1. Edena dala ma haida ai Iehova ida ita gaukara hebou diba?

HAVARAIA TAUNA ia diba goevadae taudia be ia ida do idia gaukara hebou iena ura idia hagugurua totona. Ena be hari taunimanima be goevadae lasi, to dina ta ta ai abidadama taudia be Iehova ida idia gaukara hebou diba. Hegeregere, Basileia ena sivarai namona ita harorolaia bona hahediba taudia halaoa gaukara ita karaia neganai, ita be “Dirava ida [ita] gaukara hebou.” (1 Kor. 3:5-9) Oibe, guba bona tanobada ia Havaraia Siahu Ibounai Diravana ida unai mai anina bada gaukarana dekenai ita gaukara hebou be hahenamo ta! Haroro bona hahediba taudia halaoa gaukarana sibona lasi, to dala ma haida ai Iehova ida ita gaukara hebou diba. Inai stadi ai, ita ese iseda ruma bese bona tadikaka taihu ita durua, heabidae karana ita hahedinaraia, tiokratik gaukara idauidau totona ita volantia, bona iseda hesiai gaukara helagana ita habadaia daladia do ita herevalaia.​—Kol. 3:23.

2. Dahaka dainai Iehova totona ita karaia diba gaukaradia be ma haida ida ita hahegeregerea be aonega karana lasi?

² Inai atikol ita stadilaia lalonai, namona be Iehova totona ita karaia diba gaukaradia be ma haida ida ita hahegeregerea lasi. Badina iseda mauri lagani, helt, noho daladia, bona goada be idauidau. Unai dainai Paulo ia gwau: “Namona be ta ta ese sibona ena kara do ia tahua namonamo, vadaeni ia sibona dekenai do ia moale, bona ma ta ida sibona do ia hahegeregerea lasi.”​—Gal. 6:4.

3. Dahaka dainai ita gwau diba edia ruma bese idia naria taudia be Dirava ida idia gaukara hebou noho?

³ Iehova ia ura ena hesiai taudia be edia ruma bese idia durudia. Hegeregere, emu lalokau taudia oi naria totona reana moni gaukara oi karaia diba. Sina momo be ruma dekenai idia noho edia beibi idia naria totona. Bona idia bada natudia haida be edia gorere tama sina idia naria. Unai be mai anina bada gaukaradia. Dirava ena Hereva ia gwau: “Bema tau ta be iena henari henunai idia noho taudia ia naridia lasi, bona gau badana be bema iena ruma bese taudia ia naridia lasi, ia ese ena abidadama ia negea vadaeni bona iena dika ese abidadama lasi tauna ena dika ia hereaia.” (1 Tim. 5:8) Bema oi be unai bamona maduna haida oi huaia, reana oi be nega lasi tiokratik gaukara idauidau oi karaia totona. To namona be oi goada noho! Iehova be ia moale bema emu ruma bese oi naria.​—1 Kor. 10:31.

4. Edena dala ai tama sina be tiokratik gaudia idia atoa guna, bona unai ese dahaka namo ia havaraia diba?

⁴ Keristani tama sina ese edia natudia idia durua tiokratik tahua gaudia idia atoa guna neganai, Iehova ida idia gaukara hebou. Unai bamona idia karaia tama sina momo be gabeai idia itaia edia natudia memero bona kekeni be gabu daudau ai ful-taim hesiai gaukara idia karaia. Haida be misinari gaukara idia karaia; ma haida be pablisa momo lasi gabudia ai painia gaukara idia karaia; bona haida be Betele dekenai idia gaukara noho. Gabu daudau ai idia noho dainai nega momo edia ruma bese ida idia noho hebou lasi. To, sibona edia ura idia dadaraia tama sina be edia natudia idia hagoadaia edia hesiai gaukara idia karaia noho totona. Dahaka dainai? Badina idia itaia edia natudia be Basileia idia atoa guna dainai idia moale bada. (3 Ioa. 4) Reana unai bamona tama sina momo edia hemami be Hana ena bamona, ia gwau, ena natuna Samuela be Iehova dekenai ia “henia.” Unai tama sina idia mamia unai bamona Iehova ida gaukara hebou karana be hahenamo badana ta.​—1 Sam. 1:28.

5. Edena dala ma haida oi badinaia diba emu kongrigeisen taudia oi durua totona? (Laulau ginigunana herevalaia.)

⁵ Bema ruma bese lalonai maduna metaudia oi huaia lasi, naria gaukara idia karaia tadikaka o taihu, gorere taudia, buruka taudia o heduru idia ura taudia haida oi durudia diba, a? Emu kongrigeisen lalonai heduru idia ura abia taudia haida oi diba, a? Reana nega oi atoa Keristani taihu ta ena buruka tama o sina oi naria totona unai amo taihu be ma gau haida ia karaia diba. Eiava idia oi durua hebou dekenai oi hakaudia lao, sitoa dekenai umui lao, edia gaukara ma haida oi karaia, o hospital ai ta umui vadivadi henia. Unai oi karaia neganai, reana oi be Iehova ida oi gaukara hebou noho ta ena guriguri haerelaia totona.​—1 Korinto 10:24 duahia.

6. Heabidae karana ita hahedinaraia totona dahaka ita karaia be namo?

⁶ Dirava ida idia gaukara hebou taudia be heabidae karana idia hahedinaraia taudia. Keristani Grik Toretoredia ai, inai hereva “heabidae karana” idia hahanaia ena anina be “idau taudia hebogahisi henidia.” (Heb. 13:2) Baibel ena sivarai idauidau ese ita dekenai lalokau hahedinaraia karana ia hadibaia. (Gen. 18:1-5) Namona be hanaihanai dala idauidau ai haida ita durua, ena be idia be “iseda abidadama tamona” taudia eiava lasi.​—Gal. 6:10.

7. Dahaka dainai vadivadi ful-taim hesiai taudia dekenai heabidae karana ita hahedinaraia be namo?

⁷ Dirava ida oi gaukara hebou diba bema vadivadi ful-taim hesiai taudia dekenai heabidae karana oi hahedinaraia. (3 Ioane 5, 8 duahia.) Unai be nega namona ta ta “ita hagoadaia heheni” totona. (Roma 1:11, 12) Mani Olaf ena ekspiriens ita laloa. Ia gwau, lagani haida gunanai ena kongrigeisen taudia be idia hegeregere lasi headava lasi sekit naria tauna ta dekenai, noho gabuna idia henia totona. Unai dainai, Olaf ese ena Witnes lasi tama sina ia noia bema sekit naria tauna be edia ruma dekenai ia noho diba. Idia laloa tamona, to idia gwau Olaf be sea badana (couch) dekenai do ia mahuta. Unai senisi sisina ese namo ia havaraia. Olaf ia gwau: “Unai wiki lau moalelaia! Badina lau bona sekit naria tauna be dina ta ta ai daba momokani ai toreisi bona ai aniani lalonai, topik namodia momo ai herevalaia. Bona lau abia hagoadaia herevadia ese egu ura ia habadaia ful-taim hesiai gaukara lau karaia totona.” Idia hanaia laganidia 40 lalonai, Olaf be misinari gaukara idauidau ia karaia.

8. Dahaka dainai hebogahisi ita hahedinaraia be namo ena be haida idia kamonai lasi? Haheitalai gwauraia.

⁸ Idau taudia dekenai dala idauidau ai lalokau karana oi hahedinaraia diba, ena be emu hekwarahi idia laloa bada lasi. Mani inai haheitalai oi laloa. Spain ai pablisa ta ena stiuden ladana Yesica, Ecuador amo, be ena Baibel stadi ia karaia lalonai, ia itaia ia tai noho. Pablisa ia henanadai dahaka dainai ia tai. Yesica ia gwau, Spain dekenai ia do lao lasi neganai ia be ogogami, bona nega ta ia dekenai aniani be lasi. Ena natuna kekeni dekenai ranu sibona ia henia. Yesica be ena natuna ia ura hamahutaia lalonai, heduru totona ia guriguri. Nega sisina murinai, witnes taihu rua ese ia idia vadivadi henia, to Yesica be idia ia kara auka henia bona idia henia magasin ia darea. Bona ia henanadai, “Umui ura egu natuna kekeni dekenai inai lau henia ia ania totona, a?” Taihu rua idia ura ia idia hagoadaia, to ia kamonai lasi. Gabeai, ena iduara dekenai aniani puse ta idia rakatania. Unai taihu edia hebogahisi karana ese Yesica ena kudouna ia hamarerea bona ena hemami ia dika bena ia laloparara Dirava ese ena guriguri ia haerelaia dalana ia laloa bada lasi. Hari ena lalona ia hadaia Iehova ia hesiai henia totona. Oibe, edia hariharibada karana ese namo bada ia havaraia!​—Had. 11:1, 6.

9, 10. (a) Baibel negadiai dahaka gaukara haida dainai Dirava ena taunimanima idia ura volantia gaukara idia karaia? (b) Hari kongrigeisen lalonai tatau haida be dahaka gaukara idauidau dekenai heduru idia henia diba?

⁹ Idaunegai Israela dekenai gaukara ma haida idia karaia totona volantia taudia idia abia. (Eso. 36:2; 1 Siv. 29:5; Neh. 11:2) Hari, oi dekenai danu dala momo ia noho emu nega, kohu, bona diba oi gaukaralaia emu tadikaka bona taihu oi durudia totona. Danu, do oi moale bada bona hahenamo momo do oi davaria.

¹⁰ Dirava ena Hereva ese kongrigeisen ai idia noho tatau ia hagoadaia, Iehova ida idia gaukara hebou totona hesiai tauna bona elda ena maduna idia abia be namo. (1 Tim. 3:1, 8, 9; 1 Pet. 5:2, 3) Unai bamona idia karaia taudia be idia ura ma haida ida idia gaukara hebou bona Baibel amo heduru idia henia. (Kara 6:1-4) Elda taudia be oi idia noia atendan gaukara, buka bona magasin naria gaukara, teritori oi naria, meintenens gaukara bona gau ma haida dekenai heduru oi henia totona, a? Unai bamona gaukara idia karaia taudia idia moale ma haida idia durua totona.

11. Edena dala ai taihu ta be konstraksen gaukara ai ia davaria tura namodia amo heduru ia abia?

¹¹ Tiokratik gaukara idauidau lalonai idia volantia taudia be nega momo tura matamatadia idia davaria. Mani taihu ta ladana Margie, ena haheitalai ita laloa, ia be lagani 18 lalonai Kingdom Hall haginia gaukarana ia karaia. Idia hanaia laganidia lalonai, ia ese taihu matamatadia haida dekenai treinini ia henia. Taihu ia davaria unai be dala namona ta ta edia abidadama idia hagoadaia heheni totona. (Roma 1:12) Margie ena mauri lalonai hekwakwanai ia davaria negadiai, konstraksen gaukara ai ia davaria tura namodia ese ia idia hagoadaia. Oi be unai bamona konstraksen gaukara ta lalonai volantia gaukara oi karaia, a? Herevana unai gaukara oi diba o lasi, to heduru oi henia diba, a?

12. Edena dala ai disasta negadiai heduru oi henia diba?

¹² Disasta idia vara neganai, Dirava ena taunimanima be Dirava ida idia gaukara hebou totona, dala idauidau ai edia tadikaka bona taihu idia durudia. Hegeregere, moni dalanai dika idia davaria taudia idia durudia. (Ioa. 13:34, 35; Kara 11:27-30) Dala ma ta be, idia durudia edia gabu idia hagoevaia o edia ruma idia haginia lou. Poland ai ia noho taihu ta ladana Gabriela, ena ruma be abata ese ia hadikaia, to kahirakahira idia noho kongrigeisen amo tadikaka haida idia mai ia idia durua neganai ia moale bada. Ia gwau: “Lau ura lasi lau haboioa gaudia lau herevalaia​—unai be tauanina gaudia sibona. To, lau idia durua gaudia, lau ura herevalaia. Unai ekspiriens ese lau ia hagoadaia Keristani kongrigeisen lalonai lau noho be hahenamo badana, bona moale lau abia.” Disasta murina heduru idia abia taudia momo be unai bamona moale idia mamia danu. Bona Iehova ida idia gaukara hebou bona heduru idia henia taudia be idia moale bada.​—Kara 20:35; 2 Korinto 9:6, 7 duahia.

13. Edena dala ai volantia gaukara ese iseda hetura karana Iehova ida ia hagoadaia diba? Haheitalai ta gwauraia.

¹³ Stephanie bona pablisa haida be idia moale Dirava ida idia gaukara hebou, badina United States dekenai refiuji taudia bamona idia mai Witnes taudia dekenai heduru idia henia. Idia ese tuari dainai edia gabu idia rakatania ruma besedia idia durua, edia noho rumadia idia tahua bona henia totona. Stephanie ia gwau: “Tanobada ibounai tadikaka oreana edia lalokau karana idia mamia neganai, edia moale bona tanikiu karana ese emai kudouna ia hamarerea.” Ma ia gwau: “Unai ruma bese idia laloa ai ese idia ai durua, to momokani, idia ese ai idia durua bada. Danu lalokau, lalotamona, abidadama bona Iehova dekenai tabekau karana ese emai lalokau Iehova dekenai ia hagoadaia momokani, bona iena orea amo ai abia gau ibounai dainai ia ai tanikiu henia.”

14, 15. (a) Peroveta tauna Isaia ese dahaka kara ia hahedinaraia? (b) Edena dala ai hari Basileia harorolaia taudia ese Isaia ena kara idia tohotohoa diba?

¹⁴ Oi ura Iehova ida oi gaukara hebou noho, a? Bema pablisa momo lasi gabudia ai iena orea taudia durua totona oi idia siaia, do oi abia dae, a? Oibe, Dirava ena taunimanima be gabu daudau amo do idia mai lasi hariharibada karana idia hahedinaraia totona. To, tadikaka taihu haida be edia noho dalana hegeregerena gabu daudau idia lao diba. Edia laloa dalana be Isaia ena bamona. Iehova ia henanadai, “Daika do lau siaia, bona daika be ai totona do ia lao?” Bona ia gwau: “Lau inai! Lau oi siaia!” (Isa. 6:8) Emu noho dala hegeregerena unai bamona oi haere diba, a? Edena dala ai oi heduru diba?

¹⁵ Haroro bona hahediba taudia halaoa gaukarana dekenai, Iesu ia gwau: “Gogoa gaukarana be bada, to gaukara taudia be momo lasi. Unai dainai gogoa gaukara ena Biaguna umui noia, ia ese gaukara taudia do ia siaia iena aniani idia gogoa totona.” (Mat. 9:37, 38) Pablisa be momo lasi gabuna ta ai oi painia diba, a? Eiava ta oi durua diba unai gaukara ia karaia totona? Tadikaka bona taihu momo idia mamia gogoa gaukara be ia bada gabudia dekenai oi painia be dala namona ta, Dirava bona dekena taudia lalokau henia karana ita hahedinaraia totona. Emu hesiai gaukara oi habadaia dala ma haida oi laloa, a? Unai bamona oi karaia neganai do oi moale bada.

16, 17. Iehova ena gaukara dekenai emu ura oi habadaia totona, dahaka hahenamo ma haida idia noho?

¹⁶ Oi ura Betele dekenai oi gaukara eiava konstraksen gaukarana dekenai pat-taim o komiuta bamona heduru oi henia, a? Iehova ena orea lalonai gaukara be bada dainai, mai ura bada ida Iehova idia hesiai henia diba​—herevana edeseni ai idia siaia bona dahaka gaukara idia karaia​—taudia idia gaukaralaia. Reana idia ura gaukara ta idia hagugurua dainai, ta do idia siaia unai gaukara ia karaia totona, ena be gaukara ma ta dekenai ena ekspiriens bona diba be bada. To, Iehova ese sibona idia henia ena hesiai gaukara idauidau idia karaia taudia edia heduru ia laloa bada.​—Sal. 110:3.

¹⁷ Oi ura treinini haida oi abia, unai amo emu diba oi habadaia emu hesiai gaukara helagana oi karaia totona, a? Bema oibe, Basileia Evanelia Sikuli oi lao diba. Unai sikuli ese Dirava ena hesiai gaukara idia laloa bada ful-taim hesiai tatau bona hahine dekenai, treinini ia henia edia haroro gaukara idia habadaia totona. Unai sikuli idia lao totona aplikeisen idia hahonua taudia ese sikuli murinai, do idia abia asainmen be mai ura ida idia abia dae be namo. Oi ura unai bamona gaukara do oi abia dae unai amo hesiai gaukara ena hahenamo ma haida oi abia, a?​—1 Kor. 9:23.

18. Dina ta ta ai Iehova ida oi gaukara hebou neganai, dahaka oi davaria diba?

¹⁸ Ita be Iehova ena taunimanima dainai, dina ta ta ai ma haida ita durua totona, hariharibada karana​—hegeregere kara namo, hebogahisi, bona lalokau ita hahedinaraia be namo. Unai bamona ita karaia neganai, moale bona maino ita abia diba. (Gal. 5:22, 23) Ena be emu noho dalana be edena bamona, to Iehova ena hariharibada karana oi tohotohoa bona ia ida oi gaukara hebou neganai, moale oi davaria diba!​—Aon. 3:9, 10.