1. Dahaka dainai Iehova ese mauri gaudia ia havaraia?

GUNA Iehova be sibona ia noho, to ia lalohisihisi lasi. Iehova ia laloa lasi ta ese ia do ia bamoa bena do ia moale. To, Dirava ia ura ma haida ese mauri do idia moalelaia. Lalokau dainai, Iehova ese mauri gaudia ia havaraia.​—⁠Sal. 36:9; 1 Ioa. 4:19.

2. Iesu bona aneru ese Iehova ia havaraia gaudia be edena bamona idia laloa?

² Iehova ese ena Natuna, Iesu ia havaraia guna. Bena, iena Natuna amo ‘gau ibounai ia havaraia,’ hegeregere aneru ibounai. (Kol. 1:16) Iesu be ena Tamana ida ia gaukara hebou karana ia moalelaia. (Aon. 8:30) Bona Dirava ena aneru natudia idia moale danu. Oibe, Iehova bona iena Gaukara Karaia Tauna, Iesu, ese guba bona tanobada idia karaia neganai, aneru be unai idia itaia. Aneru be dahaka idia karaia? Tanobada idia itaia neganai, idia be “mai moale danu idia boiboi,” bona Iehova ese ia karaia gaudia ta ta, taunimanima danu ia karaia neganai, aneru ese Dirava idia hanamoa. (Iobu 38:7; Aon. 8:31) Ia karaia gaudia ta ta ese Iehova ena lalokau bona aonega idia hahedinaraia.​—Sal. 104:24; Roma 1:20.

3. Korinto Ginigunana 15:21, 22 ena hereva bamona, Iesu ena mauri davalaia boubouna ese dahaka namo ia havaraia?

³ Iehova ia ura ia karaia tanobadana ai taunimanima ese mauri hanaihanai do idia moalelaia. To, Adamu bona Heva ese edia Tamana lalokauna idia gwau-edeede henia neganai, kara dika bona mase be edia natudia ibounai dekenai idia henia hanai. (Roma 5:12) Iehova be dahaka ia karaia? Maoromaoro, ia ese taunimanima do ia hamauria dalana ia gwauraia. (Gen. 3:15) Iehova ena ura be mauri davana  do ia karaia, unai amo Adamu bona Heva edia natudia be kara dika bona mase ena igui amo do ia ruhadia. Unai amo dala ia kehoa taunimanima ta ta be abia hidi idia karaia diba, Ia do idia hesiai henia bona mauri hanaihanai idia abia totona.​—Ioa. 3:16; Roma 6:23; 1 Korinto 15:21, 22 duahia.

4. Inai stadi lalonai edena henanadai do ita herevalaidia?

⁴ Dirava ena gwauhamata mase taudia do ia hatorea isi lou karana ese henanadai haida ia havaraia. Hegeregere, toreisi lou be edena bamona do ia vara? Iseda lalokau taudia idia toreisi lou neganai edia toana do ita diba, a? Edena dala ai toreisi lou karana ese ita do ia hamoalea? Bona edena dala ai toreisi lou ita laloa dobu karana ese ita ia durua Iehova ena lalokau, aonega, bona haheauka karana ita laloa bada totona? Mani unai henanadai ta ta ita herevalaia.

5. Dahaka dainai ita gwau diba mase taudia ibounai be nega tamona do idia toreisi lou lasi?

⁵ Iehova ese ena Natuna amo taunimanima milioni momo ia hatorea isi lou neganai, ita gwau diba reana idia ibounai be nega tamona do idia toreisi lou lasi. Dahaka dainai? Badina tanobada be taunimanima amo ia honu haraga neganai, hekwakwanai badana do ia vara. To, Iehova be hanaihanai gau ibounai ia karaia namonamo. Ia diba gaukara ibounai ia hegaegaelaia namonamo be gau badana, unai amo taunimanima be maino ai do idia noho. (1 Kor. 14:33) Iehova Dirava be mai aonega bona haheauka ida Iesu ida ia gaukara hebou tanobada be metairametaira idia hegaegaelaia totona, bena gabeai taunimanima idia karaia. Unai hegeregerena, Iesu ena Lagani 1,000 Lohia Negana lalonai, unai bamona do ia karaia. Ia be Aramagedono amo idia roho mauri taudia ida  do ia gaukara hebou, bona idia hegaegae toreisi lou taudia idia welkam henia totona.

6. Kara 24:15 ena hereva bamona, Iehova ese daidia danu do ia hatorea isi lou?

⁶ Mai anina bada gauna be, Aramagedono amo idia roho mauri taudia ese toreisi lou taudia dekenai Dirava ena Basileia bona ena taravatu do idia hadibaia. Dahaka dainai? Badina do idia toreisi lou taudia momo be Baibel ese ia gwauraia “kara maoromaoro lasi taudia.” (Kara 24:15 duahia.) Edia mauri ai senisi momo do idia karaia Keriso ena mauri davana amo namo idia abia totona. Mani oi laloa, Iehova idia diba lasi taudia milioni momo dekenai Dirava ena hereva momokani do ita hadibaia be gaukara badana. Hari Baibel stadi ita karaia bamona taunimanima ta ta be ta ese do ia stadi henia, a? Unai taudia be kongrigeisen dekenai do idia atodia bona treinini idia abia edia murinai idia toreisi lou taudia ma haida idia durudia totona, a? Do ita naria bona itaia. To, ita diba Keriso ena Lagani 1,000 Lohia Negana dokonai, “tanobada ibounai, be [Iehova] ena diba maoro dekena amo do ia honu momokani.” (Isa. 11:9) Unai lagani 1,000 lalonai mai moale ida gaukara momo do ita karaia!

7. Dahaka dainai Dirava ena taunimanima ese toreisi lou taudia idia hadibaia neganai, edia hemami do idia lalopararalaia?

⁷ Keriso ena Lagani 1,000 Lohia Negana ai, Iehova ena taunimanima be ia idia hamoalea totona edia kara do idia haidaua. Unai amo idia ese toreisi lou taudia edia hemami do idia lalopararalaia, bona idia durudia diba kara dika idia dadaraia bona Iehova ena taravatu idia badinaia totona. (1 Pet. 3:8) Idia toreisi lou taudia do idia itaia Iehova ena taunimanima be idia manau bona Iehova idia hamoalea totona edia kara idia haidaua noho, unai dainai do idia ura idia ida Iehova do idia tomadiho henia.​—Fili. 2:12.

8. Dahaka dainai ita gwau diba, toreisi lou taudia idia welkam henia taudia be edia lalokau taudia edia toana do idia diba?

⁸ Badina momo dainai ita gwau diba toreisi lou taudia idia hedavari henia taudia ese edia lalokau taudia edia toana do idia diba. Hegeregere, guna idia vara toreisi lou bamona, ita diba Iehova ese taunimanima do ia karaia lou, bona edia toana, hereva dalana, bona lalohadai be guna idia do mase lasi negana hegeregerena. Laloatao Iesu ese mase be mahuta ida ia hahegeregerea, bona toreisi lou be hegeregere ta be mahuta amo ia noga bamona. (Mat. 9:18, 24; Ioa. 11:11-13) Ta be mahuta amo ia noga neganai, ena toana, ena gado regena, bona ia laloa gaudia be idia idau lasi. Mani Lasaro ena haheitalai ita laloa. Ia be dina foa lalonai ia mase vadaeni, unai dainai ena tauanina ia bodaga matamaia. To, Iesu ese Lasaro ia hatorea isi lou neganai, ena taihudia ese ena toana idia diba, bona ia ese idia ia laloatao danu.​—Ioa. 11:38-44; 12:1, 2.

9. Dahaka dainai toreisi lou taudia be maoromaoro goevadae taudia ai do idia lao lasi?

⁹ Iehova ia gwauhamata Keriso ena lohia henunai idia noho tauna ta do ia gwau lasi: “Lau be gorere.” (Isa. 33:24; Roma 6:7) Danu, Iehova ese mase taudia ia hatorea isi lou neganai, idia dekenai gorere be lasi. To, maoromaoro goevadae taudia ai do idia lao lasi, badina bema unai bamona ia vara, reana edia lalokau taudia ese edia toana do idia diba lasi. Toana be Keriso ena Lagani 1,000 Lohia Negana lalonai, taunimanima ibounai be metairametaira goevadae taudia ai do idia lao. Lagani 1,000 ena dokonai, Iesu ese ena Tamana dekenai Basileia do ia henia giroa. Unai nega ai Basileia ese ena gaukara ibounai do ia hagugurua, bona taunimanima be goevadae taudia ai  do ia halaoa danu.​—1 Kor. 15:24-28; Apok. 20:1-3.

10. Toreisi lou ia vara neganai, dahaka do oi karaia?

¹⁰ Mani emu lalokau taudia do oi hedavari henidia lou negana oi laloa. Oi moale dainai do oi kiri eiava oi tai? Oi moale bada dainai Iehova hanamoa anedia do oi abia, a? Momokani, toreisi lou karana dainai iseda hebogahisi Tamana bona ena Natuna do ita lalokau henidia bada.

11. Ioane 5:28, 29 ai Iesu ena hereva bamona, Dirava ena kara maoromaoro taravatudia idia badinaia taudia dekenai dahaka do ia vara?

¹¹ Toreisi lou taudia be edia kara idia haidaua bona Dirava ena kara maoromaoro taravatudia do idia badinaia dainai do idia moale. Edia kara idia haidaua taudia be tanobada ai mauri hanaihanai do idia abia. To, Dirava idia gwau-edeede henia taudia be Paradaiso ai do idia noho lasi, bona unai gabu ena maino do idia hadikaia lasi.​—Isa. 65:20; Ioane 5:28, 29 duahia.

12. Edena dala ai Iehova ese tanobada ai idia noho taudia ibounai do ia hanamoa?

¹² Basileia ena lohia henunai, Dirava ena taunimanima ibounai ese Aonega Herevadia 10:22 ena hereva do idia mamia, ia gwau: “[Iehova] ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.” Iehova ena lauma helaga ena heduru amo, Dirava ena taunimanima edia kara do idia hanamoa, anina be Keriso ena kara do idia tohotohoa bona metairametaira goevadae taudia ai do idia lao. (Ioa. 13:15-17; Efe. 4:23, 24) Dina ta ta ai, edia tauanina do ia goada, bona taunimanima namodia ai do idia lao. Oibe, mauri do idia moalelaia bada! (Iobu 33:25) To, edena dala ai hari, toreisi lou laloa dobu karana ese oi ia durua diba?

13. Salamo 139:1-4 ena hereva bamona, edena dala ai toreisi lou karana ese do ia hahedinaraia Iehova be ita ia diba namonamo?

¹³ Matamanai ita herevalaia bamona, Iehova ese taunimanima ia hatorea isi lou neganai, edia lalohadai bona kara gunadia do ia henia lou. Unai ena anina mani oi laloa. Iehova be oi ia lalokau henia bada dainai, emu lalohadai, hemami, hereva, bona kara ia itaia bona ia laloatao. Unai dainai bema oi ia hatorea isi lou, do ia auka lasi emu lalohadai bona kara ia henia lou totona. King Davida ia laloparara Iehova be ita ta ta ia laloa bada. (Salamo 139:1-4 duahia.) Ita laloparara Iehova be ita ia diba namonamo neganai, iseda hemami be edena bamona?

14. Iehova be ita ia diba namonamo karana ita laloa dobu neganai, iseda hemami be edena bamona?

¹⁴ Iehova be ita ia diba namonamo karana ita laloa dobu neganai, do ita lalohekwarahi lasi. Dahaka dainai? Laloatao, Iehova be ita ta ta bona eda kara idauidau ia laloa bada. Iseda mauri ai idia vara hekwakwanai ia itaia, bona ia diba iseda kara be unai gaudia ese idia biagua. Unai ese ita ia hagoadaia! Namo lasi ita laloa ita be sibona ita noho, badina dina ta ta ai Iehova be ita kahirakahira ia noho, bona dala ia tahua ita ia durua totona.​—2 Siv. 16:9.

15. Edena dala ai toreisi lou helarona ese Iehova ena aonega ia hahedinaraia?

¹⁵ Taunimanima be mase dekenai idia gari neganai, edia inai taudia ese do idia hagaridia diba, ia maoro lasi karana ta idia karaia  totona. To, ita do idia hagaria diba lasi. Ita diba bema iseda inai taudia ese ita idia hamasea, Iehova ese ita do ia hatorea isi lou. (Apok. 2:10) Ita diba momokani, idia karaia gauna ta ese iseda hetura karana Iehova ida ia hadikaia diba lasi. (Roma 8:35-39) Iehova ia hamomokania iena aonega be bada badina ita dekenai toreisi lou helarona ia henia! Unai dainai ita gari lasi bema Satani idia durua taudia idia ura ita idia hamasea badina edia hereva ita kamonai lasi. Bona unai helaro ese ita ia hagoadaia Iehova ita badinaia noho totona.

16. Edena henanadai oi lalodia be namo? Bona edena dala ai emu haere ese emu abidadama karana ia hahedinaraia?

¹⁶ Bema Iehova ena inai taudia idia ura oi idia alaia, oi abia dae momokani Iehova be oi do ia hatorea isi lou, a? Edena dala ai oi diba unai negai Iehova do oi abidadama henia? Dala ta be sibona do oi nanadaia, ‘Dina ta ta ai lau karaia abia hidi maragidia ese idia hahedinaraia lau be Iehova lau abidadama henia, a?’ (Luka 16:10) Henanadai ma ta be, ‘Iehova ia gwauhamata bema Basileia lau atoa guna, egu dabu gaudia do ia henia, to egu mauri dalana amo lau hamomokania iena gwauhamata lau abidadama henia, a?’ (Mat. 6:31-33) Bema emu haere be oibe, oi hahedinaraia Iehova oi abidadama henia, bona oi hegeregere vaira negai do idia vara hahetoho idauidau oi haheaukalaia totona.​—Aon. 3:5, 6.

17. (a) Edena dala ai toreisi lou karana ese ia hahedinaraia Iehova be ia haheauka? (b) Edena dala ai ita hahedinaraia Iehova ena haheauka karana ita laloa bada?

¹⁷ Iehova be inai tanobada oromana dikana do ia hadikaia ore negana ia makaia vadaeni. (Mat. 24:36) Do ia karaharaga lasi, to unai nega do ia naria noho. Ia ura dikadika mase taudia do ia hatorea isi lou, to ia haheauka noho. (Iobu 14:14, 15) Ia naria noho nega maorona ai mase taudia do ia hamauria lou totona. (Ioa. 5:28) Iehova ena haheauka karana dainai ita tanikiu henia be namo. Mani oi laloa: Iehova ia haheauka dainai, ita bona taunimanima momo dekenai, nega ia henia ita “helalo-kerehai” totona. (2 Pet. 3:9) Iehova ia ura taunimanima momo ese mauri hanaihanai do idia abia. Unai dainai, namona be ita hahedinaraia Iehova ena haheauka karana ita laloa bada. Edena dala ai? Namona be ita gaukara goada “mauri hanaihanai idia ura kudou-maoro taudia” ita durudia, unai amo Iehova do idia lalokau henia bona idia hesiai henia diba. (Kara 13:48) Unai amo  ita bamona, idia ese Iehova ena haheauka karana amo namo idia abia diba.

18. Dahaka dainai ma haida dekenai ita haheauka be namo?

¹⁸ Iehova be do ia haheauka noho ela bona lagani 1,000 idia ore, bena ita be goevadae taudia ai do ita lao. To unai ia do vara lasi lalonai, Iehova be mai ena ura ida iseda dika ia gwauatao noho. Unai dainai, namona be iena haheitalai ita tohotohoa, bona ma haida edia kara namodia ita laloa bada bona ita haheauka noho. Hegeregere, taihu ta ena adavana be nega momo daradoko gorerena ia abia bona hebou lao karana ia hadokoa. Ia gwau: “Lau dekenai unai be auka. Emai mauri ia idau, bona guna ai palani gaudia ibounai ai karaia diba lasi.” To unai nega ai, unai lalokau hahinena be ena adavana ena gorere ia haheaukalaia. Iehova dekenai ia tabekau bona ia hesiku lasi. Iehova ena kara hegeregerena, ia ese hanaihanai adavana ena gorere sibona ia laloa lasi, to ena kara namodia ia laloa bada. Ma ia gwau: “Egu adavana be mai ena kara namodia, bona ia hekwarahi noho iena daradoko gorerena ia hanaia totona.” Oibe, namona be iseda famili eiava kongrigeisen lalonai unai bamona metau idia davaria taudia dekenai do ita haheauka!

19. Eda lalona do ita hadaia dahaka ita karaia totona?

¹⁹ Dirava ese nega ginigunana tanobada ia karaia neganai, Iesu bona aneru idia moale. To, do idia itaia goevadae taudia ese tanobada idia hahonua, Iehova idia lalokau bona idia hesiai henia neganai, do idia moale bada. Bona Dirava ese tanobada amo ia abia hidi, Iesu ida guba ai do idia lohia taudia be do idia moale, badina do idia itaia edia gaukara ese taunimanima dekenai namo ia havaraia. (Apok. 4:4, 9-11; 5:9, 10) Ita be moale dainai do ita boiboi bada, bona hisihisi, gorere, daradoko bona mase dainai ita taitai karana be do ia ore vaitani. (Apok. 21:4) Unai ita naria lalonai, namona be emu lalona oi hadaia, emu lalokau, aonega bona haheauka Tamana do oi tohotohoa noho. Unai oi karaia neganai, herevana dahaka hekwakwanai oi davaria, do oi moale noho. (Iam. 1:2-4) Ita moale bada badina Iehova ia gwauhamata mase taudia be do idia “toreisi lou”!​—Kara 24:15.