1. Edena dala ai mero maragina ta ese toreisi lou ena gwauhamata dekenai ena abidadama ia hahedinaraia?

 MERO maragina ta ladana Matthew be mai ena gorere badana bona opereisen momo ia abia. Ena mauri be 7 neganai, ena famili ida JW Broadcasting^® ena program ta idia itaia. Unai program ena dokona kahanai, miusiki vidio ta idia itaia. Unai vidio ia hahedinaraia haida be edia lalokau taudia be mase amo idia toreisi lou bona idia welkam henidia. b Unai idia itaia murinai, Matthew ese ena tama sina edia imana ia dogoatao, bona ia gwau: “Mama bona Papa e, umui itaia? Ena be do lau mase, to do lau toreisi lou. Lau do umui naria, umui laloa momo lasi.” Mani oi laloa, unai tama sina idia itaia edia natuna be toreisi lou gwauhamatana ia abidadama henia neganai idia moale bada, ani?

2-3. Dahaka dainai toreisi lou gwauhamatana ita laloa dobu be mai ena namo?

² Nega ta ta ai, namona be ita ibounai ese Baibel ia gwauhamatalaia nega vaira ai do ia vara toreisi lou karana ita laloa dobu. (Ioa. 5:28, 29) Dahaka dainai? Badina ita diba lasi edena negai gorere badana ta do ita abia, eiava iseda lalokau tauna ta do ia mase. (Had. 9:11; Iam. 4:13, 14) Toreisi lou gwauhamatana ita abidadama henia dainai, ita ia durua unai bamona hekwakwanai ita haheaukalaia totona. (1 Tes. 4:13) Baibel ese ita ia hadibaia, iseda Guba Tamana be ita ia diba namonamo bona ita ia lalokau henia bada. (Luka 12:7) Mani oi laloa, Iehova Dirava be ita ia diba namonamo dainai, ita do ia hatorea isi lou neganai, iseda kara bona memori do ia atoa giroa lou. Iehova be ita ia lalokau henia bada bona dala ia kehoa mauri hanaihanai ita abia totona. Ena be ita mase, ita do ia hatorea isi lou!

³ Inai atikol ai toreisi lou gwauhamatana ita abidadama henia  karana do ita herevalaia guna. Bona Baibel amo iseda abidadama ia hagoadaia sivaraina ta do ita herevalaia. Inai atikol ena siri badana be unai sivarai amo idia abia: “Emu taihuna do ia toreisi lou.” (Ioa. 11:23) Dokonai, iseda abidadama toreisi lou gwauhamatana dekenai ita hagoadaia dalana do ita herevalaia.

4. Gwauhamata ta ita abidadama henia totona, dahaka ita diba be namo? Haheitalai gwauraia.

⁴ Tau ta ena gwauhamata ita abidadama henia totona, namona be ita diba momokani ia be mai ena ura bona siahu o mai ena diba ena gwauhamata ia hamomokania totona. Mani inai haheitalai ita laloa. Lai gubana ese emu ruma ia hadikaia. Emu turana ta be oi dekenai ia gwauhamata, “Oi do lau durua emu ruma lau haginia lou totona.” Ia be hereva momokani tauna bona oi diba ia ura oi do ia durua. Ia be kapenta tauna namona bona mai ena tulu gaudia bona oi diba emu ruma do ia haginia lou. Unai dainai ena gwauhamata oi abidadama henia. Vadaeni, Dirava ena gwauhamata toreisi lou totona be edena bamona? Ia be mai ena ura bona siahu unai ia hagugurua totona, a?

5-6. Dahaka dainai ita diba momokani Iehova ia ura mase taudia do ia hatoredia isi lou?

⁵ Iehova ia ura mase taudia do ia hatoredia isi lou, a? Oibe, ia ura bona unai ita daradaralaia lasi. Baibel torea taudia haida ia hasiahudia nega vaira ai do ia vara toreisi lou ena gwauhamata idia torea totona. (Isa. 26:19; Hos. 13:14; Apok. 20:11-13) Bona Iehova be gwauhamata ta ia karaia neganai, hanaihanai ia hamomokania. (Ios. 23:14) Oibe, Iehova ia ura mase taudia do ia hatoredia isi lou. Dahaka dainai unai bamona ita hereva?

⁶ Mani Iobu ena hereva ita laloa. Ia diba ena be do ia mase, to Iehova ia ura dikadika ia do ia hatorea isi lou. (Iobu 14:14, 15, ftn.) Idia mase vadaeni hesiai taudia ibounai totona Iehova ia ura unai do ia karaia. Ia ura dikadika idia do ia hamauria lou, bona gorere lasi maurina do idia moalelaia. To, taunimanima milioni momo be idia mase vadaeni, bona dala be lasi Iehova idia diba totona, idia be edena bamona? Iseda lalokau Diravana ia ura unai taudia danu do ia hatoredia isi lou. (Kara 24:15) Bona dala ia kehoa idia be iena turadia ai do idia lao bona tanobada ai do idia noho hanaihanai. (Ioa. 3:16) Oibe, ia hedinarai momokani Iehova ia ura mase taudia do ia hatoredia isi lou.

7-8. Dahaka dainai ita abia dae momokani Iehova be mai ena siahu mase taudia ia hatoredia isi lou totona?

⁷ Iehova be mai ena siahu mase taudia ia hatoredia isi lou totona, a? Oibe, ia be “Siahu Ibounai Diravana.” (Apok. 1:8) Unai dainai, ena inai tauna, mase danu, ia halusia diba. (1 Kor. 15:26) Unai ita diba dainai, ita ia durua bona hagoadaia. Mani taihu Emma Arnold ena ekspiriens ita laloa. Tanobada Tuarina Iharuana ai, ia bona ena famili be edia abidadama dainai hahetoho badadia idia davaria. Ena natuna kekeni ia hagoadaia badina edia lalokau taudia haida be Nazi dibura kamepa ai idia hamasedia. Emma ia gwau: “Bema mase taudia do idia toreisi lou lasi, anina be ita ia inai henia gauna mase, ese Iehova ena goada ia hereaia. To ita diba unai be momokani lasi.” Gau ta ese Iehova ena goada ia hanaia diba lasi! Mauri ia havaraia Diravana be ia hegeregere mase taudia edia mauri ia henia giroa lou diba.

⁸ Dirava be ia hegeregere mase taudia ia hamauridia lou ena badina ma ta be idia ia laloatao noho. Hisiu ta ta be edia ladana hegeregerena ia boiria. (Isa. 40:26) Ia ese mase taudia ia lalodia tao danu. (Iobu 14:13; Luka 20:37, 38) Do ia hatoredia isi lou taudia edia kara maragimaragi ibounai ia laloatao. Edia toana, edia mauri lalonai idia karaia gaudia, bona edia memori ia laloatao danu.

9. Dahaka dainai Iehova ese nega vaira ena gwauhamata toreisi lou dekenai oi abia dae?

 ⁹ Ia hedinarai momokani, Iehova ena gwauhamata nega vaira ena toreisi lou dekenai ita abidadama henia diba. Badina ita diba Iehova be ia ura bona ia be mai ena siahu unai ia hagugurua totona. Mani Dirava ena gwauhamata mase taudia do idia toreisi lou ita abidadama henia ena badinaia ma ta ita itaia: Iehova be guna taunimanima haida ia hatoredia isi lou. Baibel negadiai, abidadama tatau haida dekenai, Iesu danu, siahu ia henia mase taudia hatoredia isi lou totona. Mani Ioane karoa 11 ai Iesu ese ia karaia toreisi lou ena sivarai ta ita herevalaia.

10. Iesu be Ioridane Sinavai ena kahanai ia haroro noho lalonai, Betania ai dahaka ia vara bona dahaka ia karaia? (Ioane 11:1-3)

¹⁰ Ioane 11:1-3 duahia. Lagani 32 C.E. ena dokona ai, Betania hanua dekenai ia vara gauna mani oi laloa. Iesu ena turana namodia, Lasaro, Maria bona Mareta be unuseniai idia noho. (Luka 10:38-42) Lasaro ia gorere bona ena taihudia idia lalohekwarahi bada. Iesu dekenai hereva idia siaia, ia be Ioridane ena kahana dekenai ia noho. Betania amo Ioridane dekenai idia lao totona dina rua do idia raka. (Ioa. 10:40) Madi, hereva ia abia lao tauna be Iesu dekenai ia ginidae neganai, Lasaro be ia mase. Iesu ia diba ena turana ia mase vadaeni, to ma dina rua ia noho bena gabeai Betania dekenai ia lao. Iesu ia ginidae neganai, Lasaro be dina foa lalonai ia mase vadaeni. Iesu ia ura kara ta do ia karaia unai amo iena turadia do ia durua bona Dirava ena ladana do ia hanamoa.​—Ioa. 11:4, 6, 11, 17.

11. Unai sivarai amo hetura karana namona ta dekenai dahaka ita dibaia?

¹¹ Unai sivarai amo hetura karana namona ta ita dibaia. Mani inai oi laloa: Maria bona Mareta be Iesu dekenai hereva idia siaia neganai, idia hamaoroa lasi Betania dekenai do ia lao. To, idia gwau sibona ena turana namona ia gorere. (Ioa. 11:3) Lasaro ia mase neganai, Iesu be gabu daudau amo ia hatorea isi lou diba. To, Iesu be abia hidi ia karaia Betania dekenai do ia lao ena turadia Maria bona Mareta ia itaia totona. Oi be mai emu tura ta, ena be oi noia lasi, to do ia mai bona oi ia durua, a? Oi diba “hekwakwanai negadia ai” ia dekenai oi tabekau diba, badina oi do ia durua. (Aon. 17:17) Namona be Iesu ita tohotohoa bona unai bamona turana ai ita lao! Mani unai sivarai dekenai ita giroa lou bona gabeai ia vara gauna ita herevalaia.

12. Iesu ena gwauhamata Mareta dekenai be dahaka bona dahaka dainai ia abidadama henia diba? (Ioane 11:23-26)

¹² Ioane 11:23-26 duahia. Mareta ia kamonai Iesu be Betania dekenai ia ginidae neganai, ia heau lao ia hedavari henia totona. Ia gwau: “Lohiabada e, bema oi be iniseniai oi noho, egu taihuna be do ia mase lasi.” (Ioa. 11:21) Momokani, Iesu be Lasaro ena gorere ia hanamoa diba. To Iesu ia ura hoa karana ta ia karaia. Ia gwauhamata ia gwau: “Emu taihuna do ia toreisi lou.” Mareta ese iena gwauhamata ia abidadama henia totona, Iesu ese badina ma ta ia hahedinaraia, ia gwau: “Toreisi lou be lau bona mauri be lau.” Oibe, Dirava ese ia dekenai siahu ia henia mase taudia ia hatorea isi lou totona. Matamanai,  kekeni maragina ta ia mase bena daudau lasi murinai ia hatorea isi lou, bona gabeai tau matamata ta ia mase bona unai dina ai ia hatorea isi lou. (Luka 7:11-15; 8:49-55) To, dina foa lalonai ia mase bona ena tauanina ia bodaga vadaeni tauna ia hatorea isi lou diba, a?

13. Ioane 11:32-35 hegeregerena, Iesu ia itaia Maria bona ma haida idia taitai neganai, dahaka ia karaia? (Laulau itaia danu.)

¹³ Ioane 11:32-35 duahia. Mani ia vara gauna oi laloa. Maria, Lasaro ena taihuna ma ta, ia lao Iesu ia hedavari henia totona. Mareta ia gwauraia herevana ia gwauraia lou: “Lohiabada e, bema oi be iniseniai oi noho, egu taihuna be do ia mase lasi.” Maria bona ia ida idia lao taudia be idia lalohisihisi bada. Iesu be edia taitai ia itaia bona kamonai neganai, ia lalohisihisi bada herea. Ena turadia ia hebogahisi henidia bada dainai ia tai. Lalokau tauna ta ia mase ena hisihisi ia lalopararalaia. Oibe, ia ura dikadika mase do ia kokia!

14. Iesu ese Maria ia kara henia dalana amo Iehova dekenai dahaka ita dibaia?

¹⁴ Iesu ese Maria ia kara henia dalana amo ita diba Iehova be hebogahisi Diravana. Dahaka dainai unai bamona ita hereva? Atikol 15 ai, Iesu be iena Tamana ena lalohadai bona hemami ia hahedinaraia goevagoeva. (Ioa. 12:45) Iesu ia tai badina iena turadia edia hisihisi ia mamia, unai dainai ita diba Iehova danu ia itaia ita taitai neganai, ia lalohisihisi bada. (Sal. 56:8) Oibe, unai ese ita ia hagoadaia iseda hebogahisi Diravana kahirakahira ita lao totona.   

15. Ioane 11:41-44 hegeregerena, Lasaro ena gara gabuna ai dahaka ia vara. (Laulau itaia danu.)

¹⁵ Ioane 11:41-44 duahia. Iesu be Lasaro ena gara gabuna dekenai ia ginidae bona ia hamaorodia kohua ia koua nadi do idia kokia totona. To Mareta ia gwau, ena tauanina be ia bonana vadaeni. Iesu ia haere: “Oi lau hamaoroa vadaeni, bema oi abidadama, Dirava ena hairai do oi itaia, ani?” (Ioa. 11:39, 40) Bena Iesu be guba ia itaia bona hutuma vairanai ia guriguri. Iesu ura gabeai do ia vara gauna amo Iehova dekenai hanamoa ibounai do ia henia. Bena Iesu ia boiboi: “Lasaro e, oi raka-lasi!” Bona Lasaro be kohua amo ia raka-lasi! Haida idia laloa do ia vara diba lasi gauna be Iesu ese ia karaia.

16. Edena dala ai Ioane karoa 11 ai ia noho sivaraina ese iseda abidadama ia hagoadaia?

 ¹⁶ Ioane karoa 11 dekenai ita duahia sivaraina ese toreisi lou helarona dekenai iseda abidadama ia hagoadaia. Edena dala ai? Mani Iesu ena gwauhamata Mareta dekenai ita laloa lou, ia gwau: “Emu taihuna do ia toreisi lou.” (Ioa. 11:23) Iena Tamana hegeregerena, Iesu be mai ena ura bona siahu unai gwauhamata ia hagugurua totona. Ena mata ranu ese idia hahedinaraia, ia ura dikadika mase bona lalohisihisi do ia kokia momokani. Lasaro be kohua amo ia raka-lasi neganai, Iesu ia hamomokania lou ia be mai ena siahu mase taudia ia hatoredia isi lou totona. Danu Iesu ese Mareta dekenai ia gwauraia herevana ita laloa, ia gwau: “Oi lau hamaoroa vadaeni, bema oi abidadama, Dirava ena hairai do oi itaia, ani?” (Ioa. 11:40) Badina namodia dainai ita abia dae Dirava ese ena gwauhamata do ia hamomokania bona mase taudia do ia hatoredia isi lou. To, edena dala ai unai helaro dekenai iseda abidadama ita hagoadaia diba?

17. Baibel lalonai toreisi lou sivaraidia ita duahia neganai dahaka ita laloa be namo?

¹⁷ Guna idia vara toreisi lou sivaraidia oi duahia bona laloa dobu. Baibel lalonai tanobada dekenai idia toreisi lou taudia 8 edia sivarai idia noho. c Namona be unai sivarai ta ta oi stadilaia namonamo. Unai oi karaia neganai, namona be oi laloatao idia be taunimanima korikoridia, tatau, hahine bona natudia. Unai sivarai ta ta lalonai point namodia oi tahua diba. Hegeregere, edena dala ai unai sivarai ta ta ese idia hamomokania Iehova be ia ura bona ia be mai ena siahu mase taudia ia hatoredia isi lou dalana do oi laloa. To, Iesu ena toreisi lou oi laloa dobu, badina ia be mai anina bada. Laloatao, iena toreisi lou be taunimanima handred momo ese idia itaia, unai dainai toreisi lou helarona ita abidadama henia diba.​—1 Kor. 15:3-6, 20-22.

18. Edena dala ai toreisi lou helarona idia herevalaia anedia oi gaukaralaia diba? (Futnout itaia danu.)

 ¹⁸ Toreisi lou helarona idia herevalaia “tomadiho anedia” oi gaukaralaia. d (Efe. 5:19) Unai ane ese idia hahedinaraia toreisi lou do ia vara momokani, bona eda abidadama unai helaro dekenai ia hagoadaia. Unai ane oi kamonai, oi anelaia bona ruma bese tomadiho lalonai umui herevalaidia. Iseda lalona bona kudouna dekenai unai ane edia hereva do ita laloatao. Bona dika ta oi davaria eiava emu lalokau tauna ta ia mase neganai, Iehova ena lauma helaga ese oi do ia durua unai ane oi lalodiatao bona edia hereva ese oi do idia durua bona hagoadaia.

19. Toreisi lou negana be edena bamona ita piksaia diba? (Maua ladana “ Idia Dekenai Dahaka Henanadai Do Oi Henia?” itaia.)

¹⁹ Emu lalona ai toreisi lou negana oi piksaia. Namona be oi piksaia hegeregere oi be tanobada matamatana ai oi noho. Taihu ta ia gwau: “Nega momo sibona lau piksaia lau be tanobada matamatana ai lau noho bona Paradaiso ai flaoaflaoa edia bonana lau bonaia diba.” Mani oi laloa, Baibel negadiai idia noho abidadama tatau bona hahine do oi hedavari henidia. Oi ura daika do oi hereva henia? Dahaka henanadai do oi henia? Danu, emu lalokau taudia do idia toreisi lou bona oi hedavari henidia, oi rosidia, umui tai hebou bona idia dekenai oi gwauraia herevadia, do oi piksaia.

20. Iseda lalona do ita hadaia dahaka ita karaia totona?

²⁰ Iehova ita tanikiu henia bada, badina ia ese toreisi lou helarona ia gwauhamatalaia! Ita diba momokani unai gwauhamata do ia vara, badina Iehova be ia ura bona ia be mai ena siahu unai ia hagugurua totona. Namona be iseda lalona ita hadaia unai gwauhamata namona dekenai iseda abidadama do ita hagoadaia noho. Unai ita karaia neganai, Dirava kahirakahira do ita lao, bona ia be ita ta ta dekenai inai gwauhamata ia karaia: ‘Emu lalokau taudia do idia toreisi lou!’