1. Isaia ese Iesu dekenai dahaka peroveta herevana ia gwauraia, bona dahaka dainai unai ese ita ia hagoadaia?

ISAIA be ena peroveta herevana amo Lohiabada Iesu Keriso ia herevalaia karana ese iseda lalona ia hanamoa bona hagoadaia. Isaia ia peroveta ia gwau, Iesu be “ena matana ese ia itaia gaudia amo hahemaoro do ia karaia lasi, eiava ia kamonai herevadia sibona amo matahakani ia henia lasi.” Ia be “mai maoromaoro ida ladana maragi taudia do ia hahemaoro henia.” (Isa. 11:3, 4, NWT) Dahaka dainai unai ese ita ia hagoadaia? Badina inai tanobada be sibona laloa bada bona ta inai henia kava karana amo ia honu. Ita ibounai be hahemaoro goeva ia karaia tauna ita ura henia, badina ia be toana amo ita do ia hahemaoro henia lasi!

2. Iesu be ita ia hamaoroa dahaka ita karaia totona, bona inai stadi ai dahaka do ita herevalaia?

² Dina ta ta ai, taunimanima dekenai hahemaoro hereva idauidau ita gwauraia. Iesu be hahemaoro goeva ia karaia diba, to ita be goevadae lasi taudia dainai, hahemaoro goeva ita karaia diba lasi. Badina matana amo ita itaia gaudia ese ita idia hakaua kerere. Unai dainai, Iesu be tanobada ai ia noho neganai, ia gwau: “Namo lasi ta ena toana amo ia umui hahemaoro henia, to mai maoromaoro ida ia do umui hahemaoro henia.” (Ioa. 7:24) Unai ese ia hahedinaraia goevagoeva, Iesu ia ura ia bamona do ita kara bona haida edia toana amo idia ita hahemaoro henia lasi. Inai stadi ai, nega momo taunimanima edia matana amo idia itaia gaudia, ese idia ia hakaua kerere gaudia toi do ita herevalaia: bese, taga, bona mauri lagani. Unai gaudia dekenai, Iesu ena oda herevadia ita badinaia diba daladia do ita herevalaia.

3, 4. (a) Dahaka gaudia idia vara dainai aposetolo Petero ena lalohadai Idau Bese taudia dekenai ia haidaua? (Laulau ginigunana herevalaia.) (b) Iehova ese Petero ia durua dahaka diba matamata ia lalopararalaia totona?

³ Mani ita laloa, Aposetolo Petero be Kaisarea dekenai, Idau Bese tauna Korenelio ena ruma dekenai idia boiria neganai, ia be lalohadai idauidau ia abia. (Kara 10:17-29) Iena nega ai idia noho Iuda taudia bamona, Petero ia tubu daekau neganai, ia abia dae Idau Bese taudia be goeva lasi. To, Petero be idia vara gaudia haida dainai, ena lalohadai ia haidaua. Hegeregere, Petero be matahanai ta ia itaia. (Kara 10:9-16) Petero be dahaka ia itaia? Ia itaia gau ta ena toana be dabua badana ta bamona be guba amo ia diho, bona unai dabua badana be goevadae lasi animal idauidau amo ia honu, bena guba amo gado ta ese ia oda henia, ia gwau: “Petero e, oi toreisi, oi alaia bona oi ania!” Nega toi Petero ia ura lasi. Nega ta ta ia ura lasi neganai, guba amo gado ta ese ia hamaoroa, “oi gwau lasi Dirava ese ia hagoevaia vadaeni gaudia be idia miro.” Petero be matahanai ia itaia murinai ia toreisi, bona unai gado ese ia dekenai ia ura hahedinaraia gauna ena anina ia laloa noho lalonai, Korenelio ese ia siaia taudia idia ginidae. Petero be lauma helaga amo hakaua herevana ia abia murinai, maoromaoro idia ia bamoa bona Korenelio ena ruma dekenai idia lao.

⁴ Bema Petero be toana amo ia itaia gaudia sibona dekenai hahemaoro ia karaia, reana Korenelio ena ruma lalonai do ia vareai lasi. Iuda taudia be Idau Bese taudia edia ruma lalonai idia vareai kava lasi. To, dahaka dainai Petero be maoromaoro ia lao ena be inai henia kava karana ia noho? Petero be ia itaia matahanai bona lauma helaga amo heduru ia abia karana ese ia hagoadaia bada. Petero be Korenelio ena hereva ia kamonai murinai, unai ese ena kudouna ia hamarerea bona lauma helaga ena heduru amo, ia gwau: “Hari lau laloparara momokani, Dirava be taunimanima edia toana ia laloa lasi, to bese ibounai lalonai ia idia gari henia bona kara maoromaoro idia karaia taudia be ia ese ia abia dae.” (Kara 10:34, 35) Petero dekenai unai be diba matamata​—unai diba be mai anina bada! Edena dala ai unai diba matamata ese toana laloa lasi karana dekenai Keristani taudia ia hagoadaia?

5. (a) Iehova ia ura Keristani taudia ibounai be dahaka idia lalopararalaia? (b) Ena be hereva momokani ita diba, to edena kara be iseda kudouna ai ia noho diba?

⁵ Iehova be Petero amo, Keristani taudia ibounai ia durua do idia laloparara Ia be toana ia laloa lasi. Iehova be taunimanima edia bese, kastom, tano, iduhu o gado idauidau, ia laloa lasi. To, tau o hahine ta be Dirava ia gari henia bona kara maoromaoro ia karaia neganai, ia ese ia abia dae. (Gal. 3:26-28; Apok. 7:9, 10) Oi diba, unai be momokani. To bema oi tubu daekau tano o ruma be ta inai henia kava karana amo ia honu, be edena bamona? Reana do oi laloa oi be ta ena toana oi laloa lasi, to emu kudouna lalonai ta inai henia kava karana ia noho diba. Petero be Iehova ena kara​—toana laloa lasi karana unai​—ia hahedinaraia, to gabeai ta inai henia kava karana ia hahedinaraia. (Gal. 2:11-14) Edena dala ai Iesu ita kamonai henia bona ta ena toana amo ia ita hahemaoro henia lasi?

6. (a) Dahaka ese ita ia durua diba iseda kudouna amo ta inai henia kava karana ita kokia totona? (b) Elda ta ena ripoti ese dahaka ia hahedinaraia?

⁶ Namona be Dirava ena Hereva amo iseda kara ita tahua namonamo unai amo do ita itaia bema ta inai henia kava lalohadai o hemami ia noho eiava lasi. (Sal. 119:105) Danu, haida edia heduru ita abia be namo badina ita dekenai ta inai henia kava karana idia itaia diba, ena be ita sibona ese unai ita itaia diba lasi. (Gal. 2:11, 14) Sedira unai kara be iseda kudouna ai idia noho daudau, to unai ita diba lasi. Mani inai haheitalai ita laloa, elda ta be ful-taim hesiai gaukara idia karaia headava ta edia ripoti ia gwauraia. Unai tau be nega momo haida ese idia laloa maragi besena amo ia mai. To momokani, elda ia diba lasi ia sibona be unai bese dekenai inai henia kava karana ena lalohadai ia abia noho. Iena ripoti ai, unai tau totona gau namodia momo ia gwauraia; to, ripoti dokonai, ia gwau: “Herevana ia be unai bese amo ia mai, to iena kara bona mauri dalana ese momo ia durua idia laloparara ena be ta be unai bese amo ia mai, to unai ese ia hahedinaraia lasi unai bese amo ia mai dainai ena mauri dalana be namo lasi.” Unai hereva ena anina oi lalopararalaia, a? Herevana dahaka maduna idauidau ita huaia, namona be sibona iseda kara ita tahua namonamo bona mai ura ida heduru ita abia unai amo iseda kudouna ai, ta inai henia kava karana ita lalopararalaia diba. Dahaka gau ma ta ita karaia diba?

7. Edena dala ai ita hahedinaraia iseda lalokau karana ita habadaia?

⁷ Bema iseda lalokau karana ita habadaia, ta do ita inai henia kava lasi. (2 Kor. 6:11-13) Oi be emu bese, gabu, tano, iduhu, o gado tamona taudia sibona oi tura henidia, a? Bema oibe, namona be ma haida danu oi tura henidia. Oi be noho dala idauidau taudia oi boiria, oi ida idia haroro o emu ruma dekenai idia oi boiria aniani o hebamo totona, a? (Kara 16:14, 15) Bema oibe, emu kudouna be lalokau amo do ia honu bona ta inai henia kava karana do oi laloa lasi. To haida edia toana amo idia ita hahemaoro henia kava daladia haida idia noho. Mani taga maurina ita herevalaia.

8. Levitiko 19:15 hegeregerena, taga o ogogami maurina ese edena bamona iseda hahemaoro karana ia haidaua diba?

⁸ Taga maurina be ma haida ita laloa karana ia haidaua diba dalana ta. Levitiko 19:15 [NWT] ia gwau: “Namo lasi ogogami tauna umui hebogahisi henia badina ia be ogogami eiava namo lasi taga tauna umui matauraia bada. Namona be mai hahemaoro goevana ida emui varavara umui hahemaoro henia.” To, ta ena taga o ogogami maurina ese edena dala ai iseda laloa dalana ia haidaua diba?

9. Solomona ese dahaka sivarai ia torea, bona ita dekenai dahaka ia hadibaia?

⁹ Lauma helaga ese Solomona ena lalona ia hamarerea dainai, goevadae lasi taudia totona sivarai ta ia torea. Aonega Herevadia 14:20 [NWT], ia gwau: “Ogogami tauna be ena dekena taudia ese idia inai henia, to taga tauna ena turadia be momo herea.” Unai siri ese ita dekenai dahaka ia hadibaia? Bema ita naria namonamo lasi, do ita ura taga tadikaka ita tura henidia bona idia ogogami tadikaka do ita tura henidia lasi. Dahaka dainai haida be edia taga maurina dainai ita hahemaoro henidia karana be maoro lasi?

10. Iamesi ese dahaka hekwakwanai ia herevalaia?

¹⁰ Bema haida edia taga maurina dainai idia ita hahemaoro henia, ita ese kongrigeisen hapararaia karana ita havaraia diba. Hahediba tauna Iamesi, ese ita ia hadibaia unai bamona hekwakwanai ese kongrigeisen ginigunadia haida ia hapararaia. (Iamesi 2:1-4 duahia.) Namona be ita naria namonamo unai bamona lalohadai ese iseda kongrigeisen ia hapararaia lasi totona. Edena dala ai ta ena toana amo hahemaoro karaia karadia ita dadaraia diba?

11. Edena dala ai ta ena kohu ese iena hetura karana Iehova ida ia hadikaia diba? Herevalaia.

¹¹ Iehova ese iseda tadikaka ia laloa bamona idia ita laloa be namo. Iehova be ta ena taga o ogogami maurina ia laloa lasi. Iseda hetura karana Iehova ida do ia goada diba, herevana iseda kohu be momo eiava lasi. Unai be momokani badina Iesu ia gwau, “Taga tauna be guba Basileia lalonai ia vareai be auka,” to ia gwau lasi do ia vareai diba lasi. (Mat. 19:23) Danu Iesu ma ia gwau: “Umui ogogami taudia umui moale, badina Dirava ena Basileia do umui abia.” (Luka 6:20) To unai ese ia hahedinaraia lasi ogogami taudia sibona be hahenamo do idia abia bona Iesu ena hahediba herevana idia abia dae. To, ogogami taudia momo be unai hahediba herevana idia abia dae lasi. Unai anina be, ta be ena taga o ogogami maurina dainai, Iehova ia tura henia karana dekenai ia ita hahemaoro henia diba lasi.

12. Baibel ese taga bona ogogami taudia dekenai dahaka ia hadibaia?

¹² Ita moale badina ita be mai iseda tadikaka bona taihu momo, idia haida be taga bona ogogami, idia be mai kudouna ibounai ida Iehova idia lalokau bona hesiai henia. Baibel ese idia taga taudia ia hadibaia “idia dika haraga kohu do idia abidadama henia lasi, to Dirava do idia abidadama henia.” (1 Timoteo 6:17-19 duahia.) Danu Baibel ese Dirava ena taunimanima ibounai, taga bona ogogami, ia hagoadaia moni ura henia bada karana dekenai idia naria namonamo totona. (1 Tim. 6:9, 10) Oibe, bema Iehova ese iseda tadikaka ia itaia bamona idia ita itaia, idia dekenai ia noho gaudia o idia noho lasi gaudia ese iseda lalona do ia veria lasi idia ita hahemaoro henia totona. To ta ena mauri lagani be edena bamona? Unai be dala maorona ta ita hahemaoro henia totona, a? Mani ita itaia.

13. Baibel ese buruka taudia matauraia karana dekenai dahaka ia hadibaia?

¹³ Baibel ese hanaihanai ita ia hadibaia buruka taudia dekenai hemataurai karana ita hahedinaraia totona. Levitiko 19:32 ia gwau: “Tau buruka edia vairanai do umui toreisi, bona buruka taudia ibounai do umui matauraia. Umui emui Dirava garina do umui gari.” Danu, Aonega Herevadia 16:31 [NWT] ese ita ia hadibaia “bema kara maoromaoro ia badinaia tauna ena huina be kurokuro, unai be ena hairai.” Ma danu, Paulo be Timoteo ia hadibaia tau badana do ia hereva auka henia lasi, to ia hereva henia, iena tamana bamona. (1 Tim. 5:1, 2) Ena be Timoteo be gau haida dekenai mai ena maoro, to tau badadia dekenai hebogahisi bona hemataurai karana ia hahedinaraia.

14. Edena nega maorodia ai, tau badana ta ita sisiba henia diba?

¹⁴ To, unai hakaua herevana be edena bamona do ita laloa? Hegeregere, bema tau badana ta be mai ura ida kara dika ia karaia o Iehova ia ura lasi karana ta ia durua, unai be maoro ita abia dae totona, a? Iehova be toana amo ta do ia hahemaoro henia lasi bona mai ura ida kara dika ia karaia tauna dekenai maoro do ia henia lasi herevana ia be tau badana. Mani Isaia 65:20 [NWT] ai, ia noho hakaua herevana ita laloa, ia gwau: “To mauri lagani 100 ai ia mase tauna, do idia gwauraia kara dika tauna.” Unai bamona hakaua herevana be Esekiela ena matahanai lalonai ia hedinarai. (Ese. 9:5-7) Unai dainai, namona be Mauri Noho Hanaihanai Tauna, Iehova Dirava dekenai hemataurai do ita hahedinaraia noho. (Dan. 7:9, 10, 13, 14) Bema unai ita karaia, do ita gari lasi ta ita sisiba henia totona herevana ena mauri lagani be bada o maragi.​—Gal. 6:1.

15. Aposetolo Paulo ese tadikaka matamatadia dekenai hemataurai ia hahedinaraia karana amo dahaka ita dibaia?

¹⁵ Kongrigeisen ai idia noho tadikaka matamatadia be edena bamona? Edena bamona idia oi laloa? Aposetolo Paulo be tau matamata Timoteo dekenai, ia gwau: “Namo lasi ta ese oi ia laloa maragi badina oi be matamata sibona. To, namona be abidadama taudia dekenai emu hereva, kara, lalokau, abidadama, bona kara goeva ai oi be haheitalai namona.” (1 Tim. 4:12) Paulo be unai hereva ia torea neganai, reana Timoteo ena mauri lagani be 30 bamona. To, Paulo ese Timoteo ia abia hidi maduna metaudia ia naria totona. Unai sisiba ena badina ita diba be gau badana lasi. To ita dibaia gauna be, namo lasi tadikaka matamatadia be edia mauri lagani dainai idia ita hahemaoro henia. Danu ita laloatao, iseda Lohiabada Iesu ena mauri lagani be 30 bamona neganai, tanobada ai ena hesiai gaukara ia karaia.

16, 17. (a) Edena dala ai elda taudia idia diba bema tadikaka ta be ia hegeregere hesiai o elda tauna ai ia lao totona? (b) Edena dala ai sibona eda lalohadai o kastom karana be Baibel ena Hereva hegeregerena lasi?

¹⁶ Reana kastom haida ai, tau matamatadia idia laloa maragi. Unai dainai, kongrigeisen ai elda taudia be reana do idia ura lasi idia hegeregere maduna idauidau idia huaia tadikaka matamatadia dekenai hesiai o elda maduna idia henia totona. Namona be elda taudia ibounai idia laloatao, Baibel ese mauri lagani ia gwauraia lasi ta be hesiai tauna o elda ai ia lao totona. (1 Tim. 3:1-10, 12, 13; Tito 1:5-9) Bema elda ta be ena kastom dainai taravatu ta ia atoa, iena kara be Baibel hegeregerena lasi. To namona be elda taudia be tau matamatadia edia kara idia tahua namonamo totona, sibona edia lalohadai o kastom dekenai idia tabekau lasi, to Dirava ena Hereva idia badinaia.​—2 Tim. 3:16, 17.

¹⁷ Baibel ena hereva ida ia hegeregere lasi kastom idauidau, ese idia hegeregere maduna idia huaia tadikakadia ia koua dalana mani ita laloa. Tano ta ai, ena gaukara ia diba momo hesiai tauna ta dekenai maduna metaudia idia henia. Ena be ena kongrigeisen ai, elda taudia idia lalotamona unai tadikaka matamata be Baibel ese ia gwauraia elda taudia edia taravatu ia badinaia, to elda maduna idia henia lasi. Elda burukadia haida idia laloa unai tadikaka be matamata dainai ia hegeregere lasi elda ai ia lao totona. Madi, unai tadikaka be unai bamona idia laloa dainai, unai maduna ia abia lasi. Herevana unai be sivarai tamona, to ripoti haida ese idia hahedinaraia tanobada ena kahana idauidau ai, unai bamona lalohadai ese momo ia hahekwakwanaia. Unai dainai mai anina bada gauna be, Baibel ena Hereva dekenai ita tabekau be namo to sibona eda lalohadai o kastom dekenai lasi! Unai dala amo Iesu ita kamonai henia bona ta ena toana amo ia do ita hahemaoro henia lasi.

18, 19. Bema Iehova ese haida edia toana ia laloa lasi bamona ita laloa, dahaka ita karaia be namo?

¹⁸ Herevana ita be goevadae lasi, to Iehova ese haida edia toana ia laloa lasi karana amo diba ita abia. (Kara 10:34, 35) To nega ibounai ita gaukara goada noho bona hanaihanai Dirava ena Hereva amo sibona ita hadibaia loulou. Unai hadibaia herevadia ita badinaia neganai, ita ese Iesu ena oda​—ta ena toana amo ia ita hahemaoro henia lasi karana do ita badinaia noho.​—Ioa. 7:24.

¹⁹ Kahirakahira iseda King, Iesu Keriso, be taunimanima ibounai do ia hahemaoro henia, ena matana ese ia itaia gaudia amo lasi, eiava ia kamonai herevadia sibona amo lasi, to mai maoromaoro ida idia do ia hahemaoro henia. (Isa. 11:3, 4) Ita ibounai be unai nega namona ita naria noho!