1. Ita ibounai ita ura iseda varavara be dahaka do idia karaia?

TAIHU ta ladana Pauline * ia gwau: “Hereva momokani lau dibaia matamaia neganai, lau ura egu ruma bese ibounai be lau ida Paradaiso dekenai do ai noho. Lau ura bada egu adavana, Wayne, bona emai natuna mero be lau ida Iehova ai hesiai henia.” Emu varavara haida be Iehova idia do dibaia lasi bona lalokau henia lasi, a? Pauline bamona, reana oi ura emu varavara be oi ida Iehova umui hesiai henia.

2. Inai atikol ai edena henanadai do ita herevalaia?

² Iseda varavara ita doria diba lasi sivarai namona idia abia dae, to idia ita hagoadadia diba, mai kudouna ibounai ida Baibel ena hereva idia laloa bada totona. (2 Tim. 3:14, 15) Dahaka dainai iseda varavara ita haroro henidia be namo? Dahaka dainai idia ita laloa bada? Dahaka ita karaia diba iseda varavara ita durua Iehova idia lalokau henia totona? Bona edena dala ai kongrigeisen taudia ese ita idia durua diba?

3. Petero Iharuana 3:9 ena hereva bamona, dahaka dainai iseda varavara ita haroro henia be namo?

³ Kahirakahira, Iehova ese inai tanobada dikana do ia haorea. To, “mauri hanaihanai idia ura kudou-maoro taudia” sibona be do idia mauri. (Kara 13:48) Ita be iseda nega bona goada ita gaukaralaia iseda komiuniti dekenai ma haida ita haroro henia totona, unai dainai ita ura iseda varavara ita haroro  henidia, bona idia danu be ita ida Iehova idia hesiai henia. Iseda lalokau Tamana, Iehova ia “ura lasi tau ta ia mase, to ia ura taunimanima ibounai idia helalo-kerehai.”​—2 Petero 3:9 duahia.

4. Iseda varavara ita haroro henidia neganai, dahaka dala kererena ita badinaia diba?

⁴ Namona be ita laloatao, bema ita naria namonamo lasi, hahemauri sivaraina be dala maorona eiava dala kererena ai ita harorolaia diba. Hegeregere, reana ita diba lasi tauna be mai manau ida ita haroro henia, to iseda varavara ita haroro henidia neganai reana do ita hereva auka.

5. Iseda varavara ita do haroro henidia lasi neganai, dahaka ita laloatao be namo?

⁵ Reana ita momo be nega ginigunana iseda varavara ita haroro henidia neganai, dala maorona ita badinaia lasi. Aposetolo Paulo ese Keristani taudia ia sisiba henidia, ia gwau: “Namona be hanaihanai mai gado namo ida do umui hereva, damena umui atoa bamona, unai amo do umui diba edena bamona ta ta do umui haere henia.” (Kol. 4:5, 6) Iseda varavara ita hereva henidia neganai namona be unai sisiba ita laloatao. Bema unai bamona ita karaia lasi, iseda varavara do idia lalohisihisi bona ita do idia kamonai henia lasi.

6-7. Edena dala ai ta ese ena witnes lasi adavana ia laloa bada be namo? Haheitalai gwauraia.

⁶ Ma haida oi laloa bada. Matamanai ita herevalaia taihu, Pauline, ia gwau: “Lau ura egu adavana dekenai Dirava bona Baibel sibona lau herevalaia. Dina ta ta ai idia vara gaudia ai herevalaia lasi.” To, Pauline ena adavana, Wayne, be Baibel ia diba namonamo lasi, bona Pauline ese ia herevalaia gaudia ia lalopararalaia lasi. Ia laloa Pauline be ena tomadiho sibona ia laloa bada. Danu, ia laloa Pauline  be orea dikana ta ia bamoa bona ia idia hakaua kerere noho.

⁷ Pauline ia gwau ia be nega momo hanuaboi bona wiken ai tadikaka bona taihu ia bamoa​—hebou gabudiai, haroro gaukara ai, bona edia ruma dekenai ia vadivadi henidia. Pauline ia gwau: “Wayne be nega haida ruma dekenai ia ginidae neganai ta ia noho lasi, bona ia mamia ia be sibona ia noho.” Momokani, Wayne be ena adavana bona natuna ia reaia bada. Ia be Pauline bona ena natuna ese idia bamoa taudia ia diba lasi, bona ia mamia Pauline be ena tura matamatadia ia laloa bada, to ena adavana ia laloa bada lasi. Unai dainai Wayne ese Pauline ia hagaria idia divos totona. Edena dala ai Pauline ese ena adavana laloa bada karana ia hahedinaraia?

8. Petero Ginigunana 3:1, 2 ena hereva bamona, iseda varavara be dahaka idia laloa bada?

⁸ Haheitalai namona oi hahedinaraia. Nega momo iseda varavara be iseda kara idia laloa bada, to iseda hereva lasi. (1 Petero 3:1, 2 duahia.) Pauline be gabeai unai ia lalopararalaia. Ia gwau: “Lau diba Wayne be ai ia lalokau henia bona ia ura lasi ai divos. Ia gwauraia divos herevana dainai lau laloparara, Iehova ese headava taudia totona ia henia sisiba lau badinaia be namo. Hari, lau hereva momo lasi to egu kara amo haheitalai namona lau hahedinaraia.” Pauline be Wayne ia doria lasi Baibel idia herevalaia totona, to dina ta ta ai idia vara gaudia sibona ia herevalaia. Wayne ia itaia Pauline be ia manau, bona edia natuna mero be kamonai karana ia hahedinaraia. (Aon. 31:18, 27, 28) Danu, Baibel ena hereva ese ena ruma bese edia mauri ia haidaua karana ia itaia neganai, ena lalona ia hadaia Dirava ena Hereva ia abia dae totona.​—1 Kor. 7:12-14, 16.

9. Dahaka dainai ita gaukara goada iseda varavara ita durudia totona?

 ⁹ Oi gaukara goada emu varavara oi durudia totona. Iehova ese ita dekenai haheitalai namona ia hahedinaraia. Ia ese taunimanima ia hadibaia “loulou,” unai amo sivarai namona idia abia dae bona mauri do idia abia. (Ier. 44:4, NWT) Bona aposetolo Paulo ese Timoteo ia hadibaia do ia gaukara goada ma haida ia durua totona. Dahaka dainai? Badina unai bamona ia karaia neganai, ia bona ia idia kamonai henia taudia ese mauri do idia abia. (1 Tim. 4:16) Iseda varavara ita lalokau henidia dainai ita ura Baibel ai idia noho hereva momokani idia dibaia. Pauline ena hereva bona kara ese gabeai ena ruma bese taudia ia durua. Hari ia moale badina ena adavana ida Iehova idia hesiai henia noho. Idia ruaosi be painia gaukara idia karaia, bona Wayne be elda ta.

10. Dahaka dainai ita haheauka be namo?

¹⁰ Oi haheauka. Dirava ena taravatu ita badinaia neganai, reana do ia auka iseda varavara ese ita abia dae gaudia bona iseda mauri dalana idia abia dae totona. Nega momo, idia lalopararalaia gauna ginigunana be, tomadiho edia aria moalelaia karadia dekenai idia ita bamoa lasi, bona politikol karadia lalonai ita vareai lasi. Reana matamanai iseda varavara haida do idia badu. (Mat. 10:35, 36) To namona be ita haheauka. Bema idia ita durua lasi ita abia dae gaudia idia lalopararalaia totona, toana be iseda kara amo ita hahedinaraia idia be hegeregere lasi mauri hanaihanai idia abia totona. Iehova ese hahemaoro gaukara be ita dekenai ia henia lasi, unai gaukara be Iesu ia henia. (Ioa. 5:22) Bema ita haheauka, gabeai iseda varavara do idia ura ita harorolaia sivaraina idia kamonai.​—Maua ladana “Iseda Websait amo Taunimanima Ita Hadibaia” itaia.

11-13. Alice ese ena tama sina ia kara henidia dalana amo dahaka oi dibaia?

¹¹ Oi aonega bona oi gari lasi. (Aon. 15:2) Mani Alice ena haheitalai ita laloa. Ia be ena tama sina amo ia daudau bona tano ma ta ai ia noho neganai, Iehova ia dibaia matamaia. Iena tama sina be Dirava ia noho lasi lalohadai idia abia dae bona politikol karadia lalonai idia vareai. Alice ia laloparara ia dibaia gaudia be ena tama sina dekenai ia hadibaia haraga be namo. Ia gwau: “Bema oi abia dae gaudia be emu ruma bese taudia dekenai oi herevalaia haraga lasi, do idia lalohisihisi.” Alice be ena tama sina ia torea henidia, bona ia hadibadia Baibel ese ia herevalaia topik ta, hegeregere lalokau karana dekenai edia lalohadai idia gwauraia hedinarai totona. (1 Kor. 13:1-13) Ia be ena tama sina ia tanikiu henidia badina ia idia naria, danu idia dekenai harihari gaudia ia siaia. Matamanai, Alice be ena tama sina dekenai ia abia dae gaudia ia gwauraia neganai, idia moale lasi.

¹² Alice be ena tama sina ida ruma dekenai idia noho neganai, ena Baibel duahiduahi sediual ia badinaia. Ia gwau: “Unai ese egu sinana ia durua bona ia laloparara lau dekenai Baibel be mai anina bada.” Unai negai, Alice ena tamana be ia ura diba dahaka dainai ena natuna be ena laloa dalana ia haidaua, bona ia ura Baibel amo Alice ia abia dae gaudia ia hakoikoia. Alice ia gwau: “Baibel ta lau henia, bona Baibel lalonai iena kudouna ia hamarerea herevadia haida lau torea.” Dahaka ia vara? Alice ena tamana be Baibel ai kerere ta ia davaria lasi, to ia duahia gaudia ese ena kudouna ia hamarerea.

¹³ Ita aonega bona ita gari lasi be namo, herevana ma haida ese ita idia dagedage henia. (1 Kor. 4:12b) Hegeregere, Alice be ena sinana ena dagedage karana ia haheaukalaia. Ia gwau: “Lau bapatiso neganai, egu sinana ia gwau lau  be ia lalokau henia lasi.” Alice be dahaka ia karaia? Ia gwau: “Lau gari lasi to mai manau ida egu sinana lau hadibaia egu lalona lau hadaia Iehova ena Witnes ta ai lau lao bona unai abia hidi do lau haidaua lasi. Egu sinana lau hadibaia ia lau lalokau henia bada. Ai ruaosi ai tai, bona ia totona aniani namona ta lau nadua. Unai nega amo, egu sinana ia laloparara, Baibel amo lau dibaia gaudia ese lau ia durua taunimanima namona ai lau lao totona.”

14. Dahaka dainai iseda varavara ese ita karaia abia hidi idia haidaua lasi be namo?

¹⁴ Reana nega sisina daudau murinai iseda varavara do idia laloparara dahaka dainai Iehova hesiai henia karana ita laloa bada. Hegeregere, Alice ena tama sina idia ura ia be edukeisen badana ia tahua, to ena lalona ia hadaia painia gaukara do ia karaia neganai, ena sinana ia tai lou. To, Alice be ena lalona ia haidaua lasi. Ia gwau: “Bema emu ruma bese ese oi idia doria bona emu abia hidi ta oi haidaua, oi karaia abia hidi ma haida do idia haidaua danu. To, bema emu ruma bese taudia dekenai oi gari lasi bona oi manau, idia haida ese oi do idia kamonai henia.” Alice dekenai unai ia vara. Hari, iena tama sina be painia gaukara idia karaia, bona ena tamana be elda ta.

15. Mataio 5:14-16 bona 1 Petero 2:12 edia hereva bamona, edena dala ai ma haida edia “kara namodia” ese iseda varavara idia durua diba?

¹⁵ Iehova ese Keristani kongrigeisen taudia edia “kara namodia” amo taunimanima ia boiridia mai ia dekenai. (Mataio 5:14-16; 1 Petero 2:12 duahia.) Bema emu adavana be Iehova ena Witnes tauna eiava hahinena lasi, ia ese emu kongrigeisen taudia ia hedavari henia vadaeni, a? Pauline, matamanai ita herevalaia  taihu, be ena ruma dekenai tadikaka bona taihu ia invait, unai amo ena adavana, Wayne ese idia do ia dibaia. Wayne be tadikaka ta ena kara ese ia durua ena lalohadai kererena ia hamaoromaoroa totona. Ia gwau: “Tadikaka be ena moni gaukara amo day off ia abia, lau ida TV ai spot gadara ta ai itaia hebou totona. Unai amo lau laloparara, tadikaka be tomadiho sibona ia laloa lasi, to moale karadia ia karaia danu!”

16. Dahaka dainai iseda varavara ita invait hebou idia mai totona?

¹⁶ Iseda varavara ita durua dalana ta be idia ita boiria kongrigeisen heboudia dekenai idia mai totona. (1 Kor. 14:24, 25) Wayne ia lao henia hebou ginigunana be Memorial hebouna, badina unai be ena moni gaukara ia ore negana ai idia karaia, bona ena program be ia kwadogi. Wayne ia gwau: “Idia henia tok ena anina lau lalopararalaia lasi, to taunimanima edia kara lau laloaboio diba lasi. Idia mai bona lau idia welkam henia. Edia kara amo lau diba idia be taunimanima namodia.” Headava tadikaka bona taihu ta be nega momo hebou bona haroro gaukara ai Pauline bona ena natuna idia durua. Unai dainai Wayne, be Pauline ia abia dae gaudia dekenai diba ma haida ia abia totona, unai tadikaka ia noia ia ida Baibel idia stadilaia.

17. Dahaka dainai iseda varavara edia abia hidi dainai ita lalohisihisi lasi, to dahaka dainai ita hesiku lasi?

¹⁷ Ita ura iseda varavara ibounai be ita ida Iehova idia hesiai henia. To, herevana ita gaukara goada iseda varavara ita durudia Dirava ena hesiai taudia ai idia lao totona, reana hereva momokani do idia abia dae lasi. Bema unai ia vara, namona be edia abia hidi dainai ita lalohisihisi lasi. Momokani, ita ese ta do ita doria diba lasi ita abia dae gaudia ia abia dae totona. Danu, bema emu varavara idia itaia oi be mai moale ida Iehova oi hesiai henia, unai ese idia ia durua diba. Idia totona oi guriguri. Mai aonega ida idia oi hereva henia. Oi hesiku lasi to idia oi durua noho! (Kara 20:20) Namona be oi abia dae Iehova ese emu hekwarahi do ia hanamoa. Danu, bema emu varavara ese oi idia kamonai henia, do idia mauri!