Golo Ia Hereaia Gauna Tahua
Nega ta golo oi davaria, a? Haida sibona be golo idia davaria. To, taunimanima milioni momo be golo ia hereaia gauna ta idia davaria. Unai be Dirava amo ia mai aonegana, bona ia be “golo . . . amo, . . . ita hoia diba lasi.”—Iobu 28:12, 15.
ITA gwau diba, Bible Student taudia be golo idia tahua taudia bamona. Idia gaukara goadagoada bona Baibel idia stadilaia namonamo dainai, aonega herevadia idia davaria. Golo tahua taudia be inai dala toi idia gaukaralaia golo idia davaria totona. Ita be Bible Student taudia dainai, unai dala toi ita badinaia diba?
GOLO TA OI DAVARIA!
Mani oi laloa, oi be sinavai ta badinai oi raka bona nadi ta oi itaia, unai nadi be dina ena diari ese ia abia dainai ia diaridiari. Vadaeni oi igo diho bona unai nadi oi abia. Oi moale badina golo ta oi davaria. Unai nadi ena bada be masisi ena kwarana bamona bona ia be dava bada daimon ia hereaia. Momokani, do oi ura unai bamona nadi ma haida oi tahua.
Unai hegeregerena, reana guna Iehova ena hesiai tauna ta be emu iduara ai ia pidipidi, Baibel ai ia noho sivarai namona ia herevalaia totona. Reana golo o hereva momokani oi davaria negana ginigunana oi do laloatao. Unai nega be emu nega ginigunana Baibel ai Dirava ena ladana Iehova oi itaia. (Sal. 83:18) Bona reana oi dibaia gauna ma ta be, oi be Iehova ena turana ai oi lao diba. (Iam. 2:23) Unai nega ai oi diba momokani oi be golo ia hereaia gauna ta oi davaria! Bona oi ura dikadika diba eiava golo ma haida oi tahua.
GOLO MA HAIDA OI TAHUA!
Nega haida golo maragimaragi be sinavai badinai oi davaria diba. Bema ia be nega namona, golo tahua taudia ese unai bamona gabudia ai golo momo idia davaria diba, bona moni tausen momo idia abia.
Iehova ena Witnes tauna ta ida Baibel oi stadilaia matamaia neganai, reana oi mamia oi be golo momo ia davaria tauna bamona. Baibel ena siri ta ta laloa dobu karana ese emu diba Baibel dekenai ia habadaia, bona emu abidadama ia hagoadaia danu. Baibel ena hereva momokani oi laloa dobu neganai, oi be Iehova kahirakahira oi lao, iena lalokau lalonai oi noho, bona mauri hanaihanai abia dalana oi dibaia.—Iam. 4:8; Iuda 20, 21.
Golo tahua tauna hegeregerena, namona be oi gaukara goada Baibel ena hereva momokani oi dibaia totona, a?
Ta ese golo ia tahua namonamo hegeregerena, reana oi danu be oi Mat. 28:19, 20.
gaukara goada Baibel amo diba ma haida oi abia totona. Baibel ena hahediba hereva badadia oi davaria murinai, reana unai ese oi ia hagoadaia Dirava dekenai emui mauri oi gwauhamatalaia bona oi bapatiso totona.—I TAHUA NOHO!
Golo tahua tauna ese reana golo haida be guna idia siahu bada nadi haida lalonai ia davaria diba. Unai bamona nadi haida lalonai golo bada ia noho dainai, unai nadi idia geia bona makohia golo idia abia totona. Nega ginigunana nadi oi itaia neganai, reana golo do oi itaia lasi. Dahaka dainai? Badina unai nadi lalonai golo gram 10 sibona ia noho! To golo tahua tauna dekenai unai be dava bada gauna.
Ta be “Keriso ena hahediba hereva ginigunadia” ia dibaia murinai, do ia gaukara goada noho. (Heb. 6:1, 2) Namona be oi gaukara goada sibona emu stadi amo point namodia ma haida oi abia totona. Ena be lagani momo lalonai Baibel oi stadilaia vadaeni, to dahaka oi karaia diba, unai amo sibona emu stadi amo namo oi davaria diba?
Namona be mai emu ura bada ida diba oi tahua. Bona oi dibaia gaudia oi lalohadailaia. Oi hekwarahi noho, bona Dirava ena aonega bona hahekau, dava bada gaudia unai, do oi davaria. (Roma 11:33) Emu diba Baibel dekenai oi habadaia totona, namona be orea ese ia halasia tulu idauidau oi gaukaralaia namonamo. Mai haheauka ida emu Baibel henanadai edia haere oi tahua. Ma haida oi nanadaia edena Baibel siri bona atikol ese idia ia durua bona hagoadaia. Emu stadi karana amo oi davaria point namodia be ma haida ida oi herevalaia.
Momokani, namo lasi emu diba sibona oi habadaia. Aposetolo Paulo ia gwau: “Diba ese hekokoroku ia havaraia.” (1 Kor. 8:1) Unai dainai oi manau bona emu abidadama oi hagoadaia noho be namo. Ruma bese tomadihona bona sibona emu stadi ese oi do ia durua Iehova ena taravatu oi badinaia bona ma haida oi durua totona. Gau badana be oi moale, badina oi be golo ia hereaia gauna ta oi davaria vadaeni.—Aon. 3:13, 14.