1-2. Tanobada matamatana ita naria noho lalonai dahaka ita karaia be namo?

 IEHOVA ena gwauhamata inai tanobada dikana do ia kokia bona kara maoromaoro tanobada matamatana do ia haginia ita laloa bada. (2 Pet. 3:13) Ena be ita diba lasi edena nega ai tanobada matamatana do ia vara, to hari idia vara gaudia ese idia hamomokania nega be ia kahirakahira vadaeni.​—Mat. 24:32-34, 36; Kara 1:7.

² Ena be hereva momokani lalonai ita noho daudau, to namona be ita ibounai ese unai gwauhamata dekenai iseda abidadama ita hagoadaia. Dahaka dainai? Badina iseda abidadama ia manoka diba. Hegeregere, aposetolo Paulo ia gwau abidadama ia manoka karana be ita ia “guia noho kara dika,” unai ese ia hahedinaraia haraga momokani eda abidadama ia manoka diba. (Heb. 12:1) Unai ia vara lasi totona, kahirakahira do ia vara tanobada matamatana ena hamomokania gaudia ita laloa loulou be gau badana.​—Heb. 11:1.

3. Inai atikol ai dahaka do ita herevalaia?

³ Inai atikol ai, Iehova ena tanobada matamatana dekenai iseda abidadama ia goada totona, dala toi do ita herevalaia: (1) Iesu ena mauri davalaia boubouna laloa dobu, (2) Iehova ena siahu ita laloa, bona (3) nega ita atoa iseda Keristani maduna idauidau ita hagugurua totona. Bena Iehova ena hereva Habakuku dekenai ese iseda abidadama ia hagoadaia dalana do ita herevalaia. To, hari hahetoho haida ita davaria noho dainai, namona be iseda abidadama tanobada matamatana ena gwauhamata dekenai, ita hagoadaia dalana do ita herevalaia.

 HEKWAKWANAI DAINAI ISEDA ABIDADAMA IA GOADA BE NAMO

4. Dahaka abia hidi do ita karaia dainai iseda abidadama ia goada be namo?

⁴ Dina ta ta ai, abia hidi idauidau ita karaia dainai, iseda abidadama ia goada be gau badana. Hegeregere, iseda turadia, moale karadia, edukeisen, headava, natudia, bona moni gaukara dekenai abia hidi ita karaia. Sibona do ita nanadaia, ‘Egu abia hidi amo lau hahedinaraia inai tanobada dikana be do ia ore bona kahirakahira Dirava ese tanobada matamatana do ia mailaia, a? Eiava egu abia hidi ia hahedinaraia egu lalohadai be mauri hanaihanai do idia abia lasi taudia edia hegeregerena?’ (Mat. 6:19, 20; Luka 12:16-21) Tanobada matamatana be ia kahirakahira vadaeni ita abidadama henia neganai, abia hidi namodia do ita karaia.   

5-6. Dahaka dainai nega aukadia lalonai iseda abidadama ia goada be namo? Haheitalai gwauraia.

⁵ Danu, hekwakwanai ita davaria neganai iseda abidadama ia goada be namo. Reana dagedage, gorere badana eiava gau ma haida ita davaria bona unai ese iseda lalona ia hamanokaia diba. Matamanai, reana hekwakwanai ita haheaukalaia diba. To bema hekwakwanai ia noho daudau—namona be iseda abidadama ia goada, unai amo do ita haheauka bona mai moale ida Iehova ita hesiai henia diba.​—Roma 12:12; 1 Pet. 1:6, 7.

⁶ Hekwakwanai ita davaria neganai, reana ita laloa Iehova ena tanobada matamatana be do ia vara lasi. Unai ena anina be iseda abidadama ia manoka, a? Lasi. Haheitalai ta mani ita laloa. Medu be wiki haida lalonai ia diho neganai, reana do ita laloa dina do ia hedinarai lasi. To, dina ia hedinarai. Unai hegeregerena, ita lalomanoka neganai, do ita mamia tanobada matamatana do ia vara lasi. To bema iseda abidadama ia goada, ita diba Dirava ena gwauhamata be do ia guguru. (Sal. 94:3, 14, 15; Heb. 6:17-19) Unai dainai, iseda mauri lalonai Iehova tomadiho henia karana do ita atoa guna.

7. Dahaka lalohadai dekenai do ita naria namonamo?

⁷ Iseda abidadama ia goada dalana ma ta ita laloa—haroro gaukara. Ita haroro henia taudia momo idia laloa, Dirava ena tanobada matamata do ia mai ena “sivarai namona” be do ia vara lasi. (Mat. 24:14; Ese. 33:32) Namona be ita naria namonamo, dika edia lalohadai ese ita dekenai daradara ia havaraia. Unai ia vara lasi totona, iseda abidadama ita hagoadaia noho be gau badana. Mani ita karaia diba daladia toi ita herevalaia.

MAURI DAVALAIA BOUBOUNA OI LALOA DOBU

8-9. Edena dala ai mauri davalaia boubouna ita laloa dobu karana ese iseda abidadama do ia hagoadaia?

⁸ Iseda abidadama ita hagoadaia dalana ginigunana be, mauri davalaia boubouna ita laloa dobu karana. Mauri davalaia boubouna ese ia hamomokania Dirava ena gwauhamata be do ia vara momokani. Mauri davalaia boubouna ia henia ena badina bona dahaka ia karaia ita laloa dobu neganai, iseda abidadama do ia goada badina Dirava ena gwauhamata mauri hanaihanai tanobada matamatana, be do ia guguru momokani. Dahaka dainai unai bamona ita gwau?

⁹ Mauri davalaia boubouna dekenai dahaka ita dibaia? Iehova ese ena lalokau Natuna roboana, ena turana, be guba amo ia siaia tanobada ai goevadae tauna bamona ia vara. Tanobada ai, Iesu be metau idauidau ia haheaukalaia. Bena hisihisi ia abia bona ia mase. Iehova ese ia lalokau henia bada tauna ia siaia ita totona ia mase! Iseda lalokau Diravana be ena natuna ia siaia, hisihisi ia abia bona ia mase be ita ese mauri kwadogina ita abia totona ia karaia lasi. To, Iehova ese Natuna  lalokauna ia henia dainai, ia ura tanobada matamatana ai mauri hanaihanai do ita abia.​—Ioa. 3:16; 1 Pet. 1:18, 19.

IEHOVA ENA SIAHU OI LALOA DOBU

10. Efeso 3:20 hegeregerena, Iehova be dahaka ia karaia diba?

¹⁰ Iseda abidadama ita hagoadaia dalana iharuana be, Iehova ena siahu do ita laloa dobu. Ia be mai ena siahu ena gwauhamata ibounai ia hagugurua totona. Momokani, taunimanima idia laloa tanobada matamatana ai mauri hanaihanai do ita abia lasi. To hanaihanai Iehova ese ia gwauhamatalaia gaudia be taunimanima ese do idia karaia diba lasi. Badina, Ia be Siahu Ibounai Diravana. (Iobu 42:2; Mar. 10:27) Unai dainai ia karaia gwauhamata idauna dekenai ita hoa lasi.​—Efeso 3:20 duahia.

11. Dirava ena gwauhamata idauna ta mani oi gwauraia. (Maua “ Idia Guguru Gwauhamata Idaudia” itaia.)

¹¹ Idaunegai, Iehova ese ena taunimanima idia laloa do idia vara diba lasi gaudia ia gwauhamatalaia karana mani ita laloa. Aberahamo bona Sara ia hamaorodia edia buruka negana ai natuna ta do idia havaraia. (Gen. 17:15-17) Danu, Aberahamo ia hamaoroa ena bese taudia dekenai Kanana tano do ia henia. Lagani momo lalonai, Aberahamo ena bese taudia, Israela taudia unai, be Aigupito ai igui hesiai taudia bamona idia noho neganai, reana idia laloa unai gwauhamata be do ia vara lasi. To ia guguru. Gabeai, Iehova ia gwau Elisabeta be natuna ta do ia havaraia ena be ia buruka vadaeni. Danu, Iehova ese rami-hebou kekenina Maria ia hamaoroa, ia be Iena Natuna do ia havaraia. Unai Natuna do ia vara ena gwauhamata herevana be lagani tausen momo gunanai Eden umana ai ia gwauraia. Unai gwauhamata be ia guguru!​—Gen. 3:15.

12. Iosua 23:14 bona Isaia 55:10, 11 edia hereva amo Iehova ena siahu dekenai dahaka ita dibaia?

¹² Iehova ese ia gwauraia gwauhamata ibounai bona ia hagugurudia dalana ita laloa neganai, iena siahu ita lalopararalaia bona unai ese iseda abidadama tanobada matamatana dekenai ia hagoadaia. (Iosua 23:14; Isaia 55:10, 11 duahia.) Unai amo ita hegeregere ma haida ita durua bena do idia abia dae tanobada matamatana ena gwauhamata be nihi ta sibona lasi. Guba bona tanobada matamatana totona Iehova ia gwau: “Inai hereva . . . be taunimanima ese idia abia dae diba bona idia be momokani.”​—Apok. 21:1, 5.

IEHOVA ENA GAUKARA TOTONA NEGA OI ATOA

13. Edena dala ai kongrigeisen heboudia ese iseda abidadama idia hagoadaia diba?

¹³ Iseda abidadama ita hagoadaia dalana ihatoina be, Iehova ena gaukara totona nega do ita atoa. Mani iseda kongrigeisen heboudia amo ita davaria namo ita herevalaia. Lagani momo lalonai ful-taim hesiai gaukara idauidau ia karaia taihu ta ladana Anna ia gwau: “Kongrigeisen heboudia ese lau idia durua egu abidadama ia goada noho totona. Ena be tok ia henia tauna be ena tok ia henia namonamo lasi eiava gau matamata ia hahedinaraia lasi, to nega momo lau kamonai herevadia ese egu diba Baibel dekenai ia hanamoa bona unai ese egu abidadama ia hagoadaia.” b Danu iseda tadikaka taihu edia haere ese iseda abidadama ia hagoadaia.​—Roma 1:11, 12; 10:17.

14. Edena dala ai haroro gaukara ese iseda abidadama ia hagoadaia?

¹⁴ Haroro gaukara ita karaia neganai iseda abidadama ita hagoadaia danu. (Heb. 10:23) Lagani 70 lalonai Iehova ia hesiai henia taihu ladana Barbara, ia gwau: “Lau mamia, haroro gaukara lau karaia neganai egu abidadama ia goada. Haida dekenai Iehova ena gwauhamata  namodia lau herevalaia ese egu abidadama ia hagoadaia.”

15. Edena dala ai sibona eda stadi karana ese iseda abidadama ia hagoadaia diba? (Laulau itaia danu.)

¹⁵ Iseda abidadama ia hagoadaia dalana ma ta be: sibona eda stadi karana. Taihu Susan ia davaria sibona ena stadi totona sediual ia karaia karana ese ia durua. Ia gwau: “Sunday ai, vaira wiki ena Gima Kohorona atikol lau stadilaia. Monday bona Tuesday ai midwik ena hebou totona lau hegaegae. Dina ma haida ai, sibona egu stadi projek lau karaia.” Hanaihanai ena stadi sediual ia badinaia dainai, Susan ena abidadama ia goada ia lao. Irene be lagani momo lalonai hedikwota ai hesiai gaukara ia karaia, ia be Baibel ena peroveta herevadia stadilaia karana ese ena abidadama ia hagoadaia. Ia gwau: “Iehova ena peroveta herevadia ibounai idia guguru lau itaia neganai lau hoa bada.” c

“IA BE DO IA VARA MOMOKANI”

16. Dahaka dainai Iehova ena gwauhamata Habakuku dekenai be mai anina bada ita dekenai? (Heberu 10:36, 37)

¹⁶ Iehova ena hesiai taudia haida be inai tanobada oromana ena dokona totona nega daudau idia naria. Taunimanima edia lalohadai amo, toana be Dirava ena gwauhamata ia guguru haraga lasi. Iehova be Habakuku ia durua neganai unai lalohadai hamaoromaoroa totona, ia gwau: “Unai matahanai be ena nega korikori ai do ia guguru, Bona dokona ia lao henia haraga noho, bona do ia koikoi lasi. Toana be ia mai haraga lasi, to do oi naria noho! Badina ia be do ia vara momokani. Do ia leiti lasi!” (Hab. 2:3) Dirava ese unai gwauhamata be Habakuku sibona ena namo totona ia henia, a? Eiava Iena hereva be mai anina bada iseda nega ai? Lauma helaga ena heduru amo, aposetolo Paulo ese unai hereva be mai ura ida tanobada matamata idia naria noho Keristani taudia dekenai ia gwauraia. (Heberu 10:36, 37 duahia.) Oibe, ena be ita do ia hamauria  gwauhamatana ia do mai haraga lasi, to ita abia dae “ia be do ia vara momokani. Do ia leiti lasi!”

17. Taihu ta ese edena dala ai Iehova ese Habakuku dekenai ia henia sisiba ia badinaia?

¹⁷ Iehova ena hesiai taudia momo be lagani momo lalonai iena sisiba, “do oi naria noho,” idia badinaia. Hegeregere, Louise, be lagani 1939 ai Iehova ia hesiai henia matamaia. Ia gwau: “Unai nega ai, lau laloa egu haisikuli lau do haorea lasi neganai Aramagedono do ia mai. To unai ia vara lasi. Lagani momo lalonai, Baibel ai Iehova ena gwauhamata do ia hagugurua negana idia naria noho taudia edia sivarai lau duahia karana ese lau ia durua, unai taudia be Noa, Aberahamo, Iosepa, bona ma haida. Naria noho karana ese lau bona ma haida ia durua dainai, ai abia dae tanobada matamata be ia kahirakahira momokani.” Nega daudau lalonai Iehova idia hesiai henia taudia momo be unai hereva idia abia dae danu!

18. Edena dala ai havaraia gaudia laloa karana ese iseda abidadama tanobada matamatana dekenai ia hagoadaia diba?

¹⁸ Momokani, tanobada matamatana be ia do vara lasi. To, hari idia noho gaudia hisiu, au, animal idauidau, bona taunimanima mani oi laloa. Unai gaudia dekenai ta do ia daradara lasi, ena be guna idia noho lasi. To, hari idia noho badina Iehova ese idia ia havaraia. (Gen. 1:1, 26, 27) Iseda Dirava ia gwauhamata danu tanobada matamatana do ia havaraia. Unai gwauhamata do ia hagugurua. Tanobada matamatana ai, taunimanima be do idia gorere lasi bona mauri hanaihanai do idia moalelaia. Dirava ese ia makaia negana ai, tanobada matamatana be do ia vara momokani.​—Isa. 65:17; Apok. 21:3, 4.

19. Edena dala ai emu abidadama oi hagoadaia diba?

¹⁹ Hari, namona be oi hekwarahi emu abidadama oi hagoadaia totona. Mauri davalaia boubouna do oi laloa bada. Iehova ena siahu do oi laloa dobu. Emu mauri ai Iehova ena gaukara totona nega oi atoa. Unai bamona oi karaia neganai, “abidadama bona haheauka karana amo Dirava ese ia gwauhamatalaia gaudia idia abia taudia” huanai do oi noho.​—Heb. 6:11, 12; Roma 5:5.