1, 2. (a) Inai dina gabediai, edena dala ai Isaia 60:22 ena hereva ia guguru? (b) Iehova ena tanobada oreana ai, dahaka ia vara be namo?

 “LADANA maragi momokani tauna mai ena famili, be bese badana mai goadana danu do idia lao.” (Isa. 60:22) Inai dina gabediai, unai peroveta herevana be ia guguru noho. Lagani 2015 ena hesiai laganina ai, tanobada hegegemadai pablisa taudia 8,220,105 be haroro gaukara idia goadalaia! Unai peroveta herevana ena dokona kahana be Keristani taudia ibounai totona, badina iseda guba Tamana ia gwau: “Negana korikori ia ginidae neganai, lau ese inai kara do lau havaraia haraga. Lau inai Lohiabada!” Hahediba taudia halaoa gaukarana be ia bada ia lao haraga, ia sipidi motuka ta bamona. Unai gaukara be edena bamona ita laloa? Ita be pablisa taudia dainai, haroro gaukara ita goadalaia, a? Tadikaka taihu momo be idia ura regula o heduru painia gaukara idia karaia. Bona ita moale badina momo be pablisa momo lasi gabudia dekenai idia lao eiava tiokratik gaukara ma haida idia durua.

² To, gaukara taudia momo ita abia be namo. Lagani ta ta ai, kongrigeisen 2,000 mai kahana idia hamatamaia. Bema unai kongrigeisen ta ta ai elda taudia 5 idia noho, lagani ta ta ai hesiai taudia 10,000 be elda taudia ai idia lao be namo. Anina be tadikaka tau sen momo idia hekwarahi be namo hesiai taudia ai idia lao totona. Unai sibona lasi, ena be ita be tadikaka o taihu, to “Lohiabada ena gaukara idauidau lalonai do [ita] bisi.”​—1 Kor. 15:58.

3, 4. Emu hesiai gaukara oi habadaia ena anina be dahaka?

³ Timoteo Ginigunana 3:1 duahia. Inai Grik herevana idia hahanaia “ura” ena anina be oi gaukara goada gau ta oi abia totona. Aposetolo Paulo be unai hereva ia gaukaralaia neganai, ia ura hahedinaraia bema ita ura iseda hesiai gaukara ita habadaia, ita gaukara goada be namo. Mani oi laloa, tadikaka ta be kongrigeisen ai ia karaia diba gaukara haida ia laloa noho. Reana hari ia be hesiai tauna lasi, to ia diba Keristani kara namodia ia hahedinaraia be namo. Matamanai, do ia gaukara goada hesiai tauna ai ia lao totona. Gabeai, reana elda maduna ia abia diba. Kongrigeisen ai unai maduna ta ta ia huaia totona, ia gaukara goada be namo.

⁴ Unai hegeregerena, bema tadikaka taihu idia ura painia gaukara, Betele gaukara, o Kingdom Hall konstraksen gaukarana idia durua, namona be idia gaukara goada edia tahua gaudia idia hagugurua totona. Dirava ena Hereva ese ita ibounai ia hagoadaia tomadiho momokani ita abia isi totona. Edena dala ai? Mani ita itaia.

5. Edena dala ai matamata taudia ese edia goada idia gaukaralaia diba?

⁵ Matamata taudia be mai edia goada Iehova ena hesiai gaukara idauidau idia karaia totona. (Aonega Herevadia 20:29 duahia.) Betele ai, tadikaka matamata haida be Baibel bona Baibel bukadia idia printaia bona karaia gabudiai idia gaukara. Bona tadikaka bona taihu matamatadia momo be Kingdom Hall haginia bona hanamoa gaukarana idia durua. Danu, disasta badadia idia vara neganai, matamata taudia be lo Witnes taudia ida idia gaukara hebou heduru idia henia totona. Bona painia gaukara idia karaia matamata taudia momo be edia hanua taudia bona hanua ma haida taudia dekenai sivarai namona idia harorolaia.

6-8. (a) Tau matamata ta be dahaka ia karaia, bona dahaka hahenamo ia abia? (b) Edena dala ai do ita mamia “Lohiabada be namo momokani”?

⁶ Mai kudouna ibounai ida Dirava ita hesiai henia be mai anina bada. To, bema tadikaka Aaron ese guna ia abia hemamina oi abia be edena bamona? Ena be Keristani ruma besena ai ia tubu daekau, to ia gwau, “Lau ese hebou lao henia karana bona haroro gaukara lau hesikulaia.” Ia ura mai moale ida Dirava ia hesiai henia, to ia moale lasi ena badina ia daradaralaia. Vadaeni dahaka ia karaia?

⁷ Aaron be inai ia karaia matamaia: Ena Baibel ia duahia, hebou totona ia hegaegae, bona hebou ai haere ia henia. Bona ia guriguri hanaihanai matamaia. Iena lalokau Iehova dekenai ia bada ia lao neganai, iena hesiai gaukara ia habadaia. Unai nega amo, Aaron be painia gaukara ia moalelaia, ma haida ida disasta amo dika idia davaria taudia ia durua, bona tano idauna ai ia haroro. Hari, Aaron be Betele ai ia gaukara bona ia be elda ta. Ia karaia gaudia be edena bamona ia laloa? Ia gwau: “Lau mamia ‘Lohiabada be namo momokani.’ Lau abia hahenamo dainai, lau mamia ia dekenai lau be mai egu abitorehai, bona lau ura egu hesiai gaukara lau habadaia. Unai lau karaia dainai hahenamo momo lau abia.”

⁸ Salamo torea tauna ia gwau: “Lohiabada idia kamonai henia taudia, be gau namona ta idia dabu lasi.”  (Salamo 34:8-10 duahia.) Oibe, Iehova ese ia idia hesiai henia taudia ia hanamodia. Ita danu be Dirava ena hesiai gaukara ita karaia neganai, do ita mamia “Lohiabada be namo momokani.” Bona bema mai kudouna ibounai ida Dirava ita tomadiho henia, moale korikorina ita davaria.

9, 10. Dahaka dainai oi “naria noho” be mai anina bada?

⁹ Emu tahua gaudia oi hagugurua totona, namona be oi “naria noho.” (Mika 7:7) Iehova be hanaihanai ena abidadama hesiai taudia ia durua, ena be nega daudau idia naria hahenamo ta idia abia totona eiava edia noho dalana ia namo totona. Mani oi laloa, ia ese Aberahamo ia gwauhamata henia natuna ta do ia havaraia, to Aberahamo ia haheauka bona Dirava ia abidadama henia be namo. (Heb. 6:12-15) Ena be Aberahamo be lagani momo ia naria Isako ia vara totona, to ia hesiku lasi, bona Iehova ese ia hanamoa.​—Gen. 15:3, 4; 21:5.

¹⁰ Momokani, bema ita naria daudau, ita hesiku diba. (Aon. 13:12) To bema ita naria dainai ita lalometau, do ita lalomanoka. Unai dainai aonega karana be iseda nega ita gaukaralaia iseda hesiai gaukara ita habadaia totona. Mani dala toi ita herevalaia.

11. Edena bamona Keristani kara namodia ita hahedinaraia diba, bona dahaka dainai unai be mai anina bada?

¹¹ Keristani kara namodia hahedinaraia.  Baibel ita duahia bona laloa dobu neganai, do ita aonega, laloa maoromaoro, laloa goada, bona eda diba Dirava dekenai do ia bada. Tomadiho momokani idia gunalaia taudia ese unai bamona kara idia hahedinaraia be mai anina bada. (Aon. 1:1-4; Tito 1:7-9) Bona  iseda Baibel bukadia ita duahia neganai, Dirava ena lalohadai hegeregerena gau ita karaia diba. Dina ta ta ai, ita ese moale karadia, iseda dabua bona toana, moni bona ma haida kara henia dalana dekenai abia hidi ita karaia. Baibel amo ita dibaia gaudia ita badinaia neganai, Iehova ia hamoalea abia hidi do ita karaia.

12. Edena dala ai kongrigeisen taudia ta ta ese edia hereva idia hamomokania diba?

¹² Emu hereva oi hamomokania.  Ena be ita be tadikaka o taihu, namona be ita abia tiokratik gaukaradia ita karaia namonamo. Nehemia be gavana dainai, ia ese Dirava ena taunimanima do idia naria taudia haida ia abia hidi. Daidia ia abia hidi? Ia ese Dirava idia gari henia, mai edia abidadama, bona gaukara karaia namonamo taudia ia abia hidi. (Neh. 7:2; 13:12, 13) Hari danu be hegeregere, “naria taudia amo idia tahua gauna be inai: Namona be idia ese edia gaukara idia karaia momokani.” (1 Kor. 4:2) Kara namodia be do idia hedinarai.​—1 Timoteo 5:25 duahia.

13. Edena dala ai Iosepa ena haheitalai oi tohotohoa diba?

¹³ Iehova ese oi do ia hamaoromaoroa.  Bema haida ese oi idia kara auka henia, dahaka do oi karaia? Reana unai hekwakwanai do oi hamaoromaoroa haraga. To nega haida, bema sibona emu maoro oi gwauraia hedinarai, unai ese hekwakwanai ia habadaia diba. Iosepa ena tadikaka ese ia idia kara auka henia, to idia ia badu henia lasi. Gabeai, Iosepa idia samania koikoi bona dibura ruma ai idia atoa. To, unai nega aukadia lalonai ia be Iehova dekenai ia tabekau. Dahaka ia vara? “Lohiabada ena hereva ese, ia hedinaraia Iosepa ena hereva be maoro.” (Sal. 105:19) Unai hahetoho idia ore neganai, Iosepa be gaukara badana ta ia abia. (Gen. 41:37-44; 45:4-8) Ginigini bamona hekwakwanai idauidau oi davaria neganai, aonega totona oi guriguri, mai manau ida oi kara bona hereva, bona Dirava oi noia oi dekenai goada do ia henia. Bena Iehova ese oi do ia durua.​—1 Petero 5:10 duahia.

14, 15. (a) Dahaka dainai iseda haroro daladia ita “naria namonamo” be namo? (b) Edena dala ai emu haroro dalana oi haidaua diba? (Laulau ginigunana bona maua ladana “ Haroro Dala Ma Ta Oi Tohoa Diba, A?” herevalaia.)

¹⁴ Paulo be Timoteo dekenai ia gwau: “Namona be oi gaukara goada taunimanima vairanai oi duahiduahi noho, sisiba oi henia noho, bona oi hadibaia noho . . . Oi sibona bona emu hadibaia hereva dekenai oi naria namonamo.” (1 Tim. 4:13, 16) Timoteo be Basileia harorolaia gaukarana ia diba namonamo. To haroro gaukara ai anina namona ia davaria totona, namona be iena hahediba dalana ia “naria namonamo.” Namo lasi ia laloa taunimanima ibounai be iena haroro dalana do idia abia dae. To edia kudouna ia hamarerea totona, namona be taunimanima ese idia laloa bada gaudia ia laloa, bona unai hegeregerena ena hahediba dalana ia haidaua. Ita be Basileia harorolaia taudia dainai, unai ita karaia danu be namo.

¹⁵ Ruma-ta-ruma-ta gaukara ita karaia neganai, nega momo taunimanima be ruma ai idia noho lasi. Gabu haida dekenai, apatmen bona mai magu gabudia haida ita vareai diba lasi. Bema emu teritori ai unai ia vara, haroro dalana ma ta oi tohoa diba, a?

16. Edena dala ai pablik gabudia haroro karana ese namo ia havaraia diba?

¹⁶ Pablik gabudiai haroro karana be dala namona ma ta dekenai sivarai namona ita harorolaia totona. Witnes taudia momo be unai dala idia badinaia dainai, namo bada idia davaria. Idia ese nega idia atoa, unai amo trein bona basi abia gabudia, maketi gabudia, laga-ani gabudia, bona pablik gabudia ma haida ai taunimanima idia haroro henia totona. Mai laloa maoromaoro ida, Witnes ta ese nius o niuspepa ai idia halasia sivaraina ia gwauraia, unai tauna ena natudia ia hanamoa, o iena gaukara dainai ia henanadai diba. Idia  herevahereva noho lalonai, pablisa ese siri ta ena hereva ia gwauraia diba bona ena haere ia naria. Iena haere amo Baibel amo hereva ma haida ia gwauraia diba.

17, 18. (a) Edena dala ai pablik gabudiai haroro karana oi manadalaia diba? (b) Haroro gaukara ai edena dala ai Davida ena hereva ese oi ia durua diba?

¹⁷ Bema oi dekenai pablik gabudiai haroro karana be auka, oi hesiku lasi. New York ai ia noho painia ta, Eddie, be ia gari pablik gabudiai taunimanima ia hereva henia totona. To nega ia hanaia lalonai, ia gari lou lasi. Dahaka ese ia durua? Ia gwau: “Emai ruma bese tomadihona ai, lau bona egu adavana be taunimanima ese idia gwauraia koua herevadia haerelaia daladia dekenai hetahu ai karaia. Witnes taudia ma haida edia lalohadai ai abia danu.” Hari Eddie be pablik gabudia haroro karana ia moalelaia.

¹⁸ Sivarai namona harorolaia karana oi manadalaia neganai, taunimanima do idia itaia oi be oi goada oi lao. (1 Timoteo 4:15 duahia.) Danu, Davida hegeregerena iseda guba Tamana do oi hanamoa, ia gwau: “Nega ibounai Lohiabada do lau hanamoa. Ia do lau tanikiu henia ela bona hanaihanai. Dirava ena durua lau dekenai lau laloa neganai, ia lau hanamoa bada. Hisihisi idia abia noho taudia ese, inai egu hereva do idia kamonai, vadaeni do idia moale be namo.” (Sal. 34:1, 2) Oibe, emu haroro goadagoada karana dainai, hisihisi idia abia noho taudia o manau taudia be mai moale ida tomadiho momokani do idia badinaia.

19. Hekwakwanai negadiai, dahaka dainai Iehova ena hesiai tauna ia moale be namo?

¹⁹ Davida ma ia gwau: “Lohiabada e, oi ese oi karaia gaudia ibounai ese, oiemu ladana do idia abia isi, bona oiemu bese taudia ese oi do idia hanamoa bada. Idia ese oiemu King siahuna ena hairaina do idia herevalaia, bona oiemu goada badana do idia gwauraia. Vadaeni taunimanima ibounai ese, oiemu kara badadia ena sivarai do idia diba. Oiemu basileia ena goada bona hairaina danu do idia diba.” (Sal. 145:10-12) Iehova ena abidadama Witnes taudia ibounai edia hemami danu be unai bamona. To, bema gorere o buruka dainai oi haroro diba lasi be edena bamona? Laloatao, oi idia naria taudia bona ma haida dekenai sivarai namona oi harorolaia neganai, oi be iseda Dirava oi hanamoa noho. Bema emu abidadama dainai oi idia hadiburaia, bona bema dala ia kehoa, hereva momokani oi harorolaia diba, bona Iehova ese unai do ia moalelaia. (Aon. 27:11) Danu, bema emu ruma bese taudia edia tomadiho be idau, namo lasi emu haroro, hebou bona stadi karana oi rakatania. (1 Pet. 3:1-4) Oibe, ena be hekwakwanai idauidau oi davaria, to Iehova oi hanamoa bona hesiai henia noho.

20, 21. Bema Iehova ena orea ai gaukara momo oi karaia, edena dala ai ma haida ia durua diba?

²⁰ Bema emu hesiai gaukara oi habadaia noho, Iehova ese oi do ia hanamoa. Reana emu sediual o noho dalana dekenai gau haida oi haidaua neganai, ma haida dekenai Dirava ena hereva momokani oi harorolaia diba. Danu, emu hetura karana Dirava ida do ia goada bona haroro gaukara durua totona sibona oi henia dainai, tadikaka taihu ma haida be namo do idia davaria. Bona mai manau ida kongrigeisen gaukara oi durua dainai, Iehova idia lalokau henia taudia ma haida ese oi do idia ura henia, moalelaia, bona durua.

²¹ Ena be lagani momo o hua haida sibona lalonai Iehova ita hesiai henia, ita ibounai be iena tomadiho karadia ita goadalaia diba. To, edena dala ai lo Keristani taudia ese pablisa matamatadia idia durua diba edia hesiai gaukara idia habadaia totona? Stadi gabena ese unai do ia herevalaia.