1-2. Iesu ena hereva oredia ia do gwauraia lasi neganai, dahaka ia vara?

HARI dina be Nisan 14, 33 C.E. Iesu idia samania koikoi, idia gwau kara dikana ta ia karaia, ena be unai ia karaia lasi. Idia kirikirilaia, idia hahisia, bena hisihisi auna dekenai ikoko amo iena imana bona aena idia kokoa. Mai hisihisi ida laga ia veria bona ia hereva. To ia hereva be namo, badina ia ura mai anina bada gaudia ia gwauraia.

² Mani Iesu be hisihisi auna ai kahirakahira ia mase neganai, ia gwauraia gaudia bona unai hereva amo ita dibaia gaudia ita herevalaia. Unai ita karaia neganai ia do ita “kamonai henia.”​—Mat. 17:5.

3. Iesu ia gwau “egu tamana e, edia dika oi gwauatao” neganai, ia be daidia ia herevalaia?

³ Iesu be dahaka ia gwau? Iesu be au dekenai idia kokoa kau neganai, ia guriguri: “Egu tamana e, edia dika oi gwauatao.” Iesu ia ura iena Tamana ese daidia ia gwauatao? Haere be gabeai ia gwauraia herevana amo ita dibaia. Ia gwau: “Idia diba lasi dahaka idia karaia noho.” (Luka 23:33, 34) Iesu be au dekenai iena aena bona imana idia kokoa Roma soldia taudia ia herevalaia. Idia diba lasi Iesu be daika. Danu ia hamasea totona idia boiboi hutuma ia lalodia, idia haida be gabeai ia do idia abidadama henia. (Kara 2:36-38) Iesu be ia idia hahisia taudia dekenai ia badu lasi. (1 Pet. 2:23) To, Iehova ia noia ia idia ura hamasea taudia edia dika ia gwauatao totona.

4. Iesu ese mai ura ida dika ia gwauatao karana amo dahaka ita dibaia?

 ⁴ Iesu ena hereva amo dahaka ita dibaia? Iesu bamona, namona be mai iseda ura ida ma haida ita gwauatao. (Kol. 3:13) Hegeregere iseda varavara ese ita do idia inai henia, badina reana iseda abidadama o iseda mauri dalana idia lalopararalaia lasi. Reana ita do idia gwauraia koikoi, ma haida vairanai ita do idia hadikaia, iseda litrisa do idia hadikaia, eiava idia ura ita do idia hahisia. Idia ita badu henia lasi, to Iehova ita noia idia do ia durua unai amo dina ta idia ese hereva momokani do idia dibaia. (Mat. 5:44, 45) Nega haida reana do ia auka ma haida edia dika ita gwauatao, bema idia be ita idia hahisia bada. To bema ita badu noho bona edia dika ita gwauatao lasi, sibona do ita hahisia. Taihu ta ia gwau: “Ma haida edia dika lau gwauatao karana ese ia hahedinaraia lasi idia be maoro, eiava idia lau koua lasi lau idia dagedage henia totona. To lau ura edia dika lau gwauatao bona lau badu noho lasi.” (Sal. 37:8) Dika ita gwauatao neganai ita hahedinaraia ita ura lasi ita davaria dagedage karana dainai ita badu noho.​—Efe. 4:31, 32.

5. Iesu ese kara dika tauna dekenai dahaka ia gwauhamatalaia, bona dahaka dainai?

⁵ Iesu be dahaka ia gwau? Kara dika taudia rua danu be Iesu badinai, hisihisi auna dekenai idia kokoa kau. Matamanai, idia ruaosi ese Iesu idia kirikirilaia. (Mat. 27:44) To gabeai idia ta be unai kara ia hadokoa. Badina ia laloparara Iesu be “kerere ta ia karaia lasi.” (Luka 23:40, 41) Danu ia abia dae, Iesu be mase amo do ia toreisi lou, bona dina ta king ai do ia lao. Unai dainai ia gwau: “Iesu e, emu Basileia lalonai oi vareai neganai mani lau oi laloa.” (Luka 23:42) Unai tauna be Iesu ia abidadama henia momokani. Unai dainai, Iesu ese ia hamaoroa: “Hari dina oi lau hamaoroa momokani, oi be lau ida [Basileia lalonai lasi, to] Paradaiso ai do ita noho.” (Luka 23:43) Iesu ese inai hereva “lau” bona “oi” ia gaukaralaia neganai, ia hahedinaraia ia sibona ese unai kara dika tauna dekenai ia gwauhamata. Iesu ia diba iena Tamana be hebogahisi Diravana dainai, kara dika tauna dekenai unai gwauhamata ia gwauraia.​—Sal. 103:8.

6. Iesu ese kara dika tauna dekenai ia gwauraia herevadia amo dahaka ita dibaia?

⁶ Iesu ena hereva amo dahaka ita dibaia? Iesu be iena tamana ena kara ia hahedinaraia goevagoeva. (Heb. 1:13) Iehova ia ura dikadika iseda dika do ia gwauatao bona ita do ia hebogahisi henia, bema guna ita karaia kara dika dainai ita helalo-kerehai momokani bona ita abia dae Iesu Keriso ena rara amo iseda dika do ia gwauatao. (1 Ioa. 1:7) Haida idia abia dae lasi Iehova be guna idia karaia kerere do ia gwauatao. Bema nega haida unai bamona oi mamia, mani inai oi laloa, Iesu ia mase gwauraia neganai, abidadama ia hahedinaraia kara dika tauna dekenai hebogahisi ia hahedinaraia. Unai hegeregerena, Iehova be ia idia tomadiho henia taudia bona iena taravatu idia badinaia taudia dekenai hebogahisi ia hahedinaraia!​—Sal. 51:1; 1 Ioa. 2:1, 2.

7. Ioane 19:26, 27 ai Iesu ese Maria bona Ioane dekenai dahaka ia gwau, bona dahaka dainai?

⁷ Iesu be dahaka ia gwau? (Ioane 19:26, 27 duahia.) Iesu ena sinana be vabu dainai ia totona ia lalohekwarahi. Iena  tadina ese tauanina dalanai iena sinana idia naria diba. To daika ese do ia durua Iehova ia abidadama henia noho totona? Unai negai Iesu ena tadidia be ia idia do badinaia lasi. To Ioane be aposetolo tauna ta bona Iesu ena turana namona. Iesu ia abia dae ia ida Iehova idia tomadiho henia taudia be iena ruma bese. (Mat. 12:46-50) Iesu be Maria ia lalokau henia bada dainai Ioane ia noia ia do ia naria. Badina ia diba Ioane ese tomadiho dalanai iena sinana do ia durua. Ena sinana dekenai ia gwau: “Itaia! Emu natuna!” bona Ioane dekenai ia gwau: “Itaia! Emu sinana!” Unai dina amo Ioane be Maria ena natuna bamona ia lao, bona Maria be iena sinana bamona ia  naria. Iesu be iena sinana ia lalokau henia bada. Iena sinana ese ia totona gau momo herea ia karaia, bona ia mase neganai ia badinai ia gini!

8. Iesu ese Maria bona Ioane dekenai ia gwauraia herevadia amo dahaka ita dibaia?

⁸ Iesu ena hereva amo dahaka ita dibaia? Iseda Keristani tadikaka taihu huanai ia noho hetura karana ese iseda famili huanai ia noho hetura karana ia hereaia diba. Iseda varavara ese ita idia dagedage henia eiava ita do idia dadaraia, to Iesu ia gwauhamata bamona, Iehova bona Iena orea kahirakahira ita noho neganai, ita haboioa gaudia be “nega 100 amo do [ita] abia.” Momo be iseda natuna mero o kekeni bona tama o sina ai do idia lao. (Mar. 10:29, 30) Iehova bona idia lalokau heheni Keristani ruma bese huanai oi noho dainai emu hemami be edena bamona?​—Kol. 3:14; 1 Pet. 2:17.

9. Mataio 27:46 ai, Iesu ia gwauraia herevadia dekenai dahaka ita dibaia?

⁹ Iesu be dahaka ia gwau? Iesu ia mase gwauraia neganai, ia boiboi: “Egu Dirava e, egu Dirava e, dahaka dainai lau oi rakatania?” (Mat. 27:46) Iesu be unai hereva ia gwauraia ena badina be Baibel ese ia herevalaia lasi. Unai hereva amo dahaka ita dibaia? Ita dibaia gauna ta be, Iesu be unai hereva ia gwauraia amo, Salamo 22:1 ai ia noho peroveta herevana ia hagugurua. * Danu, unai hereva ese idia hahedinaraia Iehova be unai dina ai iena Natuna ia “gimaia” noho lasi. (Iobu 1:10) Iesu ia laloparara, ena inai taudia ese do idia tohoa bona ena tamana ese do ia gimaia lasi. Iesu ia davaria hahetoho be taunimanima edia hahetoho ia hereaia. Danu ia gwauraia herevadia ese idia hamomokania, ia be kerere ta ia karaia lasi, to kara dika tauna bamona idia hamasea.

10. Iesu ese ena Tamana dekenai ia gwauraia herevadia amo dahaka ita dibaia?

¹⁰ Iesu ena hereva amo dahaka ita dibaia? Ita dibaia gauna ta be, namo lasi ita laloa Iehova be iseda abidadama idia tohoa gaudia amo ita do ia gimaia. Iesu be hahetoho ia davaria ela bona ia mase, ita danu namona be ita hegaegae badina iseda abidadama dainai do ita mase diba. (Mat. 16:24, 25) To ita abia dae diba, Dirava be ita do ia rakatania lasi iseda goada ia hereaia hedibagani ita davaria totona. (1 Kor. 10:13) Ita dibaia gauna ma ta be Iesu hegeregerena reana ita do idia hahisia kava. (1 Pet. 2:19, 20) Ena be kerere ta ia karaia lasi, to ita do idia dagedage henia, badina ita be tanobada ena lasi bona hereva momokani ita gwauraia hedinarai. (Ioa. 17:14; 1 Pet. 4:15, 16) Iesu ia laloparara dahaka dainai ia davaria hisihisi be Iehova ese ia koua lasi. To abidadama taudia be nega haida idia laloa dahaka dainai idia davaria hisihisi be Iehova ese ia koua lasi. (Hab. 1:3) Iseda hebogahisi bona haheauka Diravana ia laloparara unai bamona taudia edia abidadama ia manoka lasi, to idia ura ia ese idia dekenai lalogoada do ia henia.​—2 Kor. 1:3, 4.

11. Dahaka dainai Iesu ese Ioane 19:28 ai ia noho herevana ia gwauraia?

¹¹ Iesu be dahaka ia gwau? (Ioane 19:28 duahia.) Dahaka dainai Iesu ia gwau: “Lau ranu mase”? Unai bamona ia hereva “Toretore Helagadia ena hereva hagugurua totona.” Unai peroveta herevana be Salamo 22:15 dekenai ia noho,  ia gwau: “Egu goada be ia ore, raro amo idia karaia uro bamona, Egu malana be egu uduna ataiai ia kamokau.” Danu Iesu be hisihisi auna ai hisihisi bada ia mamia, unai dainai reana ia ranu mase. Ia ura ta ese ranu ia henia.

12. Iesu ia gwau “lau ranu mase,” iena hereva amo dahaka ita dibaia?

¹² Iesu ena hereva amo dahaka ita dibaia? Iesu ia hemarai lasi iena hemami ia gwauraia hedinarai totona; ita danu be ia ita tohotohoa diba. Reana nega haida do ita ura lasi ma haida dekenai heduru ita noia. To bema nega ta heduru ita ura, namona be ita hemarai lasi ma haida ita noia totona. Hegeregere, bema ita be buruka eiava ita gorere, reana turana ta ita noia diba sitoa dekenai eiava doketa itaia totona ita ia abia lao diba. Bema ita lalomanoka, elda ta eiava lo turana namona ta ita hereva henia diba, unai amo iseda lalohekwarahi ia kamonai eiava iena “hereva namona” amo ita ia hagoadaia diba. (Aon. 12:25) Namona be ita laloatao, iseda tadikaka taihu be ita idia lalokau henia, bona “hekwakwanai negadiai,” idia ura ita idia durua. (Aon. 17:17) To idia be iseda hemami eiava lalohadai idia diba lasi. Unai dainai bema edia heduru ita ura, namona be idia ita hereva henia.

13. Iesu be Dirava ia badinaia ela bona ia mase dainai, dahaka ia hagugurua?

¹³ Iesu be dahaka ia gwau? Nisan 14, 3 oklok adorahi ai Iesu ia gwau: “Lau hagugurua vadaeni!” (Ioa. 19:30) Iesu be ia mase gwauraia neganai, ia diba Iehova ena ura ibounai ia hagugurua vadaeni. Iesu be Dirava ia badinaia ela bona ia mase dainai gau momo ia hagugurua. Gau ginigunana be, ia hamomokania Satani be koikoi tauna. Iesu ia hahedinaraia herevana Satani be dahaka ia karaia, to goevadae tauna be Iehova do ia badinaia noho diba. Iharuana, Iesu be mauri davana karaia totona, sibona ena mauri ia henia. Iena mauri ia bouboulaia dainai, kara dika taudia be Dirava idia tura henia diba, bona mauri hanaihanai idia abia diba. Ihatoina be, Iesu ese Iehova ena lohia siahuna ia abia isi, bona ena Tamana ena ladana ia hahelagaia.

14. Ita ura dina ta ta ai dahaka ita karaia? Herevalaia.

¹⁴ Iesu ena hereva amo dahaka ita dibaia? Namona be dina ta ta ai Dirava badinaia karana ita hahedinaraia. Mani Tadikaka Maxwell Friend ena hereva ita laloa, guna ia be Gilead sikuli ena instrakta. Intanesinol hebouhebou ta dekenai, Tadikaka Friend be abidadama karana ia herevalaia neganai, ia gwau: “Namo lasi hari dina oi karaia eiava gwauraia diba gauna be kerukeru totona oi rakatania. Badina oi diba lasi kerukeru be dahaka do ia vara. Dina ta ta be emu dina ginigabena bamona do oi laloa, bona oi hahedinaraia oi be hegeregere mauri hanaihanai oi abia totona.” Mani ita laloa, hari dina be iseda dina ginigabena Dirava badinaia karana ita hahedinaraia totona! Vadaeni, bema do ita mase, ita gwau diba, “Iehova egu mauri lalonai oi badinaia, lau hamomokania Satani be koikoi tauna, bona emu ladana bona lohia siahuna lau abia isi!”

15. Luka 23:46 bamona, Iesu be dahaka ia diba momokani?

¹⁵ Iesu be dahaka ia gwau? (Luka 23:46 duahia.) Iesu be ena Tamana ia abidadama henia momokani, unai dainai ia gwau: “Egu Tamana e, egu mauri be emu  imana dekenai lau atoa.” Iesu ia diba, iena vaira nega maurina be Iehova ena imana lalonai, bona ia diba momokani iena Tamana ese ia do ia laloatao.

16. Joshua ena haheitalai amo dahaka oi dibaia?

¹⁶ Iesu ena hereva amo dahaka ita dibaia? Emu mauri be Iehova ena imana lalonai oi atoa, ena be do oi mase diba. Unai oi karaia totona, “mai emu kudouna ibounai ida, Iehova oi abidadama henia.” (Aon. 3:5) Mani Witnes merona Joshua ena haheitalai ita laloa, iena mauri lagani be 15 bona ia be mai ena gorere badana. Ia be Dirava ena taravatu idia utua medikol heduru ia abia dae lasi. Kahirakahira do ia mase neganai, sinana ia hamaoroa: “Sinagu, Iehova ese lau do ia naria. . . . Sinagu mai abidadama ida oi lau hamaoroa: Lau diba momokani Iehova ese mase amo lau do ia hatoreaisi lou. Ia be egu lalohadai ia diba, bona ia lau lalokau henia.” * Namona be sibona do ita nanadaia, ‘Egu abidadama dainai do lau mase neganai, egu mauri be Iehova ena imana lalonai do lau atoa, bona lau abia dae momokani Ia ese lau do ia laloa, a?’

17-18. Dahaka mai anina bada gaudia ita dibaia? (Maua itaia: “ Iesu Ena Hereva Oredia amo Ita Dibaia Gaudia.”)

¹⁷ Iesu ena hereva oredia amo mai anina bada gaudia ita dibaia! Ita idia hadibaia namona be ma haida edia dika ita gwauatao, bona ita abia dae Iehova ese ita do ia gwauatao. Ita moale badina iseda Keristani famili lalonai, tadikaka taihu idia noho hegaegae ita idia durua totona. To heduru ita ura neganai, namona be idia ita noia. Ita diba herevana dahaka hahetoho ita davaria, to Iehova ese ita do ia durua. Mai anina bada gauna be, ita mauri noho lalonai Iehova badinaia karaia do ita hahedinaraia noho, badina ita diba bema ita mase Iehova ese ita do ia hatorea isi lou.

¹⁸ Momokani, Iesu ese hisihisi auna dekenai ia gwauraia herevadia amo gau momo ita dibaia! Ita dibaia gaudia ita badinaia neganai, ita be Iehova ena hereva ita badinaia noho, ia gwau: “Ia umui kamonai henia.”​—Mat. 17:5.