1, 2. (a) Reana dahaka dainai do ita henanadai: “Edena negai”? (b) Dahaka dainai idaunegai abidadama taudia edia haheitalai ese ita idia hagoadaia?

“EDENA negai?” Unai henanadai be peroveta tauna Habakuku ese ia henia. (Hab. 1:2) King Davida be Salamo 13 ia torea neganai, ia danu be nega 4 unai bamona ia henanadai. (Sal. 13:1, 2) Bona Iesu Keriso be abidadama lasi taudia ese idia hagegea neganai, unai bamona ia henanadai danu. (Mat. 17:17) Unai dainai ita hoa lasi bema nega haida ita be unai bamona ita henanadai.

² Reana dahaka dainai do ita henanadai: “Edena negai”? Reana haida ese ita idia kara dika henia. Eiava reana ita buruka bona gorere o inai “nega aukadia” ai idia vara gaudia ese ita idia “hahekwarahia bada.” (2 Tim. 3:1) Eiava iseda dekena taudia edia kara gagevadia dainai ita hesiku. Herevana ena badina be dahaka, to ita moale badina guna Iehova ena abidadama hesiai taudia danu be unai bamona idia henanadai, bona Dirava ese idia ia gwauraia dika lasi!

3. Nega aukadia ita davaria neganai, dahaka ese ita ia durua diba?

³ To nega aukadia ita davaria neganai, dahaka ese ita ia durua diba? Hahediba tauna Iamesi, Iesu ena tadikaka unai, be ita ia  hamaoroa, ia gwau: “Tadikaka e, umui haheauka noho ela bona Lohiabada ena noho negana.” (Iam. 5:7) Oibe, ita ibounai ita haheauka be namo. To haheauka ena anina be dahaka, bona edena bamona unai kara namona ita hahedinaraia diba?

4, 5. (a) Haheauka ena anina be dahaka? (b) Hahediba tauna Iamesi ese haheauka karana be edena bamona ia haheitalaia? (Laulau ginigunana herevalaia.)

⁴ Baibel ia gwau, haheauka be lauma helaga ena huahua ta. Bema nega aukadia ai Dirava ena heduru ita abia lasi, ita goevadae lasi taudia be do ita haheauka diba lasi. Haheauka be Dirava ena harihari gauna, bona bema ita haheauka, ita hahedinaraia ita be Ia bona ma haida ita lalokau henia. Bema nega ibounai ita haheauka lasi, unai ese ita bona ma haida huanai ia noho lalokauna ia hadikaia diba; haheauka karana ese lalokau karana ia hagoadaia. (1 Kor. 13:4; Gal. 5:22) Danu, haheauka karana ese Keristani karadia ma haida ia havaraia. Unai bamona karadia ese ita idia durua nega aukadia ita haheaukalaia bona lalohadai maorona ita dogoatao totona. (Kol. 1:11; Iam. 1:3, 4) Danu, haheauka karana ese ita do ia durua ta ena dika ita gwauatao totona, bona do ita gini goada, herevana dagedage ita davaria. Ma danu, Baibel ia gwau namona be mai haheauka ida ita naria noho. Unai hagoadaia herevana be Iamesi 5:7, 8 dekenai ia noho. (Duahia.)

⁵ Dahaka dainai mai haheauka ida Iehova dekenai ita naria be namo? Iamesi ese idia vara gaudia be biru tauna ena gaukara ida ia hahegeregerea. Ena be biru tauna ia gaukara goada tubutubu gaudia ia hadoa totona, to ia ese weda o tubutubu gaudia edia tubu dalana ia biagua lasi. Bona unai tubutubu gaudia edia nega do ia haharagaia lasi. To, ia be mai haheauka ida “tano ena huahua namodia totona ia naria noho.” Unai hegeregerena, Iehova ese ena gwauhamata do ia hagugurudia negana ita naria noho lalonai, ita be gau momo ita biagua diba lasi. (Mar. 13:32, 33; Kara 1:7) Biru tauna bamona, mai haheauka ida ita naria noho be namo.

6. Peroveta tauna Mika amo dahaka ita dibaia?

⁶ Hari idia vara gaudia be peroveta tauna Mika ena negai idia vara danu. Ia be King Ahasa ia lohia negana ai ia noho, unai nega ai dagedage karadia be bada. Momokani, taunimanima ese kara “dika idia karaia dalana be idia diba momo.” (Mika 7:1-3 duahia.) Mika ia diba idia vara noho gaudia be ia ese ia haidaua diba lasi. Unai dainai dahaka ia karaia? Ita ia hamaoroa: “Lau ese Lohiabada do lau naria noho. Ia ese lauegu guriguri do ia kamonai, bona lau abidadama henia, ia ese lau do ia hamauria.” (Mika 7:7) Mika hegeregerena, ita danu ita “naria noho” be namo.

7. Dahaka dainai Iehova dekenai ita naria sibona be hegeregere lasi?

⁷ Bema iseda abidadama be Mika ena hegeregerena, mai ura bada ida Iehova do ita naria. Ita be dibura ruma ai ia noho bona ena mase negana ia naria noho tauna bamona lasi. Haida ese ia idia oda henia dainai ia naria, bona ia dekenai do ia vara gauna be mai moale ida ia naria noho lasi. To ita be idau! Ita be mai ura bada ida Iehova ita naria, badina ita diba nega korikorina ai ia ese ena gwauhamata ibounai do ia hagugurua bona ita dekenai mauri hanaihanai do ia henia! Unai dainai ‘gau ibounai do ita haheaukalaia, do ita hesiku lasi bona do ita moale.’ (Kol. 1:11, 12) Ita naria noho lalonai, namo lasi ita maumau, ita gwau Iehova be ia karaharaga lasi. Bema unai ita karaia, ia be do ia moale lasi.​—⁠Kol. 3:12.

8. Guna idia noho abidadama tatau bona hahine edia haheitalai ita laloa dobu neganai, dahaka ita laloatao be namo?

⁸ Mai ura bada ida do ita naria noho, bema guna idia noho abidadama tatau bona hahine ita lalodia. Idia be mai haheauka ida, Iehova ese ena gwauhamata ibounai do ia hagugurua negana idia naria. (Roma 15:4) Edia haheitalai ita laloa dobu neganai, namona be idia naria ena daudau, idia naria noho ena badina, bona edia haheauka karana dainai idia davaria hahenamo ita laloa.

9, 10. Aberahamo bona Sara be Iehova dekenai idia naria ena daudau be edena bamona?

⁹ Aberahamo bona Sara edia haheitalai mani ita laloa. Edia “abidadama bona haheauka karana amo Dirava ese ia gwauhamatalaia gaudia idia abia.” Baibel ia gwau “Aberahamo ia haheauka dainai,” Iehova ia gwauhamata ia do ia hanamoa bona ena bese do ia habadaia. (Heb. 6:12, 15) Dahaka dainai Aberahamo ia haheauka be namo? Badina unai gwauhamata be do ia guguru haraga lasi. Iehova ese Aberahamo ida ia karaia gwauhamatana be Nisan 14, 1943 B.C.E. ai ia guguru matamaia. Unai nega ai, ia bona Sara bona edia ruma bese be Euperate Sinavaina idia hanaia bona Gwauhamata Tanona dekenai idia vareai. Bena Aberahamo be lagani 25 ia naria ela bona ena natuna Isako be lagani 1918 B.C.E. ai ia vara, bena lagani 60 ma ia naria ela bona ena tubuna Esau bona Iakobo be lagani 1858 B.C.E. ai idia vara.​—⁠Heb. 11:9.

¹⁰ Aberahamo ese ia abia tano ena bada be edena bamona? Baibel ia gwau: “To Dirava ese ia [Aberahamo] dekenai tano ena kahana ta ia henia lasi, oibe, tano sisina  danu ia henia lasi. To ia gwauhamata, unai tano be ia dekenai do ia henia bona unai tano be ia bona ena bese taudia edia tano ai do ia lao. Dirava ese unai hereva ia gwauraia neganai, Aberahamo be natuna lasi.” (Kara 7:5) Momokani, Aberahamo ese Euperate Sinavaina ia hanaia bena lagani 430 murinai, iena bese taudia be bese badana ai idia lao bona tano idia abia.​—⁠Eso. 12:40-42; Gal. 3:17.

11. Dahaka dainai Aberahamo be Iehova dekenai ia naria, bona ena naria karana dainai dahaka hahenamo ia abia?

¹¹ Aberahamo be mai ura bada ida ia naria, badina ia be Iehova ia abidadama henia. (Heberu 11:8-12 duahia.) Oibe, ia be mai moale ida ia naria, ena be Dirava ese ia gwauhamatalaia gaudia ibounai ia itaia lasi. To, tanobada paradaiso ai do ia toreisi lou negana ai do ia mamia moalena mani oi laloa. Ia be do ia moale bada, badina Baibel lalonai ia bona ena bese taudia edia sivarai idia torea. * Danu, do ia moale badina idia gwauhamatalaia Mesiana amo Iehova ese ena ura ia hagugurua karana ia durua! Momokani, do ia moale badina ia naria dainai, unai hahenamo ia davaria.

12, 13. Dahaka dainai Iosepa ia haheauka, bona edena kara namona ia hahedinaraia?

¹² Aberahamo ena tubuna Iosepa danu be ia haheauka. Ia be dagedage bada ia davaria. Matamanai, iena mauri lagani be 17 neganai, iena tadikaka ese igui hesiai tauna bamona ia idia hoihoilaia. Gabeai, haida ese idia samania koikoi idia gwau ia ura ena biaguna ena adavana ia reipia, unai dainai dibura ruma ai ia idia atoa. (Gen. 39:11-20; Sal. 105:17, 18) Iosepa be ia kara maoromaoro dainai, panisi ia abia, to hanamoa ia abia lasi. To lagani 13 murinai, gau ibounai idia idau haraga. Ia be dibura ruma amo idia ruhaia bona Aigupito lalonai ia be siahu bada tauna iharuana ai ia lao.​—⁠Gen. 41:14, 37-43; Kara 7:9, 10.

¹³ Iosepa ese ia davaria dagedage karadia dainai ia badu, a? Iena Dirava, Iehova, abidadama henia karana ia rakatania, a? Lasi. Dahaka ese Iosepa ia durua dainai, ia be mai haheauka ida ia naria? Ia be Iehova ia abidadama henia. Bona Iehova ena heduru ia itaia. Iena tadikaka dekenai ia gwauraia herevana ese unai ia hahedinaraia, ia gwau: “Umui gari lasi. Lau be Dirava, emui kerere davana do lau henia, a? Momokani, guna umui laloa karaia, lau do umui hadikaia gwauraia, to Dirava ese emui kara ena anina be, mai namo danu ia havaraia. Unai kara ena anina be hari dina umui itaia inai, taunimanima momo herea edia mauri dekenai durua lau henia vadaeni.” (Gen. 50:19, 20) Gabeai, Iosepa ia laloparara ia naria dainai, ia be hahenamo ia abia.

14, 15. (a) Dahaka dainai haheauka karana dekenai Davida be haheitalai namona? (b) Dahaka ese Davida ia durua dainai, ia be mai haheauka ida ia naria?

¹⁴ King Davida danu be dagedage ia davaria. Ia matamata neganai, Iehova ese ia horoa Israela ena king ai ia lao totona, to Davida be lagani 15 bamona ia naria murinai, ia be iena iduhu ena king ai ia lao. (2 Sam. 2:3, 4) Unai negai danu, King Saulo be Davida ia tahua ia hamasea totona. * Unai dainai, Davida be gabu idauidau ai ia noho, nega haida tano idauna ai bona nega ma haida ai tano gagaena ena kohua dekenai ia noho. Ena be Saulo be tuari lalonai idia hamasea, to Davida be lagani 7 ma ia naria, Israela  besena ena king ai ia lao totona.​—⁠2 Sam. 5:4, 5.

¹⁵ Dahaka dainai Davida be mai haheauka ida ia naria? Haere be salamo bukana lalonai ita davaria. Unai buka tamona ai nega 4 ia henanadai: “Edena negai?” Ia gwau: “To lau ese oiemu lalokau momokani, be lau abidadama henia noho, bona oi ese lau do oi hamauria dainai, lau be lau moale noho. Lau ese Lohiabada dekenai, ane do lau abia, badina be ia ese, iena hariharibada dekenai, lau ia hanamoa vadaeni.” (Sal. 13:5, 6) Davida be Iehova ena noho hanaihanai lalokauna dekenai ia tabekau. Ia be mai moale ida Iehova ese ena hisihisi amo do ia hamauria negana ia naria, bona Iehova ese ia durua daladia ia laloa danu. Oibe, Davida ia laloparara ia naria dainai, ia be hahenamo do ia abia.

16, 17. Naria karana dekenai edena dala ai Iehova Dirava bona Iesu Keriso be haheitalai namona?

¹⁶ Iehova be ita ia hamaoroa lasi ia sibona ese ia karaia diba lasi karana ta ita karaia totona. Naria karana dekenai ia be haheitalai hereadaena. (2 Petero 3:9 duahia.) Lagani tausen momo lalonai, Iehova be mai haheauka ida ia naria noho, unai amo Eden umana ai ia vara hepapahuahuana ia hamaoromaoroa diba. Danu, ia be ena ladana do ia hahelagaia negana ia “naria noho.” Unai nega ai, ia “idia abidadama henia taudia” ibounai be hahenamo do idia abia.​—⁠Isa. 30:18.

¹⁷ Iesu danu be ia naria noho. Ena be tanobada ai ia noho neganai, ia be Dirava ia badinaia bona lagani 33 C.E. ai mauri davalaia boubouna ia henia, to ia naria ela bona lagani 1914 ai ia be king ai ia lao. (Kara 2:33-35; Heb. 10:12, 13) Ma danu, do ia naria noho ela bona ena Lagani 1,000 Lohia Negana ia ore murinai, ena inai taudia ibounai do ia hadikaia ore. (1 Kor. 15:25) Oibe, Iesu be nega daudau lalonai ia naria noho, to unai ese gau namona do ia havaraia.

18, 19. Dahaka ese ita do ia durua ita naria noho totona?

¹⁸ Namona be ita ta ta danu be mai haheauka ida ita naria noho. To dahaka ese ita do ia durua unai ita karaia totona? Dirava ena lauma helaga totona ita guriguri. Laloatao, haheauka be lauma helaga ena huahua ta. (Efe. 3:16; 6:18; 1 Tes. 5:17-19) Iehova oi noia oi do ia durua, unai amo mai haheauka ida oi naria noho diba.

¹⁹ Laloatao, Aberahamo, Iosepa, bona Davida be Iehova idia abidadama henia bona idia abia dae momokani ia ese idia do ia durua dainai, idia be mai haheauka ida Iehova ena gwauhamata ibounai ena guguru negana idia naria diba. Idia be sibodia edia namo idia laloa lasi. Idia abia hahenamodia ita laloa neganai, unai ese ita do ia hagoadaia ita naria noho totona.

20. Iseda lalona ita hadaia dahaka ita karaia totona?

²⁰ Ena be hahetoho idauidau ita davaria, to namona be ita “naria noho.” Oibe, nega haida reana do ita gwau, “Lohiabada e, . . . edena negai?” (Isa. 6:11) To, Dirava ena lauma helaga ese ita do ia hagoadaia, bona Ieremia hegeregerena do ita gwau: “Iehova be lauegu ahuna; unai dainai ia do lau naria.”​—⁠Lal. 3:24, BHḡ.