1. Keristani taudia be dahaka idia karaia diba, edia heau helulu idia hagugurua totona?

KERISTANI TAUDIA be mauri hanaihanai ena heau helulu lalonai idia heau noho. Herevana ita be hari sibona eiava lagani momo lalonai ita heau, namona be ita heau noho ela bona iseda heau helulu ita hagugurua. Aposetolo Paulo ese Filipi tadikaka taihu dekenai ia henia sisiba ese ita ia hagoadaia mauri hanaihanai ena heau helulu ita hagugurua totona. Ena be Filipi tadikaka taihu haida be lagani momo lalonai Iehova idia hesiai henia, to Paulo be idia dekenai revareva ia siaia. Idia be mai abidadama ida Iehova idia hesiai henia, to Paulo ese idia ia hadibaia idia hesiku lasi be namo. Paulo ia ura iena haheitalai do idia tohotohoa, badina ia be ia hekwarahi noho ena ‘tahua gauna ia abia totona.’​—Fili. 3:14.

2. Dahaka dainai Paulo ena sisiba herevana ese Filipi kongrigeisen taudia ia durua bada?

² Paulo be nega korikori ai Filipi tadikaka taihu dekenai sisiba ia henia. Unai kongrigeisen ia matamaia neganai taunimanima ese tadikaka taihu idia dagedage henia bada. Paulo bona Sila be lagani 50 C.E. bamona ai inai boiboi herevana, “Makedonia dekenai oi mai” idia abia neganai, Filipi dekenai idia lao. (Kara 16:9) Unuseniai hahine ta ladana Lydia idia davaria, ia be sivarai namona ia kamonai henia, bona “Iehova ese ena lalona ia kehoa.” (Kara 16:14) Daudau lasi murinai ia bona ena ruma bese be bapatiso idia abia. To, Diabolo ese idia dekenai hekwakwanai momo ia havaraia matamaia. Unai negai siti taudia ese Paulo bona Sila idia dogoatao bona lohia taudia dekenai idia veridia lao bona idia samania koikoi. Unai dainai, Paulo bona Sila idia dadabaia bona dibura ruma dekenai idia atodia bona idia hamaorodia siti idia rakatania totona. (Kara 16:16-40) Idia ruaosi be idia hesiku, a? Lasi! To unai kongrigeisen matamatana  ai idia noho tadikaka taihu be edena bamona? Idia be haheitalai namona idia hahedinaraia badina idia haheauka! Momokani, Paulo bona Sila edia haheitalai ese idia ibounai ia hagoadaia bada.

3. Paulo be dahaka ia karaia, bona edena henanadai do ita herevalaia?

³ Paulo be ena lalona ia hadaia ia hesiku lasi totona. (2 Kor. 4:16) To, ia diba mauri hanaihanai ena heau helulu ia hagugurua totona ena tahua gauna ia laloa bada be namo. Paulo ena haheitalai amo dahaka ita dibaia? Hari inai negai idia noho tadikaka taihu edia haheitalai ese edena dala ai ita ia durua ita haheauka noho totona? Bona edena dala ai vaira nega ena helaro ese ita ia hagoadaia ita hesiku lasi totona?

4. Edena dala ai Paulo be ena hesiai gaukara ia rakatania lasi, herevana ruma ta ai idia hadiburaia?

⁴ Paulo ese Filipi tadikaka taihu ia tore henidia neganai iena noho dalana mani oi laloa. Ia be Roma ai ruma ta lalonai idia hadiburaia. Danu, ia idia koua murimuri ai do ia haroro lasi totona. To, Paulo be ia idia vadivadi henia taudia ia haroro henia bona daudau gabudia ai idia noho kongrigeisen dekenai revareva ia siaia. Unai hegeregerena, hari Keristani tadikaka taihu momo be gorere eiava buruka dainai idia hegeregere lasi sivarai namona idia harorolaia totona, to edia ruma dekenai idia vadivadi taudia idia haroro henia. Bona haroro gaukara ai idia davaria lasi ruma taudia dekenai hagoadaia revareva idia torea diba.

5. Filipi 3:12-14 ena hereva bamona, dahaka ese Paulo ia durua ena hesiai gaukara ia laloa bada totona?

⁵ Paulo be Iehova ena hesiai gaukara ia laloa bada, to guna ia karaia gau namodia eiava ena kerere ia laloa momo lasi. To, ia gwau, ‘vaira gaudia totona ia hekwarahi noho’ bona ia “rakatania gaudia ia laloaboio” be namo, unai amo ena heau helulu ia hagugurua diba. (Filipi 3:12-14 duahia.) Paulo ena hesiai gaukara idia hadikaia gaudia haida be dahaka? Ginigunana be, Keristani tauna ai ia do lao lasi neganai ia be Iuda taudia edia diba bada tauna ta. To, “unai gaudia be momoru” bamona ia laloa. (Fili. 3:3-8) Iharuana be, ena be Paulo ia lalohisihisi badina guna Keristani taudia ia dagedage henia, to unai ese ia koua lasi Iehova ia hesiai henia totona. Ihatoina be, Paulo ia laloa lasi Iehova totona gau namodia momo ia karaia vadaeni dainai iena hesiai gaukara ia hadokoa be namo. Paulo be hahetoho momo ia davaria, hegeregere dibura ruma ai idia atoa, idia dadabaia, nadi amo ia idia hodoa, ia guia bouti ia dika, bona ia be aniani bona dabua lasi, to iena hesiai gaukara ia karaia noho. (2 Kor. 11:23-27) Herevana iena haroro gaukara lalonai dika idauidau idia vara, to Paulo ia diba ia hesiku lasi be namo. Ita danu unai bamona ita karaia be namo.

6. Ita “rakatania gaudia” haida be dahaka?

⁶ Edena dala ai Paulo ena haheitalai ita tohotohoa ‘ita rakatania gaudia ita laloaboio’ totona? Reana nega haida guna ita karaia kara dikadia dainai ita lalohisihisi, to unai lalohadai ita dadaraia be namo. Bema unai bamona oi mamia, vadaeni Keriso ena mauri davalaia boubouna be sibona emu stadi projek ta ai oi halaoa. Bema ita stadi, ita laloa dobu, bona Keriso ena mauri davalaia boubouna totona ita guriguri, iseda kerere gunadia do ita laloa lasi. Ita diba Iehova ese iseda dika ia gwauatao dainai unai bamona lalohadai kereredia do ita abia lasi. Paulo amo ita dibaia gauna ma ta mani ita laloa. Haida be Iehova idia hesiai henia totona edia pei bada moni gaukara idia rakatania. Bema oi be unai bamona tadikaka eiava taihu ta, vadaeni oi be guna emu moni bona kohu momo maurina oi do  laloa noho, a? (Num. 11:4-6; Had. 7:10) Ita “rakatania gaudia” haida be, reana Iehova ena hesiai gaukara ai ita hagugurua gaudia eiava guna ita haheaukalaia hahetoho. Momokani, Iehova ese ita ia durua dalana ita laloa neganai, unai ese ita ia durua iseda Tamana kahirakahira ita lao totona. To, namo lasi ita laloa ita be Iehova ena hesiai gaukara ai gau momo ita hagugurua vadaeni.​—1 Kor. 15:58.

7. Korinto Ginigunana 9:24-27 ena hereva bamona, mauri ena heau helulu lalonai ita kwalimu totona, dahaka ita karaia be namo? Haheitalai gwauraia.

⁷ Paulo be Iesu ena hereva ia lalopararalaia namonamo. Iesu ia gwau: “Do umui hekwarahi bada.” (Luka 13:23, 24) Keriso hegeregerena, Paulo ia ura iena mauri ibounai lalonai ia gaukara goada. Unai dainai Keristani mauri dalana be heau helulu ida ia hahegeregerea. (1 Korinto 9:24-27 duahia.) Heau helulu tauna be ena heau ena dokona sibona ia laloa bona ena matana idia veria gaudia ia dadaraia. Hegeregere, heau helulu taudia idia heau gabudia ai be sitoa idia noho bona lalona veria gaudia haida danu. Oi laloa heau helulu tauna be do ia stop bona sitoa dekenai idia noho gaudia do ia itaia, a? Bema ia ura heau helulu lalonai ia kwalimu, ia stop lasi be namo! Mauri ena heau helulu lalonai ita kwalimu totona, namona be iseda heau helulu idia koua gaudia ita dadaraia. Bema iseda tahua gauna ita laloa bada, bona Paulo bamona ita gaukara goada, iseda ahuna ita abia diba!

8. Edena hekwakwanai toi do ita herevalaia?

⁸ Mani hekwakwanai toi ita herevalaia. Idia be, ita naria daudau dainai ita hesiku haraga, buruka eiava gorere dainai tauanina ia manoka, bona idia ore diba lasi hekwakwanai. Ma haida ese unai hekwakwanai idia hanaia dalana ita dibaia karana ese ita do ia durua.​—Fili. 3:17.

9. Bema ita laloa gaudia idia vara haraga lasi, dahaka do ia vara?

⁹ Ita naria daudau dainai ita hesiku haraga. Momokani, ita ura bada Iehova ese ia gwauhamatalaia gaudia ibounai do ita itaia. Iehova ena peroveta tauna Habakuku ia ura dikadika Iehova ese Iuda ai idia vara kara dikadia ibounai ia haorea, to Iehova ese ia hamaoroa, ia  gwau: “Nega daudau lasi lalonai do ia vara.” (Hab. 2:3) To, bema ita laloa gaudia idia vara haraga lasi do ita lalohisihisi bona ita lalomanoka diba. (Aon. 13:12) Lagani 1914 ai tadikaka taihu haida dekenai unai ia vara. Unai negai horoa Keristani taudia momo idia laloa lagani 1914 ai guba dekenai do idia lao. To, unai ia vara lasi neganai idia lalomanoka, a?

10. Headava tau bona hahine ta be idia laloa gauna ia vara lasi neganai, dahaka idia karaia?

¹⁰ Unai bamona hekwakwanai idia hanaia Keristani taudia rua edia haheitalai mani ita laloa. Tadikaka Royal Spatz be lagani 1908 ai ia bapatiso unai negai ena mauri lagani be 20. Ia abia dae momokani ia be guba helarona do ia abia. To, lagani 1911 ai, do ia adavaia kekenina Pearl dekenai ia gwau: “Lagani 1914 ai do ia vara gauna oi diba, a? Bema ita ruaosi do ita headava, namona be unai ita karaia haraga!” Herevana lagani 1914 ai guba dekenai idia lao lasi, to idia ruaosi be Iehova hesiai henia karana idia hadokoa, a? Lasi, badina idia ura mai abidadama ida Dirava idia hesiai henia noho, to guba helarona abia totona lasi. Edia lalona idia hadaia mai haheauka ida Iehova idia hesiai henia totona. Royal bona Pearl be lagani momo lalonai Iehova idia hesiai henia ela bona idia mase. Momokani, oi ura dikadika Iehova ese ena ladana ia hanamoa bona ena lohia siahuna do ia abia isi, bona ena gwauhamata ibounai ia hagugurua karana oi itaia. Namona be oi abia dae momokani Iehova ese ena nega korikori ai unai gaudia ibounai do ia karaia. Unai dainai, Dirava hesiai henia gaukarana lalonai ita bisi noho, namo lasi ita naria daudau dainai ita hesiku haraga badina unai ese ita ia hamanokaia diba.

11-12. Dahaka dainai Iehova ita hesiai henia noho diba, ena be iseda tauanina ia goada lasi? Ekspiriens gwauraia.

¹¹ Buruka eiava gorere dainai tauanina ia manoka. Heau tauna be heau helulu ena gadara ai ia heau totona, ena tauanina ia goada be namo. To, Iehova oi hesiai henia totona emu tauanina ia goada be gau badana lasi. Momokani, tadikaka taihu momo be idia buruka eiava idia gorere dainai edia tauanina ia manoka, to Dirava hesiai henia karana idia goadalaia noho. (2 Kor. 4:16) Hegeregere, Tadikaka Arthur Secord * ena mauri lagani 88, be lagani 55 lalonai Betele gaukara ia karaia. Hari ia buruka bona gorere dainai ena tauanina ia manoka. Nega ta, nesi ta be tadikaka durua totona ia lao bona ia gwau: “Tadikaka Secord, Iehova totona gau momo oi karaia vadaeni.” To, Arthur be guna ia karaia gaudia ia laloa bada lasi. Ia be nesi ia itaia bona mai kiri ida ia gwau: “Oibe, unai be momokani. To, mai anina bada gauna be inai, hari Iehova ita badinaia be namo.”

 ¹² Reana oi be lagani momo lalonai Iehova oi hesiai henia bona hari emu gorere dainai guna oi karaia hesiai gaukara oi karaia diba lasi. Bema oi be unai bamona oi mamia, namo lasi oi lalomanoka. Namona be oi abia dae, Iehova ese guna oi karaia hesiai gaukara ia laloaboio lasi. (Heb. 6:10) Danu, namo lasi ita laloa Iehova ena hesiai gaukara lalonai ita karaia gaudia ibounai ese mai kudouna ibounai ida Dirava ita badinaia karana ia hahedinaraia. To, iseda kara namodia bona iseda goada hegeregerena ita karaia gaudia ese iseda lalokau Iehova dekenai ita hahedinaraia. (Kol. 3:23) Iehova ia diba iseda goada be mai ena hetoana bona ita ia doria lasi ita karaia diba lasi gaudia ita karaia totona.​—Mar. 12:43, 44.

13. Edena dala ai Anatoly bona Lidiya edia ekspiriens ese ita ia hagoadaia Iehova ita hesiai henia noho, ena be hekwakwanai momo ita davaria?

¹³ Idia ore diba lasi hekwakwanai. Iehova ena hesiai taudia haida be lagani momo lalonai hahetoho bona dagedage idia haheaukalaia. Hegeregere, Anatoly Melnik * ena mauri lagani be 12 neganai, iena tamana be pulisi ese dibura ruma ai idia atoa bona gabeai Siberia dekenai idia siaia lao. Iena ruma bese be Moldova ai idia noho, bona Siberia amo ena daudau be kilomita 7,000 mai kahana. Lagani ta ia ore murinai, Anatoly mai ena sinana, bona iena tubuna tau bona hahine danu be Siberia dekenai idia siaia lao. Unuseniai, hanua ma ta dekenai hebou idia lao matamaia, to idia be keru negadia lalonai mai haheauka ida kilomita 30 bamona idia raka. Gabeai Tadikaka Melnik be lagani toi lalonai dibura ruma ai ia noho dainai, ena adavana bona natuna kekeni ia itaia lasi. Ena be lagani momo lalonai hekwakwanai idia davaria, Anatoly bona ena ruma bese be Iehova idia hesiai henia noho. Hari iena mauri lagani be 82, bona ia be Central Asia ai ia noho brens ofesi ta ena Brens Komiti ta. Anatoly bona Lidiya bamona, namona be ita hesiku lasi bona Iehova ena hesiai gaukara ita karaia noho, guna ita karaia bamona.​—Gal. 6:9.

14. Paulo be ena ahuna ia abia totona, dahaka ia karaia?

¹⁴ Paulo ia diba momokani iena heau helulu do ia hagugurua bona ena ahuna do ia abia. Ia be horoa Keristani tauna dainai, Dirava ese ia henia “guba lao boiboina” ena ahuna ia laloa bada. To, unai ahuna ia abia totona, ia “hekwarahi noho” be namo. (Fili. 3:14) Paulo ese Filipi tadikaka taihu dekenai ia herevalaia haheitalai ese idia ia durua edia ahuna idia laloa bada totona.

15. Edena dala ai Paulo ese Filipi Keristani taudia ia hagoadaia idia gaukara goada totona?

 ¹⁵ Paulo ese Filipi tadikaka taihu ia hadibaia idia be guba helarona do idia abia. (Fili. 3:20) Dahaka dainai unai helaro idia laloatao be namo? Unai negai taunimanima momo idia ura Roma ena sitisen ai idia lao, badina hahenamo momo do idia abia. * To, horoa Keristani taudia ese idia abia guba helarona ese hahenamo ibounai ia hereaia. Roma dekenai idia ura noho taudia be namo ta idia davaria lasi! Unai dainai, Paulo ese Filipi tadikaka taihu ia hagoadaia, “Keriso ena sivarai namona ena dala hegeregerena” idia noho be namo. (Fili. 1:27) Hari horoa Keristani taudia be edia ahuna, guba helarona abia totona, edia gaukara goada karana amo haheitalai namona idia hahedinaraia.

16. Herevana iseda helaro be guba ai eiava tanobada ai, Filipi 4:6, 7 ena hereva bamona dahaka ita karaia be namo?

¹⁶ Herevana iseda helaro be guba ai eiava tanobada paradaisona ai, namona be iseda ahuna totona ita gaukara goada noho. Herevana iseda noho daladia be idauidau, to namona be guna ita karaia gaudia ita laloa lasi; eiava Iehova hesiai henia karana idia koua gaudia ita dadaraia. (Fili. 3:16) Reana nega haida ita naria daudau dainai ita hesiku haraga eiava ita buruka eiava gorere dainai iseda tauanina ia manoka. Danu, lagani momo lalonai hekwakwanai bona dagedage ita haheaukalaia. Herevana dahaka ia vara, ‘namo lasi gau ta ita lalohekwarahilaia.’ To gau ibounai lalonai do ita guriguri bona noinoi goadagoada, bona mai tanikiu ida Dirava dekenai iseda noinoi herevadia ita gwauraia hedinarai bona ena maino, iseda laloparara ibounai ia hereaia gauna be ita dekenai do ia henia.​—Filipi 4:6, 7 duahia.

17. Stadi atikol 32 ai dahaka do ita herevalaia?

¹⁷ Heau helulu tauna be heau helulu ena dokona dekenai ia ginidae totona ia heau noho hegeregerena, ita ese mauri hanaihanai ena heau helulu ita laloa bada danu be namo. Namona be iseda goada bona noho dalana hegeregerena, ita gaukara goada vaira nega ena hahenamo ita abia totona. Dahaka do ita karaia Iehova do ita hesiai noho totona? Stadi atikol 32 ese ita do ia durua abia hidi maorodia ita karaia, bona “mai anina bada gaudia” ita laloa bada totona.​—Fili.1:9, 10.