1. Baibel ese Iehova be edena bamona ia herevalaia bona dahaka dainai unai ese ita ia hagoadaia?

OI URA taunimanima ese emu kopina ena kala, emu vairana eiava tauanina ena toana dainai oi idia hahemaoro henia, a? Reana do oi ura lasi. Ita moale badina ita diba Iehova be taunimanima ese idia itaia gaudia hegeregerena ita ia hahemaoro henia lasi! Hegeregere, Samuela be Iese ena natudia dekenai Iehova ese ia itaia gauna ia itaia lasi. Iehova ese Samuela ia hamaoroa Iese ena natuna ta be Israela ena king ai do ia lao. To, unai be daika? Samuela ese Iese ena natuna roboana Eliaba ia itaia neganai, ia gwau: “Momokani, [Iehova] ese do ia abia hidi tauna be inai.” Eliaba ena toana be namo herea dainai Samuela ia laloa ia be king ai ia lao diba. “To [Iehova] ese Samuela ia hamaoroa, ia gwau, ‘Iena toana, o iena lata do oi laloa lasi, badina be lau ese lau ura henia lasi.’” Dahaka ita dibaia? Iehova ma ia gwau: “Taunimanima ese tau ena toana idia itaia, to [Iehova] ese tau ena kudouna ia itaia.”​—⁠1 Sam. 16:1, 6, 7.

2. Ioane 7:24 ena hereva bamona, dahaka dainai ta ena toana dainai ia ita hahemaoro henia lasi? Haheitalai gwauraia.

² Ita be goevadae lasi taudia dainai, nega momo taunimanima edia toana dainai idia ita hahemaoro henia. (Ioane 7:24 duahia.) To, iseda matana amo ta ita itaia karana sibona amo ia ita diba namonamo lasi. Mani inai haheitalai oi laloa, diba bada doketa ta be gorere tauna ena toana ia itaia sibona amo gorere tauna ena hemami ibounai do ia diba lasi. Namona be gorere tauna ena sivarai ibounai ia kamonai, unai amo gorere tauna ese guna ia davaria hekwakwanai haida bona iena gorere ese ia havaraia hisihisi (symptoms) idauidau do ia dibaia. Danu, doketa ese gorere tauna ena X-ray ia abia diba, unai amo tauanina  ena lalona do ia sekea. Bema lasi, doketa ese gorere tauna dekenai heduru maorona do ia henia lasi. Unai hegeregerena, iseda tadikaka taihu edia toana sibona ita itaia karana amo edia mauri ita lalopararalaia lasi. Namona be idia ita diba namonamo. Momokani, do ia auka ta ena kudouna ai ia laloa gaudia ita dibaia totona, unai dainai Iehova ese taunimanima edia mauri dalana ia lalopararalaia hegeregerena idia do ita lalopararalaia diba lasi. To, ita gaukara goada Iehova ita tohotohoa totona. Edena dala ai?

3. Edena dala ai inai atikol ai idia noho Baibel sivarai ese ita do ia durua Iehova ita tohotohoa totona?

³ Iehova ese ia idia tomadiho henia taudia be edena bamona ia kara henia? Ia ese idia ia kamonai henia. Ia ese edia noho dalana bona idia dekenai idia vara gaudia ibounai ia lalopararalaia. Bona idia ia hebogahisi henia. Iehova ese Iona, Elia, Hagara, bona Lota ia kara henia dalana ita stadilaia neganai, do ita itaia edena dala ai iseda tadikaka bona taihu ita kara henia neganai Iehova ena kara ita tohotohoa diba.

4. Dahaka dainai do ita laloa Iona be Dirava ia badinaia lasi tauna?

⁴ Iona ena sivarai ibounai ita diba lasi dainai reana do ita laloa ia be Dirava ia badinaia lasi tauna. Iehova ese ia hadibaia Nineva ai hahemaoro sivaraina do ia harorolaia totona. Iona be unai hahegani ia badinaia lasi, to bouti ai ia guia bona gabu idauna ma ta dekenai ia lao, Iehova amo “do ia heau” totona. (Iona 1:1-3) Bema unai be oi, Iona dekenai unai asainmen do oi henia lou, a? Reana lasi. To, Iehova be badina haida dainai Iona dekenai asainmen ia henia lou.​—Iona 3:1, 2.

5. Iona 2:1, 2, 9 ena hereva bamona, Iona amo dahaka oi dibaia?

⁵ Iona be ena guriguri amo ia hahedinaraia ia be edena bamona tauna. (Iona 2:1, 2, 9 duahia.) Iona be Iehova dekenai guriguri momo ia gwauraia bona unai guriguri ta lalonai ia hahedinaraia ia be tau namona. Iena guriguri herevadia ese idia hahedinaraia, ia be manau tauna, tanikiu karana ia hahedinaraia, bona ena lalona ia hadaia Iehova ia badinaia totona. Unai dainai Iehova ese ena kerere ia laloa lasi, to ena guriguri ia haerelaia, bona Iona ia gaukaralaia peroveta tauna ena gaukara ia karaia noho totona!

6. Dahaka dainai ita kamonai namonamo be namo?

⁶ Ma haida ita kamonai henia namonamo totona, ita manau bona haheauka be namo. Badina toi dainai unai bamona ita karaia. Ginigunana, karaharaga ma haida ita laloa kerere  lasi. Iharuana, iseda tadikaka bona taihu edia hemami bona edia kara ena badina ita laloa, bona idia ita hebogahisi henia. Bona ihatoina, iseda kamonai namonamo karana ese ta ia durua diba sibona ena kara ia lalopararalaia totona. Nega haida ta ese ena hemami korikori ia lalopararalaia lasi ela bona ma haida dekenai ena hemami ia herevalaia. (Aon. 20:5) Asia dekenai ia noho elda ta, ia gwau: “Lau laloatao, nega ta lau kamonai guna lasi bena lau hereva. Taihu ta lau hadibaia, namona be hebou dekenai haere ia henia karana ia hanamoa. Gabeai lau laloparara, ia be duahiduahi ia diba namonamo lasi, bona ia hekwarahi hebou dekenai haere ia henia totona.” Momokani, namona be elda taudia ese ‘hereva do idia kamonai guna’ gabeai sisiba idia henia!​—Aon. 18:13.

7. Iehova ese Elia ia kara henia dalana amo dahaka oi dibaia?

⁷ Iseda tadikaka bona taihu haida be edia noho dalana, kastom, eiava edia kara dainai ia auka edia hemami idia herevalaia totona. Edena dala ai idia ita durua diba ita dekenai edia hemami korikori idia herevalaia totona? Elia be Iesebele amo ia heau neganai, Iehova ese ia kara henia dalana mani oi laloa. Dina momo idia hanaia murinai Elia ese ena guba Tamana dekenai ena hemami ibounai ia herevalaia. Iehova be ia kamonai namonamo. Bena Elia ia hagoadaia bona ia dekenai mai anina bada gaukarana ta ia henia. (1 Kin. 19:1-18) Nega haida iseda tadikaka taihu be idia hemarai ita dekenai edia hemami idia herevalaia totona, to idia gwauraia hedinarai neganai edia hemami korikori do ita lalopararalaia. Bema Iehova ita tohotohoa bona ita haheauka, ita do idia abidadama henia bona mai gari lasi ida edia hemami idia herevalaia diba. Bena, edia hemami idia ura herevalaia neganai, namona be ita kamonai namonamo.

8. Genese 16:7-13 ena hereva bamona, edena dala ai Iehova ese Hagara ia durua?

⁸ Sara ena hesiai hahinena Hagara, be Aberamo ena adavana ai ia lao murinai kavakava karana ta ia karaia. Ia rogorogo neganai, Sara ia matauraia lasi badina Sara be natuna ia havaraia lasi. Unai hekwakwanai ia bada dainai Sara ese ia lulua. (Gen. 16:4-6) Ita be goevadae lasi taudia dainai, reana do ita laloa Hagara be ena kara dainai panisi ia abia. To, Iehova be unai bamona ia laloa lasi. Ia ese Hagara dekenai aneru ta ia siaia. Aneru ese Hagara ia davaria neganai, ia durua ena kara do ia haidaua totona bona ia hanamoa. Hagara ia mamia, Iehova ese ena hisihisi ibounai ia itaia bona ia dekenai idia vara gaudia ibounai ia diba. Bona mai moale bada ida ia gwau, “Oi be lau oi itaia noho Diravana.”​—Genese 16:7-13 duahia.

9. Dahaka dainai Dirava ese Hagara ia kara namo henia?

⁹ Iehova be Hagara dekenai dahaka ia itaia? Ia be Hagara ena mauri gunana, bona ia davaria hekwakwanai ibounai ia diba. (Aon. 15:3) Hagara be Aigupito hahinena bona ia be Iuda taudia edia ruma ai ia noho. Nega haida ia mamia ia idia laloa bada lasi, a? Iena ruma bese bona ena hanua ia reaia, a? Ia sibona be Aberamo ena adavana lasi. Guna, abidadama tatau haida edia adavana be momo. To, unai be Iehova ena ura hegeregerena lasi. (Mat. 19:4-6) Ita hoa lasi badina unai ese mama bona badu karana ia havaraia. Iehova ia diba Hagara ese Sara ia matauraia lasi karana be kerere, to ita diba Hagara ena hemami bona noho dalana ia lalopararalaia dainai ia kara namo henia.

10. Edena dala ai iseda tadikaka bona taihu ita dibaia namonamo?

¹⁰ Iehova ita tohotohoa diba bema iseda tadikaka bona taihu ita diba namonamo. Emu tadikaka bona taihu oi dibaia namonamo. Hebou  ia do matamaia lasi bona hebou murinai oi hereva henidia, idia ida oi haroro hebou, bona bema hegeregere idia oi invait umui aniani hebou totona. Bema unai bamona oi karaia, do oi diba taihu ta be ia hemarai dainai ma haida ia bamoa lasi, eiava oi laloa tadikaka ta be kohu ia laloa bada to ia be heabidae tauna, eiava hanaihanai hebou dekenai idia leiti ruma bese ta be dagedage idia haheaukalaia noho. (Iobu 6:29) Momokani, namo lasi ‘ma haida edia mauri lalonai idia vara gaudia ita kikilaia.’ (1 Tim. 5:13) To, iseda tadikaka bona taihu edia noho bona mauri dalana ita dibaia be namo.

11. Dahaka dainai elda taudia ese edia tadikaka bona taihu idia diba namonamo be namo?

¹¹ Elda taudia ese edia henari henunai idia noho tadikaka bona taihu idia diba namonamo be namo. Sekit gaukara ia karaia tadikaka ta ladana Artur ena haheitalai mani oi laloa. Artur bona elda ma ta be ia hemarai momo taihu ta idia vadivadi henia. Artur ia gwau: “Ai davaria unai taihu be ia headava bona daudau lasi murinai ena adavana ia mase. Herevana ena mauri be ia auka, to ena natuna kekeni rua ia durua Iehova ena abidadama hesiai taudia ai idia lao totona. Hari, ena matana ena goada ia maragi ia lao bona ia lalometau bada. To, iena lalokau bona abidadama karana Iehova dekenai be ia goada. Ai laloparara, unai taihu ena haheitalai namona amo gau momo ai dibaia.” (Fili. 2:3) Unai sekit tauna be Iehova ena haheitalai ia badinaia. Iehova be ena abidadama hesiai taudia ia diba bona idia davaria hisihisi ia diba. (Eso. 3:7) Edia tadikaka bona taihu idia diba namonamo elda taudia be heduru namona idia henia diba.

12. Edena dala ai Yip Yee be kongrigeisen ai ia noho taihu ta ia dibaia namonamo karana amo namo ia abia?

¹² Nega momo oi ia habadua Keristani tadikaka o taihu ta ena kara oi dibaia namonamo neganai, do oi hebogahisi henia. Mani inai haheitalai oi laloa. Asia dekenai ia noho taihu ta ladana, Yip Yee ia gwau: “Egu kongrigeisen dekenai ia noho taihu ta be ia hereva neganai ena gadona ia habadaia. Lau mamia ia be hemataurai karana ia hahedinaraia lasi. To, ia ida lau haroro neganai, lau laloparara ia be guna ena tama sina ia durua maketi dekenai gwarume idia hoihoilaia totona. Ia be ena gadona ia habadaia unai amo gwarume hoia taudia idia kamonai diba.” Yip Yee ma ia gwau: “Egu tadikaka bona taihu edia kara lau lalopararalaia totona, idia lau diba namonamo be namo.” Emu tadikaka bona taihu oi dibaia namonamo totona be mai ena hekwarahi. To, Baibel ena hakaua herevana emu lalokau  habadaia karana dekenai oi badinaia neganai, oi ese Iehova, “taunimanima idauidau” ia lalokau henia Diravana, do oi tohotohoa.​—1 Tim. 2:3, 4; 2 Kor. 6:11-13.

13. Genese 19:15, 16 ena hereva bamona, Lota be ia karaharaga lasi neganai aneru be dahaka idia karaia, bona dahaka dainai?

¹³ Nega ta, Lota be Iehova ena hakaua herevana ia badinaia haraga lasi. Aneru rua be Lota idia vadivadi henia bona idia hamaoroa ena ruma bese ida Sodoma idia rakatania totona. Dahaka dainai? Idia gwau: “Inai gabu do ai hadikaia ore.” (Gen. 19:12, 13) Daba ia rere neganai, Lota bona ena ruma bese be ruma dekenai idia do noho. Unai dainai aneru ese Lota idia hadibaia lou. To, Lota be “ia haraga lasi.” Reana do ita laloa Lota be Iehova ena hahegani ia laloa bada lasi, eiava ia kamonai lasi. To, Iehova be Lota dekenai ia hesiku lasi. Iehova ese ia “bogahisihisi” henia dainai, aneru ese ena ruma bese edia imana idia dogoatao bona hanua ena murimuri dekenai idia lao.​—Genese 19:15, 16 duahia.

14. Dahaka dainai Iehova ese Lota ia hebogahisi henia?

¹⁴ Iehova be badina momo dainai Lota ia hebogahisi henia. Reana Lota be hanua ena murimurina ai idia noho taudia ia gari henia dainai, ia ura lasi ena ruma ia rakatania. Unai sibona lasi, to gau ma haida danu. Lota be reana idia kahirakahira ia noho koura ta ai, guri ta mai ena pisi (bitumen) lalonai idia moru king rua edia sivarai ia diba. (Gen. 14:8-12) Lota be headava tauna bona tama ta dainai, ena ruma bese taudia totona ia lalohekwarahi. Danu, Lota be taga tauna dainai, reana Sodoma dekenai ia be ruma namona ta ai ia noho. (Gen. 13:5, 6) Momokani, unai be badina maorodia lasi Lota ese Iehova ena hahegani ia badinaia haraga lasi. To, Iehova ese Lota ena kerere ia laloa lasi bona “kara maoromaoro tauna” bamona ia laloa.​—2 Pet. 2:7, 8.

15. Namo lasi ta ena kara dainai ia ita hahemaoro henia, to dahaka ita karaia be namo?

¹⁵ Namo lasi ma ta ena kara dainai oi hahemaoro henia, to ena hemami oi lalopararalaia be namo. Europe ai ia noho taihu ta ladana Veronica, be unai bamona ia karaia. Ia gwau:  “Taihu ta be nega momo ia badu. Ia ura lasi ma haida ia bamoa. Nega haida lau gari ia lau hereva henia totona. To, lau laloa, ‘Bema lau be ia bamona, do lau ura ta ese lau ia durua.’ Unai dainai lau nanadaia ena hemami be edena bamona. Bena lau dekenai ena hemami ia herevalaia! Hari ia lau diba namonamo.”

16. Dahaka dainai hebogahisi karana ita hahedinaraia totona, ita guriguri be namo?

¹⁶ Iehova sibona be iseda mauri dalana ibounai ia lalopararalaia. (Aon. 15:11) Unai dainai Ia oi noia oi ia durua ma haida ia laloa bamona idia oi laloa, bona idia do oi hebogahisi henia dalana do oi lalopararalaia. Taihu ta ladana Anzhela, be guriguri karana ese ia durua ma haida ia hebogahisi henia totona. Iena kongrigeisen ai ia noho taihu ta ena kara be auka. Anzhela ia gwau: “Ia auka lasi unai taihu lau gwauraia dika bona lau dadaraia totona. To, gabeai Iehova lau noia lau ia durua unai taihu ena kara lau lalopararalaia totona.” Iehova ese Anzhela ena guriguri ia haerelaia, a? Anzhela ma ia gwau: “Ai ruaosi ai haroro hebou bona unai murinai hora momo lalonai ai herevahereva. Mai hebogahisi ida ia lau kamonai henia. Hari, ia lau lalokau henia bada, bona egu lalona lau hadaia ia do lau durua totona.”

17. Iseda lalona ita hadaia dahaka ita karaia totona?

¹⁷ Abia hidi oi karaia diba lasi edena tadikaka eiava taihu oi hebogahisi henia totona. Idia ibounai be Iona, Elia, Hagara, bona Lota bamona hekwakwanai idia davaria danu. Nega momo, idia dekenai ia vara hekwakwanai be sibona ese idia havaraia. Momokani, nega ta ita dekenai unai ia vara danu. Unai dainai Iehova ia ura ma haida edia hemami ita laloa. (1 Pet. 3:8) Iehova ita kamonai henia neganai, tanobada hegegemadai ai, iseda ruma bese ena lalotamona karana ita hagoadaia noho. Unai dainai ma haida ita kara henia neganai, namona be idia ita kamonai henia, edia noho dalana ita lalopararalaia, bona hebogahisi karana ita hahedinaraia.