1. Ita be dahaka hahenamo ita moalelaia?

IEHOVA ena kongrigeisen lalonai ita noho be hahenamo badana! Iseda tadikaka taihu ida kongrigeisen lalonai Iehova ita tomadiho henia neganai, maino bona moale ita mamia. To, kongrigeisen lalonai emu maduna be dahaka?

2. Aposetolo Paulo ena revareva lalonai edena haheitalai ia gaukaralaia?

² Aposetolo Paulo ese iena revareva lalonai ia gwauraia haheitalai ta ese ita do ia durua, kongrigeisen lalonai iseda maduna ita diba namonamo totona. Unai revareva ta ta lalonai Paulo ese kongrigeisen be taunimanima edia tauanina ida ia hahegeregerea. Danu, ia ese kongrigeisen taudia ta ta be tauanina ena kahana idauidau ida ia hahegeregerea.​—Roma 12:4-8; 1 Kor. 12:12-27; Efe. 4:16.

3. Inai stadi lalonai dahaka gaudia toi do ita herevalaia?

³ Inai stadi lalonai, ita ese Paulo ena haheitalai amo mai anina bada gaudia toi do ita herevalaia. Ginigunana be, do ita itaia Iehova ena kongrigeisen lalonai ita ta ta be mai iseda maduna. * Iharuana be, dahaka ita karaia diba bema kongrigeisen lalonai iseda maduna ita lalopararalaia lasi. Bona ihatoina be, dahaka dainai kongrigeisen lalonai iseda maduna ita hagugurua totona do ita gaukara goada ena badina do ita herevalaia.

4. Roma 12:4, 5 amo dahaka ita dibaia?

⁴ Paulo ena haheitalai amo ita dibaia gauna ginigunana be Iehova ena ruma bese lalonai ita ta ta be mai eda maduna. Paulo ia gwau: “Ita diba, tauanina tamona be mai ena kahana momo, bona kahana ta ta be mai edia gaukara idauidau. Unai bamona danu, ena be ita be momo, to Keriso ida ita hakapua dainai ita be tauanina tamona, bona ita be tauanina ena kahana idauidau to ita gaukara hebou.” (Roma 12:4, 5) Unai siri ena anina be dahaka? Anina be kongrigeisen lalonai ita be maduna idauidau ita huaia, to ita ta ta be mai anina bada.

5. Iehova ese kongrigeisen dekenai edena “harihari gaudia” ia henia?

⁵ Kongrigeisen lalonai maduna idia huaia taudia haida be ita idia hakaua taudia. (1 Tes. 5:12; Heb. 13:17) Momokani, Iehova ese ena kongrigeisen dekenai Keriso amo “taunimanima be harihari gaudia bamona ia henia.” (Efe. 4:8) Unai “harihari gaudia” be Hakaua Oreana taudia, Hakaua Oreana idia durua tadikaka, Brens Komiti taudia, sekit naria taudia, sikuli idia hadibaia taudia, kongrigeisen elda taudia bona hesiai taudia. Lauma helaga ese unai tadikaka ibounai ia abia hidi, Iehova ena mamoe idia naria bona kongrigeisen idia hagoadaia totona.​—1 Pet. 5:2, 3.

6. Tesalonika Ginigunana 2:6-8 ena hereva bamona, lauma helaga ese ia abia hidi tadikaka be dahaka idia karaia?

⁶ Lauma helaga ese tadikaka ia abia hidi gaukara idauidau idia karaia totona. Tauanina ena kahana idauidau, hegeregere imana bona aena idia gaukara hebou tauanina ibounai idia durua bamona, lauma helaga ese ia abia hidi tadikaka idia gaukara goadagoada kongrigeisen ibounai idia durua totona. Idia ura lasi ma haida amo hanamoa idia abia. To idia gaukara goada edia tadikaka taihu idia durua bona hagoadaia totona. (1 Tesalonika 2:6-8 duahia.) Iehova ita tanikiu henia, badina lo tadikaka be sibona edia ura idia dadaraia bona ma haida idia durua!

7. Ful-taim hesiai taudia momo be dahaka hahenamo idia moalelaia?

⁷ Kongrigeisen lalonai haida idia abia hidi misinari, spesel painia eiava regula painia gaukara idia karaia totona. Oibe, tanobada hegegemadai tadikaka taihu be edia lalona idia hadaia, ful-taim haroro bona hadibaia taudia halaoa gaukarana do idia karaia. Unai bamona idia karaia dainai, idia ese momo idia durua Iesu Keriso ena hahediba taudia ai idia lao. Ena be unai ful-taim evanelia taudia be taga taudia lasi, Iehova ese idia ia hanamoa bada. (Mar. 10:29, 30) Unai tadikaka bona taihu ita lalokau henidia bada, bona ita moale badina idia be kongrigeisen ena kahana ta!

8. Dahaka dainai Iehova ese sivarai namona idia harorolaia pablisa ibounai ia laloa bada?

⁸ Kongrigeisen lalonai elda taudia bona ful-taim hesiai taudia sibona be mai anina bada, a? Lasi! Dirava ena matanai bona kongrigeisen lalonai, sivarai namona idia harorolaia pablisa ibounai be mai anina bada. (Roma 10:15; 1 Kor. 3:6-9) Danu, kongrigeisen ena gaukara badana ta be taunimanima be Lohiabada Iesu Keriso ena hahediba taudia ai do idia halaoa. (Mat. 28:19, 20; 1 Tim. 2:4) Kongrigeisen lalonai bapatiso bona bapatiso lasi pablisa ibounai idia hekwarahi bada unai gaukara be edia mauri lalonai idia atoa guna totona.​—Mat. 24:14.

9. Dahaka dainai iseda Keristani taihu ita lalodia bada?

⁹ Iehova ese Keristani taihu ia matauraidia dainai kongrigeisen lalonai mai anina bada gaukara ia henidia. Ia ese mai abidadama ida ia idia hesiai henia sina,  vabu, headava bona singul taihu ia laloa bada. Baibel lalonai Dirava idia hamoalea hahine momo edia sivarai idia torea. Idia be haheitalai namona badina aonega, abidadama, gari lasi bona hariharibada karana idia hahedinaraia, mai lalona ibounai ida idia gaukara, bona gaukara namodia idia karaia. (Luka 8:2, 3; Kara 16:14, 15; Roma 16:3, 6; Fili. 4:3; Heb. 11:11, 31, 35) Iehova ita tanikiu henia, badina iseda kongrigeisen lalonai unai bamona kara namodia idia hahedinaraia Keristani hahine idia noho!

10. Dahaka dainai iseda buruka taudia ita laloa bada?

¹⁰ Ita moale danu badina kongrigeisen lalonai buruka taudia momo idia noho. Kongrigeisen haida dekenai, edia mauri ibounai lalonai Iehova idia hesiai henia tadikaka taihu burukadia idia noho. Buruka taudia ma haida be reana vanegai sibona hereva momokani idia dibaia. Unai buruka taudia be gorere momo idia davaria. Unai dainai, kongrigeisen lalonai bona haroro gaukara ai gau momo idia karaia diba lasi. To, unai buruka taudia be edia goada hegeregerena haroro gaukara idia durua, bona ma haida idia treinia bona hagoadaia! Bona edia ekspiriens amo diba ita abia. Ita bona Iehova dekenai idia be hairai momokani.​—Aon. 16:31.

11-12. Emu kongrigeisen dekenai idia noho matamata taudia ese oi idia hagoadaia, a?

¹¹ Mani iseda matamata taudia ita laloa. Satani Diabolo bona ena lalohadai dikadia ese idia biagua tanobadana ai idia tubu daekau dainai, hekwakwanai momo idia davaria. (1 Ioa. 5:19) To, matamata taudia be hebou dekenai idia haere, ida haroro, bona mai gari lasi ida edia abidadama idia gwauraia neganai, unai ese ita ia hagoadaia. Oibe, Iehova ena kongrigeisen lalonai matamata taudia be mai anina bada!​—Sal. 8:2.

¹² To nega haida iseda tadikaka taihu haida idia mamia kongrigeisen lalonai idia be anina lasi. Dahaka ese ita ta ta ia durua unai amo do ita mamia kongrigeisen lalonai ita be mai anina bada? Mani unai ita herevalaia.

13-14. Dahaka dainai haida idia mamia kongrigeisen lalonai idia be anina lasi?

¹³ Paulo ena haheitalai amo ita dibaia gauna iharuana ese ita ia durua hari momo ese idia davaria hekwakwanai ita laloa totona. Tadikaka taihu momo idia laloa kongrigeisen lalonai idia be anina lasi. Paulo ia gwau: “Bema aena ia gwau: ‘Lau be imana lasi, unai dainai lau be tauanina ena kahana ta lasi,’ unai ese ia hahedinaraia lasi ia be tauanina ena kahana ta lasi. Bema taiana ia gwau: ‘Lau be matana lasi, unai dainai lau be tauanina ena kahana ta lasi,’ unai ese ia hahedinaraia lasi ia be tauanina ena kahana ta lasi.” (1 Kor. 12:15, 16) Paulo ese ita dekenai dahaka ia hadibaia?

¹⁴ Bema kongrigeisen lalonai oi be ma haida ida sibona oi hahegeregerea, do oi laloa oi be anina lasi. Kongrigeisen lalonai haida be hadibaia taudia namodia, gaukara naria taudia namodia, eiava mamoe naria taudia namodia. Reana do oi laloa oi be idia hegeregerena lasi. Unai ese ia hahedinaraia oi be manau tauna bona sibona emu ladana oi abia isi lasi. (Fili. 2:3) To, namona be oi naria namonamo. Bema hanaihanai gaukara idia karaia namonamo taudia ida sibona oi hahegeregerea, do oi lalomanoka diba. Paulo ena hereva bamona, reana do oi mamia kongrigeisen lalonai oi be anina lasi. Vadaeni, dahaka ese oi do ia durua unai hemami oi dadaraia totona?

15. Korinto Ginigunana 12:4-11 ena hereva bamona, ena be iseda harihari gaudia be idauidau to dahaka ita laloa be namo?

¹⁵ Mani inai oi laloa: Iehova ese Keristani taudia ginigunadia dekenai lauma helaga amo harihari gaudia eiava hoa karadia idia karaia ena siahu ia henia, to idia ibounai ese harihari gauna tamona idia abia lasi. (1 Korinto 12:4-11 duahia.) Ena be Iehova ese idia dekenai harihari gaudia bona diba idauidau ia henia, to unai Keristani taudia ta ta be mai anina bada. Hari, ita ese lauma helaga ena siahu amo hoa karadia ita karaia lasi. To, inai hakaua herevana ita laloa be namo: Ita ibounai iseda diba be  idauidau, to Iehova ese ita ibounai ia laloa bada.

16. Dahaka sisiba ita badinaia be namo?

¹⁶ Namo lasi Keristani taudia ma haida ida sibona ita hahegeregerea, to aposetolo Paulo ena sisiba do ita badinaia. Ia gwau: “Namona be ta ta ese sibona ena kara do ia tahua namonamo, vadaeni ia sibona dekenai do ia moale, bona ma ta ida sibona do ia hahegeregerea lasi.”​—Gal. 6:4.

17. Edena dala ai Paulo ena sisiba ese ita ia durua diba?

¹⁷ Bema Paulo ena sisiba ita badinaia bona sibona iseda kara ita sekea, reana do ita laloparara, iseda harihari gaudia bona diba be ma haida edia amo ia idau. Hegeregere, reana elda ta be platfom dekenai tok henia dalana ia diba namonamo lasi, to taunimanima be hahediba taudia ai halaoa gaukarana ia karaia namonamo diba. Reana ia be kongrigeisen ai gaukara idia hegaegaelaia namonamo elda ma haida bamona lasi, to ia be mamoe naria tauna namona, bona pablisa taudia be mai gari lasi ida ia dekenai idia lao Baibel ena sisiba idia abia totona. Eiava heabidae karana dekenai ia be haheitalai namona. (Heb. 13:2, 16) Bema iseda harihari gauna bona diba ita lalopararalaia, do ita moale badina kongrigeisen lalonai unai ita gaukaralaia diba. Bona bema ita itaia iseda tadikaka taihu edia diba be iseda diba amo ia idau, do ita mama henidia lasi.

18. Edena dala ai hahediba taudia namodia ai ita lao diba?

¹⁸ Herevana kongrigeisen lalonai dahaka gaukara ita karaia, to namona be ita ibounai ese haroro gaukara ita goadalaia bona hahediba taudia namodia ai ita lao. Iseda gaukara ita karaia namonamo totona, Iehova ese ena orea amo treinini namona ia henia. Hegeregere, iseda wiki ena hebou ai, haroro gaukara do ita karaia namonamo daladia ita dibaia. Unai hebou amo oi dibaia gaudia oi badinaia noho, a?

19. Edena dala ai Basileia Evanelia Sikuli oi lao diba?

¹⁹ Basileia Evanelia Sikuli be treinini abia dalana namona ta. Unai sikuli be ful-taim hesiai gaukara tadikaka taihu bona edia mauri lagani be 23 ia lao 65 taudia totona. To, reana oi laloa oi hegeregere lasi unai sikuli dekenai oi lao totona. Namona be oi ura unai sikuli oi lao ena badina idauidau oi torea, bona namo lasi do oi lao lasi ena badina idauidau oi laloa momo. Bena palani oi karaia unai sikuli oi lao totona. Iehova ena heduru bona oi gaukara goada dainai, oi laloa do oi karaia diba lasi gauna oi hagugurua diba.

20. Roma 12:6-8 amo dahaka ita dibaia?

²⁰ Paulo ena haheitalai amo ita dibaia gauna ihatoina be Roma 12:6-8 ese ia herevalaia. (Duahia.) Inai siri ai Paulo ia hahedinaraia kongrigeisen taudia edia harihari gaudia be idauidau. To, ia gwau namona be iseda harihari gaudia ita gaukaralaia kongrigeisen ita hagoadaia totona.

21-22. Robert bona Felice edia sivarai amo dahaka ita dibaia?

²¹ Tadikaka ta ladana Robert * ena haheitalai mani ita laloa. Tano ma ta ai ful-taim hesiai gaukara ia karaia murinai, ia idia abia hidi iena tano ai ia noho Betele ofesi ai do ia gaukara. Herevana tadikaka ese idia hamaoroa ia be kerere ta ia karaia lasi, to ia gwau: “Hua momo lalonai lau lalohisihisi, badina lau laloa egu hesiai gaukara lau karaia namonamo lasi. Nega haida lau  mamia lau ura egu Betele gaukara lau rakatania.” Edena dala ai Robert ia moale lou? Elda ta ese ia hamaoroa, guna ita karaia asainmen ta ta dekenai Iehova be ita ia treinia, unai amo hari ita karaia noho asainmen ita karaia namonamo diba. Robert ia laloparara namona be guna ia karaia gaudia ia laloa lasi, to hari ia karaia diba gaudia sibona do ia laloa noho.

²² Tadikaka Felice Episcopo dekenai unai bamona hekwakwanai ta ia vara. Ia bona ena adavana be lagani 1956 ai Gilead amo idia gradueit bona Bolivia dekenai sekit gaukara idia karaia. Lagani 1964 ai, edia natuna mero ia vara. Felice ia gwau: “Ia auka ai ura henia bada asainmen ai rakatania totona. Lau be lagani ta bamona lau lalohisihisi bada. To, Iehova ena heduru amo, egu lalohadai lau haidaua bona egu natuna do lau naria ena maduna lau laloa bada.” Emu hemami be Robert bona Felice edia hemami bamona, a? Nega haida oi lalomanoka badina guna oi abia maduna haida be hari oi abia lasi, a? Namona be emu lalohadai oi haidaua, bona hari Iehova bona emu tadikaka taihu totona oi karaia diba gaudia sibona oi laloa, unai amo do oi moale. Namona be oi bisi noho. Do oi moale bema emu harihari gauna bona diba oi gaukaralaia ma haida oi durua bona kongrigeisen oi hagoadaia noho.

23. Nega ita atoa dahaka ita karaia totona, bona stadi atikol 35 ai, dahaka do ita herevalaia?

²³ Iehova ese ita ta ta ia laloa bada. Ia ura iena ruma bese ai ita lao. Bema nega ita atoa iseda tadikaka taihu durua daladia ita laloa dobu bona ita gaukara goada unai ita hagugurua totona, do ita mamia kongrigeisen lalonai ita be mai anina bada! To, kongrigeisen taudia be edena bamona ita laloa? Edena dala ai ita hahedinaraia idia ita laloa bada? Stadi atikol 35 ai, unai do ita herevalaia.