1, 2. Dahaka dainai ma haida ita treinia tiokratik gaukara idauidau idia karaia totona?

 IESU be Basileia ena sivarai namona harorolaia gaukarana ia laloa bada. To, nega ia atoa ma haida ia hadibaia totona, unai amo idia be mamoe naria taudia bona hahediba taudia ai idia lao diba. (Mat. 10:5-7) Ena be Filipo be evanelia gaukarana dekenai ia bisi bada, to iena natuna kekeni 4 ia durudia Baibel ena hereva momokani be ma haida dekenai idia harorolaia totona. (Kara 21:8, 9) Hari inai negai, dahaka dainai ma haida ita treinia be mai anina bada?

² Tanobada hegegemadai, taunimanima momo be sivarai namona idia abia dae noho. Namona be kamonai matamata taudia idia abia dae Baibel stadilaia namonamo karana be mai anina bada. Danu, ma haida haroro henia bona idia dekenai hereva momokani hadibaia dalana idia diba be namo. Iseda kongrigeisen ai, namona be tadikaka ita hagoadaia do idia gaukara goada, hesiai taudia bona elda taudia ai idia lao totona. Lo Keristani taudia ese “hadibaia hereva namodia” amo kamonai matamata taudia idia durua diba, unai amo hereva momokani lalonai do idia goada idia lao.​—Aon. 4:2.

3, 4. (a) Paulo ese edena dala ai Baibel stadilaia karana bona haroro gaukara ia herevalaia? (b) Baibel stadilaia karana be ma haida dekenai ita do herevalaia lasi neganai, dahaka ita karaia guna be namo?

³ Baibel stadilaia namonamo karana be mai anina bada, a? Aposetolo Paulo ese Kolose Keristani taudia dekenai ia torea revarevana ai haere ita davaria. Ia gwau: “Umui dainai guriguri ai hadokoa lasi, to ai noinoi umui be iena ura dekenai diba maoromaoro amo do umui honu, vadaeni aonega ibounai bona Dirava ena lauma ese ia henia laloparara do umui abia. Unai amo Iehova ena dala hegeregerena ai do umui raka bona gau ibounai dekenai ia do umui hamoalea. Bona danu gaukara namodia ibounai lalonai huahua do umui havaraia noho bona emui diba maoromaoro Dirava dekenai do ia bada ia lao.” (Kol. 1:9, 10) Kolose Keristani taudia be unai diba maoromaoro idia abia dainai, idia be ‘Iehova ena dala hegeregerena ai idia raka bona gau ibounai dekenai ia idia hamoalea’ diba. Bona ‘gaukara namodia ibounai lalonai huahua idia havaraia,’ sivarai namona idia harorolaia neganai danu. Iehova ia tomadiho henia tauna ese ena hesiai gaukara ia karaia namonamo totona, namona be dina ta ta ai Baibel ia stadilaia. Unai dainai namona be iseda stadi taudia ita durua unai idia karaia totona.

⁴ To, namona be ita ese Baibel stadilaia karana ena namo ita abia dae guna, gabeai ma haida ita durua diba. Oibe, Baibel ita stadilaia namonamo be namo. Unai dainai reana sibona oi nanadaia diba: ‘Bema ruma taudia edia lalohadai be Baibel ena hereva amo ia idau eiava bema henanadai aukadia idia henia, Baibel amo idia lau haere henia diba, a? Iesu, Paulo, bona ma haida be mai haheauka ida haroro gaukara idia karaia, Iehova lau hesiai henia lalonai, edia haheauka karana ese lau do ia durua dalana lau laloa, a?’ Ita ibounai be Baibel amo aonega bona sisiba ita abia be namo. Bona bema Baibel stadilaia karana amo ita abia namo be ma haida dekenai ita herevalaia, idia do ita hagoadaia Baibel idia stadilaia namonamo totona.

5. Edena dala ai emu stadi tauna do oi durua, sibona ena Baibel stadilaia karana ia moalelaia totona?

⁵ Oi sibona oi nanadaia, ‘Edena dala ai egu Baibel stadi tauna lau durua diba Baibel ia stadilaia hanaihanai totona?’ Dala namona be, iena stadi totona do ia hegaegae dalana oi hahedinaraia. Reana oi hadibaia Baibel be Dahaka Ia Hadibaia? bukana ena apendiks bona idia gwauraia siri ia duahidia totona. Danu, ia oi durua hebou totona do ia hegaegae, bona ena  haere ta do ia hegaegaelaia. Ma danu, ia oi hagoadaia Gima Kohorona bona Awake! magasin ia duahidia totona. Bema Watchtower Library eiava Watchtower ONLINE LIBRARY be ena gado ai ia noho, unai kahana amo Baibel ena henanadai haerelaia dalana be ia dekenai oi hahedinaraia. Bema unai oi karaia, emu Baibel stadi tauna do oi durua, sibona ena Baibel stadilaia karana ia moalelaia totona.

6. (a) Edena dala ai emu stadi tauna do oi durua Baibel ia laloa bada totona? (b) Bema stadi tauna be Baibel ia laloa bada, dahaka namo ia davaria diba?

⁶ Oibe, namo lasi ta ita doria Baibel ia duahia bona stadilaia totona. To, Iehova ena orea ese ita dekenai ia henia tulu idauidau amo iseda stadi taudia ita durua Baibel idia laloa bada totona. Reana gabeai stadi tauna be salamo torea tauna hegeregerena do ia gwau: “Dirava badibadinai lau noho. Inai be namo herea momokani. Siahu Ibounai Lohiabada e, oi be lauegu magu momokani.” (Sal. 73:28) Bema stadi tauna be Baibel ia laloa bada, Iehova ese do ia hanamoa.

7. Iesu ese edena dala ai sivarai namona idia harorolaia taudia ia treinia? (Laulau ginigunana herevalaia.)

⁷ Mataio karoa 10 ai, Iesu ese ena aposetolo taudia 12 dekenai ia henia hakaua herevadia idia noho. Iesu ese gau ibounai ia herevalaia lasi, to point badadia sibona ia herevalaia. ^[1] Iesu ese ena aposetolo taudia dekenai haroro daladia ia hadibaia neganai, idia kamonai. Bena idia ibounai be haroro totona idia lao. Iesu ena haroro daladia idia itaia namonamo dainai, idia be Baibel ena hereva momokani hadibaia taudia namodia ai idia lao. (Mat. 11:1) Ita danu ese iseda stadi taudia ita durua diba, sivarai namona harorolaia taudia namodia ai idia lao totona. Unai ita karaia daladia rua mani ita herevalaia.

8, 9. (a) Haroro gaukara ai, Iesu ese edena dala ai taunimanima ia hereva henia? (b) Iesu hegeregerena, edena dala ai pablisa matamatadia ita durua diba?

⁸ Taunimanima ida herevahereva. Iesu be nega ibounai taunimanima dekenai Basileia ia herevalaia. Hegeregere, Iakobo ena ranu gurina ai, Sukara hanuana badinai, Iesu ese hahine ta ia hereva henia. (Ioa. 4:5-30) Danu, ia ese takisi gogoa tauna, Mataio Levi ia hereva henia. Evanelia bukadia ese unai herevahereva karana idia sivarailaia momo lasi, to Mataio ese Iesu ena boiboi herevana ia abia dae bona ena murinai ia raka. Mataio ena ruma dekenai idia karaia aria ta ai, Iesu be nega sisina daudau ia hereva, bona Mataio bona ma haida be unai idia kamonai .​—Mat. 9:9; Luka 5:27-39.

⁹ Nega ma ta ai, Natanaela ese Nasareta taudia ia gwauraia dika neganai, Iesu be mai manau ida ia ia hereva henia. Unai dainai Natanaela ese ena lalohadai ia haidaua. Bona ia ura Nasareta tauna, Iesu, ese ia hadibaia gaudia dekenai diba ma haida ia abia. (Ioa. 1:46-51) Unai dainai namona be pablisa matamatadia ita treinia, unai amo mai manau bona gari lasi ida taunimanima idia hereva henia diba. ^[2] Bema unai idia karaia, kudou-maoro taudia be do idia ura kamonai, bona ita treinia taudia be unai idia itaia neganai, do idia moale.

10-12. (a) Edena dala ai Iesu ese ma haida edia ura ia habadaia? (b) Edena dala ai pablisa matamatadia ita durua diba?

¹⁰ Ura habadaia. Ena be Iesu be lagani toi mai kahana sibona lalonai haroro gaukara do ia karaia, to sivarai namona idia kamonai taudia edia ura habadaia totona nega ia atoa. Hegeregere, Iesu be vanagi ta amo hutuma ia hadibaia. Unai nega ai, hoa dalanai Petero dekenai gwarume momo herea ia henia, bona ia hamaoroa: “Hari nega amo oi be taunimanima do oi haoda henia.” Iesu ena hereva bona kara dainai, dahaka ia vara? Petero bona ena bamodia ese “vanagi be kone dekenai idia abia giroa, bona gau ibounai idia rakatania bona [Iesu] murinai idia raka.”​—Luka 5:1-11.

¹¹ Kaunsolo Nikodemo be Iesu ena hahediba herevadia ia ura henia. Ia ura diba ma haida ia abia, to ia  gari, dika taunimanima vairanai Iesu ia hereva henia bona ia do idia hevasehalaia. To, Iesu be ena nega ia gaukaralaia namonamo. Bona hanuaboi ai, hutuma idia noho lasi neganai Nikodemo ia hedavari henia. (Ioa. 3:1, 2) Unai sivarai amo dahaka ita dibaia? Dirava ena Natuna ese nega ia atoa ma haida edia abidadama ia hagoadaia totona. Iesu hegeregerena, ita gaukara goada kamonai taudia ita lou henia bona idia ida Baibel ita stadilaia totona, a?

¹² Bema haroro gaukara ai, pablisa matamatadia ida ita gaukara, idia ita durua Baibel ena hereva momokani idia hadibaia namonamo totona. Bona kamonai taudia do idia laloa bada. Danu, lou henia bona Baibel stadi ita karaia neganai, idia ita boiria. Bema unai dala ai pablisa matamatadia ita durua bona hagoadaia, do idia ura kamonai taudia edia ura idia habadaia bona idia ida Baibel stadi idia hamatamaia. Danu, unai ese idia do ia durua, mai haheauka ida haroro gaukara idia karaia noho totona.​—Gal. 5:22; maua ladana “ Haheauka be mai Anina Bada” itaia.

13, 14. (a) Baibel ai, ma haida totona sibona idia henia taudia edia sivarai amo dahaka oi dibaia? (b) Edena dala ai pablisa matamatadia bona matamata taudia oi durua diba?

¹³ Baibel ese ita ia hagoadaia iseda tadikaka ita lalokau henidia bona ita durua heheni totona. (1 Petero 1:22; Luka 22:24-27 duahia.) Dirava ena Natuna be ia ura bada ma haida ia hesiai henia, bona idia totona ena mauri ia henia. (Mat. 20:28) Doreka “be kara namodia momo ia karaia bona hebogahisi dainai ogogami taudia ia durua.” (Kara 9:36, 39) Rome ai ia noho taihu ta ladana Maria be ena kongrigeisen durua totona “gaukara momo ia karaia.” (Roma 16:6) Edena dala ai pablisa matamata do ita durudia, unai amo tadikaka taihu durua karana do idia laloa bada?

¹⁴ Lo Witnes tadikaka taihu be buruka eiava gorere tadikaka taihu idia vadivadi henia neganai, pablisa matamatadia idia boiria diba. Bema hegeregere, tama sina ese unai bamona vadivadi negadiai edia natudia idia hakaua lao diba. Elda taudia bona ma haida ese iseda lalokau buruka taudia idia vadivadi henia diba, bona idia dekenai aniani idia henia eiava edia ruma idia hanamoa diba. Unai amo matamata taudia bona kamonai matamata taudia ese ma haida dekenai hebogahisi hahedinaraia daladia do idia dibaia. Haroro negadiai, elda ta be vaia unai teritori ai idia noho Witnes taudia ia vadivadi henia. Unai elda tadikaka ia bamoa tadikaka matamata ese ia dibaia gauna be, kongrigeisen taudia ibounai ita lalokau henia be namo.​—Roma 12:10.

15. Dahaka dainai elda taudia ese tadikaka idia durua be mai anina bada?

¹⁵ Kongrigeisen lalonai, Iehova ese tadikaka ia gaukaralaia ita idia hadibaia totona, unai dainai namona be tadikaka ese edia herevahereva dalana idia hanamoa. Oi be elda tauna dainai, hesiai tauna ta ese ena tok ia hegaegaelaia neganai, oi kamonai, a? Emu heduru amo ia oi durua diba Dirava ena Hereva ia hadibaia namonamo totona.​—Neh. 8:8. ^[3]

16, 17. (a) Edena dala ai Paulo ese Timoteo ia treinia? (b) Edena dala ai elda taudia ese tadikaka idia treinia diba?

¹⁶ Keristani kongrigeisen lalonai, mamoe naria taudia momo idia noho be namo, unai dainai tadikaka be treinini idia abia noho be namo. Treinini idia abia dalana be Paulo ese ia gwauraia, Timoteo dekenai ia gwau: “Oi, egu natuna e, Keriso Iesu ida oi hakapua dainai oi abia hebogahisi hereadaena amo, goada oi abia noho. Lau amo oi kamonai hereva be taunimanima momo ese idia hamomokania danu,  unai hereva be abidadama taudia dekenai do oi henia, unai amo idia danu be do idia hegeregere ma haida idia hadibaia totona.” (2 Tim. 2:1, 2) Timoteo be unai aposetolo burukana ida ia gaukara karana amo diba ia abia. Bona ia dibaia gaudia be ena haroro gaukara ai bona hesiai gaukara ma haida ai ia badinaia.​—2 Tim. 3:10-12.

¹⁷ Paulo ese Timoteo ia treinia namonamo. Ena misinari laolaona ai, Timoteo ese ia bamoa. (Kara 16:1-5) Elda taudia ese Paulo ena haheitalai idia tohotohoa diba. Mamoe vadivadi idia karaia neganai, bema hegeregere, hesiai tauna ta idia boiria diba. Unai amo edia hadibaia dalana, abidadama, haheauka karana, bona lalokau ia itaia diba. Elda taudia ese unai kara idia hahedinaraia be namo. Unai bamona treinini ese tadikaka ia durua “Dirava ena mamoe oreana” naria taudia ai idia lao totona.​—1 Pet. 5:2.

18. Dahaka dainai ma haida ita treinia be gau badana, Iehova ena hesiai gaukara idia karaia totona?

¹⁸ Iehova ena hesiai gaukara be ia bada ia lao dainai, ma haida ita treinia be gau badana. Hari inai negai, Iesu bona Paulo edia hadibaia dalana ita tohotohoa diba. Oibe, Iehova ia ura ia idia hesiai henia taudia be treinini namona idia abia, unai amo edia tiokratik gaukarana idia karaia namonamo diba. Dirava ese ita ia hagoadaia, kongrigeisen lalonai gaukara idia karaia taudia ita durua totona. Tanobada be ia dika ia lao bona haroro daladia matamata idia hedinarai dainai, unai bamona treinini ita abia be mai anina bada.

19. Dahaka dainai oi abia dae momokani ma haida treinia karana be mai ena namo?

¹⁹ Momokani, ma haida treinia karana be mai ena hekwarahi. To Iehova bona ena lalokau Natuna ese ita do idia durua bona ita dekenai aonega do idia henia ma haida ita treinia totona. Ita durua taudia be idia ‘gaukara goada bona idia hekwarahi’ ita itaia neganai, ita moale, ani? (1 Tim. 4:10) Oibe, namona be ita ibounai ita hekwarahi noho Iehova ita hesiai henia totona.