1. Iesu ena hoa karana ginigunana mani oi herevalaia.

 LAGANI 29 C.E. dokonai, Iesu ese ena haroro gaukara ia hamatamaia negana mani oi laloa. Iesu bona ena sinana, Maria, bona ena hahediba taudia haida be Kana hanua dekenai headava aria ta dekenai idia lao. Maria be headava taudia edia famili ia diba bona ia durudia aria dekenai idia mai taudia ia naria totona. To aria lalonai, headava taudia bona edia famili ia hahemaraia diba hekwakwanai ta ia vara—edia wain ia ore. b Reana aria dekenai idia mai taudia be momo herea. Maria be ena natuna dekenai ia gwau: “Edia wain ia ore.” (Ioa. 2:1-3) Iesu be dahaka ia karaia? Ia ese hoa karana ta ia karaia—ranu be “wain namo hereana” ai ia halaoa.​—Ioa. 2:9, 10.

2-3. (a) Iesu be dahaka hoa karadia ia karaia? (b) Iesu ena hoa karadia ita stadilaia karana amo dahaka namo ita davaria?

² Iesu ena haroro gaukara lalonai hoa karadia momo ia karaia. c Iesu ese ena siahu ia gaukaralaia taunimanima momo herea ia durua totona. Hegeregere, ena hoa karadia rua ai tatau 5,000 bena gabeai tatau 4,000 ia ubudia, to bema idia noho hahine bona natudia ita duahia danu, reana taunimanima  ibounai be 27,000 mai kahana. (Mat. 14:15-21; 15:32-38) Unai nega rua ai, gorere taudia momo ia hanamodia danu. (Mat. 14:14; 15:30, 31) Mani oi laloa, Iesu ese unai hutuma edia gorere ia hanamoa bona ia ubudia dainai idia moale bada!

³ Hari, Iesu ena hoa karadia amo gau momo ita dibaia diba. Inai atikol lalonai hoa karadia amo iseda abidadama idia hagoadaia gaudia do ita herevalaia. Bona do ita itaia, Iesu ese hoa karadia ia karaia neganai ia hahedinaraia manau bona hebogahisi karana do ita tohotohoa.

4. Iesu ena hoa karadia ese ita dekenai daika ena kara ia hahedinaraia?

⁴ Iesu ena hoa karadia amo iena kara sibona ita dibaia lasi, to iena Tamana ena kara ita dibaia danu, bona unai ese iseda abidadama ia hagoadaia. Oibe, Iehova be hoa karadia edia Badina. Kara 10:38 ia gwau: “Dirava ese lauma helaga amo [Iesu] ia horoa bona siahu ia henia. Vadaeni gabu ibounai dekenai ia lao bona kara namodia ia karaia bona Diabolo ese ia hahisia taudia ibounai ia hanamoa, badina Dirava be ia ida ia noho.” Laloatao, Iesu ena hereva bona kara ibounai, ena hoa karadia danu, ese ena Tamana ena lalohadai bona hemami idia hahedinaraia. (Ioa. 14:9) Mani Iesu ena hoa karadia amo ita dibaia gaudia toi ita herevalaia.

5. Dahaka ese Iesu ena lalona ia veria hoa karadia ia karaia totona? (Mataio 20:30-34)

⁵ Gau ginigunana be, Iesu bona ena Tamana be ita idia lalokau henia bada. Iesu be tanobada ai ia noho neganai, iena siahu ia gaukaralaia hisihisi idia davaria taudia ia durudia badina idia ia lalokau henia bada. Nega ta matakepulu taudia rua be ia dekenai heduru totona idia noinoi. (Mataio 20:30-34 duahia.) Ita itaia Iesu ese “ia hebogahisi henidia” bona edia gorere ia hanamoa. Iniseniai idia hahanaia Grik herevana, “ia hebogahisi henidia” ena anina be ia hebogahisi bada herea, hegeregere ena bogana lalonai unai hebogahisi ia mamia bamona. Unai dainai Iesu ese taunimanima ia lalokau henidia, bona hitolo taudia ia ubua bona lepera tauna ia hanamoa. (Mat. 15:32; Mar. 1:41) Ita diba momokani Iehova, “hebogahisi bada” Diravana, bona ena Natuna be ita idia lalokau henia bada, bona ita davaria hisihisi dainai, idia hebogahisi bada. (Luka 1:78; 1 Pet. 5:7) Idia ura dikadika taunimanima ese idia davaria hekwakwanai ibounai do idia kokia!

6. Dirava ese Iesu dekenai dahaka siahu ia henia?

⁶ Gau iharuana be, Dirava ese Iesu dekenai siahu ia henia taunimanima edia hekwakwanai ibounai ia hanamoa totona. Iesu be hoa karadia ia karaia neganai, ia hamomokania ita hanamoa diba lasi hekwakwanai ia hanamoa diba. Hegeregere, ia be mai ena siahu taunimanima ese idia davaria hekwakwanai edia badina ia kokia totona—unai be kara dika. Bona kara dika dainai idia vara gorere bona mase do ia kokia danu. (Mat. 9:1-6; Roma 5:12, 18, 19) Iena hoa karadia ese idia hamomokania ia be gorere idauidau ia hanamoa, bona mase taudia ia hatorea isi lou diba. (Mat. 4:23; Ioa. 11:43, 44) Danu, ia be mai ena siahu lai bada ia koua bona lauma dikadia ia luludia. (Mar. 4:37-39; Luka 8:2) Iehova ese ena Natuna dekenai ia henia siahu ita dibaia neganai, unai ese ita ia hagoadaia!   

7-8. (a) Iesu ena hoa karadia dainai dahaka ita abia dae momokani? (b) Tanobada matamatana ai dahaka hoa karana oi ura itaia?

⁷ Gau ihatoina be, ita abia dae momokani vaira negai Dirava ena Basileia ese do ia  mailaia hahenamo idauidau be do idia vara momokani. Iesu be tanobada ai ia karaia hoa karadia ese ita ia hadibaia tanobada hegegemadai ai unai do ia karaia, badina ia be Dirava ena Basileia ena King. Keriso ese inai tanobada do ia lohiaia bona do ita moalelaia hahenamo idauidau mani ita laloa. Ita ese gorere lasi maurina do ita moalelaia, badina taunimanima idia hadikaia gorere idauidau do ia haorea momokani. (Isa. 33:24; 35:5, 6; Apok. 21:3, 4) Do ita hitolo lasi eiava disasta amo idia vara hisihisi idauidau do ita mamia lasi. (Isa. 25:6; Mar. 4:41) Mai moale ida iseda lalokau taudia be “gara gabudia” amo do ita welkam henidia. (Ioa. 5:28, 29) Tanobada matamatana ai, dahaka hoa karana oi ura itaia?

⁸ Iesu be hoa karadia ia karaia neganai, manau bona hebogahisi bada ia hahedinaraia. Namona be unai kara namodia rua ita tohotohoa. Hari, haheitalai rua do ita herevalaia, ginigunana be Kana dekenai ia vara headava ariana ena sivarai.

9. Headava ariana dekenai Iesu be dahaka ia karaia? (Ioane 2:6-10)

⁹ Ioane 2:6-10 duahia. Headava ariana dekenai wain ia ore neganai, unai be Iesu ena maduna kara ta ia karaia totona, a? Lasi. Peroveta herevana ta ia gwau lasi Mesia ese ranu be wain ai do ia halaoa. Mani oi laloa, emu hemami be edena bamona bema emu headava ariana ai wain be ia ore. Iesu be unai headava  taudia ia hebogahisi henidia, badina ia ura lasi do idia hemarai. Unai dainai, matamanai ita herevalaia hoa karana ia karaia. Ia ese 390 lita ranu be wain namo hereana ai ia halaoa. Reana wain bada herea ia karaia badina unai amo, gabeai haida do idia gaukaralaia eiava idia hoihoilaia diba headava taudia idia durua totona. Unai headava matamata taudia idia moale bada!

10. Ioane karoa 2 ai dahaka point badadia haida idia noho? (Laulau itaia danu.)

¹⁰ Mani Ioane karoa 2 ena point badadia haida ita herevalaia. Oi itaia Iesu be nadi hodu lalonai ranu ia hahonua lasi, ani? Ia ura lasi taunimanima be ia do idia itaia, unai dainai hesiai taudia ia hamaorodia hodu do idia hahonua. (Siri 6, 7) Iesu ese ranu be wain ai ia halaoa murinai, ia sibona ese aria biaguna dekenai wain sisina ia abia lao lasi. To, hesiai taudia ia hamaoroa unai do idia karaia. (Siri 8) Iesu be inai ia karaia, a? Taunimanima vairanai ia gini, bona mai heagi ida wain kapusi ia abia isi bona ia gwau: ‘Lau karaia wain umui inua!’ Lasi, Iesu be unai ia karaia lasi.   

11. Iesu ena hoa karana amo dahaka ita dibaia?

¹¹ Iesu ese ranu be wain ai ia halaoa karana amo, dahaka ita dibaia? Ita ese manau karana ita dibaia. Iesu be unai hoa karana dainai ia heagi lasi, oibe ia karaia gaudia ibounai dainai ia heagi diba lasi. To, mai manau ida nega ibounai hanamoa ibounai be iena Tamana dekenai ia henia. (Ioa. 5:19, 30; 8:28) Iesu ena manau karana ita tohotohoa neganai, ita karaia gaudia do ita heagilaia lasi. Herevana Iehova totona dahaka hesiai gaukara ita karaia, namo lasi ita sibona dainai ita heagi, to ita hesiai henia Dirava hereadaena totona ita heagi. (Ier. 9:23, 24) Namona be ia sibona ita hanamoa, badina Iehova ena heduru amo gaukara namodia ita karaia diba.​—1 Kor. 1:26-31.

12. Edena dala ma ta ai Iesu ena manau karana ita tohotohoa diba? Haheitalai gwauraia.

¹² Iesu ena manau karana ita tohotohoa dalana ma ta mani ita herevalaia. Inai haheitalai mani ita laloa: Elda ta be nega bada ia gaukaralaia hesiai tauna matamatana ia durua ena pablik tok ginigunana ia hegaegaelaia totona. Elda ena heduru dainai tadikaka matamata be tok namona ia henia, bona kongrigeisen taudia ese idia moalelaia bada. Hebou murinai ta be elda dekenai ia gwau: ‘Tadikaka matamata be tok namona ia henia, ani?’ Elda be dahaka do ia gwau: ‘Oibe, to egu nega bada lau haorea ia lau durua totona’? Eiava mai manau ida do ia gwau: ‘Oibe, tok namona ia henia. Bona ia dekenai lau moale bada’? Ita manau neganai, haida totona ita karaia kara namodia dainai, do ita heagi lasi. Ita moale badina ita diba Iehova ese ita karaia gaudia ibounai ia itaia bona ia laloa bada. (Mataio 6:2-4 hahegeregerea; Heb. 13:16) Oibe, Iesu ita tohotohoa bona manau karana ita hahedinaraia neganai, Iehova do ita hamoalea.​—1 Pet. 5:6.   

13. Iesu be Naina siti kahirakahira ai, dahaka ia itaia bona dahaka ia karaia? (Luka 7:11-15)

¹³ Luka 7:11-15 duahia. Iesu be ena haroro gaukara ia hamatamaia bena lagani ta mai kahana murinai ia vara gauna ta mani ita herevalaia. Iesu be Galilea ena siti ta Naina dekenai ia lao, unai be Suneme kahirakahira. Unuseniai, lagani 900 gunanai, peroveta tauna Elisaia ese hahine ta ena natuna mero ia hatorea isi lou. (2 Ki. 4:32-37) Iesu be geiti kahirakahira ia lao neganai, ia itaia mase tauanina ta idia huaia raka-lasi. Unai be hebogahisi negana, badina vabu ta be ena natuna tamona sibona ia haboioa. To, ia taitai vabu be sibona ia raka lasi, siti taudia momo ese  ia idia bamoa. Iesu ia lao kahirakahira bona mase patana ia dogoatao bona vabu totona hoa karana ta ia karaia—ena natuna mero ia hatorea isi lou! Unai be Iesu ese ia hatorea isi lou tauna ginigunana. Ia karaia toreisi lou toi edia sivarai be Evanelia bukadia lalonai idia torea.

14. Luka karoa 7 ai dahaka point badadia haida idia noho? (Laulau itaia danu.)

¹⁴ Mani Luka karoa 7 ena point badadia haida ita herevalaia. Iesu “ia itaia” vabu be ia taitai noho, bena “ia hebogahisi henia” karana oi itaia, a? (Siri 13) Iesu ia itaia vabu be mai taitai ida ena natuna ena mase tauanina vairanai ia raka lao neganai, ena kudouna ia hisihisi bada. Iesu be vabu totona ia hebogahisi sibona lasi, to karana ia hahedinaraia danu. Ia hagoadaia ia gwau: “Oi taitai lasi.” Bena ena natuna ia hatorea isi lou bona “sinana dekenai ia henia.”​—Siri 14, 15.

15. Iesu ena hoa karana amo dahaka ita dibaia?

¹⁵ Iesu ese vabu ena natuna ia hatorea isi lou karana amo dahaka ita dibaia? Ita dibaia gauna be, mase dainai idia taitai taudia dekenai hebogahisi do ita hahedinaraia. Momokani, ita be Iesu bamona mase taudia ita hatorea isi lou diba lasi. To, Iesu hegeregerena, mase dainai idia taitai taudia ita itaia neganai, hebogahisi ita hahedinaraia diba. Ita naria lasi, to iseda hereva bona kara amo idia ita durua bona hagoadaia. d (Aon. 17:17; 2 Kor. 1:3, 4; 1 Pet. 3:8) Ena be ita hereva momo lasi eiava kara maragina ta ita karaia, to ita karaia gauna ese idia do ia hagoadaia bada.

16. Laulau hegeregerena, natuna ia mase sina ta ena sivarai amo dahaka ita dibaia?

¹⁶ Mani inai sivarai ita laloa. Lagani haida gunanai kongrigeisen ena hebou ta ai, ane idia abia noho lalonai taihu ta ia itaia sina ta be ia taitai. Unai ane be toreisi lou helarona ia herevalaia, bona vanegai sibona unai sina be ena natuna ia mase. Taihu be unai ia diba dainai, ia lao bona unai sina ia rosia bona idia ane hebou. Gabeai unai sina ia gwau: “Tadikaka taihu edia lalokau karana lau mamia  momokani.” Ia moale bada badina hebou dekenai ia lao. Ma ia gwau: “Kingdom Hall be iseda heduru abia gabuna.” Ita diba momokani, mase dainai idia “daradoko taudia” dekenai ita hahedinaraia hebogahisi karana be Iehova ese ia itaia bona ia laloa bada, herevana ia be kara maragina sibona.​—Sal. 34:18.

17. Inai stadi ai dahaka ita dibaia?

¹⁷ Evanelia bukadia lalonai Iesu ena hoa karadia ita stadilaia neganai, ita do idia hagoadaia bada. Ita dibaia gauna be, Iehova bona Iesu be ita idia lalokau henidia bada, bona Iesu be mai ena siahu taunimanima edia hekwakwanai ibounai ia haorea totona. Danu, ita abia dae momokani, Dirava ena Basileia ese ia gwauhamatalaia hahenamo idauidau be kahirakahira do idia vara. Unai hoa karadia edia sivarai ita stadilaia neganai, Iesu ena kara namodia ita tohotohoa daladia do ita diba. Namona be sibona emu stadi eiava ruma bese tomadiho ai Iesu ena hoa karadia ma haida umui stadilaia. Oi dibaia gaudia be ma haida dekenai oi herevalaia diba. Unai gaudia umui herevalaia hebou karana ese umui do ia hagoadaia!​—Roma 1:11, 12.

18. Stadi atikol 16 ai dahaka do ita herevalaia?

¹⁸ Iesu ena haroro gaukara ena dokona ai, ia ese toreisi lou ihatoina ia karaia bona unai be toreisi lou ginigabena. To unai toreisi lou be idau, badina ena turana namona be dina foa ia mase murinai ia hatorea isi lou. Unai hoa karana amo dahaka ita dibaia? Bona edena dala ai toreisi lou helarona dekenai iseda abidadama ita hagoadaia diba? Stadi atikol 16 ai, unai henanadai edia haere do ita herevalaia.