1. Ena be tau bona hahine idia headava matamata neganai idia moale, to dahaka idia laloatao be namo? (Laulau ginigunana herevalaia.)

 HEADAVA dinana ai, hahine be iena tau dekenai ia raka lao neganai, idia ruaosi idia moale bada, ani? Oibe, edia hetura negana lalonai, edia lalokau be ia goada dainai, headava dinana ai idia gwauhamata ta ta do idia badinaia. To momokani, headava ese taunimanima idaudia rua ia hatamonaia bona idia be ruma bese matamata ai idia lao dainai, gau haida idia haidaua be namo. Bona Dirava ena Hereva lalonai sisiba namodia idia noho, unai ese headava idia lalohadailaia noho taudia ia durua diba. Oibe, headava ia Hamatamaia Tauna ia ura tau bona hahine ese edia headava maurina idia moalelaia. (Aon. 18:22) To danu, Baibel ia gwau idia headava goevadae lasi taudia be “edia tauanina ai hisihisi do idia abia.” (1 Kor. 7:28) Vadaeni dahaka idia karaia diba unai hisihisi idia haheaukalaia totona? Bona edena dala ai Keristani headava taudia idia moale diba?

2. Headava taudia ese edena bamona lalokauna idia hahedinaraia be namo?

² Baibel ia gwau lalokau be mai anina bada. Headava lalonai ta ta idia hebogahisi henia (Grik, phi·liʹa) be namo. Tau bona hahine ese ta ta dekenai idia hahedinaraia  lalokauna (eʹros) ese idia ia hamoalea diba, bona ruma bese lalokau henia (stor·geʹ) karana be mai anina bada, bema natudia idia havaraia. To, hakaua herevana dainai idia hahedinaraia lalokauna (a·gaʹpe) ese headava maurina ia hanamoa diba. Aposetolo Paulo ese unai lalokau be inai bamona ia herevalaia, ia gwau: “Namona be umui ibounai ese emui hahine do umui lalokau henia, sibona umui lalokau henia hegeregerena. Hahine danu ese iena tau do ia matauraia bada be namo.”​—Efe. 5:33.

3. Headava lalonai edia lalokau ena goada be edena bamona?

³ Paulo ia gwau: “Tatau e, emui hahine do umui lalokau henidia noho, Keriso ese kongrigeisen ia lalokau henia bona ia dainai sibona ia henia hegeregerena.” (Efe. 5:25) Bema Iesu ena murinai idia raka taudia idia ura iena haheitalai idia tohotohoa, namona be idia lalokau heheni, ia ese idia ia lalokau henia hegeregerena. (Ioane 13:34, 35; 15:12, 13 duahia.) Unai dainai Keristani headava taudia ese idia hahedinaraia lalokauna ia goada momokani be namo, anina be idia ta be ma ta totona ia mase diba. Hekwakwanai badana ta ia vara neganai, reana unai be kara ginigabena ta ese do ia ura karaia. To, a·gaʹpe lalokauna be “gau ibounai dekenai ia gini goada, gau ibounai ia abidadama henia, gau ibounai lalonai ia be mai ena helaro, bona gau ibounai ia haheaukalaia.” Oibe, “lalokau be ia ore diba lasi.” (1 Kor. 13:7, 8) Bema Dirava idia gari henia tau bona hahine be edia headava dinana ai idia karaia gwauhamatana​—ta ta do idia lalokau henia bona badinaia​—idia laloatao, unai ese idia do ia durua Iehova ena hakaua hereva hegeregerena edia hekwakwanai idia hamaoromaoroa totona.

4, 5. (a) Tau be ruma bese kwarana dainai ena maduna be dahaka? (b) Hahine ese kwara dagina be edena bamona ia laloa be namo? (c) Headava taudia rua be dahaka gaudia idia haidaua?

⁴ Paulo ese headava tau bona hahine edia maduna ia herevalaia neganai, ia gwau: “Hahine be edia tatau henunai idia noho be namo, Lohiabada henunai idia noho hegeregerena. Badina tau be ena hahine ena kwarana, Keriso be kongrigeisen ena kwarana hegeregerena.” (Efe. 5:22, 23) Unai ese ia hahedinaraia lasi tatau ese edia hahine idia hereaia. To hahine ia durua Dirava ese ia dekenai ia henia maduna ia huaia totona, ia gwau: “Unai tau [Adamu] sibona ia noho be ia namo lasi, lau ese durua tauna ia bamona do lau karaia.” (Gen. 2:18) Keriso, “kongrigeisen ena kwarana,” ese lalokau ia hahedinaraia hegeregerena, namona be Keristani tauna ese lalokau dalanai ena kwara dagina ia gaukaralaia. Unai bamona ia karaia neganai, iena adavana do ia moale, bona ia do ia matauraia, durua, bona kamonai henia.

⁵ Oibe, headava tau bona hahine be gau haida do idia haidaua danu, hegeregere Cathy [1] ia gwau: “Lau do headava lasi neganai, sibona totona gau ibounai lau karaia. To, lau headava murinai, unai ia idau, hari egu adavana dekenai lau tabekau. Nega haida ia auka, to Iehova ena dala ai badinaia dainai, emai hetura karana ia goada.” Iena adavana, Fred, ia gwau: “Abia hidi ta lau ura karaia neganai, ia auka. Unai dainai lau headava murinai, lau hekwarahi bada, badina hari taunimanima rua totona abia hidi lau karaia. To, guriguri amo Iehova ena heduru lau noia, bona egu adavana ena lalohadai kamonai namonamo karana ese lau ia durua bada. Lau mamia ai be tura namodia!”

6. Hekwakwanai negadiai, edena dala ai lalokau ese idia ia hatamonaia diba?

⁶ Headava ia goada totona, namona be idia hekwarahi ta ta edia dika idia gwauatao. Baibel ia gwau: “Ta ta emui kara do umui haheaukalaia noho bona mai kudouna ibounai ida do umui  gwauatao heheni.” Oibe, tau bona hahine be idia kerere diba. To unai ia vara neganai, unai be nega namona ta ta umui dibaia totona, namona be umui gwauatao heheni, bona ta ta umui lalokau henia noho, badina unai be “taunimanima ia hatamonaia gauna hereadaena.” (Kol. 3:13, 14) Danu, “lalokau be ia boga-auka, bona ia hebogahisi. . . . Bona ia be ta ena kerere ia laloatao noho lasi.” (1 Kor. 13:4, 5) Namona be lalohadai kereredia idia hamaoromaoroa haraga. Unai dainai, dina ia do diho lasi neganai, Keristani tau bona hahine ese edia hekwakwanai idia hamaoromaoroa be namo. (Efe. 4:26, 27) Bema idia ta ia manau bona lalogoada, do ia gwau, “Emu lalona lau hahisia dainai lau sori.” To, ia vara hekwakwanai idia hamaoromaoroa bona edia hetura karana idia hanamoa totona, gau ma haida idia karaia danu be namo.

7, 8. (a) Headava karana dekenai Baibel be dahaka sisiba ia henia? (b) Dahaka dainai tau bona hahine ese hebogahisi idia hahedinaraia be namo?

⁷ Mahuta hebou karana dekenai Baibel ese sisiba namona ia henia, bona unai ese tau bona hahine ia durua diba. (1 Korinto 7:3-5 duahia.) Tau bona hahine be mai lalokau ida ta ta ena hemami bona namo idia laloa be mai anina bada. Bema tau ese mai lalokau ida ena hahine ia kara henia lasi, reana hahine ese headava karana do ia moalelaia lasi. Baibel ia gwau, namona be tatau ese “mai laloa namonamo ida” edia hahine idia kara henia. (1 Pet. 3:7) Unai dainai headava karana dekenai namo lasi ta ta idia doria, to idia ruaosi idia lalotamona be namo. Oibe, ena be tatau be unai kara dekenai idia karaharaga, to ta ta edia hemami idia laloa be gau badana.

⁸ Ena be Baibel ese lalokau hahedinaraia daladia dekenai taravatu ia atoa lasi, to ia gwau lalokau be dala haida ai idia hahedinaraia diba. (Sol. 1:2; 2:6) Keristani headava tau bona hahine ese mai hebogahisi ida ta ta idia kara henia be namo.

9. Dahaka dainai emu adavana lasi to ma ta ura henia karana be kerere?

⁹ Bema tau bona hahine ese Dirava bona edia dekena tauna idia lalokau henia, gau ta o tau ta ese edia headava do ia hadikaia lasi. Headava haida be idia dika, badina edia adavana ese nega daudau lalonai ponografi laulaudia idia itaia. Unai dainai bema tau o hahine ia ura unai laulaudia ia itaia o headava murimurinai kara ma haida ia karaia, namona be unai ura ia dadaraia. Ma danu bema iena adavana lasi, to tau ma ta ena adavana ia hauraia kava, unai be lalokau karana lasi bona ia dadaraia be namo. Laloatao Dirava be iseda lalohadai bona kara ibounai ia diba, unai dainai ita ura ia ita hamoalea bona ita kara goeva.​—Mataio 5:27, 28; Heberu 4:13 duahia.

10, 11. (a) Tanobada hegegemadai, headava hadokoa karana be edena bamona? (b) Headava hapararaia karana dekenai Baibel be dahaka ia gwau? (c) Dahaka ese tau o hahine ia durua diba, unai amo ena adavana do ia rakatania lasi?

¹⁰ Bema headava lalonai hekwakwanai badadia idia vara momo, reana idia ruaosi eiava tau o hahine do ia laloa ena adavana amo ia parara eiava edia headava idia hadokoa be namo. Tano haida ai, headava ibounai 100 amo 50 be edia headava idia hadokoa. Keristani kongrigeisen lalonai unai ia vara momo lasi, to Dirava ena taunimanima huanai idia noho headava taudia danu be hekwakwanai momo idia davaria.

¹¹ Baibel be inai sisiba ia henia: “Hahine ese ena adavana do ia rakatania lasi, to bema ia ese ena adavana ia rakatania, namona be do ia headava lasi, eiava ena adavana ida maino ia karaia lou. Bona namo lasi tau ese ena adavana ia rakatania.” (1 Kor. 7:10, 11) Namo lasi emu adavana oi rakatania karana oi laloa maragi. Hekwakwanai badadia idia vara neganai, reana do oi laloa umui parara be namo, to unai ese hekwakwanai ma haida do ia havaraia. Iesu ese Dirava ena hereva, tau ese ena tamana bona sinana do ia rakatania bona ena hahine danu do ia hakapua, ia gwauraia lou murinai, ia gwau: “Dirava ese ia hakapua taudia be  ta ese do ia hapararaia lasi be namo.” (Mat. 19:3-6; Gen. 2:24) Unai ena anina be tau o hahine ese ‘Dirava ia hakapua taudia do ia hapararaia lasi.’ Iehova ia ura headava taudia rua do idia noho hebou ela bona ta ia mase. (1 Kor. 7:39) Laloatao, ita ibounai be Dirava vairanai do ita gini, unai dainai namona be headava taudia idia hekwarahi edia hekwakwanai idia hamaoromaoroa haraga totona, unai amo hekwakwanai badana ai do ia lao lasi.

12. Dahaka badina haida dainai reana tau o hahine do ia ura idia parara?

¹² Headava taudia edia ura gaudia idia vara lasi neganai, headava lalonai hekwakwanai idia vara. Hegeregere, reana idia ura edia headava idia moalelaia, to unai ia vara lasi neganai, do idia lalohisihisi bona badu. Reana edia hemami bona famili maurina be idau dainai, hekwakwanai ia vara diba, eiava moni, ravadia, bona natuna naria karana dainai idia hepapahuahu. To, ita moale badina Keristani headava taudia momo be unai bamona hekwakwanai hamaoromaoroa daladia idia diba, badina Dirava ese idia ia hakaua.

13. Dahaka badina namodia dainai headava taudia idia parara diba?

¹³ Badina namodia haida dainai headava taudia idia parara diba. Hegeregere, bema tau ese tauanina dalanai iena ruma bese ia naria lasi bona idia ogogami, iena adavana ia dadabaia dikadika bona kahirakahira ia mase, bona mai dagedage ida ena adavana ena tomadiho karana ia koua. Unai bamona hekwakwanai idia davaria Keristani taudia be elda taudia amo heduru idia abia be namo. Unai lo tadikaka ese Dirava ena Hereva amo headava taudia idia durua diba. Danu, headava lalonai idia vara hekwakwanai ita hamaoromaoroa totona, namona be Iehova ena lauma helaga bona ena heduru totona ita guriguri, unai amo Baibel ena hakaua herevadia ita badinaia bona lauma helaga ena huahua ita hahedinaraia diba.​—Gal. 5:22, 23. [2]

14. Iehova ia hesiai henia lasi tauna ia adavaia Keristani tauna dekenai, Baibel be dahaka ia gwau?

¹⁴ To bema Keristani tauna ta ena adavana be Iehova ia hesiai henia lasi be edena bamona? Baibel ese idia ruaosi idia parara lasi ena badina namona ia gwauraia. (1 Korinto 7:12-14, 16 duahia.) Oibe, ena be abidadama lasi adavana ia diba o lasi, to ia be “helaga,” badina ia ese abidadama hahinena o tauna ia adavaia. Idia havaraia natudia danu be “helaga,” bona Dirava ese ia lalodia bada. Paulo ia gwau: “Hahine e, bema emu adavana oi durua Keristani tauna ai ia lao totona, oi ese ia oi hamauria unai. Eiava tau e, bema emu adavana oi durua Keristani hahine ai ia lao totona, oi ese ia oi hamauria unai.” (1 Kor. 7:16) Kahirakahira Iehova ena Witnes taudia edia kongrigeisen ibounai lalonai headava taudia idia noho, idia haida be edia Keristani adavana ese ia “hamauria.”

15, 16. (a) Witnes lasi tauna ia adavaia Keristani hahinena dekenai, Baibel ena sisiba be dahaka? (b) “Bema abidadama lasi tau o hahine ia ura iena adavana ia rakatania,” Keristani tauna be dahaka do ia karaia?

¹⁵ Aposetolo Petero ese Keristani hahine ia sisiba henidia edia adavana henunai do idia noho, badina “bema idia haida be Dirava ena hereva idia badinaia lasi, vadaeni ena be hereva ta umui gwauraia lasi, to emui kara amo idia be abidadama taudia ai idia lao diba, badina emui kara goeva bona hemataurai bada karana idia itaia.” Bona “lalomanau bona dagedage lasi karadia” do idia hahedinaraia, “unai be mai anina bada Dirava ena matanai.” Bema hahine be iena adavana dekenai Keristani hahediba herevadia ia gwauraia lasi, to unai bamona kara namodia ia hahedinaraia, iena adavana ese tomadiho momokani do ia abia dae.​—1 Pet. 3:1-4.

¹⁶ To bema Keristani tauna ena abidadama lasi adavana ia ura parara be edena bamona? Baibel ia gwau: “Bema abidadama lasi tau o hahine ia ura iena adavana ia rakatania, vadaeni ia lao be namo. Unai bamona ia vara neganai, tadikaka o  taihu be unai headava ese ia guia lasi. To Dirava ese umui ia boiria, maino ai umui noho totona.” (1 Kor. 7:15) To namo lasi Keristani tauna ia laloa Baibel ese maoro ia henia ia headava lou totona. Danu, namo lasi iena abidadama lasi adavana ia doria idia parara lasi totona. Oibe, idia parara neganai, unai ese maino ia havaraia diba. To reana Keristani tauna do ia ura iena adavana ia giroa lou, bona do idia gaukara hebou edia headava idia hanamoa totona, bona ia be abidadama tauna ai ia lao.

17. Keristani headava taudia be dahaka idia atoa guna be namo?

¹⁷ Ita be “dina gabediai” ita noho dainai, “nega aukadia” ita davaria. (2 Tim. 3:1-5) To, bema iseda abidadama idia hagoadaia gaudia ita goadalaia, inai tanobada ena laloani karadia do ita dadaraia. Paulo ia gwau: “Nega be ia kwadogi. Unai dainai hari inai nega amo, namona be tatau mai edia adavadia be adavana lasi taudia bamona do idia noho. . . . Bona inai tanobada gaudia idia gaukaralaia taudia be unai gaudia idia gaukaralaia guguru lasi taudia bamona do idia noho.” (1 Kor. 7:29-31) Paulo ia gwau lasi headava taudia ese edia maduna do idia dadaraia. To, nega be ia kwadogi dainai, edia abidadama ia hagoadaia gaudia idia atoa guna be namo.​—Mat. 6:33.

18. Keristani taudia ese edia headava idia moalelaia totona, dahaka idia karaia be namo?

¹⁸ Ena be ita be nega aukadia ai ita noho bona headava momo idia dika, to iseda headava ia namo bona ita moalelaia diba. Oibe, bema idia headava Keristani taudia be Iehova ena taunimanima huanai idia noho, Baibel ena sisiba idia badinaia, bona Iehova ena lauma helaga ena hakaua dalana idia abia dae, “Dirava ese ia hakapua taudia” be do idia noho namo.​—Mar. 10:9.