1-2. (a) Edena dala ai Satani ese taunimanima ia koia? (b) Inai atikol ai dahaka do ita herevalaia?

ADAMU bona Heva edia nega amo ema bona hari Satani “koikoi ena tamana,” ese taunimanima ia koia. (Ioa. 8:44) Iena koikoi herevana ta be, ta ia mase neganai ia be gabu ma ta dekenai ia noho. Unai bamona koikoi herevadia ese kastom karadia bona mase taudia gari henia lalohadai idauidau ia havaraia. Unai dainai tadikaka taihu momo be edia gabu ai bona edia ruma bese lalonai ta ia mase neganai, nega haida ia auka Dirava idia badinaia totona.​—Iuda 3.

² Bema oi idia doria unai bamona kastom karadia lalonai oi vareai, dahaka ese oi do ia durua mase dainai idia vara lalohadai koikoi dekenai Baibel ena hereva momokani oi gwauraia hedinarai totona? (Efe. 6:11) Keristani tauna ta be ena ruma bese lalonai ta ia mase neganai, edena dala ai ia oi hagoadaia diba Dirava ese ia inai henia kastom karadia lalonai ia vareai lasi totona? Iehova ese ita ia durua daladia be inai atikol ese do ia herevalaia. Gau ginigunana be, mase dainai idia vara hahediba hereva koikoidia dekenai Baibel ena lalohadai mani ita herevalaia.

3. Koikoi kara ginigunana amo dahaka ia vara?

³ Dirava ia ura lasi taunimanima idia mase. To, Adamu bona Heva be idia mauri hanaihanai diba bema Iehova idia badinaia, badina Ia ese idia dekenai inai hahegani ia henia, ia gwau: “Kara namo bona kara dika hadibaia au ena huahua oi ania lasi, badina be inai huahua oi ania dina dekenai do oi mase momokani.” (Gen. 2:16, 17) To, Satani ia gwau unai hereva be momokani lasi. Ia be gaigai amo Heva dekenai inai hereva ia gwauraia: “Inai be momokani lasi, dohore umui mase lasi.” Heva be unai hereva ia abia dae bona au huahua ia ania. Bena ena adavana dekenai ia henia  bona ia ania danu. (Gen. 3:4, 6) Unai dainai, taunimanima ibounai be idia kara dika bona idia mase.​—Roma 5:12.

4-5. Edena dala ai hari inai negai Satani ese taunimanima ia koia noho?

⁴ Dirava ena hereva hegeregerena, Adamu bona Heva be idia mase. To, Satani ese mase dainai idia vara hahediba hereva koikoidia ia gwauraia noho. Gabeai, hahediba hereva koikoi ma haida ia hamatamaia. Hahediba hereva koikoina ta be, ta ia mase neganai ia be gabu ma ta dekenai ia noho o ia loaloa. Idaunegai amo ema bona hari unai bamona hahediba hereva koikoidia ese taunimanima momo ia koia vadaeni.​—1 Tim. 4:1.

⁵ Dahaka dainai Satani ese taunimanima momo ia koia? Badina ia diba taunimanima be mase dainai idia gari bona unai ia gaukaralaia idia ia koia totona. Hereva momokani be inai, Dirava ese ita ia havaraia ita mauri hanaihanai totona, unai dainai ita ura lasi ita mase. (Had. 3:11) Baibel ese ia hahedinaraia, mase be do ia ore momokani.​—1 Kor. 15:26.

6-7. (a) Edena dala ai mase dainai idia vara hahediba herevadia be Baibel ese ia hakoikoia? Gwauraia hedinarai. (b) Ta ia mase neganai edena dala ai Baibel ena hereva momokani ese ita ia durua ita gari lasi totona?

⁶ Ena be Satani be unai ia karaia, to mase dainai idia vara hahediba herevadia be Baibel ese ia hakoikoia. Hari inai negai, taunimanima momo be mase dainai Baibel ena hereva momokani bona ena helaro idia diba bona idia harorolaia. (Had. 9:5, 10; Kara 24:15) Unai ese ita ia hagoadaia dainai ita gari lasi bona ita daradara lasi. Hegeregere, Iehova ena hesiai taudia be mase dainai idia vara hahediba hereva koikoidia idia abia dae lasi. Ita diba ta ia mase neganai ia be gau ta ia diba lasi. Unai be hegeregere ia mahuta boio. (Ioa. 11:11-14) Ita diba danu ta ia mase neganai nega o hora ia diba lasi. Lagani handred momo gunanai idia mase taudia idia toreisi lou neganai, do idia mamia nega be ia heau haraga momokani.

⁷ Oi diba momokani ta ia mase neganai ia be gau ta ia diba lasi, ia mahuta boio bamona, bona ta do ia hagaria lasi. Unai be Satani ena hahediba hereva koikoidia amo ia idau. Satani ena hahediba hereva koikoidia ese taunimanima idia koia sibona lasi, to iseda Havaraia Tauna ena ladana idia hadikaia danu. Satani ese ia havaraia vadaeni dika ita lalopararalaia namonamo totona, mani inai henanadai ita herevalaia: Edena dala ai Satani ena hahediba hereva koikoidia ese Iehova ena ladana ia hadikaia? Edena dala ai mase dainai idia vara hereva koikoidia ese Keriso ena mauri davalaia boubouna abia dae karana ia hadikaia? Edena dala ai Satani ena koikoi herevadia ese taunimanima dekenai lalometau bona hisihisi ia havaraia?

8. Ieremia 19:5 ena hereva bamona, edena dala ai Satani ena hahediba hereva koikoidia ese Iehova ena ladana ia hadikaia?

⁸ Satani ena hahediba hereva koikoidia ese Iehova ena ladana ia hadikaia. Unai hahediba hereva koikoina ta be, mase taudia be lahi lalonai hisihisi bada idia abia. Unai hahediba herevana ese Dirava ena ladana ia hadikaia! Edena dala ai? Unai hahediba hereva koikoidia dainai taunimanima idia laloa lalokau Diravana ena kara be Diabolo bamona. (1 Ioa. 4:8) Unai dainai, emu hemami be edena bamona? To gau badana be inai, Iehova ese unai hahediba hereva koikoidia be edena bamona ia laloa? Baibel ese ia hahedinaraia Iehova ese ma haida hahisia karadia iboudiai ia inai henia momokani.​—Ieremia 19:5 duahia.

9. Ioane 3:16 bona 15:13 edia hereva bamona, edena dala ai Satani ena hahediba hereva koikoidia ese Keriso ena mauri davalaia boubouna abia dae karana ia hadikaia?

⁹ Satani ena hahediba hereva koikoidia ese Keriso ena mauri davalaia boubouna abia dae karana ia hadikaia. (Mat. 20:28) Unai hahediba hereva koikoina ta be inai, taunimanima be idia mase neganai idia be gabu ma ta dekenai idia noho. Bema unai hereva be momokani, vadaeni taunimanima ibounai be do idia mase lasi. Bona Keriso ese taunimanima totona iena mauri ia henia be anina lasi. Namona be ita laloatao, taunimanima ibounai dekenai Keriso ena mauri davalaia boubouna be lalokau karana hereadaena. (Ioane 3:16; 15:13 duahia.) Taunimanima be edia hahediba hereva koikoidia amo unai lalokau karana hereadaena be anina lasi gauna ai idia halaoa. Iehova bona iena Natuna edia hemami mani oi laloa!

10. Edena dala ai Satani ena hahediba hereva koikoidia ese taunimanima dekenai lalometau bona hisihisi ia havaraia?

¹⁰ Satani ena koikoi herevadia ese taunimanima dekenai lalometau bona hisihisi ia havaraia. Tama sina ta be edia natuna maragina ta ia mase neganai reana idia laloa Dirava ese edia natuna ia abia bona guba dekenai aneru ai ia halaoa. Unai hahediba hereva koikoina ese unai tama sina edia lalohisihisi ia hamaragia eiava ia habadaia? Inai be hahediba hereva koikoina: Lahi lalonai ta hahisia karana, bona dubu edia hahediba herevadia idia abia dae lasi taudia be au dekenai idia kwatua bona lahi amo idia gabua karana. Buka ta, Spanish Inquisition ese ia hahedinaraia taunimanima idia hahisia taudia idia laloa lahi ese ia gabua taudia be “lahi ena hisihisi sisina idia mamia” unai amo edia kara dika amo do idia helalo-kerehai bona hel lahina lalonai do idia mase lasi. Tano momo ai kastom karadia haida be, taunimanima ese idaunegai idia mase taudia idia matauraia, tomadiho henia, bona idia amo hahenamo idia noia. Bona ma haida idia laloa kara haida idia karaia be namo, unai amo idaunegai idia mase taudia do idia badu lasi. Unai ese ia hahedinaraia taunimanima ese Satani ena hahediba hereva koikoidia idia abia dae. Unai ese taunimanima dekenai lalometau, hisihisi bona gari ia havaraia.

11. Edena dala ai iseda turadia eiava varavara ese ita idia doria Baibel ena taravatu idia utua kastom karadia lalonai ita vareai totona?

¹¹ Bema iseda turadia eiava varavara ese ita idia doria kastom karadia lalonai ita vareai, Dirava bona iena Hereva lalokau henia karana ese ita do ia durua Iehova ita badinaia noho totona. Reana do idia ura ita idia hahemaraia bona do idia gwau ita be mase tauna ita lalokau henia lasi bona matauraia lasi. Eiava do idia laloa iseda kara dainai mase tauna ese idia mauri taudia do ia hahisia. Edena dala ai Baibel ena hereva momokani ita gwauraia hedinarai diba? Baibel ena hakaua herevadia badinaia daladia do ita herevalaia.

12. Mase dainai idia vara kastom karadia haida be dahaka?

 ¹² Emu lalona oi hadaia Dirava ese ia ura henia lasi hahediba herevadia bona kastom karadia oi “rakatania.” (2 Kor. 6:17) Caribbean tanona ta ai, taunimanima idia laloa ta ia mase neganai, ia loaloa bona ia idia hadikaia taudia ia panisi o hahisia. Buka ta ese ia hahedinaraia, unai mase tauna be taunimanima ibounai dekenai hisihisi ia havaraia. Africa ena kastom karana ta be, mase tauna ena ruma ai ia noho hevarivari bona haba dekenai idia noho laulau be dabua ta amo idia koudia. Dahaka dainai? Haida idia laloa mase taudia be sibodia edia laulau idia itaia lasi be namo! Ita be Iehova ena Witnes taudia dainai, Satani ena hahediba hereva koikoidia ita abia dae lasi bona meamea karadia lalonai ita vareai lasi!​—1 Kor. 10:21, 22.

13. Iamesi 1:5 ena hereva bamona, bema kastom karana ta dekenai oi daradara, dahaka oi karaia be namo?

¹³ Bema kastom karana ta dekenai oi daradara, Iehova oi guriguri henia, unai amo ia ese oi dekenai aonega do ia henia. (Iamesi 1:5 duahia.) Bena iseda pablikeisen amo tahua gaukara oi karaia. Heduru ma haida oi abia totona kongrigeisen ena elda taudia oi hereva henia diba. Oi totona abia hidi do idia karaia lasi, to oi do idia durua Baibel ena hakaua herevadia oi badinaia totona. Bema unai oi karaia, ‘emu darana oi gaukaralaia karana amo’ sibona oi hadibaia bona unai ese oi do ia durua ‘maoro bona kerere edia idau oi dibaia’ totona.​—Heb. 5:14.

14. Edena dala haida amo ma haida edia lalomamina ita hahekwakwanaia lasi?

¹⁴ “Gau ibounai do umui karaia Dirava umui hanamoa totona. Namo lasi . . . hahekwakwanaia karana ta umui karaia.” (1 Kor. 10:31, 32) Bema oi laloa Baibel ese ia taravatua lasi kastom karana ta lalonai do oi vareai, namona be oi karaia abia hidi ese Keristani taudia ma haida edia lalomamina ia hahekwakwanaia lasi. (Mar. 9:42) Bona ita ura lasi Witnes lasi taudia edia lalona ita hahisia kava. Namo lasi idia ida ita hepapahuahu o edia kastom karadia ita maumauraia. To, idia ita lalokau henia dainai mai hemataurai ida idia ita hereva henia, unai ese Iehova ena ladana ia hanamoa. Namona be ita laloatao, lalokau be mai anina bada! Bema mai lalokau ida ma haida edia namo ita laloa bona idia ita matauraia, reana idia ese ita do idia badu henia lasi.

15-16. (a) Dahaka dainai ma haida dekenai oi abia dae gaudia gwauraia hedinarai be aonega karana? Ekspiriens ta gwauraia. (b) Edena dala ai Paulo ena hereva Roma 1:16 ai ita badinaia diba?

¹⁵ Emu komiuniti ai oi hahedinaraia oi be Iehova ena Witnes tauna ta. (Isa. 43:10) Bema emu  ruma bese ai ta ia mase bona Baibel ese ia taravatua kastom karana ta lalonai oi vareai lasi, emu varavara bona dekena taudia be do idia badu. Namona be nega bada lalonai idia dekenai oi abia dae gaudia oi herevalaia. Francisco, Mozambique ai ia noho tauna, ia gwau: “Lau bona egu adavana Carolina be hereva momokani ai dibaia neganai, emai ruma bese taudia ai hadibaia ai ruaosi be mase taudia do ai tomadiho henidia lasi. Carolina ena kakana ia mase neganai unai ese emai abidadama ia tohoa. Emai gabu ena kastom karana ta be, mase tauanina hadigua karana be tomadiho karana ta ai idia halaoa. Unai dainai mase tauna ena kakana o tadina be dina toi lalonai mase tauanina idia hadigua ranuna idia bubua gabuna dekenai do ia mahuta. Idia gwau unai kastom karana be mase taudia matauraia karana. Edia ruma bese taudia idia ura Carolina be mase tauanina idia hadigua gabuna dekenai do ia mahuta.”

¹⁶ Francisco bona ena adavana be dahaka idia karaia? Francisco ia gwau: “Iehova ai lalokau henia bona ai ura ia ai hamoalea dainai, unai kastom karana lalonai ai vareai lasi. Carolina ena ruma bese taudia be idia badu dikadika. Idia gwau ai be mase tauna ai matauraia lasi bona ai do idia vadivadi henia bona durua lasi. Ai abia dae gaudia be idia dekenai ai herevalaia vadaeni, unai dainai idia badu lalonai ai ura lasi idia ai hereva henia. Emai varavara haida be emai abia hidi idia lalopararalaia bona idia gwau ai abia dae gaudia be ai herevalaia vadaeni. Gabeai, Carolina ena varavara bona ai be maino ai karaia. Bona haida be emai ruma dekenai idia mai bona Baibel pablikeisen haida idia abia.” Namo lasi Baibel ena hereva momokani gwauraia hedinarai totona ita hemarai, badina ita diba mase dainai idia vara hahediba herevadia be koikoi.​—Roma 1:16 duahia.

17. Bema Keristani tadikaka ta o taihu ta be mase dainai ia lalohisihisi, edena dala ai ita be iena tura korikorina ai ita lao diba?

¹⁷ Bema Keristani tauna ta ena ruma bese lalonai ta ia mase, namona be ia dekenai ita be “tura korikorina” bona “hekwakwanai negadia ai” ia be tadikaka korikori ta bamona ia ita durua. (Aon. 17:17, NWT) Bema tadikaka ta o taihu ta be ena varavara ese idia doria Baibel ese ia taravatua kastom karana ta lalonai ia vareai totona, edena dala ai ita be “tura korikorina” ta ai ita lao diba? Baibel ena hakaua herevadia rua ese ita do  ia durua mase dainai idia lalohisihisi taudia ita hagoadaia totona.

18. Dahaka dainai Iesu ia tai, bona iena haheitalai amo dahaka ita dibaia?

¹⁸ “Idia taitai taudia ida umui taitai.” (Roma 12:15) Reana mase dainai ia lalohisihisi tauna dekenai ita diba lasi dahaka do ita gwauraia. To bema ita idia itaia ita tai neganai, do idia diba edia hemami ita laloa bada. Iesu ena turana Lasaro ia mase neganai, Maria, Mareta bona ma haida be edia tadikaka bona edia turana totona idia taitai. Dina foa murinai Iesu ia ginidae neganai, ia danu ia tai ena be ia diba Lasaro do ia hatoreaisi lou. (Ioa. 11:17, 33-35) Iesu ia tai ese ia hahedinaraia Lasaro ia mase neganai Iehova be ia hebogahisi danu. Unai ese ia hahedinaraia Iesu be Lasaro ena ruma bese taudia ia lalokau henia bada. Unai hegeregerena, iseda tadikaka taihu ese iseda lalokau karana idia itaia neganai, do idia diba idia be sibona idia noho lasi, to idia laloa bada tura korikoridia idia noho.

19. Mase dainai ia lalohisihisi Keristani tauna ita hagoadaia neganai, edena dala ai Hadibaia Tauna 3:7 ena hereva ita badinaia diba?

¹⁹ “Regerege lasi dekenai ita noho be mai ena nega, bona do ita herevahereva danu be mai ena nega.” (Had. 3:7) Mase dainai ia lalohisihisi Keristani tauna ta ita hagoadaia dalana ta be, ia hereva neganai ita kamonai namonamo. Namona be iseda tadikaka ena lalohekwarahi gauna ia gwauraia neganai, ita kamonai bona ita hereva haraga lasi. (Iobu 6:2, 3) Ia lalometau badina iena Witnes lasi varavara ese ia idia doria Baibel ese ia taravatua kastom karadia lalonai ia vareai totona. Unai dainai ia ida oi guriguri. Dirava oi noia unai amo ena lalona do ia hagoadaia bona ia dekenai laloparara ia henia totona. (Sal. 65:2) Bema ia hegeregere, ia ida Baibel oi duahia. Eiava ia ida mase dainai idia lalohisihisi taudia durua daladia edia atikol haida o mauri sivarai haida oi duahia.

20. Stadi atikol 17 ai dahaka do ita herevalaia?

²⁰ Ita moale badina Baibel ena hereva momokani bona idia mase taudia totona vaira nega ena helaro ita dibaia! (Ioa. 5:28, 29) Unai dainai, iseda kara bona hereva amo Baibel ena hereva momokani ita gimaia bona dala ia kehoa neganai ma haida dekenai ita gwauraia hedinarai. Stadi atikol 17 ai, Satani ese iena hahediba hereva koikoidia amo taunimanima ia koia dalana ma ta do ita herevalaia​—unai be meamea karadia. Danu Satani bona ena demoni ese moale karadia ai idia atoa tarapu ita dadaraia ena badina do ita herevalaia.