1-2. Salamo 34:8 hegeregerena, edena dala ai Iehova ena namo ita itaia diba?

MANI oi laloa, ta ese oi dekenai aniani matamata ta ia henia oi tohoa totona. Reana unai aniani oi diba totona ena toana do oi itaia, oi bonaia, bona nadua dalana totona do oi henanadai eiava ma haida do oi nanadaia bema unai aniani idia ura henia. To unai aniani oi ura henia totona dala tamona be oi sibona ese do oi mamia.

² Iehova ena namo ita dibaia totona Baibel bona iseda pablikeisen do ita duahia, bona ma haida edia ekspiriens amo, Iehova ese idia ia hanamoa dalana do ita diba. Iehova ena namo ita lalopararalaia namonamo totona, ita sibona ese do ita “tohoa” be namo. (Salamo 34:8 duahia.) Mani unai ita karaia diba dalana ta ita laloa. Reana ita ura ful-taim hesiai gaukara ita karaia to unai tahua gauna ita hagugurua totona, namona be kohu momo lasi maurina ita noholaia. Reana nega momo Iesu ena gwauhamata, Basileia oi atoa guna bona Iehova ese emu dabu gaudia do ia henia ita duahia, to reana nega ta ita itaia lasi Iehova ese ita dekenai unai ia karaia. (Mat. 6:33) To Iesu ena gwauhamata ita abidadama henia dainai moni momo ita negea kava lasi, iseda moni gaukara dekenai senisi haida ita karaia, bona iseda haroro gaukara ita habadaia. Unai bamona ita karaia neganai ita sibona ita itaia Iehova be iseda dabu gaudia ia henia. Unai amo Iehova ena namo ita itaia.

3. Salamo 16:1, 2 hegeregerena, Iehova ese daika dekenai hahenamo momo ia henia?

³ Iehova be taunimanima ibounai dekenai “kara namo” ia hahedinaraia bona ia idia diba lasi taudia dekenai danu.  (Sal. 145:9; Mat. 5:45) To Iehova idia lalokau henia bona mai lalona ibounai ida ia idia hesiai henia taudia dekenai hahenamo momo ia henia. (Salamo 16:1, 2 duahia.) Mani Iehova ese ita dekenai ia karaia gau namodia haida ita herevalaia.

4. Edena dala ai Iehova ese ia kahirakahira idia lao taudia ia hanamoa?

⁴ Iehova amo ita dibaia gaudia ita badinaia neganai, ia ese iseda mauri ia hanamoa dalana ita itaia. Hegeregere ia ita dibaia bona lalokau henia matamaia neganai, ita ia durua ia moalelaia lasi lalohadai bona kara ita rakatania. (Kol. 1:21) Bona Iehova dekenai ita gwauhamata bona ita bapatiso neganai, ita dekenai gau namodia ma haida ia henia, hegeregere lalomamina namona bona ia ita tura henia.​—1 Pet. 3:21.

5. Edena dala ai haroro gaukara ai Iehova ena kara namo ita mamia?

⁵ Haroro gaukara ita karaia noho neganai Iehova ena kara namo do ita mamia. Oi be hemarai momo tauna, a? Iehova ena taunimanima momo be unai bamona. Reana Iehova ena Witnes ta ai oi do lao lasi neganai, oi laloa lasi, nega ta oi diba lasi tauna ena ruma dekenai do oi lao bona ia dekenai Baibel oi herevalaia. To hari, hanaihanai unai bamona oi karaia. Bona Iehova ese oi ia durua haroro gaukara oi moalelaia totona! Oibe, Iehova ena heduru be dala idauidau ai oi mamia. Bona taunimanima ese oi idia gwauraia dika neganai oi dekenai lalomaino ia henia. Bona ruma tauna ia ura kamonai neganai, oi ia durua siri maorona oi gaukaralaia totona. Danu haroro gaukara ai taunimanima idia ura lasi kamonai neganai, oi dekenai goada ia henia oi haroro noho totona.​—Ier. 20:7-9.

6. Edena dala ai haroro gaukara ai ita abia diba be Iehova ena kara namo ia hahedinaraia?

⁶ Iehova ese ita ia kara namo henia dalana ta be haroro gaukarana totona ita ia hadibaia. (Ioa. 6:45) Wiki ena hebou ai, ita ese haroro hereva namodia ita kamonai, bona haroro gaukara ai ita gaukaralaia diba. Matamanai, reana ita gari unai dala matamatana ita tohoa totona, to ita badinaia neganai taunimanima idia kamonai. Danu hebouhebou badadia bona maragidia ai, ita idia hagoadaia haroro dala matamatadia ita tohoa totona. Unai ita karaia totona reana ita gari, to ita tohoa neganai Iehova ese ita ia hanamoa. Herevana iseda mauri dalana be idauidau, to ita hekwarahi unai dala matamatadia ita badinaia neganai, Iehova ese ita ia hanamoa dalana mani ita itaia. Bena iseda haroro gaukara ita hanamoa daladia do ita herevalaia.

7. Ita hekwarahi haroro gaukara ita habadaia neganai, dahaka hahenamo do ita davaria?

⁷ Iseda hetura karana Iehova ida ia goada. Mani elda ta ladana Samuel * ita laloa, ia bona ena adavana be Colombia ai painia gaukara idia karaia. Idia be mai moale ida edia kongrigeisen ai idia painia, to idia ura edia haroro gaukara idia habadaia dainai pablisa momo lasi kongrigeisen ta dekenai do idia lao. Unai idia karaia totona, edia ura gaudia haida idia dadaraia be namo. Samuel ia gwau, “Mataio 6:33 ai badinaia bona do ai gaukaralaia lasi kohu hoia karana ai hadokoa. To emai ruma do ai rakatania be auka momokani. Ia be emai ura dalana ai idia haginia  bona ai abitorehai lasi.” Edia kongrigeisen matamata dekenai idia lao neganai edia dina ta ta maurina ai moni momo idia gaukaralaia lasi. Samuel ia gwau, “Ai itaia Iehova ese ai ia durua abia hidi maorodia ai karaia totona bona emai guriguri ia haerelaidia. Iehova be ai dekenai ia moale bona ai ia lalokau henia, guna unai bamona ai mamia lasi.” Emu haroro gaukara oi habadaia diba, a? Bema oibe, Iehova ese emu dabu gaudia do ia henia bona iena turana ai do oi lao.​—Sal. 18:25.

8. Ivan bona Viktoria edia ekspiriens amo dahaka oi dibaia?

⁸ Iseda hesiai gaukara ita moalelaia. Mani Ivan bona Viktoria edia hereva ita itaia, idia be Kyrgyzstan ai idia painia. Idia be kohu momo lasi maurina idia noholaia dainai asainmen idauidau idia durua. Hegeregere konstraksen gaukaradia dekenai idia volantia diba. Ivan ia gwau: “Emai asainmen ta ta dekenai ai gaukara goada. Ena be hora momo ai gaukara dainai ai hesiku bada, to ai moale bona lalomaino ai abia badina ai diba emai goada ai gaukaralaia Basileia gaukaradia ai durua totona. Danu, ai moale bada badina turadia momo ai davaria bona ekspiriens namodia momo ai moalelaia.”​—Mar. 10:29, 30.

9. Ena be taihu ta be hekwakwanai ia davaria, to edena dala ai haroro gaukara ia habadaia bona dahaka namo ia davaria?

⁹ Ena be hekwakwanai ita davaria to Iehova ena hesiai gaukara dekenai moale ita davaria diba. Hegeregere, West Africa dekenai, vabu ta ladana Mire be guna doketa ta, to ena gaukara amo ia doko bona painia gaukara ia hamatamaia. Mire be roki gorere ia abia dainai, ruma-ta-ruma-ta haroro gaukara dekenai hora tamona sibona ia haroro. To troli haroro dekenai nega bada ia haroro diba. Ia be mai ena lou henia bona Baibel stadi momo, bona idia haida be telefon amo ia rini henidia. Dahaka dainai Mire ia ura Iehova ena gaukara dekenai nega bada ia henia? Ia gwau, “Iehova bona Iesu Keriso lau lalokau henidia bada. Bona nega momo Iehova ena heduru lau noia, egu hesiai gaukara lau goadalaia totona.”​—Mat. 22:36, 37.

10. Petero Ginigunana 5:10 hegeregerena, hesiai gaukara idia habadaia taudia be Iehova amo dahaka namo idia abia?

¹⁰ Iehova amo treinini ma haida ita abia. Mauritius dekenai painia ta ladana Kenny be unai ia hamomokania, hereva momokani ia dibaia neganai iunivesiti ia rakatania, ia bapatiso, bona ful-taim hesiai gaukara ia karaia. Kenny ia gwau, “Lau ura peroveta tauna Isaia ena hereva lau badinaia, ia gwau: ‘Lau inai! Lau oi siaia!’” (Isa. 6:8) Kenny be konstraksen gaukaradia bona ena gado dekenai Baibel bukadia hahanaia gaukarana ia durua. Ia gwau, “Treinini lau abia egu asainmen idauidau lau hagugurua totona. To unai gaukara karaia dalana sibona lau dibaia lasi. Lau dibaia gauna ta be, egu diba be mai ena hetoana, bona danu Iehova ena hesiai tauna namona ai lau lao totona kara namodia haida lau hahedinaraia be namo.” (1 Petero 5:10 duahia.) Oi danu be emu mauri ai gau haida oi haidaua diba, unai amo dala idauidau ai Iehova ese oi dekenai treinini do ia henia.

11. South Korea ai taihu haida be idia haroro totona dahaka idia karaia, bona dahaka namo ia vara? (Rau 1 ena laulau itaia.)

¹¹ Lagani momo lalonai idia noho Witnes taudia be haroro dala matamata idia tohoa totona treinini idia abia be namo. COVID-19 gorere negana ai, South Korea ena kongrigeisen ta ena elda taudia idia gwau: “Pablisa haida be mai edia gorere dainai  guna idia haroro diba lasi, to hari vidio amo idia haroro hanaihanai. Mauri lagani 80 bamona taihu toi be kompiuta gaukaralaia dalana idia dibaia, bona hari dina ta ta ai idia haroro.” (Sal. 92:14, 15) Oi ura emu haroro gaukara oi habadaia bona Iehova ena namo oi itaia, a? Unai oi hagugurua daladia haida do ita herevalaia.

12. Iehova ia gwauhamata ia dekenai idia tabekau taudia totona dahaka do ia karaia?

¹² Iehova dekenai ita tabekau. Ita gaukara goada Iehova ita hesiai henia neganai ia gwauhamata ita do ia hanamoa. (Mal. 3:10) Colombia ai, taihu ta ladana Fabiolar be Iehova ese ia dekenai unai gwauhamata ia hagugurua dalana ia itaia. Ia bapatiso murinai ia ura ia painia. To moni gaukara ia karaia noho badina ia ura ena adavana bona ena natudia toi ia durua. To ena gaukara amo ia doko gwauraia neganai, Iehova dekena ia guriguri goadagoada. Ia gwau: “Nega momo taunimanima be nega daudau idia naria murinai edia pensen monina idia abia matamaia, to lau be hua ta murinai egu pensen monina lau abia matamaia. Unai be hoa gauna!” Hua rua murinai painia gaukara lau hamatamaia. Hari iena mauri lagani be 70 bona lagani 20 bamona ia painia vadaeni. Unai nega lalonai taunimanima 8 ia durua bapatiso idia abia totona. Ia gwau: “Ena be nega haida egu tauanina ia manoka, to Iehova ese dina ta ta lau ia durua egu sediual lau badinaia totona.”

13-14. Edena haheitalai ese ita ia durua Iehova dekenai ita tabekau bona eda hesiai gaukara do ita habadaia?

 ¹³ Iehova dekenai idia tabekau taudia edia haheitalai tohotohoa. Baibel lalonai Iehova idia hesiai henia goadagoada taudia momo edia sivarai idia noho. Nega momo, idia ese kara ta idia karaia guna bena Iehova ese ia hanamodia. Hegeregere, Aberahamo be do ia lao gabuna ia diba lasi, to ena hanua ia rakatania murinai Iehova ese ia hanamoa. (Heb. 11:8) Iakobo be aneru ida ia rosia helulu murinai hahenamo ia abia. (Gen. 32:24-30) Israela besena be gwauhamata tanona dekenai do idia vareai gwauraia neganai, hahelaga taudia be Ioridane Sinavai lalonai edia aena idia atoa vareai murinai, taunimanima idia raka hanaia diba.​—Ios. 3:14-16.

¹⁴ Hari inai negai, Iehova dekenai idia tabekau taudia bona edia hesiai gaukara idia habadaia taudia edia haheitalai ita tohotohoa diba. Hegeregere, Payton bona ena adavana Diana be haroro gaukara idia habadaia tadikaka taihu edia ekspiriens duahia karana idia moalelaia. Payton ia gwau: “Unai sivarai idauidau ai duahia neganai, unai be hegeregere ta be aniani namona ia moalelaia noho karana ai itaia noho bamona. Bona nega momo unai gaudia ai duahia dainai ai danu ai ura ‘Iehova ai tohoa bona ena namo do ai itaia.’” Gabeai, Payton bona Diana be pablisa momo lasi gabuna dekenai idia lao. Oi ese unai bamona sivarai oi duahia danu, a? Bona jw.org ai inai vidio, Witnessing in Isolated Territory​—Australia bona Witnessing in Isolated Territory​—Ireland oi itaia vadaeni, a? Unai gaudia ese oi do idia durua emu haroro gaukara oi habadaia totona.

15. Edena dala ai ita bamoa taudia ese ita idia durua diba?

¹⁵ Ita idia hagoadaia taudia ita bamoa. Aniani ta idia moalelaia taudia ita bamoa neganai, ita ura unai aniani matamata ita tohoa danu. Unai hegeregerena, Iehova hesiai henia karana idia atoa guna taudia ita bamoa neganai, ita danu do ita ura iseda hesiai gaukara ita habadaia. Kent bona ena adavana Veronica ese unai idia hamomokania. Kent ia gwau, “Emai turadia bona famili ese ai idia hagoadaia haroro dala matamatadia ai tohoa totona, ai laloparara Basileia idia tahua guna taudia ai bamoa neganai, goada ai abia haroro dala matamatadia ai tohoa totona.” Hari Kent bona Veronica be Serbia ai, spesel painia gaukara idia karaia.

16. Luka 12:16-21 ena haheitalai hegeregerena, dahaka dainai Iehova hesiai henia totona gau haida ita rakatania be namo?

¹⁶ Iehova ita hesiai henia totona gau haida ita rakatania. Iehova ena ura ita karaia totona, ita moalelaia gaudia ibounai do ita rakatania lasi. (Had. 5:19, 20) To, bema Iehova ita hesiai henia lasi badina ita ura lasi ita moalelaia gaudia ibounai ita rakatania, ita be Iesu ena parabole lalonai ia gwauraia tauna bamona, ia ura mauri namona ia noholaia dainai Dirava ia dadaraia. (Luka 12:16-21 duahia.) France dekenai, tadikaka ta ladana Christian, ia gwau, “Lau ese egu nega bona goada bada lau henia lasi Iehova lau hesiai henia bona egu famili lau durua totona.” Ia bona ena adavana be abia hidi idia karaia idia painia totona. To unai idia karaia totona edia moni gaukara idia rakatania. Sibona idia durua totona bisinesi maragina ta idia haginia bona moni momo lasi maurina idia noholaia matamaia. Gau haida idia rakatania bona idia painia dainai idia moale, a? Christian ia gwau, “Hari emai haroro gaukara ai moalelaia bada bona ai itaia  Baibel stiuden bona lou henia be Iehova idia dibaia neganai, ai moale bada.”

17. Dahaka ese ita ia koua diba haroro dala matamata ita tohoa totona?

¹⁷ Haroro dala matamatadia ita tohoa. (Kara 17:16, 17; 20:20, 21) United States ai painia ta ladana Shirley, be COVID-19 gorerena negana ai ena haroro dalana ia haidaua. Matamanai ia daradara telefon amo ia haroro totona, to sekit tauna ena vadivadi lalonai treinini ia abia murinai, hanaihanai telefon amo ia haroro. Ia gwau: “Matamanai lau gari, to hari unai lau moalelaia. Ruma-ta-ruma-ta haroro gaukarana ai momo ai haroro henia lasi, to hari taunimanima momo ai haroro henia!”

18. Hekwakwanai ita hanaia totona dahaka ese ita do ia durua?

¹⁸ Palani karaia bona hagugurua. Hekwakwanai ita davaria neganai, heduru totona ita guriguri bona do ita karaia gaudia ita laloa namonamo. (Aon. 3:21) Europe ai, Romany gado grup ia durua painia ta ladana Sonia ia gwau: “Lau ura karaia palani be pepa ta dekenai lau torea bona lau itaia haraga gabuna dekenai lau atoa. Pepa dekenai dala rua be gabu idaudia dekenai idia lao ena laulau lau torea, bona teibolo dekenai lau atoa. Abia hidi ta lau ura karaia neganai, unai dala rua lau itaia, unai ese lau ia durua bema egu palani do lau hagugurua eiava lasi.” Sonia ia ura lalohadai maorona do ia dogoatao noho. Ia gwau, “Namona be inai bamona lau laloa, lau davaria hekwakwanai be haba ta bamona lau idia koua eiava nese ta bamona lau idia durua egu palani lau hagugurua totona.”

19. Edena dala ai Iehova ese ita ia hanamoa karana ita laloa bada?

¹⁹ Iehova ese dala momo ai ita ia hanamoa. Bona unai gaudia ita laloa bada dalana be ita gaukara goada Ia ita hanamoa totona. (Heb. 13:15) Oibe, dala idauidau ai Iehova ita hesiai henia diba, bena Iehova be ita do ia hanamoa bada. Dina ta ta ai dala ita tahua ‘Iehova ita tohoa bona do ita itaia ia be namo.’ Bena ita be Iesu ena lalohadai do ita abia, ia gwau: “Egu aniani be lau ia siaia tauna ena ura do lau karaia bona lau dekenai ia henia gaukarana do lau hagugurua.”​—Ioa. 4:34.