Dahaka dainai Iesu ia mase gwauraia neganai, Davida ena hereva Salamo 22:1 ai ia gwauraia?

Iesu ia mase gwauraia neganai, ia gwauraia herevana be Mataio 27:46 ai idia torea, ia gwau: “Egu Dirava e, egu Dirava e, dahaka dainai lau oi rakatania?” Iesu be unai hereva ia gwauraia amo, ia ese Davida ena hereva Salamo 22:1 ai ia hagugurua. (Mar. 15:34) Namo lasi ita laloa Iesu be ia lalohisihisi, eiava iena abidadama ia manoka dainai unai hereva ia gwauraia. Iesu be do ia mase ena anina ia lalopararalaia dainai, ia ura do ia mase. (Mat. 16:21; 20:28) Danu ia diba kahirakahira ia mase neganai, Iehova ese ena “gimaia” karana be ia amo do ia kokia. (Iobu 1:10) Ena be Iehova ese ia gimaia lasi, to Iesu be mai abidadama ida ena mase ena hisihisi ia haheaukalaia.​—Mar. 14:35, 36.

Dahaka dainai Iesu ese Salamo ena hereva ia gwauraia? Ena be ita diba namonamo lasi, to badina haida do ita herevalaia. *

Iesu be unai hereva ia gwauraia anina be Iehova ese ena mase do ia koua lasi, a? Ena be Iehova ese ia durua lasi, to Iesu ese unai mauri davana do ia karaia. Ia be taunimanima ta dainai, “taunimanima ibounai totona ia mase” be namo.​—Heb. 2:9.

Iesu be Salamo ena hereva haida ia gwauraia neganai, ia ura taunimanima be Salamo karoa 22 ena hereva ibounai do idia laloa, a? Vaia unai negai, Iuda taudia  momo be Salamo bukana ena siri momo idia laloatao. Idia be Salamo ena siri ta idia kamonai neganai, unai Salamo ena karoa ibounai idia laloatao. Bema Iesu be unai bamona ia laloa, reana ia murinai idia raka Iuda taudia do ia durua Salamo ese iena mase ia perovetalaia herevadia momo do idia laloatao totona. (Sal. 22:7, 8, 15, 16, 18, 24) Unai Salamo ena siri dokodia ese Iehova idia hanamoa bona idia gwau ia be tanobada ibounai ena king.​—Sal. 22:27-31.

Iesu be Davida ena hereva ia gwauraia neganai, ia hahedinaraia ia be kerere ta ia karaia lasi, a? Iesu idia do hamasea lasi neganai, dala kererena ai idia kota henia, bona idia gwau Dirava ena ladana ia hadikaia, to Iesu ia haheauka. (Mat. 26:65, 66) Sanhedrin be idia haboua haraga, bona hanuaboi momokani ai kota idia karaia, to unai be taravatu hegeregerena lasi. (Mat. 26:59; Mar. 14:56-59) Iesu be haere abia totona unai henanadai ia gwauraia lasi, to reana ia ura hahedinaraia ia be kerere ta ia karaia lasi bona idia hamasea be maoro lasi.

Iesu ena hereva ese ia hahedinaraia Iehova be Davida ia lalonamo henia lasi dainai, Davida ena hisihisi ia koua lasi, a? Davida ena henanadai ese ia hahedinaraia lasi ena abidadama ia manoka. Unai henanadai ia henia murinai ia gwau, ia abidadama Iehova ese ena taunimanima do ia hamauria, bona Iehova ese ia hanamoa noho. (Sal. 22:23, 24, 27) Unai hegeregerena, ena be Iesu, “Davida ena Natuna,” be hisihisi auna ai hisihisi ia mamia, to Iehova ese ia lalonamo henia noho.​—Mat. 21:9.

Iesu be iena badinaia karana ia hamomokania totona, Iehova ese ena gimaia karana be ia amo ia kokia dainai ia lalohisihisi, a? Iesu be hisihisi do ia mamia bona do ia mase be Iehova ena ura korikorina lasi. Adamu bona Heva idia gwau-edeede murinai, Iehova ese unai palani ia karaia. Iesu be kerere ta ia karaia lasi, to hisihisi do ia mamia bona do ia mase. Badina Satani ena hepapahuahu ia haerelaia bona taunimanima hoia totona mauri davana ia karaia. (Mar. 8:31; 1 Pet. 2:21-24) Unai do ia hagugurua diba bema Iehova ese nega sisina sibona lalonai Iesu gimaia karana ia kokia.

Iesu ia ura ia murinai idia raka taudia do ia durua ia mase ena badina idia laloa totona, a? * Iesu ia diba kara dika tauna bamona hisihisi auna ai ia mase karana ese taunimanima do ia hahekwakwanaia. (1 Kor. 1:23) Bema ia murinai idia raka taudia be ia mase ena badina idia laloa, ena anina korikorina do idia lalopararalaia. (Gal. 3:13, 14) Unai amo do idia laloa lasi ia be kara dika tauna, to ia be Hamauria Tauna.

Herevana dahaka dainai Iesu be Salamo 22:1 ena hereva ia gwauraia, to ia laloparara ia mase ena badina be Iehova ena ura karaia totona. Salamo ena siri ia gwauraia murinai, Iesu ia gwau: “Lau hagugurua vadaeni!” (Ioa. 19:30; Luka 22:37) Oibe, Iehova be nega sisina lalonai Iesu gimaia karana ia kokia, unai ese dala ia kehoa Iesu be tanobada dekenai ia mai ena badina ibounai ia hagugurua totona. Danu, Iesu ese “Mose ena Taravatu, Peroveta Taudia bona Salamo ai” idia torea hereva ibounai ia hagugurua.​—Luka 24:44.