1. Iehova ita tomadiho henia dainai dahaka namo ita davaria, bona iseda lalona ita hadaia dahaka ita karaia totona?

 HARI taunimanima haida be Iehova idia tomadiho henia bona gaukara namodia momo idia karaia noho. Idia be Dirava ena orea ena kahana ta, bona unuseniai taunimanima milioni momo be maino korikori idia moalelaia bona lalotamona ai idia noho. Bona Iehova idia tomadiho henia taudia be edia lalona idia hadaia, ia tomadiho henia karana do idia rakatania lasi. Danu, idia ura taunimanima momo be Iehova bona idia ta ta huanai maino bona hetura karana namona do idia moalelaia.

2. Dahaka dainai tanobada ai ia noho paradaiso be hoa gauna?

² Ena be Satani ese inai tanobada ia hadikaia bona ena taunimanima be ta ta idia inai henia, to hoa gauna be idia huanai Iehova ese gabu ta ia hegaegaelaia, unuseniai iena taunimanima be maino bona lalotamona ai idia noho. (1 Ioa. 5:19; Apok. 12:12) Iseda lalokau Diravana ia itaia inai nega oromana ai taunimanima be idia hisihisi noho, to ia idia tomadiho henia taudia ia gimaia, unai amo mai moale ida ia do idia hesiai henia noho. Iena Hereva ese unai paradaiso be “hunia” gabuna bona “ranu momo ia noho uma gabu” ida ia hahegeregerea. (Isa. 4:6; 58:11) Iehova ena heduru dainai, ia idia tomadiho henia taudia be idia moale bona idia noho namonamo ena be inai dina gabedia ena nega aukadia ai idia noho.—Isa. 54:14; 2 Tim. 3:1.

3. Edena dala ai Isaia karoa 65 ena peroveta herevana be nega ginigunana ia guguru?

³ Isaia karoa 65 ai, peroveta tauna Isaia amo Iehova ese ia idia tomadiho henia taudia edia mauri dalana ia herevalaia. Bona unai ia guguru nega ginigunana be lagani 537 B.C.E. Unai nega ai, idia helalo-kerehai Iuda taudia be Babulonia ena igui amo idia ruhaia bona edia tano dekenai idia giroa lou.  Iehova ese ena taunimanima ia hanamoa bona durudia Ierusalema ena siti idia hanamoa bona dubu helaga idia haginia lou, bona unuseniai Iehova idia tomadiho henia.—Isa. 51:11; Sek. 8:3.

4. Edena dala ai Isaia karoa 65 be hari iseda negai ia guguru?

⁴ Lagani 1919 C.E. ai, Isaia ena peroveta herevana be nega iharuana ia guguru. Unai nega ai Iehova idia tomadiho henia taudia be Babulonia badana ena igui amo idia ruhaia. Unai murinai, tanobada ibounai dekenai tomadiho goevana be ia bada ia lao. Basileia idia harorolaia goadagoada taudia be kongrigeisen momo idia hamatamaia bona Keristani kara namodia idia hahedinaraia. Unai tatau bona hahine be guna dagedage bona matabodaga karadia idia karaia, to gabeai ‘kara matamata idia atoa . . . . Unai kara be Dirava ena ura hegeregerena ia vara.’ (Efe. 4:24) Oibe, Isaia ese ia gwauraia hahenamo idauidau be tanobada matamatana ai do idia guguru. To, hari ita be Iehova bona tadikaka taihu ida maino ai ita noho dainai, dala idauidau ai hahenamo ita abia noho. Iehova tomadiho henia karana ese ita ia durua, bona unai ita rakatania lasi ena badina do ita herevalaia.

IEHOVA IDIA TOMADIHO HENIA TAUDIA EDIA HEMAMI

5. Isaia 65:13 ena gwauhamata bamona, tomadiho goevana lalonai dahaka ita moalelaia?

⁵ Laulau dalanai ita hitolo lasi bona ita goada. Isaia ena peroveta herevana ese Iehova idia tomadiho henia taudia bona ia idia tomadiho henia lasi taudia edia idau ia herevalaia. (Isaia 65:13 duahia.) Iehova be ia idia tomadiho henia taudia dekenai, edia abidadama ia hagoadaia gaudia ia henia. Hegeregere, lauma helaga, Baibel bona pablikeisen idauidau ia henia, unai amo do ita ‘aniani, ranu do ita inua, bona do ita moale.’ (Apokalupo 22:17 hahegeregerea.) To, tomadiho goevana ena murimuri ai idia noho taudia be do idia ‘hitolo, idia ranu mase, [bona] idia hemarai.’ Unai taudia be Dirava idia diba lasi.—Amo. 8:11.

6. Ioela 2:21-24 ese Iehova amo ita abia harihari gaudia be edena bamona ia herevalaia, bona edena dala ai unai gaudia ese ita idia durua?

⁶ Ioela ena peroveta herevana lalonai, ia ese dina ta ta ai idia abia aniani, hegeregere witi, wain, bona olive oela ia gaukaralaia, unai amo ia hahedinaraia Iehova be ena taunimanima edia abidadama hagoadaia gaudia bona Baibel ena hakaua herevadia ia henia. (Ioe. 2:21-24) Unai ia karaia dalana be, ita totona Baibel bona Baibel pablikeisen idauidau, websait, hebou maragidia bona badadia ia hegaegaelaia. Dina ta ta ai unai gaudia ita abia dainai, laulau dalanai ita hitolo lasi bona ita goada.

7. Dahaka gaudia dainai iseda “kudouna ia namo”? (Isaia 65:14)

⁷ Ita abia gaudia dainai ita moale. Dirava ena taunimanima be ‘mai moale ida idia boiboi,’ badina Iehova idia tanikiu henia. (Isaia 65:14 duahia.) Iseda abidadama ia hagoadaia herevadia, Baibel ai Dirava ena gwauhamata namodia bona Keriso ena mauri davana amo ita abia helaro namona dainai, “iseda kudouna ia namo.” Unai gau namodia be iseda tadikaka taihu ida ita herevalaia neganai, ita moale bada!—Sal. 34:8; 133:1-3.

8. Tomadiho goevana ai edena kara rua idia hahedinaraia?

⁸ Tomadiho goevana ai Iehova ena taunimanima ese idia hahedinaraia kara badadia rua be lalokau bona lalotamona karana. “Taunimanima ia hatamonaia gauna” ese ita ia durua tanobada matamatana ai do ita noholaia maurina ita laloa totona. Unuseniai Iehova  ena hesiai taudia be lalokau bona lalotamona karana do idia habadaia, hari bamona lasi. (Kol. 3:14) Keristani taihu ta be nega ginigunana Iehova ena taunimanima ia hedavari henia neganai, ia gwau: “Lau be moale dalana lau diba lasi, ena be egu famili ida lau noho. To, nega ginigunana Iehova ena Witnes taudia lau hedavari henia neganai lalokau karana lau itaia.” Bema ta ia ura moale korikorina ia davaria, Iehova ia tomadiho henia be namo. Herevana inai tanobada taudia ese Iehova ena hesiai taudia idia laloa dalana be idau, to Iehova ena vairanai idia be ladana namona idia abia.—Isa. 65:15.

9. Hari ita davaria hekwakwanai dekenai, Isaia 65:16, 17 ena gwauhamata be dahaka?

⁹ Noho namo bona lalohekwarahi lasi. Isaia 65:14 ia gwau, tomadiho goevana ena murimuri ai idia noho taudia be ‘idia taitai badina idia lalohisihisi bona idia lalometau.’ To Dirava ena taunimanima dekenai hisihisi bona lalometau idia havaraia gaudia be edena bamona? Kahirakahira, unai gaudia be do idia ore bona “[Dirava] vairana amo do idia boio.” (Isaia 65:16, 17 duahia.) Iehova ese iseda hekwakwanai ibounai do ia kokia, bona nega ia hanaia lalonai ita davaria hisihisi ibounai do idia ore.

10. Dahaka dainai iseda tadikaka taihu ida ita hebamo be hahenamo badana? (Laulau itaia danu.)

¹⁰ Hari iseda Keristani hebou dekenai ita helai neganai ita gari lasi, bona inai tanobada dikana ese ia havaraia gaudia ita laloa momo lasi. Danu, Dirava ena lauma helaga ese ia havaraia kara namodia hegeregere lalokau, moale, maino, kara namo bona manau ita hahedinaraia neganai, iseda tadikaka taihu do idia gari lasi. (Gal. 5:22, 23) Dirava ena orea lalonai ita noho be hahenamo badana! Tomadiho goevana ai idia noho taudia ese Dirava ena gwauhamata “guba matamata bona tanobada matamata” ia guguru dalana do idia itaia.

11. Isaia 65:18, 19 ena hereva hegeregerena, Iehova ese ia havaraia tomadiho goevana dainai dahaka namo ita davaria?

¹¹ Ita moale. Isaia ese ia hahedinaraia Iehova ita tomadiho henia dainai ita “moale.” Iehova ese unai ia havaraia. (Isaia 65:18, 19 duahia.) Unai dainai ita ia gaukaralaia noho, taunimanima dekenai hereva momokani ita hadibaia, bona ita durudia ita ida Iehova idia tomadiho henia totona! Hereva momokani ita dibaia bona ita abia hahenamo idauidau dainai ita moale, bona unai ese ita ia hagoadaia ma haida dekenai ita dibaia gaudia ita herevalaia totona.—Ier. 31:12.

12. Isaia 65:20-24 ese ia gwauhamatalaia gaudia dainai, emu hemami be edena bamona, bona dahaka dainai?

 ¹² Danu, ita moale badina Iehova ita tura henia dainai, vaira nega ena helaro namona ita abia. Mani tanobada matamatana ai do ita itaia bona karaia gaudia oi laloa! Baibel ia gwauhamata: “Natu maragina ta do ia mase lasi, . . . bona buruka taudia be do idia noho daudau.” ‘Ruma do ita haginia, bona do ita noholaia, bona vain umadia do ita karaia bona edia huahua do ita ania.’ ‘Do ita hekwarahi kava lasi’ badina ‘Iehova ese ita do ia hanamoa.’ Ia gwauhamata ita do ia naria bona mauri namona do ia henia. “Edia noinoi gauna idia do gwauraia lasi neganai,” idia ta ta edia ura gaudia do ia diba bona ‘mauri gaudia ibounai edia ura gaudia ia henia.’—Isa. 65:20-24; Sal. 145:16.

13. Isaia 65:25 ese taunimanima edia mauri idia haidaua bona Iehova idia hesiai henia karana be edena bamona ia herevalaia?

¹³ Maino bona gari lasi. Dirava ena lauma helaga ena heduru dainai, guna idia dagedage bona koikoi taudia be hari edia mauri idia haidaua. (Isaia 65:25 duahia.) Idia gaukara goada edia kara gunadia idia haidaua. (Roma 12:2; Efe. 4:22-24) Momokani, Dirava ena taunimanima be goevadae lasi dainai kerere idia karaia diba. To, Iehova ese “taunimanima idauidau” ia hatamonaia bona idia ese Ia bona ta ta idia lalokau henia, unai dainai maino korikori bona lalotamona karana idia moalelaia. (Tito 2:11) Unai be hoa gauna, bona siahu ibounai Diravana sibona ese ia karaia diba!

14. Edena dala ai Isaia 65:25 ena hereva be tadikaka ta dekenai ia guguru?

¹⁴ Taunimanima be edia kara idia haidaua diba, a? Mani inai ekspiriens ita laloa. Tau ta be matabodaga bona dagedage maurina ia noholaia bona ena mauri lagani be 20 neganai, nega momo dibura ruma dekenai idia atoa, badina motuka ia henaodia bona kara dika badadia ia karaia. Nega momo ia ura taunimanima ida ia heai. Nega ginigunana Baibel amo hereva momokani ia dibaia bona Iehova ena Witnes taudia edia hebou ia lao matamaia neganai, ia abia dae ena mauri be mai ena badina, unai be Iehova tomadiho henia karana. Ia bapatiso murinai, nega momo Isaia 65:25 ena hereva be ia dekenai ia guguru dalana ia laloa. Ia be dagedage tauna laiona bamona, to ena kara ia haidaua bona mamoe bamona maino tauna ai ia lao.

15. Dahaka dainai ma haida ita boiria ita ida Iehova idia tomadiho henia totona, bona edena bamona unai ita karaia diba?

¹⁵ Isaia 65:13 be inai bamona ia hamatamaia: “Siahu Ibounai Lohiabadana Iehova ia gwau.” Bona siri 25 ena dokona be inai bamona ia gwau: “Unai be Iehova ena hereva.” Hanaihanai ena hereva idia guguru. (Isa. 55:10, 11) Hari ita be Iehova ena orea lalonai ia ita tomadiho henia. Bona Iehova ese taunimanima idauidau ia haboua, ruma bese ta bamona ia idia tomadiho henia, unai be idau momokani. Ita be unai ruma bese ena kahana ta dainai, ena be inai dagedage tanobadana lalonai ita noho, to maino bona noho namo ita moalelaia. (Sal. 72:7) Unai dainai, ita ura momo ita durua iseda Keristani ruma besena lalonai idia vareai. Unai ita karaia diba bema hahediba taudia halaoa gaukarana ita karaia.—Mat. 28:19, 20.

MA HAIDA DURUA ITA IDA IEHOVA IDIA TOMADIHO HENIA

16. Edena dala ai taunimanima be Iehova idia tomadiho henia diba?

¹⁶ Ita ta ta be mai iseda maduna ma haida ita durua, Iehova idia tomadiho henia totona.  Unai ita karaia totona, namona be Iehova ita tohotohoa. Ia be taunimanima ia doria lasi ena orea lalonai idia vareai totona. To, mai lalokau ida ta ia “veria mai” ia dekenai. (Ioa. 6:44; Ier. 31:3) Kudou-maoro taudia be Iehova ena lalokau bona kara namodia idia dibaia neganai, ia kahirakahira idia lao. Edena dala ai, iseda kara namodia amo taunimanima ita veria mai diba Iehova idia tomadiho henia totona?

17. Edena dala ai ma haida ita veria mai diba Iehova idia tomadiho henia totona?

¹⁷ Taunimanima ita veria mai Iehova idia tomadiho henia dalana ta be, iseda tadikaka taihu dekenai lalokau bona kara namodia ita hahedinaraia. Kamonai taudia be iseda kongrigeisen heboudia dekenai idia mai neganai, ita ura idia danu be guna Korinto dekenai hebou idia lao kamonai taudia bamona idia mamia. Idia gwau: “Momokani, Dirava be umui huanai ia noho.” (1 Kor. 14:24, 25; Sek. 8:23) Unai dainai, inai sisiba herevana ita badinaia ‘ta ta ida maino ai do ita noho.’—1 Tes. 5:13.

18. Dahaka ese iseda orea lalonai taunimanima ia veria mai?

¹⁸ Namona be Iehova ese iseda Keristani tadikaka taihu ia laloa hegeregerena idia ita laloa. Unai ita karaia dalana be edia kara namodia sibona ita laloa, to edia kerere lasi. Hekwakwanai ita hamaoromaoroa diba bema hanaihanai ita ‘kara namo heheni bona hebogahisi heheni, bona mai kudouna ibounai ida ta ta ena dika ita gwauatao.’ (Efe. 4:32) Unai amo idia ura ma haida ese idia kara namo henia taudia be ita ida Iehova idia tomadiho henia diba. a

 IEHOVA TOMADIHO HENIA KARANA RAKATANIA LASI

19. (a) Maua ladana, “ Idia Raka Siri To Idia Giroa Lou” ese ia hahedinaraia, haida be Iehova ena orea dekenai idia giroa lou neganai, dahaka idia gwau? (b) Iseda lalona ita hadaia dahaka ita karaia totona? (Laulau ita danu.)

¹⁹ Iehova ita tomadiho henia dainai ita moale! Unai be namo herea guna bamona lasi, bona unuseniai Iehova idia tomadiho henia taudia momo herea idia noho. Hanaihanai Iehova ita tanikiu henia badina ia haginia maino bona lalotamona oreana lalonai ita noho. Bema ta be Iehova tomadiho henia karana ia rakatania lasi, ia be laulau dalanai do ia hitolo lasi, ia abia gaudia do ia moalelaia, do ia lalohekwarahi lasi, do ia gari lasi bona do ia noho namonamo! To namona be ita gima noho, badina Satani ia ura ita ia koia unai orea namona ita rakatania totona. (1 Pet. 5:8; Apok. 12:9) Namo lasi dala ita kehoa Satani ia kwalimu totona. Namona be ita gaukara goada Iehova tomadiho henia karana ena hairai, helaga, bona ena maino ita gimaia.