1. Aposetolo taudia eda negai Iehova ena taunimanima be edena bamona idia gaukara hebou?

 IEHOVA ese ena taunimanima dekenai gaukara ia henia neganai, ia ura unai idia karaia namonamo. (1 Kor. 14:33) Hegeregere, Dirava ena ura be tanobada ibounai dekenai sivarai namona do idia harorolaia. (Mat. 24:14) Iehova ese Iesu ia abia hidi unai gaukara ia gunalaia totona. Bona Iesu ia ura unai gaukara be dala maorona ai do idia karaia. Aposetolo taudia edia negai, gabu idauidau ai kongrigeisen idia haginia neganai, elda taudia idia abia hidi hakaua herevadia idia henia bona taunimanima idia hakaua totona. (Kara 14:23) Ierusalema ai ia noho elda oreana, unai be aposetolo taudia bona tau badadia, ese abia hidi haida idia karaia bona kongrigeisen ibounai ese unai idia badinaia be namo. (Kara 15:2; 16:4) Tadikaka taihu be unai hakaua herevadia idia badinaia dainai, “kongrigeisen taudia edia abidadama ia goada ia lao bona dina ta ta ai edia namba ia bada daekau.”—Kara 16:5.

2. Lagani 1919 amo, Iehova be edena dala ai ena taunimanima ia hakaua bona ena hakaua herevadia ia halasia noho?

² Hari inai negai danu, Iehova be iena taunimanima ia hakaua noho. Lagani 1919 amo, Iesu ese horoa taudia amo orea maragina ia gaukaralaia haroro gaukara ia gunalaia bona nega korikori ai Dirava ena hakaua herevadia ia halasia. a (Luka 12:42) Ita itaia Iehova be unai orea ena gaukara ia hanamoa noho.—Isa. 60:22; 65:13, 14.

3-4. (a) Hegaegae namonamo karana ena haheitalai oi gwauraia. (b) Inai atikol ai dahaka do ita herevalaia?

 ³ Bema ita hegaegae namonamo lasi, Iesu ese ita dekenai ia henia gaukarana do ita hagugurua lasi. (Mat. 28:19, 20) Hegeregere, bema tadikaka be kongrigeisen lalonai haroro gaukara ena teritori idia palanilaia lasi, reana ita ibounai be iseda ura gabudia ai do ita haroro. Reana teritori haida be ita karaia loulou to haida be ita do karaia lasi. Hegaegae namonamo karana dainai idia vara namo haida oi laloa, a?

⁴ Iesu be tanobada ai ia noho neganai iena murinai idia raka taudia ia hakaua hegeregerena, hari danu Dirava ena taunimanima ia hakaua noho. Inai atikol ai, Iesu ena haheitalai bona iseda orea ese unai haheitalai ia badinaia dalana do ita herevalaia. Danu ita hahedinaraia Iehova ena orea ita laloa bada dalana do ita herevalaia.

ISEDA OREA ESE IESU ENA HAHEITALAI IA TOHOTOHOA

5. Iesu ena haheitalai ita tohotohoa dalana ta be dahaka? (Ioane 8:28)

⁵ Iesu be ena guba Tamana amo do ia karaia bona do ia gwauraia gaudia ia dibaia. Iehova ena orea be Baibel ia gaukaralaia ita ia durua maoro bona kerere ita diba bona hakaua herevadia ia henia, unai amo Iesu ena haheitalai ia tohotohoa. (Ioane 8:28 duahia; 2 Tim. 3:16, 17) Hanaihanai ita ia hadibaia Baibel ita duahia bona badinaia totona. Unai sisiba ita badinaia dainai dahaka namo ita davaria?

6. Iseda pablikeisen amo Baibel ita stadilaia neganai, dahaka namo ita davaria?

⁶ Iseda pablikeisen amo Baibel ita stadilaia neganai namo bada ita davaria. Hegeregere, Baibel ena hahediba herevadia be orea amo ita abia hakaua herevadia ida ita hahegeregerea diba. Ita itaia unai hakaua herevadia be Baibel ena hereva ida idia hegeregere neganai, unai ese ita ia durua Iehova ena orea ita abidadama henia.—Roma 12:2.

7. Iesu ese dahaka sivarai ia harorolaia, bona Iehova ena orea be edena dala ai iena haheitalai ia tohotohoa?

⁷ Iesu ese “Dirava ena Basileia ena sivarai namona” ia harorolaia. (Luka 4:43, 44) Danu, Iesu ese ena hahediba taudia ia oda henia Basileia do idia harorolaia. (Luka 9:1, 2; 10:8, 9) Hari Iehova ena orea idia badinaia taudia be Basileia sivaraina idia harorolaia, ena be edeseni ai idia noho eiava Iehova ena orea lalonai maduna momo idia huaia.

8. Dahaka hahenamo badana ita abia?

⁸ Ma haida dekenai Dirava ena Basileia ita harorolaia be hahenamo badana! Taunimanima ibounai be unai hahenamo idia abia lasi. Hegeregere, Iesu be tanobada ai ia noho neganai, lauma dikadia dekenai maoro ia henia lasi ia idia harorolaia totona. (Luka 4:41) Hari, bema ta ia ura Iehova ena taunimanima ida ia haroro, namona be Iehova ese ia moalelaia mauri dalana ia badinaia. Nega bona gabu idauidau ai Dirava ena Basileia ita harorolaia neganai, ita hahedinaraia unai hahenamo ita laloa bada. Iesu hegeregerena, ita ura gaukara goada taunimanima dekenai hereva momokani ita harorolaia bona hadibaia.—Mat. 13:3, 23; 1 Kor. 3:6.

9. Edena dala ai iseda orea ese Dirava ena ladana ia gwauraia hedinarai?

⁹ Iesu ese Dirava ena ladana ia gwauraia hedinarai. Iesu be guriguri amo iena guba Tamana dekenai ia gwau: “Lau ese emu ladana . . . lau gwauraia hedinarai vadaeni.” (Ioa. 17:26) Iesu hegeregerena, Iehova ena orea ese gau ibounai ia karaia ma haida ia durua Dirava ena ladana idia dibaia totona. Dala ta be Nega Matamata Trensleisen Ena Buka Helaga lalonai Dirava ena ladana be ena gabu maorodia ai ia atoa lou. Hari unai Baibel trensleisen ena kahana ibounai eiava ena kahana haida be gado  270 mai kahana ai ia halasia. Bona ena Apendiks A4 bona A5 lalonai, do oi davaria dahaka dainai bona edena dala ai Dirava ena ladana ia atoa lou. Study Bible ena Apendiks C ai, hamomokania gaudia momo ese ia hahedinaraia Dirava ena ladana be Keristani Grik Toretoredia ai, nega 237 ia hedinarai be namo.

10. Myanmar ai ia noho hahinena ena hereva amo dahaka oi dibaia?

¹⁰ Iesu bamona, ita ura taunimanima momo ita durua Dirava ena ladana idia dibaia totona. Myanmar ai, mauri lagani 67 hahinena be Dirava ena ladana ia dibaia neganai, ia tai bona ia gwau: “Egu mauri ai inai be egu nega ginigunana lau kamonai, Dirava ena ladana be Iehova. . . . Lau dekenai mai anina bada gauna oi hadibaia.” Unai ekspiriens ese ia hahedinaraia, taunimanima be Dirava ena ladana idia dibaia neganai unai ese edia mauri ia haidaua diba.

ISEDA OREA OI LALOA BADA NOHO

11. Edena dala ai elda taudia idia hahedinaraia Iehova ena orea idia laloa bada? (Laulau itaia danu.)

¹¹ Edena dala ai elda taudia idia hahedinaraia Dirava ena orea idia laloa bada? Elda taudia be hakaua herevadia idia abia neganai, namona be idia duahia namonamo bona idia gaukara goada idia badinaia totona. Hegeregere, hebou kahadia henia dalana, kongrigeisen totona guriguri gwauraia daladia bona danu Keriso ena mamoe naria dalana totona hakaua herevadia idia abia. Elda taudia be orea amo idia abia hakaua herevadia idia badinaia neganai, tadikaka taihu do idia mamia Iehova be idia ia lalokau henia bona naria.

12. (a) Dahaka dainai ita idia hakaua taudia ida ita gaukara hebou be namo? (Heberu 13:7, 17) (b) Dahaka dainai ita idia hakaua taudia edia kara namodia sibona ita laloa be namo?

¹² Elda taudia amo hakaua herevadia ita abia neganai, mai ura ida ita badinaia be namo. Unai ita karaia neganai, do ia auka lasi ita idia hakaua taudia be edia gaukara idia karaia totona. Baibel ese ita ia hagoadaia ita idia hakaua taudia ita kamonai henia bona idia henunai ita noho. (Heberu 13:7, 17 duahia.) Bona nega haida unai ita karaia be auka. Dahaka dainai? Badina unai tatau be goevadae lasi taudia. To, edia kara kereredia sibona ita laloa bona edia kara namodia ita laloa lasi neganai, ita be iseda inai henia taudia ita durua noho. Edena dala ai? Ita be Dirava ena orea do ita abidadama henia lasi, bona unai be iseda inai taudia ese idia ura henia gauna. Dahaka ita karaia be namo iseda inai taudia edia koikoi herevadia ita diba bona dadaraia totona?

HAIDA ESE EMU ABIDADAMA IDIA HAMANOKAIA LASI BE NAMO

13. Edena dala ai Dirava ena inai taudia ese iena orea idia gwauraia dika?

¹³ Dirava idia inai henia taudia idia ura Iehova ena orea ese ia hadibaia gau namodia idia gwauraia dika. Hegeregere Baibel amo ita diba, Iehova ia ura iseda tauanina, dabua bona kara idia goeva be namo, bona ia ura henia dalanai ia ita tomadiho henia. Iehova ia gwau, bema ta ia ura lasi ena kara dika amo ia helalo-kerehai, kongrigeisen amo idia atoa siri be namo. (1 Kor. 5:11-13; 6:9, 10) Ita ese unai oda herevana ita badinaia. To iseda inai taudia be unai idia gaukaralaia bona idia gwau, ita be taunimanima ita hahemaoro henia bona ita lalokau henidia lasi.

14. Iseda orea totona koikoi herevadia ia gwauraia tauna be daika?

¹⁴ Ita ia dagedage henia tauna oi diba be namo. Satani Diabolo be iseda orea totona koikoi herevadia ia gwauraia. Ia be “koikoi ena tamana.” (Ioa. 8:44; Gen. 3:1-5) Unai dainai ita diba, Satani be iseda inai taudia do ia gaukaralaia Iehova ena orea totona koikoi herevadia  do idia gwauraia. Idaunegai, Iesu bona Keristani taudia ginigunadia dekenai unai ia vara.

15. Dubu gunalaia taudia be Iesu bona ena murinai idia raka taudia dekenai, dahaka idia karaia?

¹⁵ Ena be Dirava ena Natuna, Iesu be goevadae tauna bona hoa karadia momo ia karaia, to Satani be taunimanima haida ia gaukaralaia ia totona koikoi herevadia momo idia gwauraia. Hegeregere, dubu gunalaia taudia be taunimanima idia hamaoroa “demoni edia lohia” ese Iesu dekenai siahu ia henia demoni ia luludia totona. (Mar. 3:22) Iesu be kota dekenai idia abia lao neganai, dubu gunalaia taudia be Iesu totona, koikoi herevadia idia gwauraia bona taunimanima edia lalona idia veria ia idia hamasea totona. (Mat. 27:20) Gabeai, Iesu ena murinai idia raka taudia be sivarai namona idia harorolaia neganai, edia inai taudia be taunimanima “edia lalona idia ania” Keristani taudia idia dagedage henia totona. (Kara 14:2, 19) December 1, 1998 Gima Kohorona ese Kara 14:2 be inai bamona ia herevalaia: “Iuda dagedage taudia ese sivarai namona idia dadaraia, to unai sibona lasi, idia ura Idau Bese taudia ese Keristani taudia do idia lalo-dika henia danu bona unai dainai samania koikoi herevadia idia gwauraia.”

16. Sivarai koikoidia ita kamonai neganai, dahaka ita laloatao be namo?

¹⁶ Hari inai negai, Satani be ena koikoi karadia ia do karaia noho, bona ia be “tanobada ibounai ia hakaua kerere noho.” (Apok. 12:9) Bema iseda orea eiava ita idia hakaua tadikaka totona, hereva koikoidia oi kamonai, namona be Dirava ena inai taudia ese Iesu bona iena hahediba taudia ginigunadia idia dagedage henia karana oi laloatao. Hari, Baibel ena peroveta herevana hegeregerena, Iehova ena taunimanima be dagedage idia davaria noho  bona idia totona koikoi herevadia idia gwauraia. (Mat. 5:11, 12) Sivarai koikoidia do ita abia dae lasi bema ita diba, unai sivarai be koikoi tauna amo ia mai. Bona sibona ita gimaia totona, kara ta do ita karaia haraga. Dahaka ita karaia be namo?

17. Edena dala ai sivarai koikoi ita dadaraia diba? (2 Timoteo 1:13) (Maua ladana, “ Sivarai Koikoi Dainai, Dahaka Do Oi Karaia?” ita danu.)

¹⁷ Sivarai koikoidia oi dadaraia. Sivarai koikoidia ita kamonai neganai, aposetolo Paulo ese do ita karaia gauna be ia gwauraia. Timoteo ia hamaoroa “haida do ia oda henia . . . sivarai koikoidia do idia kamonai lasi” bona “sivarai koikoidia” idia dadaraia be namo. (1 Tim. 1:3, 4; 4:7) Beibi be floa dekenai gau ta do ia abia bona ena uduna dekenai do ia atoa, to taunimanima badana be unai do ia karaia lasi, badina ia diba unai be dika. Sivarai koikoidia ita dadaraia, badina unai sivarai ia gwauraia tauna ita diba. To “hereva momokani” sibona ita kamonai.—2 Timoteo 1:13 duahia.

18. Edena dala ai ita hahedinaraia Iehova ena orea ita laloa bada?

¹⁸ Inai atikol ai, Dirava ena orea ese Iesu ia tohotohoa daladia toi sibona ita herevalaia. Baibel oi stadilaia lalonai, orea ese Iesu ena haheitalai ia tohotohoa daladia ma haida oi tahua. Emu kongrigeisen ai ma haida oi durua orea idia abidadama henia totona. Bona mai abidadama ida Iehova oi hesiai henia bona ena ura ia hagugurua totona ia gaukaralaia oreana oi bamoa neganai, oi hahedinaraia iena orea oi laloa bada. (Sal. 37:28) Iehova idia lalokau henia bona badinaia taudia huanai ita noho be hahenamo badana, bona namona be unai hahenamo ita laloa bada.