OFESA ta ese lau ia gwau henia, ia gwau: “Oi be tamana dikana. Oi ese emu hahine mai bogana bona natuna kekeni maragina oi rakatania. Daika ese idia do ia ubua bona naria? Emu tomadiho gaukarana oi rakatania bona oi lao ruma!” Lau gwau: “Lau ese egu ruma bese lau rakatania lasi. Umui ese lau umui dogoatao! Ena badina be dahaka?” Ofesa ia gwau: “Bema kara dika ma ta oi karaia be namo, to oi be Witnes tauna dainai oi ai lokaia.”

Unai be lagani 1959, Russia ena siti Irkutsk ena dibura ruma ta ai ia vara. Lau bona egu adavana, Maria, be “kara maoromaoro dainai hisihisi” ai abia, to hahenamo ai abia danu, badina emai abidadama ai dogoatao. Mani unai lau sivarailaia.​—⁠1 Pet. 3:13, 14.

Lau be lagani 1933 ai, Ukraine ena hanua ta ladana Zolotniki dekenai lau vara. Lagani 1937 ai, egu lalana bona ena adavana, Witnes taudia, be France amo idia mai ai idia vadivadi henia totona, bona ai dekenai buka ladana Government bona Deliverance idia rakatania. * Egu tamana be unai buka rua ia duahia neganai, iena abidadama Dirava dekenai ia goada lou. To madi, lagani 1939 ai ia gorere bada, to ia do mase lasi neganai, egu sinana ia hamaoroa: “Inai be hereva momokani. Iseda natudia dekenai oi hadibaia.”

April 1951 ai, gavamani taudia ese USSR ena west kahana tanodia dekenai idia noho Witnes taudia be Siberia dekenai idia siaidia. Lau, egu sinana, bona tadina mero, Grigory, be Ukraine amo idia abia. Trein amo kilomita 6,000 mai kahana ai lao murinai, Siberia ena siti ladana Tulun dekenai ai ginidae. Wiki rua murinai, egu kakana, Bogdan, be kahirakahira ia noho siti ta ladana Angarsk dekenai ia noho dibura kamepa dekenai ia ginidae. Ia be dibura ruma ai lagani 25 do ia noho.

Lau, egu sinana, bona Grigory be Tulun ena gabu idauidau dekenai ai haroro, to mai aonega ida unai ai karaia. Hegeregere, ai henanadai: “Iniseniai tau ta ia ura ena boromakau ia hoihoilaia?” Bema ta be ena boromakau ia ura hoihoilaia, ia dekenai boromakau be hoa dalanai ia vara karana ai herevalaia. Bena Havaraia Tauna ai herevalaia. Unai nega ai, niuspepa ta ese Witnes taudia edia gaukara ia herevalaia ia gwau, idia be boromakau idia tahua, to ai diba ai be momokani mamoe ai tahua! Bona mamoe bamona taudia ai davaria! Unai gabu idauidau dekenai ai davaria kudou-maoro taudia ida Baibel herevalaia karana ai moalelaia. Hari Tulun ai, kongrigeisen ta ia noho bona ena pablisa ibounai be 100.

Ukraine ai Tanobada Tuarina Iharuana ia vara noho lalonai, egu adavana, Maria, be hereva momokani ia dibaia. Iena mauri lagani be 18 neganai, ofesa tauna ta ese ia doria ia ida ia mahuta hebou totona, to mai gari lasi ida unai ia dadaraia. Dina ta, ruma dekenai ia giroa lou neganai, ia itaia unai ofesa tauna be ena bedi ai ia hekure. Maria ia heau. Ofesa tauna ia badu dikadika dainai, Maria ia hagaria ia gwau ia be Witnes kekenina dainai dibura ruma ai do ia lokaia. Bona unai ia vara, lagani 1952 ai, Maria idia siaia lagani 10 dibura ruma ai do ia noho. Iosepa hegeregerena, iena abidadama dainai ia idia hadiburaia. (Gen. 39:12, 20) Kota ruma amo dibura ruma dekenai Maria ia abia lao tauna be Maria dekenai ia gwau: “Oi gari lasi. Taunimanima momo be dibura ruma dekenai idia lao, to idia raka-lasi neganai, edia abidadama be ia goada.” Unai hereva ese Maria ia hagoadaia.

Lagani 1952 ia lao 1956 ai, Russia ena siti Gorkiy (hari idia gwauraia Nizhniy Novgorod) kahirakahira ia noho dibura kamepa dekenai Maria idia siaia lao. Ia idia oda henia idia gini au do ia geia bona kokia, keru negadiai do ia gaukara danu. Iena goada be metairametaira ia ore, to lagani 1956 ai, ia idia ruhaia bona Tulun dekenai ia lao.

Tulan ai tadikaka ta ese lau ia hamaoroa taihu ta be do ia mai, unai dainai basikele amo basi stopu dekenai lau lao, unai amo taihu lau hedavari henia bona iena kohu lau huaia diba. Maria lau hedavari henia negana amo ia lau ura henia. Lau hekwarahi bada iena kudouna lau veria totona, bona lau kwalimu. Lagani 1957 dekenai ai headava. Lagani ta murinai, emai natuna kekeni Irina ia vara, to ia ida lau noho daudau lasi. Lagani 1959 ai, Baibel bukadia lau printaia dainai, dibura ruma ai lau idia atoa. Hua 6 bamona lalonai dibura ruma ai lau noho. Lalomaino abia totona, nega ibounai lau guriguri, Basileia anedia lau abia, bona lau idia ruhaia neganai do lau karaia haroro gaukarana lau laloa.

Dibura ruma ai lau noho bona ofesa tauna ta be tahua gaukara ia karaia lalonai ia boiboi, ia gwau, “Kahirakahira ai ese umui do ai moia patapata, ta ese bita ta ia moia patapata hegeregerena!” Lau gwau: “Iesu ia gwau Basileia ena sivarai namona be bese ibounai dekenai DO idia harorolaia, bona ta ese unai do ia koua lasi.” Unai lau gwauraia dainai, ofesa tauna ese dala idauidau ia gaukaralaia egu abidadama ia hamanokaia totona. Edia hagaria herevadia eiava dagedage karadia idia gaukara lasi neganai, Saransk ena siti kahirakahira ia noho dibura kamepa dekenai lau idia siaia lao. Dibura kamepa dekenai lau lao noho lalonai, lau kamonai emai natuna kekeni iharuana, Olga, ia vara. Ena be egu natuna kekeni rua bona adavana be idia noho daudau, to lau moale badina lau bona Maria be Iehova ai badinaia noho.

Lagani ta ta ai, Maria be trein amo Saransk dekenai ia lao lau ia vadivadi henia totona, herevana Tulun amo dina 12 do ia laolao. Lagani ta ta ai, lau totona tamaka matamata ia mailaia. Tamaka ena henunai dekenai be Gima Kohorona ena kopi matamatadia ia hunia. Lagani ta ai, Maria be lau ia vadivadi henia neganai, emai natuna kekeni rua ia hakaua mai danu. Idia lau itaia bona hedavari henia negana ai lau mamia moalena mani oi laloa!

Lagani 1966 ai, dibura kamepa amo lau idia ruhaia bona lau bona egu bese be Armavir siti dekenai ai lao, unai be Black Sea kahirakahira. Unuseniai, aiemai natudia memero rua Yaroslav bona Pavel idia vara.

 Daudau lasi ofesa taudia be emai ruma dekenai idia mai, Baibel bukadia idia tahua totona. Gabu ibounai idia sekea, boromakau edia aniani gabunai danu. Nega ma ta ai, gabu be ia siahu dainai ofesa taudia be idia varahu bada, bona edia dabua be kahu ese ia koua. Maria be idia ia hebogahisi henia, badina ia diba idia be oda idia badinaia sibona. Idia dekenai ranu ia henia, barasi ta, edia dabua amo kahu idia kokia totona, ranu disi ta, bona tauele. Gabeai, ofesa tauna badana ia mai neganai, unai ofesa taudia ese Maria ia karaia karana idia herevalaia. Emai ruma idia rakatania neganai, ofesa tauna badana be mai kiri ida ai ia bamahuta henia. Ai moale badina “kara namo amo dika [ai] halusia.”​—⁠Roma 12:21.

Ena be nega momo emai ruma idia sekea, to Armavir dekenai ai haroro noho. Danu, Kurganinsk taoni kahirakahira ia noho grup maragina ta ai durua. Lau moale bada, badina hari Armavir ai kongrigeisen ibounai be 6 bona Kurganinsk ai be 4.

Idia hanaia laganidia lalonai, nega haida Iehova hesiai henia karana ai manokalaia. To Iehova ai tanikiu henia, badina ia ese abidadama tadikakadia ia gaukaralaia ai idia hagoadaia totona. (Sal. 130:3) Nega ta, hahetoho badana ta ai davaria, ofesa taudia haida be hunia dalanai ai ida idia gaukara, to ai be unai ai diba lasi. Idia be haroro gaukara idia goadalaia. Idia haida be orea lalonai maduna haida idia abia danu. To gabeai edia hehuni karana ia hedinarai.

Lagani 1978 ai, Maria ena mauri lagani be 45 neganai, ia rogorogo lou. Iena kudouna ia gaukara namonamo lasi dainai, doketa idia laloa do ia mase, unai dainai iena lalona idia veria iena bogana lalonai ia noho beibi ia hamasea totona. To Maria ia ura lasi. Unai dainai, hospital ai doketa haida be hekodo ida ia murinai idia loaloa, idia ura ia idia kodoa toho, unai amo do ia mara haraga. Unai beibi gimaia totona, Maria be hospital amo ia heau boio.

Vadaeni ofesa taudia ese ai idia oda henia siti ai rakatania totona. Unai dainai Estonia ena siti Tallinn kahirakahira ia noho hanua ta dekenai ai lao, unai nega ai unai hanua be USSR ese ia naria. Tallinn ai, doketa edia hereva ia vara momokani lasi, Maria ese beibi namona ta, Vitaly, ia havaraia.

Gabeai, Estonia amo Nezlobnaya dekenai ai lao bona unuseni ai noho, unai be Russia ena saut kahanai. Mai aonega ida hotel momo idia noho taoni dekenai ai haroro, nega momo unai taoni dekenai vadivadi taudia be momo. Idia haida be gorere dainai unuseni idia lao, to unai gabu idia rakatania neganai, idia be mauri hanaihanai helarona idia diba vadaeni!

Emai natudia edia kudouna ai, Iehova lalokau henia bona hesiai henia urana ai atoa toho. Nega momo emai ruma dekenai haheitalai namodia idia hahedinaraia tadikaka ai boiridia. Ai ia vadivadi henia momo tauna be egu tadina, Grigory, ia be lagani 1970 ia lao 1995 lalonai sekit gaukara ia karaia. Egu ruma bese ibounai ese iena vadivadi idia moalelaia, badina ia be moale bona hevaseha momo tauna. Emai ruma dekenai vadivadi taudia idia mai neganai, nega momo Baibel gadaradia ai karaia, unai dainai emai natudia idia tubu daekau lalonai, idia be Baibel ena sivarai momo idia diba.

Lagani 1987 ai, emai natuna mero, Yaroslav, be  Latvia ena siti Riga dekenai ia lao, unuseniai iena haroro gaukara ia habadaia. To ami lalonai ia ura lasi vareai dainai, ia idia siaia lagani ta mai kahana dibura ruma ai do ia noho, bona dibura ruma idauidau 9 dekenai ia noho. Dibura ruma ai lau noho negana ena sivarai be ia dekenai lau gwauraia, unai ese ia ia durua ia haheauka totona. Gabeai painia gaukara ia karaia. Lagani 1990 ai, emai natuna mero, Pavel, be Japan ena not kahanai ia noho motumotu, Sakhalin dekenai ia lao, painia gaukara ia karaia totona, unai nega ai iena mauri lagani be 19. Matamanai ai ura lasi ia lao. Unai motumotu ai pablisa ibounai be 20 sibona, bona emai pada unai motumotu amo be kilomita 9,000 bamona. To gabeai ai lalotamona, badina unai be abia hidi maorona. Unai motumotu ai idia noho taudia be Basileia ena sivarai namona idia abia dae. Lagani haida sibona murinai, unuseniai kongrigeisen ibounai be 8. Pavel be unuseniai ena hesiai gaukara ia karaia ela bona 1995. Unai nega ai emai mero ginigabena, Vitaly, be ai ida ia noho. Ia maragi negana amo, Baibel duahiduahi karana ia moalelaia. Iena mauri lagani be 14 neganai, painia gaukara ia matamaia, bona lagani rua lalonai ia ida lau painia. Unai nega lau moalelaia bada. Iena mauri lagani be 19 neganai, ai ia rakatania bona spesel painia gaukara ia karaia.

Lagani 1952 ai, ofesa tauna ta be Maria dekenai ia gwau: “Emu abidadama oi rakatania, bema lasi, lagani 10 dibura ruma ai do oi noho. Bona unai gabu oi rakatania neganai, oi be do oi buruka vadaeni bona sibona do oi noho.” To unai ia vara lasi. Iseda Dirava, Iehova, ena noho hanaihanai lalokauna, bona emai natudia bona ai durudia taudia edia lalokau ai mamia momokani. Lau bona Maria be ai moale, badina emai natudia idia haroro gabudia ai vadivadi henia. Emai natudia ese idia durua taudia edia moale ai itaia neganai, goada ai abia.

Lagani 1991 ai, gavamani ese Iehova ena Witnes taudia edia gaukara ia abia dae. Unai disisen dainai haroro gaukara ai goadalaia. Emai kongrigeisen ese basi ta ia hoia, unai amo wikeni ai, kahirakahira idia noho taoni eiava hanua dekenai ai lao diba.

Lau moale badina Yaroslav bona ena adavana, Alyona, bona Pavel bona ena adavana, Raya, be Betele ai idia gaukara, to Vitaly bona ena adavana, Svetlana, be sekit gaukara idia karaia. Emai natuna kekeni roboana, Irina, bona ena famili be Germany dekenai idia noho. Iena adavana, Vladimir, bona ena natuna memero toi be elda maduna idia huaia. Emai natuna kekeni, Olga, be Estonia dekenai ia noho, bona nega ibounai lau ia rini henia. Egu lalokau adavana, Maria, be lagani 2014 ai ia mase. Lau ura dikadika toreisi lou negana ai ia lau itaia! Hari lau be Belgorod siti dekenai lau noho, unuseniai tadikaka ese lau idia durua bada.

Iehova lau hesiai henia negana amo lau dibaia gauna be inai, iseda abidadama dainai dagedage ita davaria diba, to Iehova ese ia henia lalomaino ese ita ia hagoadaia diba. Lau bona Maria emai gini goada karana dainai ai abia hahenamo be momo herea. Lagani 1991 ai, USSR ia do moru lasi neganai, pablisa taudia be 40,000 mai kahana sibona. To hari, Soviet Union ese guna ia lohiaia tanodia momo dekenai pablisa ena namba ia bada daekau 400,000 mai kahana! Hari egu mauri lagani be 83 bona elda maduna lau do huaia noho. Iehova ena heduru dainai lau haheauka diba. Oibe, Iehova ese lau ia hanamoa bada!​—⁠Sal. 13:5, 6.