1. Ita ibounai ese dahaka ita karaia be namo?

BEMA oi diba heau helulu ta be ia auka, do oi heau ena be oi gorere eiava hesiku, a? Reana lasi. To, aposetolo Paulo ia gwau, Keristani taudia momokanidia be heau helulu ta lalonai idia noho. (Heb. 12:1) Bona ita ibounai, matamata eiava buruka, goada eiava hesiku, ita haheauka ela bona dokona be namo bema ita ura Iehova ese ita dekenai ia henia ahuna ita abia.​—⁠Mat. 24:13.

2. Timoteo Iharuana 4:7, 8 ena hereva bamona, dahaka dainai Paulo be mai moale ida ia hereva?

² Paulo be mai moale ida ia gwau ena ‘heau helulu ia haorea vadaeni.’ (2 Timoteo 4:7, 8 duahia.) To, Paulo be edena heau helulu ia herevalaia?

3. Paulo be edena heau helulu ia herevalaia?

³ Paulo be nega haida mai anina bada gaudia ia hadibaia totona, idaunegai Greek taudia ese idia karaia gadara ai idia gaukaralaia gaudia ia herevalaia. (1 Kor. 9:25-27; 2 Tim. 2:5) Nega momo Paulo ese Keristani mauri dalana ia herevalaia totona, ia ese heau helulu lalonai idia heau taudia edia haheitalai ia gaukaralaia. (1 Kor. 9:24; Gal. 2:2; Fili. 2:16) Ta be Iehova dekenai ena mauri ia gwauhamatalaia bona bapatiso ia abia neganai, ia be unai “heau helulu” lalonai ia vareai. (1 Pet. 3:21) Iehova ese ia dekenai mauri hanaihanai ena ahuna do ia henia bema heau helulu ia hagugurua.​—Mat. 25:31-34, 46; 2 Tim. 4:8.

4. Inai atikol ai dahaka do ita herevalaia?

⁴ Keristani mauri dalana bona heau helulu korikorina ai dahaka gaudia idia hegeregere? Gau haida be idia hegeregere.  Mani unai gaudia toi ita herevalaia. Ginigunana, namona be dala maorona ita badinaia; iharuana, heau helulu hagugurua karana ita laloa; bona ihatoina, heau helulu lalonai idia vara hahetoho ita haheaukalaia.

5. Edena dala ita badinaia be namo, bona dahaka dainai?

⁵ Heau helulu korikorina ai ahuna idia ura abia taudia be gadara idia biagua taudia ese idia abia hidi dala idia badinaia be namo. Unai hegeregerena, bema ita ura mauri hanaihanai ena ahuna ita abia, Keristani mauri dalana ita badinaia be namo. (Kara 20:24; 1 Pet. 2:21) To, Satani bona iena murinai idia raka taudia be idia ura lasi Keristani mauri dalana ita badinaia; badina idia ura ‘idia ida unai kara dikadia ita karaia noho.’ (1 Pet. 4:4) Idia ese ita badinaia mauri dalana idia kirikirilaia bona idia gwau, idia badinaia mauri dalana be namo, bona ia be auka lasi. To, idia gwauraia hereva be koikoi.​—2 Pet. 2:19.

6. Brian ena ekspiriens amo dahaka oi dibaia?

⁶ Satani ena tanobada idia badinaia taudia be gabeai idia diba, idia be dala kererena idia badinaia; idia be sibona edia ura idia badinaia bona Satani ena igui hesiai taudia ai idia lao. (Roma 6:16) Mani Brian ena haheitalai oi laloa. Iena tama sina ese idia hagoadaia Keristani mauri dalana ia badinaia totona. To, ia be mero matamata neganai ia daradara bema ia abia hidi dalana ese ia dekenai moale do ia havaraia eiava lasi. Brian be abia hidi ia karaia Satani ena dala idia badinaia taudia ia bamoa totona. Ia gwau, “Unai nega ai lau diba lasi, lau ura henia mauri dalana ese gabeai lau dekenai hekwakwanai momo do ia havaraia. Gabeai, drag dikadia idauidau lau gaukaralaia, alkahol lau inua bona matabodaga karadia lau karaia. Lagani haida murinai, drag aukadia lau tohoa bona unai gaudia ese lau ia biagua bamona. . . . Drag lau hoihoilaia matamaia unai amo drag ma haida lau hoia diba.” Gabeai, Brian be abia hidi ia karaia Iehova ena taravatu ia badinaia totona. Ia be ena mauri dalana ia haidaua bona lagani 2001 ai bapatiso ia abia. Hari ia moale bada badina ia be Keristani mauri dalana ia badinaia noho. *

7. Mataio 7:13, 14 ese edena dala rua ia herevalaia?

⁷ Dala maorona ita abia hidi bona ita badinaia be mai anina bada! Satani ia ura lasi ita ibounai ese “mauri ia lao henia” dala maragina ita badinaia, to ia ura inai tanobada ai taunimanima momo ese idia ura henia dala badana ita badinaia. Taunimanima momo be unai dala idia diba bona ia auka lasi oi badinaia  totona. To unai be “mase ia lao henia” dalana. (Mataio 7:13, 14 duahia.) Dala maorona ai ita heau noho bona Iehova ena taravatu idia badinaia lasi taudia ita dadaraia totona, Iehova ita abidadama henia bona ita kamonai henia be namo.

8. Bema heau helulu tauna ta ia moru, dahaka do ia karaia?

⁸ Heau helulu taudia be edia vairanai ia noho dala sibona do idia itaia, unai amo do idia moru lasi. To, reana idia ida ia heau tauna ta ese idia ia bampaia eiava guri ta lalonai idia moru diba. Bema idia moru, idia toreisi bona idia heau noho. Idia ia hamorua gaudia idia laloa lasi, to heau helulu ena dokonai do idia abia ahuna idia laloa.

9. Bema ita moru, dahaka ita karaia be namo?

⁹ Iseda heau helulu ai, nega momo do ita moru, reana ita karaia gauna ta eiava ita gwauraia gauna ta dainai kerere ia vara. Eiava ita heau hebou taudia ese idia karaia kerere dainai hahisia ita abia diba. Unai ia vara neganai, ita hoa lasi. Ita ibounai be goevadae lasi taudia, bona mauri ia lao henia dala maragina dekenai ita heau noho. Unai dainai nega haida iseda kara eiava hereva dainai ma ta ita hahisia diba. Paulo ia laloparara, nega haida ita be badina ma haida dainai ta ta dekenai do ita “maumau” diba. (Kol. 3:13) Namo lasi ita idia hahekwakwanaia gaudia ita laloa momo, to namona be iseda vairanai ia noho ahuna ita laloa. Bema ita moru, namona be ita toreisi bona ita heau noho. Bema ita badu bona ita ura lasi toreisi, iseda heau helulu do ita hagugurua lasi bona ahuna do ita abia lasi. Danu, bema unai bamona ita karaia, mauri ia lao henia dala maragina dekenai idia heau taudia edia dala ita koua diba.

10. Edena dala ai ma haida dekenai “hahekwakwanaia gauna ta” ita atoa lasi?

¹⁰ Ita ida idia heau hebou taudia dekenai “hahekwakwanaia gauna ta” ita atoa lasi totona, namona be edia lalohadai ita kamonai danu, namo lasi iseda ura sibona idia badinaia. (Roma 14:13, 19-21; 1 Kor. 8:9, 13) Inai mai anina bada gaudia ese idia hahedinaraia ita be heau helulu korikorina ai idia heau taudia bamona lasi. Badina idia be heau helulu taudia ma haida ida idia kara helulu, bona idia ta ta idia hekwarahi sibona totona ahuna  idia abia. Unai heau helulu taudia be sibona edia ura idia laloa bada. Unai dainai do idia ura heau helulu taudia ma haida idia doria bona idia heau hanaia. To, ita be idau badina ma haida ida ita kara helulu lasi. (Gal. 5:26; 6:4) Iseda tahua gauna be taunimanima momo ita durua ita ida heau helulu ita hagugurua bona mauri ena ahuna ita abia totona. Unai dainai Paulo ena sisiba ita badinaia, ia gwau, ‘sibona iseda namo do ita laloa lasi, to ma haida edia namo danu do ita laloa.’​—⁠Fili. 2:4.

11. Heau helulu tauna be dahaka do ia laloa, bona dahaka dainai?

¹¹ Heau helulu korikorina ai idia heau taudia be edia vairana ai ia noho dala sibona idia itaia lasi, to heau helulu ena dokona idia laloa danu. Ena be edia matana korikori amo unai idia itaia lasi, to heau helulu idia hagugurua bona ahuna idia abia karana idia laloa diba. Do idia abia ahuna idia laloa karana ese idia ia hagoadaia idia heau noho totona.

12. Iehova be ita dekenai dahaka gwauhamata ia henia?

¹² Iseda heau helulu ai, Iehova be ena taunimanima dekenai ia gwauhamata heau helulu idia hagugurua taudia dekenai ahuna namona ta​—⁠mauri hanaihanai guba ai eiava tanobada paradaisona ai do ia henia. Baibel ese unai hahenamo ia herevalaia, unai dainai ita diba mauri namona do ita moalelaia. Iseda lalona ai unai helaro ita laloa noho neganai, hahekwakwanaia gauna ta ese iseda heau dalana do ia koua diba lasi.

13. Edena dala ai heau helulu korikorina ai idia heau taudia ita hereaia?

¹³ Grik ena heau helulu gadara dekenai idia heau taudia be tohoa gaudia, hegeregere hesiku karana bona hisihisi idia hanaia. To, idia be edia treinini bona edia goada dekenai idia tabekau. Ita be unai heau helulu taudia bamona, treinini ita abia iseda heau helulu ita hagugurua totona. To, ita ese unai heau helulu korikorina ai idia heau taudia ita hereaia. Ita be Iehova amo ia ore diba lasi siahuna ita abia diba. Bema Iehova ita abidadama henia, ia gwauhamata ita dekenai treinini do ia henia sibona lasi, to ita do ia hagoadaia danu!​—1 Pet. 5:10.

14. Edena dala ai 2 Korinto 12:9, 10 ese ita ia durua hahetoho ita haheaukalaia totona?

¹⁴ Paulo be hahetoho momo ia haheaukalaia. Ia idia gwauraia dika bona idia dagedage henia sibona lasi, to nega haida ena tauanina ia manoka bona ‘ginigini ta ese ena tauanina ia gwadaia bamona’ gauna ta ia haheaukalaia. (2 Kor. 12:7) Paulo be unai gaudia dainai ena hesiai gaukara ia hadokoa lasi, to ia laloa unai ese dala ia kehoa Iehova dekenai ia tabekau totona. (2 Korinto 12:9, 10 duahia.) Paulo be lalohadai maorona ia abia dainai, ena hahetoho ibounai lalonai Iehova ese ia durua.

15. Bema Paulo ita tohotohoa, dahaka namo do ita davaria?

¹⁵ Ita danu be iseda abidadama dainai ita do idia gwauraia dika eiava dagedage henia. Danu, gorere ita haheaukalaia eiava ita hesiku diba. To, bema Paulo ita tohotohoa, unai hahetoho ta ta amo Iehova be mai lalokau ida ita ia durua dalana do ita mamia.

16. Dahaka oi karaia diba, ena be oi buruka eiava gorere?

¹⁶ Oi be emu bedi dekenai oi hekure sibona eiava wilsea dekenai oi helai, a? Emu tuina idia manoka eiava emu matana ena goada ia orea, a? Bema oibe, mai edia goada matamata taudia ida Iehova oi hesiai henia diba, a? Oibe, unai bamona oi karaia diba! Buruka bona gorere taudia momo be mauri ia lao henia dalana dekenai idia heau noho. Sibona edia goada amo unai gaukara idia karaia diba lasi. To, idia ese mobael fon bona idia rekodia  vidio amo Keristani heboudia idia kamonai neganai Iehova amo goada idia abia. Bona hahediba taudia halaoa gaukarana idia karaia totona, idia ese doketa taudia, nesi taudia bona edia varavara idia haroro henia.

17. Iehova ese edia goada ia maragi taudia be edena bamona ia laloa?

¹⁷ Namo lasi oi laloa emu goada ia maragi dainai mauri ia lao henia dalana dekenai oi heau diba lasi. Iehova be emu abidadama bona haheauka karana dainai oi ia lalokau henia. Hari Iehova ena heduru oi abia dae be namo, unai amo oi do ia rakatania lasi. (Sal. 9:10) To, oi kahirakahira do ia mai diba. Mani gorere dainai idia vara hekwakwanai idauidau ia haheaukalaia taihu ta oi laloa, ia gwau: “Egu gorere ia bada ia lao neganai, lau mamia ma haida dekenai hereva momokani harorolaia karana lau karaia momo lasi. To, lau diba lau karaia gaukara maragina ese Iehova ena kudouna ia hamoalea, bona unai lau moalelaia.” Bema oi lalomanoka, laloatao ma haida danu be unai bamona idia mamia. Mani Paulo ena haheitalai bona ena hagoadaia herevana oi laloa, ia gwau: “Ena be lau manoka, . . . to lau moale. Badina lau manoka neganai, goada bada lau abia.”​—2 Kor. 12:10.

18. Haida be edena bamona hekwakwanai idia davaria?

¹⁸ Mauri ena dala ai idia heau noho taudia haida be hahetoho ma haida idia davaria danu. Bona idia davaria hekwakwanai be ma haida ese idia itaia eiava lalopararalaia lasi. Hegeregere, idia be lalometau eiava lalohekwarahi momo idia haheaukalaia. Dahaka dainai Iehova ena hesiai taudia be unai bamona hekwakwanai idia davaria? Badina bema ta be ena imana ia makohia eiava wilsea dekenai ia helai, taunimanima ese unai idia itaia diba bona heduru do idia henia. To, bema ta be lalometau bona lalohekwarahi karana ia haheaukalaia noho, unai ita itaia diba lasi. Idia mamia hisihisi be ena aena ia makohia tauna ia abia hisihisi bamona, to ma haida ese edia hisihisi idia itaia diba lasi dainai idia dekenai lalokau bona hebogahisi idia hahedinaraia lasi.

19. Mepiboseta ena haheitalai amo dahaka ita dibaia?

¹⁹ Bema oi be mai emu gorere bona oi mamia ma haida ese oi idia laloa lasi, Mepiboseta ena haheitalai ese oi do ia durua. (2 Sam. 4:4) Ia be ena gorere ia haheaukalaia, bona King Davida ese ia kara namo henia lasi. Idia vara hekwakwanai be Mepiboseta ena kerere dainai ia vara lasi. To, ia be ia badu lasi; ia dekenai ia vara gau namodia sibona ia laloa. Ia be Davida ese guna ia dekenai ia hahedinaraia kara namona dainai ia moale. (2 Sam. 9:6-10) Unai dainai Davida ese ia kara namo henia lasi neganai, Mepiboseta be lalohadai maorona ia  abia. Ia be Davida ena kara dainai ia lalohisihisi lasi. Bona Davida ena kara dainai Iehova dekenai bleim ia atoa lasi. Mepiboseta be ia karaia diba gaudia sibona ia karaia Iehova ese ia abia hidi king ia durua totona. (2 Sam. 16:1-4; 19:24-30) Iehova ese Mepiboseta ena haheitalai namona be Baibel lalonai ia torea unai amo heduru ita abia diba.​—Roma 15:4.

20. Edena dala ai lalohekwarahi karana ese haida ia hahisia diba, to dahaka idia diba be namo?

²⁰ Tadikaka taihu momo be idia lalometau bada dainai, idia gari ma haida idia bamoa totona. Ena be idia hekwarahi taunimanima momo huanai idia noho, to kongrigeisen heboudia bona hebouhebou badadia dekenai idia lao noho. Danu, ena be ia auka idau taudia idia hereva henia totona, to haroro gaukara ai ma haida idia hereva henia. Bema oi be unai bamona oi mamia, namona be oi diba ma haida be unai bamona hemami idia abia danu. Laloatao, Iehova be mai kudouna ibounai ida oi karaia hesiai gaukara ia laloa bada. Emu hesiku lasi karana ese ia hahedinaraia Iehova be oi ia hanamoa noho bona goada ia henia. * (Fili. 4:6, 7; 1 Pet. 5:7) Bema oi be Iehova oi hesiai henia noho ena be emu tauanina ena goada be ia maragi, namona be oi diba momokani oi be Iehova oi hamoalea noho.

21. Iehova ena heduru dainai dahaka ita karaia diba?

²¹ Ita moale bada badina heau helulu korikorina bona Paulo ese ia herevalaia heau helulu ai gau haida idia idau. Baibel negadia ai, heau helulu tauna tamona be ahuna ia abia. To, Keristani mauri dalana dekenai mai haheauka ida idia heau taudia ibounai be mauri hanaihanai ena ahuna idia abia. (Ioa. 3:16) Bona heau helulu korikorina ai idia heau taudia ibounai edia tauanina ia goada be namo; bema lasi, do idia kwalimu lasi. Danu, ena be ita momo be mai iseda gorere to ita haheauka noho. (2 Kor. 4:16) Iehova ena heduru dainai, ita ibounai ese iseda heau helulu do ita hagugurua!