Lagani 1955 ai, lau vara bona natudia toi amo lau be dokona. Lau be Finland ena saut kahana ai lau tubu daekau, hari unai siti ladana be Vantaa.

Egu sinana be ia bapatiso bona Iehova ena Witnes ta ai ia lao bena lagani haida murinai, lau vara. To, egu tamana be hereva momokani ia inai henia bona ia ura lasi egu sinana ida ai stadi bona kongrigeisen heboudia dekenai ai ia abia lao. Unai dainai egu tamana ia noho lasi neganai, egu sinana be ai dekenai Baibel ena hereva momokani ia hadibaia.

Lau maragi negana amo, abia hidi lau karaia Iehova do lau badinaia. Hegeregere, egu mauri lagani be 7 neganai, egu tisa be lau dekenai ia badu dikadika, badina verilättyjä (Finland blood pancake) lau ania lasi. Ia ura keke sisina lau ania dainai, ena imana ta amo egu medena ia gigia, unai amo egu uduna do lau kehoa bona keke do ia atoa. To ena imana lau doria bona foka ia hamorua.

Egu mauri lagani be 12 neganai, egu tamana ia mase. Unai murinai, kongrigeisen heboudia dekenai lau lao. Kongrigeisen dekenai tadikaka haida be lau idia kara namo henia bona unai ese lau ia hagoadaia Iehova kahirakahira lau lao totona. Bena dina ta ta ai, Baibel lau duahia bona iseda pablikeisen lau stadilaia namonamo. Unai gaudia lau karaia dainai, egu mauri lagani be 14 neganai, August 8, 1969 ai lau bapatiso.

 Egu sikuli lau haorea murinai, regula painia lau hamatamaia. Wiki haida lalonai, Finland kahirakahira ia noho taoni ta, Pielavesi dekenai lau lao, bona pablisa momo lasi gabuna lau durua.

Pielavesi ai, do lau adavaia kekenina, Sirkka, ida lau hedavari. Ia lau ura henia badina ia be manau hahinena bona Iehova ia lalokau henia bada. Ia be lada bada bona kohu momo ia tahua lasi. Ai ruaosi ai ura mai kudouna ibounai ida Iehova ai hesiai henia bona idia henia asainmen be mai ura ida ai karaia. March 23, 1974, ai headava. Bona holidei totona ai lao lasi, to taoni maragina Karttula dekenai ai lao, unuseniai pablisa momo lasi gabuna ai durua.

Emai headava matamana ai, Iehova ese ia hahedinaraia bema iena Basileia ai atoa guna, emai dabu gaudia do ia henia. (Mat. 6:33) Hegeregere, Karttula dekenai, ai be motuka lasi. Matamanai, ai be basikele amo ai loaloa. To keru negana ai, gabu do ia keru momokani. Kongrigeisen ena daudau teritori dekenai ai haroro totona, motuka ta ai abia be namo. To emai moni be hegeregere lasi motuka ta ai hoia totona.

Nega ta, egu kakana be ai ia vadivadi henia. Ai hoa badina ai dekenai iena motuka ia henia. Danu, motuka ena rejistreisen davana ia hoia. Unai dainai petrol sibona ai hoia. Oibe, ai ura henia gauna ai abia.

Iehova ese ia hahedinaraia emai dabu gaudia be ia ese ia henia. Emai gaukara be Basileia do ai atoa guna.

Lagani 1978 ai, Painia Sikuli dekenai ai lao neganai, sikuli ena tisa ta, Raimo Kuokkanen a ese ai ia hagoadaia Gilead Sikuli totona aplikeisen do ai henia. Unai dainai nao gado ai stadilaia, unai sikuli ai lao totona. To lagani 1980 ai, aplikeisen ai do henia lasi neganai, ai idia boiria Finland ena brens ofesi dekenai do ai gaukara. Unai negai, Betele ai idia gaukara taudia be Gilead sikuli totona aplikeisen do idia henia lasi. To ai ura Iehova ese ai ia siaia gabuna dekenai ia ai hesiai henia, bona emai ura gabuna lasi. Unai dainai, idia henia asainmen ai abia dae. To nao gado ai do stadilaia noho, bema dala ia kehoa, Gilead totona aplikeisen do ai henia.

Lagani haida murinai, Hakaua Oreana ia gwau, Betele ai idia gaukara taudia be Gilead totona  aplikeisen idia henia diba. Bona karaharaga aplikeisen ai hahonua, to unai ese ia hahedinaraia lasi Betele gaukara ai moalelaia lasi. Unai gaukara ai moalelaia! Ai noho hegaegae Iehova ena hesiai gaukara lalonai heduru idia ura gabudia ai, ia ai hesiai henia totona. Gilead sikuli totona emai aplikeisen idia abia dae bona September 1985 ai, klas 79 dekenai ai gradueit. Emai asainmen be Colombia dekenai do ai lao.

Colombia ai, brens ofesi dekenai ai idia siaia lao. Egu asainmen lalonai lau gaukara goada, to brens ai lagani ta murinai, lau mamia namona be senisi ai karaia. Egu mauri ai, unai be nega ginigunana asainmen idauna ta totona lau noinoi. Bona ai idia siaia Neiva ena siti ena hanua maragina ta, Huila dekenai misinari gaukara ai karaia.

Lau be hanaihanai haroro gaukara lau moalelaia. Finland ai, lau do headava lasi neganai, nega haida daba ela bona adorahi ai haroro gaukara lau karaia. Ai headava murinai, lau bona Sirkka be daba ai ela bona adorahi ai haroro. Daudau teritori dekenai ai haroro neganai, nega haida emai motuka lalonai ai mahuta. Unai amo, nega ai haorea lasi dala dekenai ai heau totona, bona daba ai, emai haroro gaukara ai hamatamaia diba.

Misinari gaukara ai karaia neganai, guna haroro gaukara ai karaia ena ura ai mamia lou. Emai kongrigeisen ia bada bona Colombia tadikaka taihu be hemataurai, lalokau bona ma haida laloa bada karana idia hahedinaraia.

Emai asainmen ai karaia taoni, Neiva ena badinai, idia noho taoni haida dekenai Witnes taudia be lasi. Lau laloa edena bamona unai gabudia dekenai sivarai namona do ai harorolaia. To, terorist taudia idia noho dainai, unai gabu be namo lasi idau tano taudia idia lao totona. Unai dainai lau guriguri unai taoni amo ta be Witnes ta ai do ia lao. Bona lau laloa unai bamona tauna be Neiva ai ia noho be namo, unai amo hereva momokani do ia diba. Danu, lau guriguri unai tauna be ia bapatiso murinai, lo tauna ai do ia lao bona ena taoni dekenai do ia giroa lou bona haroro gaukara ia karaia. To namona be lau diba Iehova be ena ura gauna do ia hagugurua.

Daudau lasi murinai, tau matamata ta ladana, Fernando González ida Baibel ai stadilaia. Ia be Algeciras dekenai ia noho, unai taoni ai Witnes ta be lasi. Fernando be moni gaukara totona, Neiva dekenai kilomita 50 mai kahana do ia lao. Iena stadi totona ia hegaegae namonamo bona karaharaga hebou ibounai dekenai ia lao matamaia. Ia stadi ena wiki ginigunana ai, Fernando be ena taoni ai haida ia haboua bona Baibel stadi amo ia dibaia gaudia be idia dekenai ia hadibaia.

Fernando be hua siks ia stadi murinai, January 1990 ai bapatiso ia abia. Unai murinai, regula painia ia karaia. Algeciras ai, Witnes tauna ta ia noho dainai, brens ofesi idia laloa spesel painia haida idia siaia diba. February 1992 ai, unai taoni ai kongrigeisen ta idia hamatamaia.

Fernando be ena taoni sibona dekenai ia haroro, a? Lasi! Ia headava murinai, ia bona ena adavana, Olga be San Vicente del Caguán dekenai idia lao, unai taoni ai Witnes ta be lasi. Unuseniai, kongrigeisen ta idia hamatamaia. Lagani  2002 ai, Fernando be sekit naria tauna ai ia lao bona unai nega amo ema bona hari ena adavana ida sekit gaukara idia karaia noho.

Unai ekspiriens amo lau dibaia gauna be, tiokratik asainmen gaukaradia lalonai, guriguri karana be mai anina bada. Iehova be ita karaia diba lasi gauna do ia karaia. Unai ita diba, badina gogoa gaukarana be iena, to iseda lasi.—Mat. 9:38.

Lagani 1990 ai, lau bona egu adavana be sekit gaukara ai hamatamaia. Emai sekit ginigunana be Bogotá dekenai, ia be siti badana. Ai laloa unai asainmen do ai karaia namonamo lasi. Lau bona egu adavana be sikuli badana dekenai ai lao lasi bona emai diba be maragi. Bona ai manada lasi taunimanima momo idia bisi gabudia dekenai ai noho totona. To, Iehova ese ena gwauhamata Filipi 2:13 ai ia hagugurua, ia gwau: “Dirava be emui goada ena badina, bona umui dekenai ura bona goada ia henia, ia ura henia gaudia umui karaia totona, badina ia ura unai ia karaia.”

Gabeai, ai idia siaia Medellín ena gabu ta dekenai hesiai gaukara ai karaia, matamanai lau herevalaia siti. Unuseniai, nega momo taunimanima be street dekenai idia heatu, unai dainai momo idia manada unai bamona gabudiai idia noho totona. Hegeregere, nega ta egu Baibel stadi ena ruma dekenai ai stadi noho lalonai, murimuri dekenai haida idia heatu bona ipidi idia hapoua matamaia. Lau gari bona lau ura hekure diho, to lau itaia egu Baibel stiuden be ia gari lasi bona paragraf ia duahia noho. Bona ia duahia ore murinai, ia gwau ekskius, bona murimuri dekenai ia lao. Daudau lasi murinai, natu maragidia rua ida ia mai bona ia gwau, “Sori bada, lau lao egu natudia lau hakaua mai.”

Nega haida kahirakahira emai mauri ai haboioa. Nega ta, ruma-ta ruma-ta haroro gaukara ai karaia noho lalonai, egu adavana be mai gari ida lau dekenai ia heau mai. Ia gwau tau ta ese kahirakahira ia pidia. Unai dainai lau gari dikadika. To gabeai ai diba, unai tauna be Sirkka ia ura pidia lasi, to ena badinai ia raka hanai tauna ia ura pidia.

Nega ia hanaia lalonai unai bamona idia heatu gabudia dekenai, noho dalana ai manadalaia. Unai gabu ai idia noho Witnes taudia edia gari lasi karana ese ai ia hagoadaia. Ai laloparara bema Iehova be idia ia durua, ai do ia durua danu. Hanaihanai elda taudia edia heduru ai tahua, sibona ai naria namonamo, bona emai lalohekwarahi ibounai be Iehova ena imana dekenai ai rakatania.

Oibe, nega haida idia vara gaudia be dika momokani lasi. Nega ta, lau vadivadi henia rumana ena murimuri ai, toana be hahine rua idia hepapahuahu noho. Lau ura lasi ia vara noho gauna lau itaia, to ruma tauna ese lau ia hamaoroa unai lau itaia totona. Bona lau davaria, unai be parrot rua idia “hepapahuahu” noho, idia be neiba taudia edia hereva dalana idia tohotohoa.

Lagani 1997 ai, lau idia abia hidi Hesiai Gaukara Hadibaia Sikulina ena hadibaia tauna  ai lau lao. b Tiokratik sikuli lao henia karana lau moalelaia, to lau laloa lasi hadibaia tauna ena hahenamo do lau abia.

Gabeai, distrik naria tauna ai lau lao. To unai gaukara idia koua neganai, sekit gaukara lau karaia lou. Unai dainai, lagani 30 mai kahana lalonai, hadibaia tauna bona sekit gaukara lau moalelaia. Unai asainmen idauidau amo hahenamo momo lau abia. To, unai ese ia hahedinaraia lasi mauri be ia namo. Mani unai lau herevalaia.

Lau be kara auka tauna. Unai ese lau ia durua hekwakwanai badadia lau haheaukalaia totona. To, nega haida lau ura kongrigeisen lalonai idia vara hekwakwanai lau hamaoromaoroa haraga. Nega haida, mai ura ida haida lau hagoadaia lalokau bona laloa maoromaoro karana be ma haida dekenai do idia hahedinaraia. Oibe, ena be haida lau hagoadaia, to lau be unai kara lau hahedinaraia lasi.—Roma 7:21-23.

Egu manoka gaudia dainai, nega haida lau lalometau. (Roma 7:24) Nega ta, guriguri amo Iehova lau hamaoroa misinari gaukara lau rakatania bona Finland dekenai lau giroa lou be namo. Unai adorahi ai, kongrigeisen ena hebou ta dekenai lau lao. Bona lau kamonai gaudia ese lau ia hagoadaia, namona be egu asainmen lau karaia noho bona lau gaukara goada egu manoka gaudia lau hanamoa totona. Unai nega amo ema bona hari, Iehova ese egu guriguri ia haerelaia dalana ese egu kudouna ia hamarerea. Danu, ia lau tanikiu henia badina lau ia durua egu manoka gaudia lau hanaia totona.

Lau bona Sirkka ai moale badina Iehova ese hahenamo ia henia, emai mauri lalonai ful-taim hesiai gaukara ai karaia totona. Danu, Iehova lau tanikiu henia badina ia ese adavana namona ia henia bona lagani momo ai gaukara hebou.

Kahirakahira egu mauri lagani be 70 dainai, tiokratik sikuli idauidau naria gaukarana bona sekit gaukara do lau hadokoa. To unai lau lalohisihisilaia lasi. Dahaka dainai? Badina lau abia dae momokani, Iehova ese ia moalelaia gauna be mai manau ida ia ita hesiai henia bona mai kudouna ibounai ida ita lalokau henia bona hanamoa. (Mika 6:8; Mar. 12:32-34) Iehova ita badinaia totona, mai anina bada asainmen ita abia be gau badana lasi.

Lau karaia asainmen idauidau lau laloa neganai, lau diba lau abia asainmen ese ia hahedinaraia lasi lau be ma haida lau hereaia; danu egu diba dainai unai hahenamo idauidau lau abia lasi. To, Iehova ena hebogahisi hereadaena dainai unai asainmen ia henia. Ena be mai egu manoka gaudia, to Iehova ese unai hahenamo ia henia. Lau diba Iehova ena heduru amo lau hegeregere, unai asainmen idauidau lau hagugurua totona. Unai dala amo egu manoka gaudia ese Iehova ena siahu ia hahedinaraia.—2 Kor. 12:9.