MAURI SIVARAINA
Henia Karana amo Moale Lau Davaria
LAUEGU mauri lagani be 12 neganai, lau laloa ma haida dekenai mai anina bada gauna ta lau henia be namo. Hebouhebou ta ai, tadikaka ta ese lau ia nanadaia bema lau ura haroro. Lau gwau, “oibe,” ena be guna haroro gaukara lau karaia lasi. Teritori dekenai ai lao bona Dirava ena Basileia idia herevalaia buklet haida be lau dekenai ia henia. Bona ia gwau: “Inai dala ena kahanai idia noho taudia oi hereva henia bona lau be inai kahanai idia noho taudia do lau hereva henia.” Mai gari ida ruma ta ta dekenai lau lao matamaia, bona lau hoa badina egu buklet ibounai lau hariharilaia. Unai ese ia hahedinaraia, taunimanima momo be lau henia gaudia idia ura henia.
Lau be lagani 1923 ai, Chatham, Kent, England dekenai lau vara, bona lau tubu daekau tanona ai, momo be gau idauidau dainai idia lalohisihisi. Taunimanima momo idia laloa Tuari Badana murinai, edia mauri be do ia namo, to unai ia vara lasi. Danu, egu tama sina be Baptis dubu ena gunalaia taudia edia kara dainai idia lalohisihisi, badina idia be sibodia edia namo idia laloa. Lauegu mauri lagani be 9 bamona neganai, egu sinana be International Bible Students edia dubu dekenai ia lao matamaia, unuseniai inai ladana, Iehova ena Witnes, idia abia taudia edia hebou eiava klas idia karaia. Bona taihu ta ese lau bona natudia ma haida dekenai Baibel amo sivarai haida ia gwauraia bona buka ladana The Harp of God ia henia. Lau dibaia gaudia lau moalelaia.
TADIKAKA BURUKADIA AMO DIBA LAU ABIA
Lau matamata neganai, Dirava ena Hereva amo taunimanima lau durua karana lau moalelaia. Ena be nega momo lau sibona be ruma-ta-ruma-ta gaukara lau karaia, to ma haida ida haroro karana amo diba lau abia danu. Hegeregere, dina ta lau bona tadikaka burukana ta be basikele amo emai haroro teritori dekenai ai lao neganai, dubu gunalaia tauna ta ai hanaia bona lau gwau: “Nanigosi ta ia lao inai.” Unai tadikaka be ena basikele ia hastopua bona lau ia nanadaia bema ia ida au ta latanai do ai helai. Ia gwau: “Daika ese oi dekenai maoro ia henia, nanigosi taudia oi abia hidi totona? Namona be mai moale ida taunimanima dekenai sivarai namona ita harorolaia bona hahemaoro gaukarana be Iehova dekenai ita rakatania.” Unai negadiai, henia karana ena moale amo gau momo lau dibaia.—Mat. 25:31-33; Kara 20:35.
Tadikaka burukana ma ta amo lau dibaia gauna be inai, henia karana amo moale lau davaria totona, lau haheauka be namo. Unai tadikaka ena adavana be Iehova ena Witnes taudia ia ura henia lasi. Nega ta unai tadikaka ese ena ruma dekenai lau ia boiria. To tadikaka be ia lao haroro dainai ena adavana ia badu, bona
ti baege be ai dekenai ia negedia matamaia. Unai ia karaia dainai tadikaka be ia badu lasi, to mai moale ida unai ti baege be edia gabu maorona dekenai ia atoa lou. Tadikaka ena haheauka karana dainai, lagani haida murinai ena adavana ia bapatiso bona Iehova ena Witnes taihuna ai ia lao.Lau ura bada ma haida lau durua dainai, March 1940 ai, Dover dekenai lau bona egu sinana be bapatiso ai abia. September 1939 ai, Britain be Germany ia tuari henia, unai nega ai egu mauri lagani be 16. June 1940 ai, emai ruma amo lau itaia idia lalohisihisi tuari taudia tausen momo be motuka amo idia hanaia. Idia be Dunkirk ai idia karaia tuarina amo idia roho mauri. Edia vairana toana amo lau diba idia be helaro lasi, unai dainai lau ura dikadika idia dekenai Dirava ena Basileia lau herevalaia. Unai lagani murinai, Britain dekenai bomu idia negea matamaia. Hanuaboi ta ta ai lau itaia, German ena tuari peleini momo be ai noho gabuna idia roho hanaia. Unai peleini ese bomu idia negea neganai, edia regena oi kamonai diba, bona do oi gari danu. Murina dinana ai, emai ruma amo ai raka-lasi neganai, ai itaia ruma ibounai be idia dika. Unai amo lau laloparara, vaira nega ai Basileia sibona ese lau dekenai helaro do ia henia.
HARORO GAUKARA LAU MATAMAIA
Lagani 1941 ai, lau ia hamoalea gaukarana lau hamatamaia. Unai nega ai lau be Chatham ena wofu dekenai lau gaukara, unuseniai bouti lau hanamodia, unai gaukara be momo idia ura henia bona ena davana be namo. Iehova ena hesiai taudia be idia diba Keristani taudia be bese ta totona bese ma ta do idia tuari henia lasi. Lagani 1941 ai, ai laloparara tuari kohudia havaraia bisinesi ai durua be kerere. (Ioa. 18:36) Lau gaukara wofuna ai davara lalonai idia heau bouti idia karadia dainai, lalona lau hadaia unai gaukara do lau rakatania bona ful-taim hesiai gaukarana do lau matamaia. Lauegu asainmen ginigunana be Cirencester ai, ia be taoni hairaina ta.
Lauegu mauri lagani be 18 neganai, hua 9 lalonai dibura ruma dekenai lau noho, badina tuari lau durua lasi. Gadi tauna ese egu sel ena iduara ia koua bona sibona lau noho neganai, lau lalohekwarahi bada. To gabeai, gadi taudia bona dibura taudia ma haida ese unuseni lau noho ena badina idia henanadailaia neganai, mai moale ida idia dekenai egu abidadama lau herevalaia.
Dibura ruma lau rakatania murinai, tadikaka ese lau idia hadibaia, Leonard Smith a do lau bamoa bona Kent ena taoni idauidau dekenai do ai haroro. Lagani 1944 amo, Kent tanona dekenai bomu idia huaia tuari peleini maragidia tausen mai kahana idia moru. Ai be peleini idia roho hanai gabuna dekenai ai noho, unai nega ai Nazi ese Europe bona London ia naria. Unai peleini idia gwauraia, “doodlebugs.” Unai be gari bada negana, badina peleini ena ensini ia bodo neganai, oi diba sekeni haida murinai peleini do ia moru bona pou. Ai ese tama ta, ena adavana bona natudia toi ai stadi henia. Nega haida auri teibolo ta henunai ai helai, unai amo ruma ia moru neganai, unai teibolo ese ai ia gimaia diba. Gabeai, unai ruma bese ibounai be bapatiso idia abia.
TANO IDAUNA AI SIVARAI NAMONA AI HAROROLAIA
Ireland ai, hebouhebou ta totona taunimanima ai boiria (henunai)
Tuari murinai, lau be lagani rua Ireland ena saut kahanai painia gaukara lau karaia. England bona Ireland idia idau dalana ai diba lasi. To, ruma ta ta dekenai ai lao bona noho gabuna totona ai henanadai. Ruma taudia ai hamaoroa ai be misinari taudia, bona dala dekenai emai magasin ai hariharilaia. Unai be Katolik tanona dainai, unai ai karaia be kerere! Tau ta ese ai ia dagedage henia neganai, pulisi tauna dekenai unai lau gwauraia, to ia gwau: “Be, dahaka oi laloa?” Unuseniai pris taudia edia siahu be bada. Iseda buka idia abia dae taudia be edia moni gaukara amo idia hadokodia bona ai noho rumana amo ai idia lulua.
Gabeai inai ai dibaia, bema gabu matamata dekenai ai lao, namona be emai noho gabuna amo ia daudau gabuna ta dekenai ai lao, bona pris idauna henunai idia noho taudia sibona ai haroro henia. Gabeai, kahirakahira idia noho taudia ai haroro henia. Kilkenny ai, tau matamata ta ai stadi henia. Ena be dagedage taudia ese ai idia hagaria, to pura ta lalonai nega toi ai stadi. Ma haida dekenai Baibel ena hereva momokani hadibaia karana lau moalelaia, unai dainai Gilead Sikuli totona pepa lau hahonua.
Lagani 1948 ia lao 1953 ai, Sibia be emai misinari rumana bamona (idibana)
New York ai, hua 5 lalonai emai sikuli ai haorea murinai, lau bona tadikaka ma toi be Caribbean Davarana ena motumotudia dekenai idia siaia. November 1948 ai, 18 mita bouti ta ladana Sibia dekenai ai guia bona New York siti ai rakatania. Lau be guna bouti ta lau guia lasi dainai, lau moale bada. Iseda tadikaka ta, Gust Maki, be bouti ena kapten. Unai dainai ai dekenai bouti ena gaukara haida ia hadibaia, hegeregere bouti ena palai hadaia bona hadihoa dalana, kampasi sekea karana bona lai lalonai heau namonamo dalana. Lai gubana lalonai Gust ese dina 30 lalonai emai bouti ia taria ela bona Bahamas dekenai ai ginidae.
“KONE TANODIA DEKENAI DO UMUI GWAURAIA HEDINARAI”
Bahamas ena motumotu maragidia dekenai hua haida ai haroro murinai, Leeward Motumotudia bona Windward Motumotudia dekenai ai lao. Unai motumotudia be Puerto Rico ena kahirakahira idia noho Virgin Motumotudia amo ela bona Trinidad, unai be kilomita 800 mai kahana bamona. Lagani 5 lalonai, ai be Witnes taudia idia noho lasi motumotudia dekenai ai haroro. Nega haida wiki momo lalonai email ai siaia eiava abia diba lasi. To ai moale badina motumotu idauidau dekenai Iehova ena hereva ai harorolaia!—Ier. 31:10.
Sibia amo idia loaloa misinari taudia (laurina amo ia lao idibana): Ron Parkin, Dick Ryde, Gust Maki, bona Stanley Carter
Kone dekenai ai ginidae neganai, hanua taudia momo idia hoa bona bouti kahirakahira idia mai ai idia itaia totona. Haida be guna bouti ta eiava tau kurokuro idia itaia lasi. Unai motumotu taudia be tomadiho idia laloa bada bona Baibel idia diba namonamo. Nega momo ai dekenai gwarume, avokado, bona pinati idia henia. Emai bouti maragina ena speis be maragi ai mahuta, nanadu, eiava dabua ai huria totona, to ai moale.
Kone dekenai emai bouti ai atoa bona unai dina ibounai lalonai taunimanima ai vadivadi henia. Nega momo idia
ai hadibaia Baibel tok ta do ai henia. Bena dina ia diho neganai, bouti ena gaba ai botaia bona hanua taudia ibounai idia haboua. Ororo amo idia diho neganai, edia lamepa ena diari be hisiu ena diari bamona. Nega haida taunimanima handred bamona idia mai, bona henanadai momo idia henia ela bona hanuaboi momokani. Idia be ane abia karana idia moalelaia, unai dainai Basileia anedia haida ai torea bona ai henidia. Ai 4 ese ane ai abia guna, bena hanua taudia be ai ida idia ane, edia gadodia be namo herea. Unai be moale negadia!Baibel stadi ta ai karaia murinai, emai stadi haida be ai idia bamoa ruma bese ma ta ena stadi dekenai, bona idia helai vareai danu. Ena be wiki haida murinai motumotu ta ai rakatania, to kamonai taudia ai noidia ma haida ida idia stadi totona ela bona ai giroa lou. Ai moale badina haida be edia stadi idia laloa bada.
Hari, turist taudia momo be unai motumotudia dekenai idia lao, to guna unai gabu ai taunimanima idia noho lasi, kone hairaidia bona pama audia sibona. Vaia hanuaboi lalonai motumotu ta ta dekenai ai lao. Dolfin be emai bouti badinai idia nahu loaloa, bona regerege ta oi kamonai lasi, to bouti ena vaira kahana be ranu ia botaia ena regena sibona. Bona hua ena diari ese davara hadiaria.
Lagani faiv unai motumotudia dekenai ai haroro murinai, Puerto Rico dekenai ai lao, emai bouti be bouti mai ena ensini ida ai senisia totona. Unuseni ai ginidae neganai, Maxine Boyd lau hedavari henia bona ia lau ura henia. Ia be taihu hairaina bona misinari gaukara ia karaia. Ia maragi negana amo ia be sivarai namona ia harorolaia goadagoada. Gabeai, Dominican Republic dekenai misinari gaukara ia karaia ela bona lagani 1950 ai, Katolik gavamani ese ia idia hamaoroa unai tano do ia rakatania. Lau be bouti ai lau gaukara dainai, maoro lau abia Puerto Rico ai hua tamona lau noho totona. Daudau lasi, lau be motumotu idauidau dekenai do lau lao bona lagani ma haida do lau noho. Unai dainai sibona dekenai lau gwau, ‘Ronald e, bema inai kekeni oi ura henia, namona be kara ta oi karaia haraga.’ Wiki toi murinai, taihu dekenai egu hemami lau gwauraia hedinarai, bena wiki siks murinai ai headava. Lau bona Maxine be Puerto Rico dekenai idia siaia misinari gaukara ai karaia totona, unai dainai bouti matamata dekenai lau guia lasi.
Lagani 1956 ai, sekit gaukara amo kongrigeisen ai vadivadi henidia matamaia. Tadikaka bona taihu momo be idia ogogami, to ai moale idia ai vadivadi henia totona. Hegeregere hanua ta ladana Potala Pastillo ai, Witnes ruma bese rua idia noho. Edia natudia be momo herea, bona nega momo idia totona fluti lau gadaralaia. Edia natudia kekeni ta, Hilda lau noia bema ia ura haroro gaukara ai, ai ia bamoa. Ia gwau: “Lau ura, to lau hegeregere lasi, badina lau be tamaka lasi.” Unai dainai iena tamaka ai hoia, bena ai ia bamoa. Lagani haida murinai, lagani 1972 ai, lau bona Maxine be Brooklyn Betele ai vadivadi henia neganai, Gilead Sikuli ia haorea taihuna ta be ai ia hedavari henia. Ia be Ecuador dekenai idia siaia, bona ia gwau: “Lau umui laloatao lasi, ani? Lau be Pastillo amo bona lau maragi neganai, umui ese egu tamaka umui hoia.” Ia be Hilda! Ai moale bada dainai ai tai!
Lagani 1960 ai, Puerto Rico brens ofesi ese ai idia boiria. Ia be Santurce, San Juan ai ia noho ruma maragina ta mai ena sitori rua. Matamanai, lau bona Lennart Johnson ese gaukara ibounai ai karaia. Dominican Republic ai, ia bona ena adavana be Iehova ena Witnes taudia ginigunadia, bona lagani 1957 ai Puerto Rico dekenai idia ginidae. Gabeai brens ai, Maxine be magasin sabskripsen ia siaidia—wiki ta ta ia ese magasin tausen mai kahana ia siaia. Unai gaukara ia moalelaia, badina ia ese Baibel bukadia bona magasin idia abia taudia ia laloa.
Betele gaukara lau moalelaia, badina ia be henia karana ta bamona. To ia be mai ena hekwarahi danu. Hegeregere lagani 1967 ai, Puerto Rico ena intanesinol hebouhebou ginigunana dekenai lau bisi bada. Unai nega ai, Iehova ena Witnes taudia edia orea ia hakaua tadikakana, Nathan Knorr, be Puerto Rico ia vadivadi henia. Ia laloa lau ese idia vadivadi misinari taudia edia motuka dalana lau hegaegaelaia lasi, ena be unai lau karaia. Gabeai, gaukara karaia namonamo karana dekenai sisiba aukana ia henia bona ia gwau ia be lau dekenai ia moale lasi. Lau ura lasi ia ida lau hepapahuahu,
to iena kara dainai lau lalohisihisi sisina. To gabeai, lau bona Maxine be Tadikaka Knorr ai itaia, ia ese ena daiutu dekenai ai ia boiria bona ai totona aniani ia nadua.Nega ta ta ai, Puerto Rico amo ai lao England dekenai egu ruma bese ai vadivadi henia totona. Lau bona egu sinana sibona be hereva momokani ai abia, to egu tamana be lasi. To Betele tadikaka idia vadivadi neganai, nega momo egu sinana ese emai ruma dekenai idia ia boiria. Egu tamana ia itaia, unai Betele tadikakadia be idia manau, idia be ia idia inai henia dubu gunalaia taudia bamona lasi. Gabeai lagani 1962 ai, ia bapatiso bona Iehova ena Witnes tauna ai ia lao.
Puerto Rico ai lau bona Maxine ai headava murinai bona lagani 2003 aiemai lagani 50 headava aniveseri
Lagani 2011 ai, egu adavana lalokauna, Maxine, ia mase. Lau ura bada vaira nega ai ia toreisi lou neganai, ia lau itaia. Unai be lalohadai namona! Ia ida lagani 58 lau noho neganai, ai itaia Puerto Rico ai Iehova ena taunimanima idia momo daekau, 650 amo ia lao 26,000! Bona lagani 2013 ai Puerto Rico brens be United States brens ena henunai ia gaukara bona lau idia noia Wallkill, New York ai do lau gaukara. Lagani 60 motumotu idauidau dekenai lau noho murinai, lau mamia lau be Puerto Rico tauna ta bamona, oibe, coquí bamona. Puerto Rico ai, Coquí be au dekenai ia noho paroparo maragina, bona gabu ia dibura gwauraia neganai do ia ane ko-kee, ko-kee. To gau haida lau haidaua be namo.
“MAI MOALE IDA IA HENIA TAUNA BE DIRAVA ESE IA LALOKAU HENIA”
Betele gaukara lau do moalelaia noho. Hari egu mauri lagani be 90 mai kahana, bona lau karaia gaukara be Betele taudia lau hagoadaia. Lau idia hadibaia Wallkill dekenai lau mai negana amo lau ese tadikaka taihu 600 mai kahana lau vadivadi henia vadaeni. Lau idia vadivadi henia taudia haida be edia ruma bese eiava sibona edia hekwakwanai idia herevalaia. Haida be edia Betele gaukara karaia namonamo totona heduru idia noia. Bona vanegai sibona idia headava taudia danu be egu heduru idia noia. Haida be Betele idia rakatania bona haroro gaukara idia karaia. Lau idia hereva henia taudia ibounai edia hereva lau kamonai, bona bema hegeregere, idia lau hamaoroa: “‘Mai moale ida ia henia tauna be Dirava ese ia lalokau henia.’ Unai dainai emui gaukara umui moalelaia. Unai be Iehova totona umui karaia.”—2 Kor. 9:7.
Betele eiava gaukara ma haida oi moalelaia totona, namona be oi karaia gaukarana ena badina oi laloa. Betele ai ita karaia gaukara ibounai be gaukara helagadia. Ita karaia gaukarana amo“igui hesiai tauna mai ena kamonai bona mai ena kara maoromaoro” ita durua, tanobada hegegemadai idia noho tadikaka oreana dekenai Dirava ena hereva ita hadibaia. (Mat. 24:45) Herevana edeseniai Iehova ita hesiai henia, to ia ita hanamoa be namo. Namona be ita dekenai ia henia gaukarana ita karaia, badina “mai moale ida ia henia tauna be Dirava ese ia lalokau henia.”
a Leonard Smith ena mauri sivaraina be April 15, 2012 ena Gima Kohorona ai ia noho.