Inai Oi Diba, A?
Dahaka dainai idau bese taudia be tuari lalonai King Davida idia durua?
DAVIDA ena tuari idia durua taudia haida be, Amono tauna Sekele, Hiti tauna Uria, bona Moaba tauna Itima. a (1 Siv. 11:39, 41, 46) Davida ena tuari taudia ma haida be, “Kereti taudia, Pelete taudia, bona Gata taudia.” (2 Sam. 15:18) Kereti taudia bona Pelete taudia be reana Filistia taudia edia bese amo idia mai. (Ese. 25:16) Gata taudia be Filistia ena siti amo idia mai.—Ios. 13:2, 3; 1 Sam. 6:17, 18.
Dahaka dainai Davida be ena tuari lalonai unai idau bese taudia ia abia hidi? Ia abia dae ia do idia durua bona mai anina bada gauna be, Iehova do idia badinaia. Hegeregere, The New Interpreter’s Dictionary of the Bible ese Kereti taudia bona Pelete taudia totona, ia gwau: “Davida be ena lohia negana lalonai hekwakwanai badadia ia davaria neganai, ia idia durua.” Edena dala ai? “Israela taudia ibounai” be King Davida idia rakatania bona “kerere ia karaia tauna, iena ladana be Sieba,” idia badinaia neganai, Kereti taudia bona Pelete taudia be Davida idia durua bona Sieba ena gwau-edeede karana idia koua. (2 Sam. 20:1, 2, 7) Nega ma ta ai, King Davida ena natuna Adonaisa ia ura king dagina ia abia. To, Kereti taudia bona Pelete taudia be Davida idia durua bona Solomona be king ai idia halaoa, badina Iehova ese ia abia hidi.—1 Ki. 1:24-27, 38, 39.
Davida ia badinaia namonamo idau bese tauna ma ta be Gata tauna Itai. Davida ena natuna Abesaloma be Israela ena tatau edia lalona ia veria king idia gwau-edeede henia neganai, Itai bona ena tuari taudia 600 be King Davida idia durua. Matamanai, Davida ese Itai ia hamaoroa, ia be idau bese tauna dainai, Davida totona do ia tuari lasi. To Itai ia gwau: “Ia mauri noho Diravana, Iehova, ena ladana ai bona egu lohia bona king ena ladana ai oi lau hamaoroa momokani, egu lohia bona king ia lao gabudia ibounai dekenai emu hesiai tauna be oi ida do ia noho, bona lau noho hegaegae oi ida lau mase totona!”—2 Sam. 15:6, 18-21.
Itai be Iehova ese ia horoa tauna, king Davida ia badinaia
Ena be Kereti taudia, Pelete taudia bona Gata taudia be idau bese taudia, to idia diba Iehova be Dirava momokanina bona ia ese Davida ia horoa. Davida ia moale bada badina unai bamona tatau ese ia idia badinaia!
a Dirava ena taravatu Deuteronomi 23:3-6 ese Amono taudia bona Moaba taudia ia taravatua Israela besena lalonai do idia vareai lasi. Unai taravatu ese ia hahedinaraia idia be Israela besena ai do idia lao lasi, to idia ia koua lasi Dirava ena taunimanima idia bamoa eiava idia ida idia noho hebou totona. Insight on the Scriptures, Volume 1, rau 95 itaia.
