Keristani tauna ia headava lou bona unai headava ia hamomokania neganai, tadikaka taihu ese idia abia dae headava gunana be ia doko vadaeni. Unai ena badina idauidau ita lalopararalaia totona, Iesu ese divos bona headava lou karana ia gwauraia dalana mani ita laloa.

Mataio 19:9 ai, Iesu ese headava ia doko ena badina maorona ia herevalaia. Ia gwau: “Bema tau ta be matabodaga karadia dainai lasi, to badina ma ta dainai ena hahine ia divosia bona hahine ma ta ia adavaia, ia be ia heudahanai.” Iesu ena hereva amo, ita dibaia gauna be inai: (1) Matabodaga karana dainai ta ese ena adavana ia divosia diba, bona (2) tau be ena adavana ia divosia bona ia headava lou, to bema Baibel hegeregerena lasi, unai be heudahanai karana.

Iesu ena hereva ena anina be, tau be matabodaga karadia ia karaia bona ena adavana ia divosia dainai, Baibel ena hereva hegeregerena do ia headava lou, a? Lasi. Headava lalonai ta ia heudahanai neganai, ia kerere lasi tau o hahine ese disisen ia karaia diba ena adavana ena dika do ia gwauatao eiava lasi. Bema ia kerere lasi hahine ese ena adavana ia abia dae lasi bona gavamani ena taravatu hegeregerena idia divos, ruaosi be mai edia maoro ma ta idia adavaia totona.

Danu, ia kerere lasi hahine ia ura ena adavana ia abia dae lou, bona ia hamaoroa iena dika do ia gwauatao. To, bema ia heudahanai tau be ena adavana ena hereva ia abia dae lasi bona ia sibona ese divos pepa ia karaia, dahaka do ia vara? Hahine ia ura ena adavana ena dika ia gwauatao bona ia abia dae lou dainai, tau be Baibel ena hereva hegeregerena do ia headava lou lasi. To bema hahine ma ta ia adavaia, ia heudahanai lou unai. Bona elda oreana ena hahemaoro komiti ese unai case do ia karaia lou.​—1 Kor. 5:1, 2; 6:9, 10.

Tau be maoro lasi do ia headava lou totona, to ia headava lou neganai, kongrigeisen ese headava gunana bona matamatana be edena bamona do ia laloa? Baibel ena hereva hegeregerena, headava gunana ia doko vadaeni, a? Ia kerere lasi hahine be ena adavana gunana ena dika do ia gwauatao eiava dadaraia ena disisen do ia badinaia noho, a? Kongrigeisen ese idia headava lou taudia be heudahanai taudia bamona do idia laloa, a?

Guna, kongrigeisen ese idia headava lou taudia be heudahanai taudia bamona idia laloa, badina ia kerere lasi hahine ia do mauri noho, ia headava lou lasi, bona matabodaga karadia ia karaia lasi. To, Iesu ese divos bona headava lou karana ia gwauraia neganai, ia ese kerere lasi adavana ia gwauraia lasi. To, ia gwau bema tau ese ena adavana ia divosia bona ia headava lou, to Baibel ena hereva hegeregerena lasi, ia heudahanai unai. Unai ia vara neganai, Iesu ia gwau divos bona headava lou be heudahanai karana, bona unai ese headava gunana ia hadokoa.

Tau ese ena adavana gunana ia divosia bona ia headava lou neganai, ena adavana gunana be  dala lasi tau ena dika ia gwauatao eiava dadaraia totona. Unai dainai, hahine be tau ena dika ia gwauatao eiava dadaraia ena disisen karaia totona do ia lalohekwarahi lasi. Danu, kongrigeisen ese idia headava lou taudia be heudahanai taudia bamona do idia laloa lasi. a

Ataiai ita herevalaia haheitalai dekenai, tau be ia heudahanai dainai, divos karana ia vara. Bema tau ia heudahanai lasi, to ena hahine ia divosia bona ia headava lou be edena bamona? Eiava bema idia do divos lasi neganai tau be matabodaga karadia ia karaia lasi, to divos murinai matabodaga karadia ia karaia bona ia headava lou, ena be ena hahine ia ura ena dika ia gwauatao be edena bamona? Unai haheitalai rua ai, divos bona headava lou karana be heudahanai karana dainai, headava gunana ia hadokoa unai. Headava matamata be gavamani ena taravatu hegeregerena idia karaia. The Watchtower, November 15, 1979, ena rau 32 ia gwau: “Ia be headava matamata lalonai ia noho bona unai do ia hadokoa lasi, bona adavana gunana dekenai do ia giroa lou lasi. Headava gunana be divos, heudahanai, bona headava lou karana ese ia hadokoa.”

Unai diba matamata ese ia hahedinaraia lasi, Keristani tauna do ia laloa headava be helaga lasi eiava heudahanai karana be kara dika badana lasi. Tau ese ena hahine ia divosia, to unai be Baibel ena hereva hegeregerena lasi bona ia headava lou, ia heudahanai dainai elda oreana ese hahemaoro komiti ia karaia diba. (Bema ia adavaia hahine be taihu, ia danu be ia heudahanai dainai elda oreana ese hahemaoro komiti ia karaia diba.) Ena be headava matamata be heudahanai headavana bamona ita laloa lasi, to lagani momo lalonai tau be kongrigeisen ena maduna idauidau do ia abia lasi ela bona haida ese ena kerere idia laloaboio bona ia idia matauraia lou. Elda taudia be ia dekenai maduna idia do henia lasi neganai, idia ese iena adavana gunana bona ia rakatania natudia edia hemami bona idia davaria hekwakwanai idia laloa be namo.​—Mal. 2:14-16.

Baibel ena taravatu ia utua dalana ai divos bona headava lou karana ese dika ia havaraia dainai, Keristani taudia ese Iehova ena lalohadai idia abia bona headava idia matauraia be aonega karana.​—Had. 5:4, 5; Heb. 13:4.