1. Iehova ese iena hesiai taudia ta ta totona dahaka ia karaia?

IEHOVA ese mai lalokau ida dala ia kehoa iena hesiai taudia ta ta be iena kongrigeisen lalonai idia noho totona. Bona ena be iseda maduna be idauidau, to ita ibounai be mai anina bada. Aposetolo Paulo ese ita ia durua unai mai anina bada gauna ita lalopararalaia totona. Edena dala ai unai ia karaia?

2. Efeso 4:16 ena hereva bamona, dahaka dainai ta ta do ita laloa bada bona ita gaukara hebou?

² Inai atikol ena siri badana ena hereva hegeregerena, Paulo ia gwau ita ta be Iehova ena hesiai tauna ma ta dekenai do ita gwau lasi “Lau dekenai oi be anina lasi.” (1 Kor. 12:21) Kongrigeisen ai maino ia noho totona, namona be ta ta do ita laloa bada bona ita gaukara hebou. (Efeso 4:16 duahia.) Mai lalotamona ida ita gaukara hebou neganai, tadikaka taihu ibounai be lalokau do idia mamia bona kongrigeisen do ia goada ia lao.

3. Inai stadi lalonai dahaka gaudia do ita herevalaia?

³ Edena dala ai kongrigeisen lalonai Keristani taudia ma haida ita matauraia diba? Inai stadi lalonai, elda taudia ese elda ma haida idia matauraia karana do ita herevalaia. Gabeai, ita ibounai ese singul tadikaka bona taihu ita matauraia karana do ita herevalaia. Bona dokonai, iseda gado idia manadalaia lasi taudia ita laloa bada karana do ita herevalaia.

4. Roma 12:10 ai Paulo ena sisiba hegeregerena, elda taudia ese dahaka idia karaia be namo?

⁴ Kongrigeisen ena elda taudia ibounai be Iehova ena lauma helaga ese ia abia hidi. To, idia ta ta edia harihari gaudia bona diba be idauidau. (1 Kor. 12:17, 18) Elda haida edia ekspiriens be bada, to haida be hari sibona elda taudia ai idia lao dainai, gaukara momo dekenai idia manada lasi. Haida be idia buruka eiava gorere dainai edia gaukara haida idia karaia diba lasi. To namo lasi, elda ta be elda ma haida dekenai do ia gwau ‘Lau dekenai umui be anina lasi.’ Namona be elda ta ta ese Paulo ena sisiba Roma 12:10 dekenai do idia badinaia.​—Duahia.

5. Edena dala ai elda taudia idia hahedinaraia elda ma haida idia matauraia, bona dahaka dainai unai be mai anina bada?

⁵ Elda taudia idia hahedinaraia elda ma haida idia matauraia, bema edia hereva idia kamonai namonamo. Elda taudia be mai anina bada gaudia herevalaia totona idia hebou neganai, unai kara idia badinaia be namo. Dahaka dainai? The Watchtower, October 1, 1988 gauna, ia gwau: “Elda taudia do idia abia dae, lauma helaga ena siahu amo, Keriso ese elda oreana lalonai elda ta ena lalona ia hasiahua diba Baibel ena hakaua herevana ia gwauraia totona, unai ese elda taudia do ia durua hekwakwanai ta lalonai disisen maorona idia karaia totona. (Kara 15:6-15) Lauma helaga ese kongrigeisen ena elda tamona sibona lasi, to elda taudia ibounai ia durua.”

6. Dahaka ese elda taudia ia durua mai lalotamona ida idia gaukara totona, bona edena dala ai unai ese kongrigeisen do ia durua?

⁶ Elda ma haida ia matauraia elda tauna be do ia ura lasi elda hebou dekenai, hanaihanai ia sibona ia hereva guna. Hebou ai ia sibona do ia hereva lasi, bona do ia laloa lasi iena lalohadai be hanaihanai ia maoro. To, ia be mai manau ida iena lalohadai do ia gwauraia, bona ma haida edia lalohadai do ia kamonai namonamo. Mai anina bada gauna be mai ura ida Baibel ena hakaua herevadia do ia gwauraia, bona  “hesiai tauna mai ena kamonai, bona mai ena kara maoromaoro” ena hakaua dalana do ia badinaia. (Mat. 24:45-47) Bema elda taudia be mai lalokau bona hemataurai ida hebou ai gau ta idia herevalaia, Dirava ena lauma helaga be idia huanai do ia noho bona idia do ia durua kongrigeisen ia hagoadaia disisen idia karaia totona.​—Iam. 3:17, 18.

7. Singul maurina dekenai Iesu ena lalohadai be dahaka?

⁷ Hari inai negai, kongrigeisen lalonai headava taudia bona ruma bese idia noho. To, idia headava lasi tadikaka bona taihu momo idia noho danu. Singul tadikaka bona taihu be edena bamona do ita lalodia? Namona be Iesu ese idia ia laloa dalana ita tohotohoa. Iesu be tanobada ai ia noho neganai, ia headava lasi, to hesiai gaukara dekenai iena nega bona goada ia gaukaralaia. Iesu be taravatu ta ia atoa lasi, Keristani tauna ta be do ia headava eiava do ia headava lasi. To, ia gwau Keristani taudia haida be abia hidi do idia karaia idia headava lasi totona. (Mat. 19:11, 12) Iesu be idia headava lasi taudia ia matauraia. Ia laloa lasi singul taudia be anina lasi, eiava gau ta dekenai idia dabu.

8. Korinto Ginigunana 7:7-9 ena hereva bamona, Paulo ese Keristani taudia ia hagania dahaka idia laloa totona?

⁸ Aposetolo Paulo be Iesu bamona, ia be singul bona hesiai gaukara ia karaia. Paulo ia gwau lasi Keristani tauna ia headava be kerere. Ia laloparara unai be ta ta ena abia hidi. To, Paulo ese Keristani taudia ia hagania edia singul mauri do idia gaukaralaia Iehova idia hesiai henia totona. (1 Korinto 7:7-9 duahia.) Oibe, Paulo ia laloa lasi headava lasi Keristani taudia be anina lasi. To, ia ese singul tau matamata, Timoteo ia abia hidi, mai anina bada gaukara ia karadia totona. * (Fili. 2:19-22) Unai amo ita diba, tadikaka ta be gaukara ta ia karaia namonamo totona, ia headava eiava ia singul be gau badana lasi.​—1 Kor. 7:32-35, 38.

9. Headava bona singul maurina dekenai dahaka lalohadai ita abia be namo?

⁹ Iesu bona Paulo idia gwau lasi, Keristani taudia be do idia headava eiava do idia headava lasi. Vadaeni, headava bona singul maurina dekenai dahaka lalohadai ita abia be namo? The Watchtower, October 1, 2012 gauna, ia gwau: “Momokani, ita gwau diba headava bona singul maurina be harihari gaudia Dirava amo. . . . Iehova ia laloa lasi  singul maurina dainai ta do ia hemarai eiava ia lalohisihisi.” Unai dainai, namona be kongrigeisen lalonai singul tadikaka bona taihu edia gaukara ita matauraia be namo.

10. Edena dala ai singul tadikaka bona taihu ita matauraia diba?

¹⁰ Edena dala ai singul tadikaka bona taihu edia hemami ita matauraia diba? Namona be ita laloatao tadikaka bona taihu be badina idauidau dainai singul maurina idia abia hidi. Hegeregere, Keristani singul taudia haida be edia lalona idia hadaia do idia headava lasi. Keristani singul taudia haida be idia ura headava, to taihu o tadikaka maorona idia do davaria lasi. Bona haida edia adavana be idia mase. Herevana dahaka dainai idia headava lasi, to namo lasi kongrigeisen taudia ese idia nanadaia: ‘Dahaka dainai oi headava lasi?’ eiava ‘Oi totona adavana ta do lau tahua, a?’ Momokani, reana singul Keristani taudia haida be heduru totona do idia noinoi. To, bema singul taudia be heduru totona idia noinoi lasi bona unai bamona ita henanadai, edia hemami ita hadikaia diba, a? (1 Tes. 4:11; 1 Tim. 5:13) Mani singul taudia edia hereva haida ita itaia.

11-12. Edena dala ai singul taudia edia hemami ita hadikaia diba?

¹¹ Sekit naria gaukara ia karaia namonamo singul tadikaka ta ia gwau, singul maurina be mai ena hahenamo momo. To, ia gwau, nega haida ia lalomanoka badina tadikaka taihu ese idia nanadaia: “Dahaka dainai oi headava lasi?” Brens ofesi ta dekenai ia gaukara tadikaka ta, ia gwau: “Nega haida lau itaia, tadikaka taihu idia laloa singul taudia idia hebogahisi henidia be namo. Unai kara amo, haida idia laloa singul maurina be hekwakwanai ta, bona ia be harihari gauna lasi.”

¹² Betele dekenai ia gaukara singul taihu ta, ia gwau: “Pablisa haida idia laloa, singul taudia ibounai be adavana idia tahua noho. Eiava haida idia laloa singul taudia ibounai ese moale hebou karadia dekenai adavana idia tahua noho. Nega ta Betele gaukara totona gabu ta dekenai lau lao neganai, hebou hanuaboina ai lau ginidae. Iena ruma ai do lau noho taihu be lau ia hamaoroa kongrigeisen lalonai tadikaka rua idia noho bona edia mauri lagani be lauegu hegeregerena. Ma ia gwau, ia be lau totona turana ta ia tahua lasi. To, Kingdom Hall dekenai ai vareai neganai, maoromaoro lau ia veria lao unai tadikaka rua lau hedavari henia totona. Oibe, unai nega ai, lau bona unai tadikaka rua be ai hemarai bada.”

13. Singul taihu ta be daika edia haheitalai ese ia hagoadaia?

¹³ Betele dekenai ia gaukara singul taihu ma ta, ia gwau: “Lagani momo lalonai painia gaukara idia karaia singul taudia momo lau diba, idia be laloa maoromaoro taudia, edia hesiai gaukara idia atoa guna, sibona idia henia haida durua totona, bona idia moale. Idia ese kongrigeisen idia durua bada. Idia be singul maurina dekenai lalohadai maorona idia abia. Singul maurina idia abia hidi dainai, idia laloa lasi idia be ma haida idia hereaia, eiava idia be adavana lasi bona natudia lasi dainai idia dabu.” Kongrigeisen taudia ese oi idia matauraia bona laloa bada neganai, unai lalohadai maorona do oi abia bona do oi moale. Do oi mamia lasi haida ese oi idia hebogahisi henia, mama henia, dadaraia eiava abia isi. To, do oi mamia oi idia lalokau henia.

14. Edena dala ai ita hahedinaraia singul taudia ita matauraia?

¹⁴ Iseda singul tadikaka bona taihu do idia moale, bema edia kara namodia dainai ita ura henidia. Namo lasi idia singul dainai  ita hebogahisi henidia. To, edia abidadama dainai idia do ita laloa bada be namo. Unai ita karaia neganai, iseda singul tadikaka bona taihu do idia mamia lasi, ita gwau: ‘Ai dekenai umui be anina lasi.’ (1 Kor. 12:21) Lasi, to do idia diba idia ita matauraia bona kongrigeisen lalonai idia be mai anina bada.

15. Haida be edia haroro gaukara habadaia totona, dahaka idia karaia?

¹⁵ Vanegai laganidia ai, pablisa momo be maka idia atoa gado ma ta do idia dibaia, unai amo edia haroro gaukara idia habadaia diba. Unai idia karaia totona, edia mauri ai gau haida idia haidaua. Unai tadikaka taihu be edia gado korikori ena kongrigeisen idia rakatania, unai amo pablisa be momo lasi tanodia dekenai idia lao bona gado ma ta ia herevalaia kongrigeisen idia bamoa diba. (Kara 16:9) Idia sibona ese unai abia hidi idia karaia Basileia ena gaukara idia habadaia totona. Ena be lagani haida murinai unai gado do idia manadalaia, to idia be gaukara namona idia karaia. Edia kara namodia bona ekspiriens amo tadikaka taihu idia hagoadaia. Oibe, unai gaukara dekenai sibona idia henia tadikaka taihu ita lalodia bada!

16. Elda oreana idia ura tadikaka ta idia abia hidi neganai, edena hakaua herevadia idia badinaia be namo?

¹⁶ Namo lasi elda oreana idia laloa tadikaka ta be edia kongrigeisen ena gado ia diba namonamo lasi dainai, elda o hesiai tauna ena maduna do idia henia lasi. Elda oreana ese tadikaka ta idia abia hidi totona, Baibel ena hakaua herevadia elda bona hesiai taudia totona idia badinaia be namo. Namo lasi idia laloa tadikaka be kongrigeisen ena gado ia diba lasi dainai, maduna do idia henia lasi.​—1 Tim. 3:1-10, 12, 13; Tito 1:5-9.

17. Ruma bese haida be tano matamata dekenai idia lao neganai, dahaka henanadai haida idia vara?

¹⁷ Keristani ruma bese haida be moni gaukara totona eiava hekwakwanai haida dainai tano ma ta dekenai idia lao. Unai bamona negadiai, edia natudia be sikuli ai unai tano matamata ena gado idia dibaia. Bona tama sina danu be moni gaukara tahua totona unai gado idia dibaia. To, edena bamona bema unuseniai edia gado korikori ena kongrigeisen o grup ta ia noho? Edia ruma bese be edena kongrigeisen do idia bamoa? Idia be tano matamata ena gado ena kongrigeisen o edia gado korikori ena kongrigeisen do idia bamoa?

18. Galatia 6:5 ena hereva bamona, dahaka dainai ruma bese kwarana ena abia hidi ita matauraia be namo?

¹⁸ Namona be ruma bese kwarana ese do idia bamoa kongrigeisen ia abia hidi. Ia sibona ese unai abia hidi ia karaia dainai, namona be iena ruma bese ena namo do ia laloa. (Galatia 6:5 duahia.) Ita ese ruma bese kwarana ena abia hidi ita matauraia  be gau badana. Herevana dahaka abia hidi ia karaia, namona be iena abia hidi do ita matauraia bona iseda kongrigeisen dekenai iena ruma bese do ita welkam henia.​—Roma 15:7.

19. Namona be ruma bese kwarana ese dahaka do ia gurigurilaia?

¹⁹ Ruma bese haida be edia gado korikori ena kongrigeisen idia bamoa to edia natudia be unai gado idia manadalaia lasi. Bema unai kongrigeisen be unai tano ena gado badana idia herevalaia gabuna ai ia noho, reana natudia do idia hekwarahi hebou idia lalopararalaia totona bona Iehova kahirakahira do idia lao lasi. Dahaka dainai? Badina reana natudia be unai tano ena gado idia herevalaia sikulina dekenai idia lao, bona edia gado korikori idia manadalaia lasi. Unai ia vara neganai, namona be ruma bese edia kwarana be do idia guriguri, edena dala ai edia natudia do idia durua Iehova bona iena taunimanima kahirakahira idia noho totona. Idia ese natudia do idia durua edia gado korikori idia dibaia totona, eiava natudia ese idia manadalaia gadona ena kongrigeisen dekenai do idia lao. Herevana ruma bese kwarana ese dahaka abia hidi ia karaia, namona be idia lao henia kongrigeisen taudia ese ia bona ena ruma bese do idia matauraia bona laloa bada.

20. Edena dala ai ita hahedinaraia gado ma ta idia dibaia tadikaka taihu ita matauraia?

²⁰ Ita herevalaia badina idauidau dainai, kongrigeisen momo ai tadikaka taihu idia hekwarahi noho gado matamata idia dibaia totona. Reana, edia lalohadai idia gwauraia hedinarai be auka. To ena be gado matamata idia gwauraia namonamo lasi, gau badana be do ita itaia idia be Iehova idia lalokau henia bona idia ura ia idia hesiai henia. Bema unai kara hairaidia ita itaia, iseda tadikaka taihu do ita lalodia bada bona matauraidia. Bona iseda gado idia manadalaia lasi dainai do ita gwau lasi, “Lau dekenai oi be anina lasi.”

21-22. Iehova ese ita dekenai dahaka hahenamo ia henia?

²¹ Ita moale badina Iehova ese kongrigeisen lalonai ita dekenai maduna ia henia. Unai be hahenamo badana. Herevana ita be tau o hahine, headava o singul, matamata o buruka, gado ta ita diba namonamo eiava lasi, to ita ta ta bona Iehova dekenai ita be mai anina bada.​—Roma 12:4, 5; Kol. 3:10, 11.

²² Paulo ese ia gwauraia tauanina ena kahana idauidau ena haheitalai amo ita dibaia gaudia ita badinaia noho be namo. Unai ese ita do ia durua iseda tadikaka taihu hagoadaia daladia do ita tahua, bona hanaihanai idia ita lalokau henia bona matauraia totona.