘nega ibounai Lohiabada ena gaukara idauidau lalonai do ita bisi.’  (1 Kor. 15:58) Bema haroro gaukara lalonai ‘nega bada ita gaukaralaia,’ iseda hekwakwanai idauidau dekenai lalohadai maorona do ita abia. (Kara 18:5) Hegeregere, haroro gaukara ai ita hereva henia taudia be hekwakwanai badadia idia davaria. To, Iehova idia dibaia bona iena sisiba herevadia idia badinaia neganai, edia mauri be ia namo bona idia moale. Unai ita itaia neganai, ita diba momokani Iehova ese ita do ia naria. Unai ese ita ia durua lalomaino ita abia totona. Lagani momo lalonai ia lalomanoka bona lalohisihisi momo taihu ta ese unai hereva ia hamomokania. Ia gwau: “Haroro gaukara ai lau bisi neganai, lau moale. Lau laloa haroro gaukara lau karaia neganai, lau mamia lau be Iehova kahirakahira lau lao.”

10. Brenda ena hereva amo dahaka oi dibaia?

¹⁰ Taihu ta ladana, Brenda ena haheitalai mani ita laloa. Ia bona ena natuna kekeni be gorere badana ta (multiple sclerosis) * idia abia. Brenda ia raka diba lasi dainai wilsea ai ia helai sibona. Nega haida ia hegeregere neganai ruma-ta-ruma-ta haroro gaukara ia karaia, to nega momo haroro gaukara totona revareva ia torea. Ia gwau: “Lau laloparara hari inai negai muramura ta ese egu gorere ia hanamoa diba lasi, unai dainai haroro gaukara lau laloa bada. Haroro gaukara laloa bada karana ese lau ia durua egu gorere lau lalohekwarahilaia lasi totona. Bona lau ia durua emai kongrigeisen ena teritori ai revareva amo lau haroro henia taudia lau durua totona. Unai bamona lau karaia neganai, lau ia durua vaira nega ena helaro lau laloa noho totona.”

11-13. (a) Edena dala ai aposetolo taudia bona ma haida be Iesu ena tura korikoridia ai idia lao? (b) Edena dala ai Iesu ena turadia ese ia idia durua?

¹¹ Iesu be tanobada ai ena haroro gaukara ia karaia neganai, iena abidadama aposetolo taudia be idia hahedinaraia idia be Iesu ena tura korikoridia. Edia haheitalai ese inai aonega herevana ia hamomokania, ia gwau: “Tura haida be tadikaka korikori bamona ta ta idia lalokau henia.” (Aon. 18:24, NWT) Iesu be unai bamona turadia ia laloa bada. Haroro gaukara ia karaia neganai, ia ida idia vara hebou tadikakadia ese ia idia abidadama henia lasi. (Ioa. 7:3-5) Nega ta iena varavara idia laloa ia be ia kavakava. (Mar. 3:21) To, Iesu be ena hanuaboi ginigabena ai iena abidadama aposetolo taudia dekenai ia gwau: “Hahetoho lau davaria negadiai, umui be lau umui rakatania lasi.”​—Luka 22:28.

¹² Nega haida iena aposetolo taudia be ia idia badinaia lasi, to ia be edia kerere ia laloa lasi bona ia itaia idia be ia idia abidadama henia. (Mat. 26:40; Mar. 10:13, 14; Ioa. 6:66-69) Iesu idia do hamasea lasi hanuaboi ginigabena ai ia idia badinaia taudia dekenai ia gwau: “Umui lau boiria turadia, badina egu Tamana amo lau kamonai gaudia ibounai be umui dekenai lau gwauraia hedinarai vadaeni.” (Ioa. 15:15) Unai be momokani badina Iesu ena turadia ese ia idia hagoadaia bada. Ena haroro gaukara lalonai ia idia durua dainai, unai ese Iesu ia hamoalea.​—Luka 10:17, 21.

¹³ Iesu be mai ena turadia ma haida, unai tatau bona hahine ese haroro gaukara bona gaukara ma haida dekenai ia idia durua. Idia haida ese ia idia boiria edia ruma dekenai idia aniani totona. (Luka 10:38-42; Ioa. 12:1, 2) Bona ma haida be haroro gaukara  totona ia idia bamoa bona edia kohu idia gaukaralaia. (Luka 8:3) Iesu dekenai idia be tura namodia badina idia diba ia ese idia do ia durua. Idia dekenai kara namodia ia hahedinaraia bona ia diba idia be gaukara momo idia karaia diba lasi. Iesu be goevadae tauna, to ia be ena goevadae lasi turadia edia heduru ia laloa bada. Bona ita diba momokani, idia ese ia idia durua lalomaino ia abia noho totona.

14-15. Edena dala ai tura namodia ita davaria, bona idia ese ita be edena bamona do idia durua?

¹⁴ Tura namodia ese ita do idia durua Iehova ita badinaia noho totona. Tura namodia oi davaria totona, namona be oi sibona be tura namona ai oi lao. (Mat. 7:12) Hegeregere, Baibel ese ita ia hagoadaia iseda nega bona goada ita gaukaralaia idia ‘dabu taudia’ ita durua totona. (Efe. 4:28) Emu kongrigeisen ai oi durua diba tauna ta oi laloa, a? Gorere o buruka dainai ruma dekenai ia noho tauna durua totona sitoa dekenai oi lao diba, a? Moni dalanai idia hegeregere lasi ruma bese ta totona aniani oi hegaegaelaia diba, a? Bema iseda websait jw.org^® bona JW Library^® app gaukaralaia dalana oi diba, emu kongrigeisen ai idia noho taudia oi durua diba unai idia gaukaralaia totona, a? Bema ita bisi haida durua totona, do ita moale.​—Kara 20:35.

¹⁵ Hekwakwanai ita davaria neganai iseda tura namodia ese ita idia durua diba lalomaino ita abia totona. Iobu be ena hekwakwanai ia herevalaia neganai, Elihu ia kamonai namonamo. Unai hegeregerena, iseda turadia ese ita idia durua diba bema iseda  lalohekwarahi gaudia ita gwauraia hedinarai bona idia kamonai namonamo. (Iobu 32:4) Namo lasi ita laloa iseda turadia be ita totona abia hidi do idia karaia, to Baibel amo idia henia sisiba namodia ita badinaia be aonega karana. (Aon. 15:22) King Davida be mai manau ida iena turadia edia heduru ia abia dae hegeregerena, bema gau haida totona iseda turadia edia heduru ita abia neganai, namo lasi ita hekokoroku. (2 Sam. 17:27-29) Momokani, unai bamona tura namodia be Iehova amo idia mai harihari gaudia bamona.​—Iam. 1:17.

16. Filipi 4:6, 7 ena hereva bamona, edena dala tamona sibona amo lalomaino ita abia diba? Gwauraia hedinarai.

¹⁶ Filipi 4:6, 7 duahia. Dahaka dainai Iehova ia gwau ia ese “Keriso Iesu amo” ita dekenai lalomaino do ia henia? Iehova ena ura hagugurua totona, Iesu ena gaukara ita lalopararalaia bona laloa bada neganai, iseda lalona bona kudouna ai lalomaino do ita abia. Hegeregere, Iesu ena mauri davalaia boubouna ese iseda kara dika ibounai ia gwauatao diba. (1 Ioa. 2:12) Unai ese ita ia hagoadaia bada! Iesu be Dirava ena Basileia ena King dainai, ia ese Satani bona iena tanobada dikana ese idia havaraia hisihisi ibounai do ia haorea. (Isa. 65:17; 1 Ioa. 3:8; Apok. 21:3, 4) Unai ese ita ia hagoadaia vaira nega namona ita laloa totona! Ena be Iesu ese ita dekenai gaukara metauna ia henia, to ia be inai dina gabedia lalonai ita ia durua noho. (Mat. 28:19, 20) Unai ese ita hagoadaia bada! Moale, helaro, bona lalogoada karana be mai anina bada lalomaino ita abia totona.

17. (a) Edena dala ai Keristani tauna ta be lalomaino ia abia diba? (b) Ioane 16:33 ena gwauhamata herevana hegeregerena, dahaka ita karaia diba?

¹⁷ Bema hahetoho badadia oi davaria, edena dala ai oi lalomaino noho diba? Iesu ia karaia gaudia toi oi tohotohoa karana amo lalomaino oi abia diba. Gau ginigunana be, herevana dahaka ia vara oi guriguri loulou be namo. Gau iharuana be, namona be Iehova oi badinaia bona oi haroro goadagoada ena be nega haida ia auka. Bona gau ihatoina be, hahetoho oi davaria neganai emu turadia edia heduru oi abia dae. Dirava ena maino ese ita do ia durua ita lalomaino totona. Bona Iesu bamona, hahetoho idauidau oi hanaia diba.​—Ioane 16:33 duahia.