1. Dahaka ita abia dae momokani?

 ITA BE Iehova ena taunimanima dainai, ita diba ita ia lalokau henia bona ia ura iseda mauri ita moalelaia. (Roma 8:35-39) Danu, ita abia dae momokani Baibel ena hakaua herevadia ita badinaia neganai, namo do ita davaria. (Isa. 48:17, 18) To bema ita dekenai hekwakwanai idia vara, dahaka do ita karaia?

2. Dahaka hekwakwanai ita davaria, bona unai ese dahaka ia havaraia diba?

² Iehova ena hesiai taudia ibounai be mai edia hekwakwanai. Hegeregere, famili lalonai ta ese ita ia hahisia. Reana ita be mai iseda gorere badana dainai iseda hesiai gaukara ita habadaia diba lasi. Reana disasta ta ia vara dainai iseda ruma o kohu ita haboioa. Eiava iseda abidadama dainai ita idia dagedage henia. Unai bamona hekwakwanai ita davaria neganai, reana do ita laloa: ‘Dahaka dainai lau dekenai unai ia vara? Kerere ta lau karaia, a? Unai ena anina be Iehova ese lau ia hanamoa lasi, a?’ Unai bamona oi mamia danu, a? Bema oibe, oi lalomanoka lasi. Iehova ena hesiai taudia momo be unai bamona idia mamia danu.​—Sal. 22:1, 2; Hab. 1:2, 3.

3. Salamo 34:19 amo dahaka ita dibaia?

³ Salamo 34:19 duahia. Inai siri ai mai anina bada gaudia rua mani ita laloa: (1) Kara maoromaoro taudia danu be hekwakwanai idia davaria. (2) Hekwakwanai negadiai Iehova ese ita ia durua. Edena dala ai Iehova ese ita do ia durua? Dala ta be, ita ia durua inai nega oromana ai mauri dekenai lalohadai  maorona ita abia totona. Iehova ia gwauhamata iena hesiai gaukara ita karaia neganai do ita lalohisihisi lasi, to ia gwau lasi hekwakwanai do ita davaria lasi. (Isa. 66:14) Ita ia hagoadaia vaira nega sibona ita laloa—unai nega ai mauri do ita moalelaia ela bona hanaihanai. (2 Kor. 4:16-18) To hari ita ia durua ia ita hesiai henia noho totona.​—Lal. 3:22-24.

4. Inai atikol ai dahaka do ita herevalaia?

⁴ Baibel negadiai bona hari Iehova idia tomadiho henia taudia edia sivarai amo ita dibaia gaudia do ita herevalaia. Do ita itaia, ita dekenai hekwakwanai do idia vara kava. To Iehova dekenai ita tabekau neganai, nega ibounai ita do ia durua. (Sal. 55:22) Unai sivarai ita laloa neganai, sibona oi nanadaia: ‘Bema lau dekenai unai ia vara dahaka do lau karaia? Edena dala ai unai sivarai idauidau ese egu abidadama Iehova dekenai ia hagoadaia? Lau dibaia gaudia be edena dala ai egu mauri lalonai lau badinaia diba?’

5. Labana dainai Iakobo be dahaka hekwakwanai ia davaria? (Rau 1 ena laulau itaia.)

⁵ Baibel negadiai, Iehova ena hesiai taudia be hekwakwanai momo idia davaria. Mani Iakobo ita laloa. Ena tamana ese ia hamaoroa ena varavara ta Labana, ena natuna kekeni ta do ia adavaia bona ia hamaoroa Iehova ese do ia hanamoa. (Gen. 28:1-4) Iakobo ese tamana ena hereva ia badinaia. Kanana tanona ia rakatania bona Labana bona ena natuna kekeni rua, Lea bona Rahela, idia noho gabuna dekenai ia lao. Iakobo be Labana ena natuna kekeni iharuana, Rahela, ia lalokau henia bona ia adavaia totona Iakobo ia lalotamona lagani seven Rahela ena tamana totona do ia gaukara. (Gen. 29:18) To Iakobo ia laloa gauna ia vara lasi. Labana ese ia koia bona ia dekenai ena natuna kekeni ginigunana, Lea, ia henia. Labana ese Iakobo ia hamaoroa, wiki ta murinai Rahela do ia adavaia bema ia totona, lagani ma seven ia gaukara. (Gen. 29:25-27) Danu Labana be bisinesi ia karaia neganai, nega momo Iakobo ia koia. Lagani 20 lalonai, Labana ese Iakobo ia kara namo henia lasi!​—Gen. 31:41, 42.

6. Iakobo be dahaka hekwakwanai ma haida ia haheaukalaia?

⁶ Iakobo be hekwakwanai ma haida ia haheaukalaia. Iena natudia be momo, to idia huanai lalotamona ia noho lasi. Edia tadina Iosepa be igui hesiai tauna bamona idia hoihoilaia. Iakobo ena natuna memero rua, Simeona bona Levi, ese edia famili dekenai hemarai idia havaraia bona Iehova ena ladana idia hadikaia. Danu, Iakobo ena adavana Rahela, be edia natuna iharuana ia havaraia neganai ia mase. Bona hitolo bada ia vara dainai, ena be Iakobo ia buruka to ena tano ia rakatania bona Aigupito dekenai ia lao.​—Gen. 34:30; 35:16-19; 37:28; 45:9-11, 28.

7. Edena dala ai Iehova ese ia hahedinaraia Iakobo ia lalonamo henia?

⁷ Herevana Iakobo ena mauri lalonai hekwakwanai momo ia davaria, to Iehova bona ena gwauhamata ia laloaboio lasi. Unai dainai Iehova ese ia hahedinaraia Iakobo ia lalonamo henia. Hegeregere, ena be Labana ese ia koia, to Iehova ese Iakobo dekenai kohu momo ia henia. Bona danu mani oi laloa, Iakobo be Iehova dekenai ia moale bada, badina ena natuna Iosepa ida ia hedavari henia lou, ena be ia laloa ia mase vadaeni! Iakobo be Iehova ia tura henia dainai, unai ese ia hagoadaia hekwakwanai idauidau ia haheaukalaia. (Gen. 30:43; 32:9, 10; 46:28-30) Bema Iehova ida iseda hetura karana ia goada, ita dekenai idia vara kava hahetoho idauidau ita haheaukalaia diba.

8. King Davida ia ura dahaka ia karaia?

 ⁸ King Davida ia ura Iehova totona ia karaia gaudia ibounai be ia karaia lasi. Hegeregere, Davida ia ura ena Dirava totona dubu helaga do ia haginia. Peroveta tauna Natana dekenai ena lalohadai ia gwauraia. Natana ese ia hamaoroa: “Emu kudouna ena ura hegeregerena oi kara, badina Dirava momokanina be oi ida.” (1 Siv. 17:1, 2) Momokani unai hereva ese Davida ia hagoadaia bada. Reana, maoromaoro unai projek badana totona ia hegaegae.

9. Davida be unai sivarai ia kamonai neganai, dahaka ia karaia?

⁹ To daudau lasi murinai, Iehova ena peroveta tauna Natana ese Davida dekenai sivarai ta ia mailaia. “Unai hanuaboi ai,” Iehova ese Natana ia hamaoroa Davida ese dubu helaga do ia haginia lasi, to ena natuna merona ta ese unai do ia karaia. (1 Siv. 17:3, 4, 11, 12) Davida be unai sivarai ia kamonai neganai dahaka ia karaia? Iena tahua gauna ia haidaua. Ia ese Solomona totona dubu helaga haginia moni bona kohu ia haboua.​—1 Siv. 29:1-5.

10. Edena dala ai Iehova ese Davida ia hanamoa?

¹⁰ Iehova ese Davida ia hamaoroa ia ese dubu helaga do ia haginia lasi, unai murinai Iehova ese ia ida gwauhamata ta ia karaia. Iena tubuna ta be king ai do ia lao ela bona hanaihanai. (2 Sam. 7:16) Tanobada matamatana ai, Davida be do ia moale bada badina Iesu ena Lohia Lagani 1,000 Negana ai do ia noho, unai King be ena bese amo ia vara! Unai sivarai ese ita ia durua, ena be Iehova totona ita ura karaia gaudia ita karaia lasi, to ita laloa lasi dalana ai, iseda Dirava ese ita dekenai hahenamo ma haida do ia henia.

11. Keristani taudia ginigunadia ese dahaka gau namodia idia moalelaia, ena be unai nega ai Basileia ia do mai lasi? (Kara 6:7)

¹¹ Keristani taudia ginigunadia idia laloa lasi hekwakwanai haida idia vara danu. Hegeregere, idia ura Dirava ena Basileia do ia mai, to idia diba lasi edena nega ai do ia ginidae. (Kara 1:6, 7) Unai dainai dahaka idia karaia? Haroro gaukara lalonai idia bisi. Sivarai namona ia bada ia lao noho lalonai, idia itaia Iehova ese edia hekwarahi ia hanamoa.​—Kara 6:7 duahia.

12. Hitolo bada ia vara neganai, Keristani taudia ginigunadia be dahaka idia karaia?

¹² Nega ta, “tanobada ibounai dekenai” hitolo bada ia vara. (Kara 11:28) Keristani taudia ginigunadia dekenai unai hekwakwanai ia vara danu. Hitolo bada dainai idia davaria hisihisi mani oi laloa. Momokani unai negai tama sina idia lalohekwarahi edena dala ai edia famili do idia ubua. Bona edia hesiai gaukara idia ura habadaia matamata taudia be edena bamona? Edia palani do idia haidaua, a? Ena be edia noho dalana ia idau, to Keristani taudia ese unai mauri idia manadalaia. Dala idauidau ai edia haroro gaukara idia karaia bona mai moale ida ta ta dekenai edia kohu idia haria.​—Kara 11:29, 30.

13. Hitolo bada negana ai, Keristani taudia ginigunadia be dahaka hahenamo idia abia?

¹³ Hitolo bada negana ai, Keristani taudia ginigunadia be dahaka hahenamo idia abia? Ma haida amo aniani idia abia neganai, Iehova ena heduru idia itaia. (Mat. 6:31-33) Reana idia dekenai heduru idia henia tadikaka taihu ida edia hetura karana ia goada. Bona kontribusen idia henia eiava heduru henia gaukarana lalonai idia noho tadikaka taihu, ese henia karana ena namo idia moalelaia. (Kara 20:35) Iehova ese idia ibounai ia hanamoa badina ena be edia noho dalana ia auka, to unai idia abia dae bona idia moale.

14. Banaba bona aposetolo Paulo dekenai dahaka ia vara, to dahaka namo idia vara? (Kara 14:21, 22)

¹⁴ Keristani taudia ginigunadia be nega  momo dagedage idia davaria. Nega haida idia laloa lasi negadia ai unai ia vara. Banaba bona aposetolo Paulo be Lusitera ai idia haroro noho lalonai, ia vara gauna mani ita laloa. Matamanai, taunimanima ese idia abidia dae bona idia kamonai henidia. To gabeai, inai taudia ese “hutuma edia lalona idia veria,” bona idia ese nadi amo Paulo idia hodoa bona idia rakatania ia mase totona. (Kara 14:19) To Banaba bona Paulo be haroro gaukara idia karaia totona, gabu ma ta dekenai idia lao. Dahaka namo idia vara? Idia ese “haida be hahediba taudia ai idia halaoa,” bona edia hereva bona kara ese edia tadikaka taihu ia hagoadaia bada. (Kara 14:21, 22 duahia.) Ena be Paulo bona Banaba be dagedage idia davaria, to edia haroro gaukara idia hadokoa lasi. Iehova ese ita dekenai ia henia gaukarana ita hadokoa lasi neganai, Ia ese ita do ia hanamoa.   

15. Tadikaka A. H. Macmillan ena ekspiriens amo dahaka oi dibaia?

¹⁵ Lagani 1914 do lasi neganai, Iehova ena taunimanima be idia naria noho gau haida do idia vara totona. Tadikaka A. H. Macmillan mani ita laloa. Unai nega ai, momo idia laloa bamona, tadikaka Macmillan ia laloa kahirakahira guba helaro do ia abia. Lagani 1914 September ai, ena tok ta dekenai inai bamona ia gwau: “Reana inai be egu tok ginigabena.” To, unai be ena tok ginigabena lasi. Gabeai, tadikaka Macmillan ese revareva ta ia torea, ia gwau: “Reana ai haida ai laloa maoromaoro guba dekenai do ai lao.” Ma ia gwau: “Lohiabada ena hesiai gaukara lalonai ai bisi be namo.” Tadikaka Macmillan be ia bisi bada. Haroro gaukara ia karaia goadagoda. Dibura ruma ai idia noho tadikaka ia hagoadadia. Bona ena be ia buruka to mai kudouna ibounai ida kongrigeisen heboudia ia lao. Tadikaka Macmillan be ena helaro ia naria noho lalonai, edena dala ai ena nega ia gaukaralaia namonamo? Lagani 1966 ai, ia do mase lasi neganai, ia gwau: “Hari egu abidadama be ia goada momokani, guna bamona lasi.” Unai be haheitalai namona ita tohotohoa totona, badina ita haida be lagani daudau lalonai hekwakwanai momo ita haheaukalaia noho!​—Heb. 13:7.

16. Herbert Jennings bona ena adavana ese dahaka hekwakwanai idia davaria? (Iamesi 4:14)

¹⁶ Iehova ena taunimanima momo be gorere badadia idia davaria. Hegeregere, Tadikaka Herbert Jennings b ena mauri sivaraina ai, ia bona ena adavana ese Ghana ai edia misineri gaukara idia moalelaia karana ia herevalaia. To, daudau lasi murinai lalohekwarahi gorerena ia abia. Tadikaka Jennings ese ena revareva ai Iamesi 4:14 ena hereva ia torea, ia gwau, “ai diba lasi ‘kerukeru’ be dahaka do ia vara.” (Duahia.) Ma ia gwau: “Egu gorere dainai, Ghana ai emai turadia ai rakatani bona medikol heduru totona Canada dekenai ai giroa lou.” Ena be unai hekwakwanai idia davaria, to Iehova ese Tadikaka Jennings bona ena adavana ia durua dainai, ia idia hesiai henia noho.

17. Edena dala ai Tadikaka  Jennings ena eksperiens ese ma haida ia hagoadaia?

¹⁷ Tadikaka Jennings ena mauri sivaraina ai ia gwauraia herevadia ese ma haida ia durua bada. Taihu ta ia gwau: “Tadikaka Jennings ena ekpiriens lau duahia neganai, unai ese egu kudouna ia hamarerea. . . . Iena gorere dainai ena asainmen ia rakatania karana lau duahia neganai, lau ia durua egu asainmen dekenai lalohadai maorona lau abia totona.” Unai hegeregerena, tadikaka ta ia gwau:  “Lagani 10 lalonai elda gaukara lau karaia to lau rakatania, badina lalohekwarahi gorerena lau davaria. Egu gorere ia bada badina lau mamia egu maduna lau huaia namonamo lasi, unai dainai lau ura lasi mauri sivarai edia atikol lau duahia. . . . To Tadikaka Jennings ena haheauka karana ese lau ia hagoadaia.” Unai ese ita ia hadibaia, bema hekwakwanai idauidau ita haheaukalaia, ma haida ita hagoadaia diba. Ena be idia vara gaudia ese iseda noho dalana ia haidaua, to iseda abidadama bona haheauka karana ese ma haida do ia hagoadaia.​—1 Pet. 5:9.

18. Laulau hegeregerena, Nigeria ai ia noho vabu ena haheitalai amo dahaka oi dibaia?

¹⁸ Disasta idauidau, hegeregere, COVID-19 pandemic ese Iehova ena taunimanima dekenai hekwakwanai momo ia havaraia. Hegeregere, Nigeria ai vabu ta ena moni bona aniani be sisina sibona. Daba ta ai, ena natuna kekeni ese ia nanadaia, raisi sisina ia ore murinai dahaka aniani do idia ania. Iseda taihu ese ena natuna kekeni ia hamaoroa edia moni bona aniani ia ore, to Sarepata vabuna idia tohotohoa be namo—raisi orena idia nadua bona mai lalona ibounai ida Iehova idia abidadama henia. (1 Ki. 17:8-16) Unai dina tubu ai do idia nadua aniani idia lalohadailaia noho lalonai, tadikaka taihu ma haida ese idia dekenai aniani haida idia siaia. Unai aniani be wiki rua lalonai idia ania diba. Taihu ia gwau, iena natuna dekenai ia gwauraia gauna be Iehova ese ia kamonai danu. Oibe, Iehova dekenai ita tabekau neganai, mauri ai idia vara kava hekwakwanai ese ita idia durua Iehova kahirakahira do ita lao.​—1 Pet. 5:6, 7.

19. Aleksey Yershov be dahaka ia haheaukalaia?

¹⁹ Vanegai laganidia ai, iseda tadikaka taihu momo be dala idauidau ai dagedage idia davaria bona idia haheaukalaia. Russia ai, Tadikaka Aleksey Yershov ena ekspiriens mani ita laloa. Tadikaka Yershov be lagani 1994 ai  ia bapatiso, unai negai Iehova ena taunimanima be edia tomadiho karadia idia karaia diba. To lagani haida murinai, unai ia idau. Lagani 2020 ai, pulisi be Tadikaka Yershov ena ruma idia vareai bona ena kohu ibounai idia dadia. Hua haida murinai, gavamani ese kota dekenai idia abia lao bona idia gwau ia be kerere ia karaia. Unai ia vara badina, lagani tamona lalonai koikoi dalanai Baibel ia stadilaia tauna ta ese stadi lalonai vidio ia abia bona kota dekenai ia henia. Unai be kara dika rohorohona!

20. Edena dala ai Tadikaka Yershov ese ena hetura karana Iehova ida ia hagoadaia?

²⁰ Tadikaka Yershov idia dagedage henia karana ese namo ta ia havaraia, a? Oibe. Iena hetura karana Iehova ida ia goada. Ia gwau: “Hanaihanai lau bona egu adavana ai guriguri hebou. Lau laloparara, Iehova ena heduru dainai unai hekwakwanai lau haheaukalaia diba.” Ma ia gwau: “Sibona egu stadi karana ese lau ia durua lau lalomanoka lasi totona. Idaunegai abidadama hesiai taudia edia haheitalai lau lalodia dobu. Baibel lalonai sivarai momo ese idia hahedinaraia ita manau bona Iehova ita abidadama henia be gau badana.”   

21. Inai atikol ai dahaka oi dibaia?

²¹ Inai atikol ai dahaka ita dibaia? Inai tanobada ai, ita laloa lasi hekwakwanai do idia vara. To Iehova be hanaihanai ena hesiai taudia ia durua, bema ia dekenai idia tabekau. Inai atikol ena siri badana hegeregerena, “kara maoromaoro tauna ese ia davaria hisihisi be momo, to idia ibounai amo Iehova ese ia hamauria.” (Sal. 34:19) Namona be ita davaria hekwakwanai ita laloa momo lasi, to Iehova ena siahu ita abidadama henia. Bena aposetolo Paulo hegeregerena do ita gwau: “Lau dekenai siahu ia henia tauna amo goada lau abia gau ibounai lau karaia totona.”​—Fili. 4:13.