1. Daidia be Filipi dekenai kongrigeisen ta idia hamatamaia?

APOSETOLO Paulo, Sila, Luka bona Timoteo be Roma ena siahu henunai ia noho hanuana, Filipi dekenai idia ginidae neganai, idia davaria taunimanima momo be Basileia ena sivarai namona idia ura henia. Unai gaukara goada tadikaka foa ese kongrigeisen ta idia hamatamaia bona hahediba taudia ibounai idia hebou matamaia, reana unai be heabidae hahinena ladana Lidia ena ruma ai.​—Kara 16:40.

2. Kongrigeisen taudia be dahaka hahetoho idia davaria?

² Idia hamatamaia kongrigeisen matamata be hahetoho ta ia davaria. Satani be hereva momokani idia inai henia taudia ia gaukaralaia mai dagedage ida, abidadama Keristani taudia edia haroro gaukara idia koua totona. Paulo bona Sila idia guia, au amo idia botadia, bona dibura ruma ai idia atodia. Dibura amo idia ruhaia murinai, idia ese hahediba taudia matamatadia idia vadivadi henia bona idia hagoadaia. Gabeai, Paulo, Sila bona Timoteo be unai hanua idia rakatania to Luka be ia noho. Hari, unai kongrigeisen matamata be dahaka do idia karaia? Iehova ena lauma helaga ena heduru amo idia ese mai goada ida Iehova idia hesiai henia. (Fili. 2:12) Paulo be edia gaukara namona dainai ia moale bada!

3. Filipi 1:9-11 ai, Paulo be dahaka totona ia guriguri?

³ Lagani ten bamona murinai, Paulo ese Filipi kongrigeisen dekenai revareva ta ia torea. Unai revareva oi duahia neganai, do oi itaia Paulo ese ena tadikaka ia lalokau henia bada. Ia gwau: “Lau ura dikadika umui ibounai lau itaia, bona umui dekenai lau hahedinaraia lalokauna be Keriso Iesu ese ia hahedinaraia  lalokauna bamona.” (Fili. 1:8) Danu, idia totona ia guriguri. Iehova ia noia idia do ia durua edia lalokau idia habadaia noho, mai anina bada gaudia idia diba, kerere lasi ida do idia noho, ma haida do idia hahekwakwanaia lasi, bona kara maoromaoro ena huahua do idia hahedinaraia. Momokani, hari inai negai, ita ese Paulo ena hagoadaia herevadia amo namo ita abia diba. (Filipi 1:9-11 duahia.) Inai atikol ai ita ese Paulo ia herevalaia point ta ta do ita itaia, bona ita badinaia diba daladia do ita herevalaia.

4. (a) Ioane Ginigunana 4:9, 10 ena hereva bamona, edena dala ai Iehova ese ita dekenai ena lalokau ia hahedinaraia? (b) Edena dala ai Dirava ita lalokau henia diba?

⁴ Iehova ese ita ia lalokau henia bada dainai ena Natuna ia siaia tanobada dekenai iseda kara dika totona ia mase. (1 Ioane 4:9, 10 duahia.) Dirava ena lalokau hereadaena dainai ia ita lalokau henia be namo. (Roma 5:8) Edena dala ai Dirava ita lalokau henia diba? Unai henanadai ena haere be Iesu ese Farisea tauna dekenai ia henia haere amo ita dibaia. Ia gwau: “Namona be Iehova emu Dirava oi lalokau henia mai emu kudouna ibounai, mai emu mauri ibounai, bona mai emu darana ibounai ida.” (Mat. 22:36, 37) Ita ura mai kudouna ibounai ida Dirava ita lalokau henia. Bona ita ura dina ta ta ai iseda lalokau Ia dekenai ita habadaia. Paulo ese Filipi tadikaka ia hadibaia namona be edia “lalokau do ia bada ia lao noho.” Dahaka ita karaia diba iseda lalokau Dirava dekenai ita hagoadaia totona?

5. Edena dala ai iseda lalokau Dirava dekenai ia goada diba?

⁵ Dirava ita lalokau henia totona, ia ita dibaia be namo. Baibel ia gwau: “Lalokau ia hahedinaraia lasi tauna be Dirava ia diba lasi, badina Dirava be lalokau.” (1 Ioa. 4:8) Aposetolo Paulo ia hahedinaraia iseda lalokau Dirava dekenai do ia goada, bema Ia amo ‘diba maoromaoro bona laloa kehoa ibounai’ ita abia. (Fili. 1:9) Baibel ita stadilaia matamaia neganai Dirava lalokau henia karana ita dibaia matamaia, ena be iena kara namodia haida ita do dibaia lasi. Bona Iehova ita dibaia noho lalonai, iseda lalokau ia dekenai do ia goada ia lao. Unai dainai iseda mauri lalonai Baibel stadilaia hanaihanai karana bona laloa dobu karana ita atoa guna be namo!​—Fili. 2:16.

6. Ioane Ginigunana 4:11, 20, 21 ena hereva bamona, daidia ita lalokau henia danu be namo?

⁶ Dirava ena lalokau bada karana ese ita ia durua iseda tadikaka taihu ita lalokau henia totona. (1 Ioane 4:11, 20, 21 duahia.) Reana do ita laloa ia auka lasi iseda tadikaka taihu ita lalokau henia totona. Badina ita ibounai ese Iehova ita tomadiho henia, bona ita gaukara goada ena kara namodia ita tohotohoa totona. Ita ese Iesu ena haheitalai ita tohotohoa, badina ita ia lalokau henia bada dainai ena mauri ia henia. To, nega haida ia auka ta ta lalokau henia karana ena hahegani ita badinaia totona. Mani Filipi kongrigeisen taudia edia haheitalai ita laloa.

7. Paulo ese Euodia bona Sunutuke dekenai ia henia sisiba amo dahaka ita dibaia?

⁷ Euodia bona Sunutuke be aposetolo Paulo ida idia “gaukara hebou” taihu goadadia rua. To, gau ta ia vara dainai idia ruaosi idia lalotamona lasi bona edia hetura karana ia dika. Paulo ese unai taihu rua idia noho kongrigeisen dekenai revareva ia siaia neganai, ia ese Euodia bona Sunutuke edia ladana ia torea, bona idia ia sisiba henia ‘idia lalotamona’ totona. (Fili. 4:2, 3) Danu Paulo ia laloa kongrigeisen taudia ibounai ia hadibaia be namo. Unai dainai ia gwau: “Gau ibounai umui karaia neganai, umui maumau lasi bona hepapahuahu lasi.” (Fili. 2:14) Momokani, Paulo ena  sisiba herevadia ese unai abidadama taihu rua bona kongrigeisen taudia ibounai ia durua ta ta lalokau henia karana idia hahedinaraia totona.

8. Dahaka dainai do ia auka iseda tadikaka taihu ita lalokau henia totona, to edena dala ai unai ita hanaia diba?

⁸ Euodia bona Sunutuke bamona, nega haida iseda tadikaka taihu edia kerere ita laloa momo dainai reana do ia auka idia ita lalokau henia totona. Ita ibounai be dina ta ta ai kerere ita karaia. Bema ma haida edia kerere ita laloa momo, do ia auka idia ita lalokau henia totona. Hegeregere, bema tadikaka ta be ita ida Kingdom Hall do ita hagoevaia to ia laloaboio, reana ita badu diba. Bema iseda tadikaka ia karaia kerere ma haida ita laloa noho, iseda badu do ia habadaia bona ia do ita lalokau henia lasi. Bema oi dekenai unai bamona hekwakwanai ta ia vara, namona be inai oi laloa: Iehova ese iseda kerere bona iseda tadikaka taihu edia kerere ia itaia. Herevana ita be mai iseda kerere, to Iehova ese ita ibounai ia lalokau henia. Unai dainai, namona be Iehova ena lalokau karana ita tohotohoa bona iseda tadikaka taihu edia kara namodia sibona ita laloa. Bema ita gaukara goada iseda tadikaka taihu ita lalokau henidia, lalotamona ai ita noho diba.​—Fili. 2:1, 2.

9. Paulo ese Filipi tadikaka dekenai edena “mai anina bada gaudia” haida ia gwauraia?

⁹ Lauma helaga ena heduru amo Paulo ese Filipi tadikaka​—bona Keristani taudia ibounai​—ia hadibaia namona be ‘mai anina bada gaudia do idia diba.’ (Fili. 1:10) Unai mai anina bada gaudia haida be hegeregere, Iehova ese ena ladana do ia hahelagaia, iena ura do ia hagugurua, bona kongrigeisen be maino bona lalotamona ai do ia noho. (Mat. 6:9, 10; Ioa. 13:35) Bema iseda mauri ai unai gaudia ita laloa bada, ita hahedinaraia Iehova ita lalokau henia.

10. Dahaka ita karaia diba kerere lasi taudia bamona ita noho totona?

¹⁰ Danu, Paulo ia gwau namona be “kerere lasi” ida ita noho. Unai ese ia hahedinaraia lasi ita be do ita goevadae momokani Iehova Dirava bamona. To, Iehova ese ita be kerere lasi taudia bamona do ia laloa bema ita gaukara goada iseda lalokau ita habadaia bona mai anina bada gaudia ita laloa bada. Iseda lalokau karana ita hahedinaraia dalana ta be ma haida ita hahekwakwanaia lasi.

11. Dahaka dainai ma haida ita hahekwakwanaia lasi be namo?

¹¹ Ma haida hahekwakwanaia lasi ena sisiba herevana ita laloa bada be namo. Edena dala ai ta ita hahekwakwanaia diba? Reana ita abia hidi moale karana, iseda dabua toana, eiava ita karaia moni gaukara ese ta ia hahekwakwanaia diba. Reana do ita laloa ita karaia gaudia be kerere lasi. To, bema iseda abia hidi ese ma ta ena lalomamina ia hadikaia bona ia hahekwakwanaia, unai be kerere badana. Iesu ia gwau bema iseda tadikaka ta ita hahekwakwanaia, do ia namo bema iseda aiona dekenai nadi badana ta do idia kwatua bona davara dekenai ita do idia negea diho!​—Mat. 18:6.

12. Painia gaukara idia karaia headava tau bona hahine ta edia haheitalai amo dahaka ita dibaia?

¹² Painia gaukara idia karaia headava tau bona hahine ta ese Iesu ena sisiba idia badinaia dalana mani ita laloa. Idia be vanegai sibona idia bapatiso headava tau bona hahine ta ida kongrigeisen tamona ai idia gaukara hebou. Unai bapatiso matamata headava tau bona hahine idia tubu daekau ruma besedia ai gau momo idia taravatua. Unai dainai idia abia dae Keristani taudia ese muvi idia itaia lasi be namo, herevana unai be muvi namodia. Idia kamonai unai painia taudia rua be  muvi ta idia itaia neganai, idia moale lasi. Unai dainai unai painia taudia be muvi idia itaia lou lasi ela bona unai bapatiso matamata headava tau bona hahine be edia lalomamina idia hadibaia namonamo, bona dahaka be maoro bona kerere edia idau idia diba. (Heb. 5:14) Unai painia rua be sibodia edia ura idia dadaraia karana amo idia hahedinaraia, idia be edia tadikaka bona taihu matamata idia lalokau henia edia hereva sibona amo lasi to edia kara amo danu.​—Roma 14:19-21; 1 Ioa. 3:18.

13. Edena dala ai ita gwauraia hereva kererena ese ta ia doria diba ia kara dika totona?

¹³ Ma ta ita hahekwakwanaia diba dalana ta be ia ita doria kara dika ta ia karaia totona. Edena dala ai unai ia vara diba? Mani inai oi laloa. Baibel stiuden ta be lagani momo ia hekwarahi murinai, bia inua karana ia biagua diba. Ia laloparara bia do ia inua lou lasi be namo. Iena mauri lalonai gau haida ia haidaua bona bapatiso ia abia. Gabeai tadikaka ta ese ia invait moale hebou ta dekenai bona bia ta ia henia bena ia gwau: “Hari oi be Keristani tauna; Iehova ena lauma helaga oi abia vadaeni. Lauma helaga ena huahua ta be sibona biagua karana. Bema oi be sibona oi biagua diba, bia momo do oi inua lasi.” Mani oi laloa, bema unai tadikaka matamatana ese unai sisiba kererena ia abia dae, bia inua karana do ia manadalaia lou.

14. Edena dala ai iseda Keristani heboudia ese ita ia durua Filipi 1:10 ena hereva ita badinaia totona?

¹⁴ Iseda Keristani heboudia ese ita idia durua dala idauidau ai, Filipi 1:10 ena hereva ita badinaia totona. Ginigunana be,  hebou ai Iehova ese ia laloa bada gaudia ita dibaia. Iharuana be, ita dibaia gaudia badinaia dalana ita diba, unai amo mai kerere lasi ida ita noho. Bona ihatoina be, “ita lalokau heheni bona kara namodia ita karaia.” (Heb. 10:24, 25) Iseda tadikaka taihu ese ita idia hagoadaia neganai, unai ese iseda lalokau karana Dirava bona iseda tadikaka taihu dekenai do ia habadaia. Bema mai iseda kudouna ibounai ida Dirava bona iseda tadikaka taihu ita lalokau henia, do ita gaukara goada ma haida ita hahekwakwanaia lasi totona.

15. Inai hereva “kara maoromaoro ena huahua” ita hahedinaraia ena anina be dahaka?

¹⁵ Paulo ia guriguri goadagoada Filipi tadikaka ese “kara maoromaoro ena huahua” do idia hahedinaraia totona. (Fili. 1:11) Momokani unai “kara maoromaoro ena huahua” be Iehova bona ena taunimanima lalokau henia karana ia herevalaia. Danu, ma haida dekenai Iesu idia abidadama henia karana bona edia helaro ia herevalaia. Filipi 2:15 ai, ia gwau, “tanobada ai, umui be diari bamona umui hedinarai.” Unai hereva be maoro badina Iesu ia gwau ena hahediba taudia be “tanobada ena diari.” (Mat. 5:14-16) Danu ia ese ena hahediba taudia ia hagania ma haida be ‘hahediba taudia ai idia halaoa,’ bona ‘tanobada ena daudau momokani gabudia dekenai, ia do idia gwauraia hedinarai.’ (Mat. 28:18-20; Kara 1:8) Ita ese “kara maoromaoro ena huahua” ita hahedinaraia diba, bema inai mai anina bada gaukarana ita goadalaia.

16. Filipi 1:12-14 ena hereva bamona, ena be hekwakwanai idia vara to edena dala ai iseda diari ita hahedinaraia diba? (Rau 1 ai ia noho laulau itaia.)

¹⁶ Herevana iseda noho dalana be edena bamona, iseda diari ita hahedinaraia diba. Nega haida, gau haida ese sivarai namona harorolaia gaukarana ia koua, to dala ma haida ai ita haroro diba. Hegeregere, Paulo be Roma dekenai  ruma ta ai dibura tauna bamona ia noho neganai, ia ese Filipi tadikaka dekenai ena revareva ia torea. Herevana Paulo be dibura ruma ai ia noho, to unai ese ia koua lasi gadi taudia bona ia idia vadivadi henia taudia ia haroro henia totona. Paulo be unai bamona negadiai ia haroro goadagoada dainai unai ese tadikaka ia hagoadaia “mai gari lasi ida Dirava ena hereva idia harorolaia” totona.​—Filipi 1:12-14; 4:22 duahia.

17. Edena dala ai tadikaka taihu haida be haroro gaukara idia karaia noho herevana ia auka?

¹⁷ Tadikaka bona taihu momo be Paulo ena gari lasi karana idia tohotohoa. Idia haida be idia noho tanodia ai reana ia auka pablik gabudiai eiava ruma ta ruma ta haroro gaukara idia karaia totona, unai dainai dala ma haida ai sivarai namona idia harorolaia. (Mat. 10:16-20) Unai bamona tanona ai, sekit naria tauna ta ese pablisa ta ta ia hadibaia sibodia edia haroro “teritori” idia karaia, hegeregere edia varavara, dekena taudia, sikuli turadia, gaukara turadia bona edia turadia ma haida idia haroro henia totona. Lagani rua lalonai, unai sekit dekenai idia noho kongrigeisen edia namba ia bada daekau. Reana ita be haroro gaukara idia koua tanona ta ai ita noho lasi. To, iseda tadikaka taihu edia gaukara goada karana amo gau ta ita dibaia: Namona be hanaihanai dala idauidau ai haroro gaukara ita karaia, badina ita diba Iehova ese ita do ia hagoadaia koua gaudia idauidau ita hanaia totona.​—Fili. 2:13.

18. Iseda lalona ita hadaia dahaka ita karaia totona?

¹⁸ Hari inai negai, namona be iseda lalona ita hadaia Paulo ese ena revareva ai Filipi tadikaka dekenai ia torea sisiba ita badinaia totona. Namona be mai anina bada gaudia ita diba, kerere lasi ida ita noho, ma haida ita hahekwakwanaia lasi, bona kara maoromaoro ena huahua ita hahedinaraia. Bema unai bamona ita karaia, iseda lalokau do ia bada ia lao bona iseda lalokau Tamana, Iehova do ita hanamoa.