ABIDADAMA karana ese ita dekenai goada ia henia diba. Hegeregere, ena be Satani ia ura iseda hetura karana Iehova ida ia hadikaia, to abidadama karana ese ita do ia durua ‘Dika Tauna ena peva ibounai mai ena lahi do ita habodoa’ totona. (Efe. 6:16) Bema ita be mai iseda abidadama, ororo bamona hekwakwanai idauidau ita haheaukalaia diba. Iesu ese ena hahediba taudia ia hamaoroa: “Bema emui abidadama be mastadi uhena bamona, inai ororo dekenai do umui gwau, ‘Inai gabu amo oi lao unuseniai,’ bena do ia lao.” (Mat. 17:20) Abidadama karana ese iseda hetura karana Iehova ida do ia hagoadaia dainai, namona be inai henanadai ita lalodia: Abidadama ena anina be dahaka? Edena dala ai hereva momokani laloa bada karana ese iseda abidadama ia hahedinaraia? Edena dala ai iseda abidadama ita hagoadaia diba? Bona daika ita abidadama henia be namo?​—Roma 4:3.

Abidadama karana be Baibel ese ia herevalaia gaudia ita abia dae sibona lasi, badina “demoni danu be unai idia abia dae [Dirava ia noho] bona idia heudeheude.” (Iam. 2:19) Vadaeni, abidadama ena anina be dahaka?

Baibel ese abidadama karana be dala rua ai ia herevalaia. Ginigunana, “abidadama ena anina be inai, oi daradara lasi to oi diba oi naria noho gauna be do ia vara.” (Heb. 11:1a) Bema oi be mai emu abidadama, anina be oi abia dae momokani, Iehova ia gwauraia gaudia ibounai be momokani bona do idia guguru. Hegeregere, Iehova ese Israela taudia ia hamaoroa: “Lau ese gwauhamata taravatuna lau karaia vadaeni dina bona hanuaboi danu, idia ese nega ibounai edia nega korikori dekenai idia mai noho, bona inai gwauhamata be do ia makohia diba lasi. Inai bamona danu lau ese egu hesiai tauna Davida danu gwauhamata taravatuna lau karaia.” (Ier. 33:20, 21) Nega ta oi laloa, dina do ia daekau lasi bona daba bona hanuaboi do idia hedinarai lasi, a? Bema oi abia dae daba bona hanuaboi be edia taravatu idia badinaia, oi laloa unai taravatu ia atoa Tauna ese ena gwauhamata do ia hagugurua, a? Oibe!​—Isa. 55:10, 11; Mat. 5:18.

Iharuana, abidadama karana be “oi diba momokani, oi abia dae gaudia be momokani, ena be unai gaudia oi itaia lasi.” (Heb. 11:1b) Edena dala ai? Bema natuna ta be oi ia nanadaia, ‘Edena dala ai oi diba, hodahoda be ia noho?’ Ena be hodahoda oi itaia diba lasi, to natu ia laloparara totona, hamomokania gaudia hegeregere, hahodi karana, lai ese gau ta ia hamarerea dalana, bona gau ma haida amo ia oi durua diba. Natuna ese hamomokania gaudia ia abia dae neganai, ia itaia diba lasi gauna do ia abia dae diba. Unai hegeregerena, abidadama be ita itaia diba lasi gaudia ita abia dae karana.​—Roma 1:20.

Abidadama be ita itaia diba lasi gaudia ita abia dae karana, unai dainai ta ia abidadama totona, “hereva momokani ena diba maoromaoro” ia abia guna be namo. (1 Tim. 2:4) To unai sibona be hegeregere lasi. Aposetolo Paulo ia gwau: “Tau ta be ena kudouna ai ia abidadama.” (Roma 10:10) Ta ese hereva momokani ia abia dae sibona lasi, to ia laloa bada danu be namo. Unai amo ena abidadama do ia hahedinaraia,  anina be Dirava ia moalelaia mauri dalana do ia badinaia. (Iam. 2:20) Hereva momokani ia laloa bada lasi tauna be hamomokania gaudia ia dadaraia diba, badina ia ura lasi ena lalohadai ia haidaua eiava ia ura sibona ena ura ia badinaia. (2 Pet. 3:3, 4; Iuda 18) Unai dainai Baibel negadiai, hoa karadia idia itaia taudia haida sibona ese abidadama karana idia hahedinaraia. (Num. 14:11; Ioa. 12:37) Hereva momokani idia ura henia taudia sibona ese Dirava ena lauma helaga ia havaraia abidadama karana idia hahedinaraia diba.​—Gal. 5:22; 2 Tes. 2:10, 11.

King Davida, be abidadama goada tauna ta. (Heb. 11:32, 33) To, Davida ena ruma bese taudia ibounai ese unai bamona abidadama idia hahedinaraia lasi. Hegeregere, nega ta Davida ena kakana, Eliaba, be abidadama karana ia hahedinaraia lasi, badina ia gwau Davida ese Goliata tuari henia totona ia gwauraia herevana be hekokoroku karana. (1 Sam. 17:26-28) Ta be mai ena abidadama ida ia vara lasi; eiava ena tama sina amo abidadama karana ia abia lasi, unai dainai Davida be Dirava ia tura henia karana amo sibona ena abidadama ia hagoadaia.

Salamo 27 ai, Davida ese ena abidadama ia hagoadaia dalana ia herevalaia. (Siri 1) Davida be guna ia dekenai idia vara gaudia bona Iehova ese ena inai taudia ia halusia dalana ia laloa dobu. (Siri 2, 3) Iehova tomadiho henia karana ia moalelaia. (Siri 4) Davida be ena abidadama tamona taudia ida dubu helaga lalonai Dirava idia tomadiho henia. (Siri 6) Ia be mai ena lalona ibounai ida Iehova ia guriguri henia. (Siri 7, 8) Danu, Davida ia ura Dirava ena hakaua dalana do ia badinaia. (Siri 11) Davida ese abidadama karana ia laloa bada dainai ia gwau: “Lau diba momokani, lau ese inai mauri lalonai, [Iehova] ena kara namo do lau itaia.”​—Siri 13.

Davida bamona emu abidadama oi hagoadaia diba bema Salamo 27 ese ia herevalaia gaudia oi badinaia. Abidadama be diba maorona abia karana amo ia vara, unai dainai bema nega ibounai Dirava ena Hereva bona Baibel pablikeisen idauidau oi stadilaia, do ia auka lasi Dirava ena lauma helaga ena huahua, abidadama, oi hahedinaraia totona. (Sal. 1:2, 3) Nega oi atoa oi stadilaia gaudia oi laloa dobu totona. Oi stadilaia gaudia oi laloa dobu neganai, Iehova do oi lalokau henia bada. Danu, do oi ura kongrigeisen heboudia ai Iehova oi tomadiho henia bona ma haida dekenai emu helaro oi gwauraia hedinarai karana amo emu abidadama do oi hahedinaraia. (Heb. 10:23-25) Danu, abidadama karana ita hahedinaraia, bema hanaihanai ‘ita guriguri bona ita hesiku lasi.’ (Luka 18:1-8) Unai dainai nega ibounai Iehova ita “guriguri” henia, badina Ia ese ita “ia laloa bada.” (1 Tes. 5:17; 1 Pet. 5:7) Abidadama ese ita ia durua kara maorona ita karaia totona, bona unai ese iseda abidadama ia hagoadaia.​—Iam. 2:22.

Iesu ia do mase lasi hanuaboina ai, ena hahediba taudia ia hamaoroa: “Dirava do umui abidadama  henia, bona lau danu do umui abidadama henia.” (Ioa. 14:1) Unai dainai Iehova sibona ita abidadama henia lasi, to Iesu ita abidadama henia danu. Edena dala ai Iesu oi abidadama henia diba? Mani dala toi ita herevalaia.

Ginigunana, mauri davana be Dirava ese oi dekenai ia henia harihari gauna ta bamona oi laloa. Aposetolo Paulo ia gwau: “Dirava ena Natuna lau abidadama henia dainai lau mauri, ia ese lau ia lalokau henia bona lau totona ia sibona ia henia.” (Gal. 2:20) Iesu oi abidadama henia neganai, oi abia dae momokani unai mauri davana amo heduru oi abia, emu dika ia gwauatao, mauri hanaihanai ena helaro ia henia, bona ia hamomokania Dirava ese oi ia lalokau henia. (Roma 8:32, 38, 39; Efe. 1:7) Danu, unai ese oi do ia durua oi lalohisihisi lasi bona sibona laloa maragi karana oi dadaraia totona.​—2 Tes. 2:16, 17.

Iharuana, Iesu ena mauri davana dainai, guriguri amo Iehova kahirakahira oi lao diba. Mauri davana dainai, “mai gari lasi ida Dirava ita guriguri henia, unai amo hebogahisi do ita davaria bona iena hebogahisi hereadaena amo, heduru be nega maorona ai do ita abia.” (Heb. 4:15, 16; 10:19-22) Guriguri karana ese ita do ia durua, hedibagani ese ia havaraia kara dika ita dadaraia totona.​—Luka 22:40.

Ihatoina, Iesu oi kamonai henia. Aposetolo Ioane ia gwau: “Natuna ia abidadama henia tauna be mauri hanaihanai do ia abia, to Natuna ia kamonai henia lasi tauna be mauri do ia itaia lasi, to Dirava ena badu be ia latanai ia noho.” (Ioa. 3:36) Ita itaia Ioane ese abidadama bona kamonai lasi karana edia idau ia herevalaia. Unai dainai Iesu oi abidadama henia neganai, anina be ia oi kamonai henia. Iesu oi kamonai henia dalana ma ta be, “Keriso ena taravatu,” ia hadibaia gaudia bona iena hahegani ibounai, oi badinaia. (Gal. 6:2) Danu, Iesu oi kamonai henia dalana ma ta be, “igui hesiai tauna mai ena kamonai bona mai ena kara maoromaoro” amo idia mai hakaua herevadia oi badinaia. (Mat. 24:45) Iesu oi kamonai henia karana ese oi do ia hagoadaia, hekwakwanai idauidau oi haheaukalaia totona.​—Luka 6:47, 48.

Nega ta, tau ta be Iesu dekenai ia boiboi, ia gwau: “Lau be mai egu abidadama! Lau oi durua egu abidadama lau hagoadaia totona!” (Mar. 9:24) Herevana ia be mai ena abidadama, to mai manau ida Iesu ia noia ena abidadama ia hagoadaia totona. Unai tauna bamona, nega ta ita danu heduru do ita ura iseda abidadama ita hagoadaia totona. Bona hari inai negai, ita ibounai ese iseda abidadama ita hagoadaia diba. Ita herevalaia bamona, Dirava ena Hereva ita stadilaia bona laloa dobu neganai, iseda abidadama do ia hagoadaia bona iseda lalokau Iehova dekenai do ia habadaia. Iseda abidadama do ia goada diba, bema iseda tadikaka taihu ida Iehova ita tomadiho henia, ma haida dekenai iseda helaro ita herevalaia, bona nega ibounai ita guriguri. Danu, iseda abidadama ita hagoadaia neganai, ahuna namona do ita abia. Baibel ia gwau: “Egu lalokau taudia e, emui abidadama helagana umui hagoadaia, . . . unai amo Dirava ena lalokau lalonai do umui noho.”​—Iuda 20, 21.