“TAMAGU,” “PAPA,” “VAVANA.” Betele ai matamata taudia momo ese lau dekenai unai bamona idia gwauraia. Egu mauri lagani be 89 dainai unai ladadia lau moalelaia. Lau dekenai unai bamona hanamoa herevadia be hahenamo bamona Iehova amo badina lagani 72 ful-taim hesiai gaukara lalonai ia lau hesiai henia. Bona Dirava ena hesiai gaukara lalonai lau davaria ekspiriens dainai, mai kudouna ibounai ida matamata taudia lau hagoadaia, ‘Emu gaukara ena ahuna do oi abia​—bema emu imana oi atoa diho lasi.’​—2 Siv. 15:7 NWT, ftn.

Egu tama sina be Ukraine idia rakatania bona Canada dekenai idia lao. Idia be provinsi ladana Manitoba ena taoni Rossburn ai idia noho. Egu lalokau sinana be memero 8 bona kekeni 8 ia havaraia, hekapa be lasi​—natudia ibounai 16 amo lau be namba 14. Egu tamana be Baibel ia lalokau henia bona Sunday daba ibounai, ai dekenai ia duahia, to ia laloa tomadiho gunalaia taudia be taunimanima amo moni idia abia to idia durudia lasi bona nega momo mai hevaseha ida ia henanadai, “Daika ese Iesu ena haroro bona hadibaia gaukara ena davana ia henia?”

Egu tadikaka bona taihudia 8​—memero 4 bona kekeni 4​—be gabeai hereva momokani idia abia dae. Egu taihuna namba 8, Rose, be painia gaukara ia karaia ela bona ia mase. Ena mauri dina oredia lalonai, ai ibounai ia hagoadaia Dirava ena Hereva ai laloa bada totona, bona ia gwau, “Lau ura tanobada matamatana lalonai umui lau itaia.” Egu tadikaka namba 5, Ted, be guna hel lahi lalohadaina ia harorolaia tauna ta. Sunday daba ibounai reidio amo ia haroro, bona idia kamonai taudia ia hamaoroa loulou, kara dika taudia be ia bodo diba lasi hel lahina ese do ia araia ela bona hanaihanai. To, gabeai ia be Iehova ia abidadama henia bona iena hesiai tauna ta ai ia lao.

June 1944 ai, nega ta sikuli murinai ruma dekenai lau giroa neganai, emai aniani teibolo latanai buklet ta ladana The Coming World Regeneration * lau davaria. Rau ginigunana lau duahia, bena iharuana ma lau duahia, ela bona lau duahia haorea. Unai buklet lau duahia murinai, egu lalona lau hadaia​—lau ura Iehova do lau hesiai henia Iesu ese ia karaia bamona.

Edena dala ai unai buklet be emai teibolo latanai ia noho? Egu kakana namba 10 Steve, ia gwau, buka bona buklet idia “hoihoilaia” tatau rua be emai ruma dekenai idia mai. Steve ia gwau, “Unai lau hoia, badina ena davana be 15 toea sibona.” Unai tatau rua be vaira wiki ena Sunday ai idia giroa mai. Ai idia hamaoroa idia be Iehova ena Witnes taudia bona idia be Baibel idia gaukaralaia taunimanima edia henanadai idia haerelaidia totona. Idia ai abia dae badina ai maragi negana amo emai tama sina ese ai idia hadibaia Dirava ena Hereva ai matauraia. Danu unai tatau rua ese ai idia hadibaia Witnes taudia be Winnipeg ai hebouhebou ta do idia abia, egu taihuna namba 7, Elsie, be unai siti ai ia noho. Lau ura unai hebouhebou dekenai lau lao.

Winnipeg dekenai lau lao totona egu basikele lau taria bona kilomita 320 bamona lau heau, to ai idia vadivadi henia Witnes taudia rua idia noho taoni ladana Kelwood dekenai lau stopu. Unuseni lau noho lalonai, lau be hebou ta lau lao bona unai nega amo kongrigeisen ena anina lau dibaia. Danu lau laloparara tau, hahine, memero bona kekeni be hadibaia taudia ai idia lao bona ruma-ta-ruma-ta haroro gaukara idia karaia be namo, Iesu ia karaia bamona.

Winnipeg ai, egu kakana badana Jack ida lau hedavari, ia be northern Ontario amo ia mai unai hebouhebou totona. Hebouhebou ena dina ginigunana ai, tadikaka ta be bapatiso totona hadibaia herevana ia gwauraia. Lau bona Jack be emai lalona ai hadaia unai hebouhebou ai bapatiso do ai abia totona. Ai ura bada bapatiso ai abia murinai, maoromaoro painia gaukara do ai karaia. Unai dainai hebouhebou ia ore murinai Jack be painia ta ai ia lao. Egu mauri lagani be 16 dainai sikuli totona lau giroa lou, to vaira lagani ai lau danu be regula painia ta ai lau lao.

Manitoba ena provinsi ai ia noho taoni ladana Souris ai, tadikaka Stan Nicolson ida, painia gaukara lau karaia matamaia. Bona lau itaia painia gaukara lalonai gau haida idia vara diba. Emai moni ia ore lao, to haroro gaukara ai do karaia noho. Nega ta, haroro gaukara murinai mai hitolo ida ruma dekenai ai giroa, bona ai dekenai moni ta ia noho lasi. Hoa gauna be emai iduara dekenai aniani puse badana ta ai itaia! Ema bona hari, ai diba lasi daika ese unai ia atoa. Unai adorahi ai, king bamona ai aniani. Emai imana ai atoa diho lasi dainai hahenamo ai abia! Bona momokani, unai hua ena dokonai, egu metau be ia daekau guna bamona lasi.

Bona hua haida murinai, ai idia siaia lao taoni ladana Gilbert Plains dekenai, ia be kilomita 240 bamona Souris ena not kahana amo. Unai nega ai, kongrigeisen ta ta be platfom ai mai edia chart badana ta bona hua ta ta ai kongrigeisen ena haroro gaukara ena ripoti ia hahedinaraia. Hua ta ena ripoti ia diho dainai, egu tok ta ai kongrigeisen lau sisiba henia tadikaka bona taihu ese edia haroro gaukara idia hanamoa totona. Hebou murinai, painia taihu burukana ta, ena tau be witnes lasi, be mai mata ranu ida lau dekenai ia gwau: “Lau karaia toho, to guna lau karaia bamona lau karaia diba lasi.” Bena lau tai, bona ia dekenai lau sori.

Lau dekenai ia vara bamona, idia goada tadikaka matamatadia be unai bamona kerere idia karaia diba bena gabeai sibona dekenai do idia lalohisihisi. To lau dibaia gauna be imana oi atoa diho lasi totona, namona be emu kerere amo gau ta oi dibaia bona ia vara gauna oi laloatao, unai amo do oi goada. Mai abidadama ida emu gaukara oi habadaia neganai hahenamo do oi abia.

Egu mauri lagani be 21 neganai Gilead sikuli ena klas namba 14 dekenai lau lao bona February 1950 lau gradueit, unai be hahenamo badana ta! Stiuden ibounai 103 amo egu klas turadia 25 be, Canada ai French gado idia hereva provinsi ladana, Quebec dekenai idia siaidia lao, unuseniai tomadiho koikoi taudia ese nega momo Witnes taudia idia dagedage henidia. Lau be Quebec ena sautwest kahana ena taoni ta ladana, Val-d’Or dekenai idia siaia lao. Nega ta, tadikaka bona taihu ibounai be Val-Senneville kahirakahira ia noho hanuana dekenai ai haroro. Hanua ena pris ta be mai dagedage ida ai ia hagaria hanua ai rakatania totona. Ena dagedage karana dainai kota dekenai lau atoa. Bona pris tauna ia faini. *

Unai bamona kara bona ma kara haida be “Quebec ai ia vara dagedage karana” ta. Lagani 300 mai kahana bamona, Quebec ena provinsi be Roma Katolik Dubuna ese ia biagua. Dubu gunalaia oreadia bona edia politikol turadia ese Iehova ena Witnes taudia idia dagedage henidia. Unai be nega aukadia bona ai be momo lasi; to emai imana ai atoa diho lasi. Quebec ai kudou-maoro taudia haida be idia kamonai. Lau stadi henia tatau bona hahine haida be hereva momokani idia abia dae dainai lau moale. Egu Baibel stiuden ta ena famili ai idia ibounai be ten. Bona idia ibounai be Iehova idia hesiai henia matamaia. Edia haheitalai namona ese haida edia lalona ia veria Katolik Dubu idia rakatania totona. Haroro gaukara ai karaia noho, bona ia vara dagedage karana amo ai kwalimu!

Lagani 1956 ai, Haiti dekenai lau idia siaia misinari gaukara lau karaia totona. Unuseniai idia noho misinari matamatadia momo be idia hekwarahi French gado idia dibaia totona, to taunimanima be idia kamonai. Misinari tauna, Stanley Boggus ia gwau, “Ai hoa badina ai itaia taunimanima be idia gaukara goada ai idia durua emai lalohadai ai gwauraia hedinarai totona.” Lau be guna, Quebec ai French gado lau dibaia dainai lau hekwarahi lasi. To gabeai ai laloparara unai hanua ai tadikaka momo be Haitian Creole gado sibona idia herevalaia. Unai dainai ai misinari taudia ese emai gaukara ai hanamoa totona, Haitian Creole gado ai dibaia be namo. Unai bamona ai karaia, bona emai hekwarahi dainai hahenamo ai davaria.

Tadikaka ai durudia noho totona, Hakaua Oreana amo gwaumaoro ai abia Haitian Creole gado ai Gima kohorona bona pablikeisen idauidau ai hahanaia totona. Gabu ibounai dekenai hebou idia mai taudia edia namba ia bada daekau. Lagani 1950 ai, Haiti dekenai pablisa ibounai be 99, to lagani 1960 ai, pablisa edia namba be ia bada daekau 800 mai kahana! Unai negai lau idia abia hidi Betele dekenai do lau gaukara totona. Lagani 1961 ai, lau moale Basileia Hesiai Gaukara Sikuli ena hadibaia gaukarana lau karaia. Kongrigeisen ena elda ibounai 40 bona spesel painia taudia dekenai treinini ai henia. January 1962 ena hebouhebou ai, unai gabu ai, idia hegeregere maduna idia huaia tadikaka ai hagoadaia edia haroro gaukara idia habadaia totona, bona haida be spesel painia taudia ai idia lao. Unai be nega maorona ai ia vara, badina dagedage be ia bada.

January 23, 1962 ai, hebouhebou murinai, misinari tauna Andrew D’Amico bona lau be brens ofesi dekenai ai idia dogoatao, bona January 8, 1962 ena Awake! ibounai (French gado ai), idia abidia lao. Unai Awake! ese French ena niuspepa ai Haiti dekenai idia karaia meamea karadia ena ripoti ia herevalaia. Haida be unai hereva idia ura henia lasi bona idia gwau unai atikol be brens dekenai ai torea. Wiki haida murinai, misinari taudia be edia tano dekenai idia siaidia lou. * To unai gabu ai idia noho tadikaka be edia gaukara idia hadokoa lasi. Hari, lau be idia ida lau moale hebou badina idia haheauka bona edia abidadama be ia goada noho. Danu New World Translation of the Holy Scriptures be hari edia Haitian Creole ai idia abia​—unai be guna ai nihilaia gauna.

Haiti ai lau painia murinai, lau idia abia hidi Central African Republic ai misinari gaukara lau karaia totona. Gabeai, lau abia hahenamo be unuseniai loaloa gaukara ena ovasia ai lau lao bena murinai brens ovasia gaukara lau karaia.

Unai negadiai, Kingdom Hall momo be kurukuru amo idia karaia. Bona lau be uda dekenai au gogoa bona kurukuru amo guhi karaia dalana lau dibaia. Raka hanai taudia idia itaia lau hekwarahi unai gaukara matamatana lau karaia totona. Unai ese tadikaka ia hagoadadia haginia gaukarana idia goadalaia bona sibona edia Kingdom Hall idia hanamodia totona. Dubu gunalaia taudia ese ai idia kirikirilaia badina edia dubu be mai edia tini guhidia to ai be lasi. Unai ese ai ia koua lasi, emai Kingdom Hall edia guhi be kurukuru amo ai karaia totona. Bangui siti ai lai goadana ta ia vara murinai, unai taudia ese ai idia kirikirilaia lou lasi. Unai lai ese dubu ta ena guhi ia kokia bona negea diho dala badana dekenai. To emai Kingdom Hall ena guhi, kurukuru amo ai karaia gauna, be ia kokia lasi. Basileia gaukarana ai karaia namonamo totona, hua faiv sibona lalonai brens ofesi matamatana bona misinari rumana ta ai haginia. *

Lagani 1976 ai, Central African Republic dekenai Basileia gaukarana idia taravatua, bona lau idia siaia lao N’Djamena siti, Chad kahirakahira. To moale gauna be, Happy lau davaria, spesel painia taihu goadana ta, ia be Cameroon amo. April 1, 1978 ai, ai headava. Unai hua tamona ai, tuari ia matamaia, bona ai momo be ai heau lao siti ena saut kahanai. Tuari ia ore murinai, ai giroa bona ai davaria emai ruma be tuari oreana edia hedikwota ai idia halaoa. Danu emai litrisa, Happy ena wedin dres bona emai wedin harihari gaudia ai haboioa. To emai imana ai atoa diho lasi. Ai do mauri noho bona emai hesiai gaukara ai habadaia.

Lagani rua bamona murinai, Central African Republic ai idia atoa taravatu idia kokia. Bena ai giroa lou bona loaloa gaukara ai karaia. Emai ruma be basi (van) ta mai ena lokua bedi danu, ranu daramu ta (200 L), gas frisa ta, bona gas stouv ta. Laolao be mai ena hekwarahi. Nega ta ai, nega 117 bamona ai stopu bona pulisi be ai idia sekea.

Nega momo dina ena siahu be ia daekau 50 digri bamona (122 Fahrenhiet). Hebouhebou negadiai, nega haida bapatiso totona ranu ai davaria be auka. Unai dainai tadikaka be idia kakoro sinavai amo tano idia geia bona ranu sisina be uaina daramu lalonai idia haboua, bapatiso idia karaia totona.

Lagani 1980 ai Nigeria dekenai ai idia siaia lao. Unuseniai, lagani rua mai kahana, brens matamata haginia gaukarana ai durua. Tadikaka ese sitori rua ruma badana ta idia hoia, idia kokia bona emai gabu ai idia haginia totona. Daba ta ai, ruma kokia gaukarana lau durua totona ruma ena ataiai momokani lau daekau. Adorahi kahanai, lau daekau gabuna amo lau diho. To ruma ena kohu haida idia kokia, bona aena atoa gabuna be lasi dainai, ruma amo lau moru. Toana be bero badana lau abia, to X-ray lau abia bona doketa ese lau ia sekea murinai, Happy ia hamaoroa: “Oi laloa momo lasi. Ena joini gabudia haida sibona ia makohia bona do ia NAMO reana wiki ta o haida murinai.”

Lagani 1986 ai, Côte d’Ivoire dekenai ai lao, unuseni loaloa gaukarana ai karaia. Lau laloa lasi lagani haida murinai Burkina be emai noho gabuna ai do ia lao.

Lagani 1956 ai Canada lau rakatania, to 2003 ai, lagani 47 idia ore murinai lau bona Happy be Canada Betele dekenai ai giroa lou. Ai be Canada sitisen taudia, to ai mamia ai be Africa amo.

Bena 2007 ai, egu mauri lagani be 79 neganai, Africa dekenai ai giroa lou! Ai idia siaia lao Burkina Faso dekenai, unuseniai Tano Komiti ena memba ta ai lau lao. Bena gabeai unai ofesi be rimout trensleisen ofesi ai ia lao Benin brens henunai, bona August 2013 ai, Benin ena Betele dekenai ai idia siaia lao.

Ena be egu tauanina ia goada lasi, to haroro gaukara lau laloa bada. Idia hanaia laganidia toi ai, elda taudia bona egu adavana be mai lalokau ida edia heduru karana dainai, egu Baibel Student taudia rua, Gédéon bona Frégis edia bapatiso lau itaia. Idia be hari mai ura bada ida Iehova idia hesiai henia.

Unai nega ai, lau bona egu adavana idia siaia lao South Africa ena brens dekenai, unuseniai Betele famili ese tauanina durua gaudia amo lau idia naria. Africa tanodia ai South Africa be egu hesiai gaukara lau karaia tano namba 7. Bena October 2017 ai, hahenamo ta ai abia. Ai be Warwick, New York ai, hedikwota ena dedikeisen totona ai lao. Unai dina ai laloaboio diba lasi!

Lagani 1994 Yearbook ena rau 255, ia gwau: “Lagani momo lalonai mai haheauka ida umui gaukara taudia ibounai, ai hagoadaia: ‘Umui goada bona emui imana do umui atoa diho lasi, badina emui gaukara ena ahuna namona do umui abia.’​—2 Siv. 15:7 NWT.” Lau bona Happy be mai lalogoada ida unai sisiba ai badinaia bona ma haida ai hagoadaia unai bamona idia karaia totona.