OI URA kongrigeisen ai maduna ta oi huaia, a? Reana unai maduna be hari ta ese ia karaia noho. Eiava unai be guna oi karaia kongrigeisen asainmen ta. To, emu mauri lagani ia bada, oi gorere, moni ena hekwakwanai eiava ruma bese ena maduna ma haida dainai guna oi karaia gaudia be hari oi karaia lasi. Eiava orea ena senisi haida dainai guna oi huaia maduna be hari oi karaia lasi. Ena be badina momo dainai unai ia vara, to do oi mamia Dirava ena hesiai gaukara ai emu asainmen oi karaia namonamo lasi. Unai oi laloa neganai nega haida do oi lalohisihisi. To, dahaka do oi karaia lalohadai kereredia hegeregere lalomanoka, badu, eiava lalohisihisi oi hanaia totona? Ena be maduna ta oi huaia lasi, to edena dala ai do oi moale noho?

Ioane Bapatiso ena haheitalai ese ita do ia durua ita moale noho totona. Ena be Ioane ia diba lasi ena mauri ai dahaka do ia vara, to ena hesiai gaukara ia moalelaia. Ioane be lagani ta bamona Iesu ia harorolaia, to ia diba lasi dibura ruma ai do ia noho daudau. To, Ioane be ena mauri ibounai lalonai ia moale. Dahaka ese Ioane ia durua? Bona edena dala ai ita moale diba, ena be ita lalohisihisi?

Lagani 29 C.E. ai, Ioane ese ena hesiai gaukara ia hamatamaia bona ia be Mesia ena dala ia hegaegaelaia, ia gwau: “Umui helalo-kerehai, badina guba Basileia be ia kahirakahira vadaeni.” (Mat. 3:2; Luka 1:12-17) Momokani, taunimanima momo ese Ioane ena hereva idia kamonai, bona idia be gabu daudau amo idia mai, idia helalo-kerehai bona bapatiso idia abia. Ioane be mai gari lasi ida sibona idia gwauraia kara maoromaoro tomadiho gunalaia taudia ia hamaoroa bema idia helalo-kerehai lasi hahemaoro do idia abia. (Mat. 3:5-12) Ioane ese Iesu ia bapatisoa neganai, ena haroro gaukara ena namo ia itaia. Unai murinai Ioane ese ma haida ia hagoadaia Iesu, idia perovetalaia Mesia idia badinaia totona.​—⁠Ioa. 1:32-37.

Iesu ese Ioane ena gaukara namona ia herevalaia neganai, ia gwau: “Hahine amo idia vara taudia ta lasi ese Ioane Bapatiso ia hereaia.” (Mat. 11:11) Ita diba momokani Ioane be ia abia  hahenamo ia moalelaia. Ioane bamona, hari momo be Dirava amo idia abia hahenamo idia moalelaia. Tadikaka Terry ena haheitalai mani ita laloa. Ia bona ena hahine, Sandra be lagani 50 lalonai ful-taim hesiai gaukara idia karaia. Terry ia gwau: “Hahenamo momo lau abia. Lau painia, Betele ai lau gaukara, spesel painia gaukara lau karaia, sekit bona distrik naria gaukara lau karaia, bona hari spesel painia gaukara lau karaia lou.” Momokani, hesiai gaukara idauidau ita karaia be hahenamo badana, to Ioane ena haheitalai amo do ita diba, senisi idia vara neganai ita moale noho be namo.

Ioane Bapatiso be ena hesiai gaukara ia laloa bada dainai unai ese ia durua ia moale noho totona. Mani inai haheitalai oi laloa. Iesu ia bapatiso murinai, Ioane ena hahediba taudia momo be Iesu ena hahediba taudia ai idia lao. Ioane ena hahediba taudia be idia laloa momo dainai Ioane idia nanadaia, idia gwau: “Oi gwauraia hedinarai tauna unai, be taunimanima ia bapatisoa bona ibounai be ia dekenai idia lao noho.” (Ioa. 3:26) Ioane be idia dekenai ia gwau: “Headava matamata tauna ese headava matamata hahine ia abia. Vadaeni headava matamata tauna ena turana be ia badinai ia gini bona ena gadona ia kamonai neganai, ia moale bada. Unai dainai egu kudouna be moale amo ia honu.” (Ioa. 3:29) Ioane be Iesu ida sibona ia hahegeregerea lasi, bona ia laloa lasi iena hesiai gaukara be anina lasi badina Iesu ena gaukara be mai anina bada. To, ia moale badina ia be “headava matamata tauna ena turana.”

Ena be Ioane ena gaukara be auka, to ia be ena hesiai gaukara dekenai lalohadai maorona ia abia. Hegeregere, Ioane be Nasiri tauna dainai wain ia inua lasi. (Luka 1:15) Iesu ese Ioane ena mauri ia herevalaia neganai, ia gwau: “Ioane be ia mai neganai, ia aniani eiava ia inuinu lasi.” To, Iesu bona ena hahediba taudia edia mauri dalana be idau. (Mat. 11:18, 19) Bona Ioane be hoa karadia ia karaia lasi, to ia diba Iesu ena hahediba taudia bona guna Ioane idia bamoa taudia be hoa karadia idia karaia diba. (Mat. 10:1; Ioa. 10:41) Ioane be ia idia bamoa taudia bona Iesu ena hahediba taudia ese idia karaia gaudia ia hahegeregerea lasi, to ia be Iehova amo ia abia hesiai gaukara ia karaia noho.

Bema hari Iehova ena hesiai gaukara lalonai ita abia asainmen ita laloa bada, do ita moale. Terry ia gwau: “Asainmen ta ta lau abia neganai, lau karaia sibona.” Guna ful-taim hesiai gaukara amo ia abia asainmen idauidau ia laloa neganai, ia gwau: “Unai maduna ibounai lau moalelaia bada.”

Do ita moale bada bema Dirava ena hesiai gaukara lalonai ita abia asainmen bona maduna idauidau amo idia mai hahenamo ita laloa. ‘Dirava ida ita gaukara hebou’ be hahenamo badana. (1 Kor. 3:9) Dava bada gauna ta ena hairai ia noho daudau diba bema ita hagoevaia bona naria namonamo. Unai hegeregerena, Iehova hesiai henia karana amo ita abia hahenamo ita laloa dobu neganai, lalohadai kereredia do ita dadaraia. Danu, iseda hesiai gaukara be ma haida edia hesiai gaukara ida do ita hahegeregerea lasi. Namo lasi ita laloa iseda maduna be ma haida ese idia karaia dainai, ita karaia gaudia ita laloa bada lasi.​—Gal. 6:4.

Reana Ioane ia laloa nega daudau lalonai haroro gaukara do ia karaia, to ia laloparara lasi senisi haida do idia vara. (Ioa. 3:30) Lagani 30 C.E. ai, Iesu ia bapatiso bona hua siks murinai King Heroda ese Ioane be dibura ruma dekenai ia atoa. To, Ioane be hereva momokani ia harorolaia noho. (Mar. 6:17-20) Herevana dibura ruma ai ia noho, to dahaka dainai Ioane be ia moale? Badina Ia be Iehova ena hesiai gaukara ia laloa bada.

Ioane be dibura ruma ai ia noho neganai, Iesu ena haroro gaukara ia bada sivaraina ia kamonai. (Mat. 11:2; Luka 7:18) Ioane ia diba Iesu be Mesia to ia daradara edena dala ai Iesu be Toretore Helagadia ese ia perovetalaia gaudia do ia hagugurua. Mesia be king ai do ia lao dainai, ia be maoromaoro tanobada do ia lohiaia, a? Iesu ese Ioane be dibura ruma amo do ia ruhaia, a?  Ioane ia ura Iesu ena gaukara ia diba namonamo dainai ena hahediba taudia rua ia siaia bona Iesu idia nanadaia, idia gwau: “Oi be Do Ia Mai Tauna, eiava idau tauna ta do ai naria?” (Luka 7:19) Ioane ena hahediba taudia idia giroa lou neganai, Iesu ese ia karaia hoa karadia be Ioane dekenai idia herevalaia, idia gwau: “Matakepulu taudia edia matana idia kehoa, aena dika taudia idia raka, lepera taudia idia namo, bona taia kudima taudia idia kamonai, mase taudia idia toreisi lou, bona ogogami taudia be sivarai namona idia kamonai.”​—Luka 7:20-22.

Ioane be ia kamonai gaudia ese ena abidadama ia hagoadaia. Unai ese ia hamomokania Iesu be Mesia totona idia perovetalaia herevadia ia hagugurua noho. Ena be Iesu ese Ioane be dibura ruma amo ia ruhaia lasi, to Ioane ia diba guna ia karaia gaudia be mai anina bada. Herevana ena mauri ai senisi ia vara, to ia moale noho.

Ioane bamona, bema Iehova hesiai henia karana ita laloa bada, do ita moale bona ita haheauka noho. (Kol. 1:9-11) Baibel duahia bona laloa dobu karana ese ita ia durua, unai amo do ita laloparara Dirava totona ita hekwarahi be hekwarahi kava lasi. (1 Kor. 15:58) Sandra ia gwau: “Dina ta ta ai Baibel ena karoa ta ta duahia karana ese lau ia durua Iehova kahirakahira lau lao totona. Unai amo lau be sibona egu ura lau laloa bada lasi to iena ura sibona lau laloa.” Danu namona be tanobada hegegemadai idia karaia hesiai gaukara idauidau ita laloa, unai ese ita do ia durua sibona iseda ura do ita laloa bada lasi to Iehova ese ia hagugurua gaudia ita laloa bada. Sandra ma ia gwau: “Hua ta ta ai JW Broadcasting^® ese ai ia durua Iehova ena orea ida ai gaukara hebou bona emai asainmen idauidau ai moalelaia.”

Ioane Bapatiso be “Elia ena goada bona siahu hegeregerena” lagani tamona lalonai ena haroro gaukara ia karaia, bona Elia bamona ia danu be “mai ena hemami ita hegeregerena.” (Luka 1:17; Iam. 5:17) Ioane bamona, Iehova ena hesiai gaukara ita laloa bada neganai, Basileia ena hesiai gaukara idauidau do ita moalelaia, herevana iseda mauri ai senisi ia vara.