1. Iehova ena Witnes ta ai ita lao karana ita herevalaia neganai, dahaka namo ia havaraia?

 “EDENA dala ai Iehova ena Witnes ta ai oi lao?” Reana unai henanadai be nega momo oi haerelaia vadaeni. Tadikaka o taihu ta ita diba namonamo totona, unai bamona henanadai ita henia. Ita ura tadikaka bona taihu ese Iehova idia dibaia bona lalokau henia ena sivarai ita kamonai, bona ita be mai moale ida idia dekenai hereva momokani ita abia dae ena badina ita herevalaia. (Roma 1:11) Unai herevahereva karana ese ita ia durua, Iehova ena Witnes ta ai ita lao karana ita laloa bada. Danu iseda lalona ita hadaia ‘hereva momokani ai ita raka noho,’ anina be, Iehova ia ura henia dalana ita badinaia noho, unai amo ita do ia hanamoa bona lalonamo henia.​—3 Ioa. 4.

2. Inai atikol ai dahaka do ita herevalaia?

² Inai atikol ai, hereva momokani ita ura henia bada ena badina haida do ita itaia. Bona hereva momokani ita badinaia noho dalana do ita herevalaia. Oibe, inai atikol ese ita do ia durua Iehova ese hereva momokani dekenai ita ia veria mai karana ita laloa bada totona. (Ioa. 6:44) Danu do ita ura ma haida dekenai Baibel ena hereva momokani ita herevalaia.

3. Dahaka dainai hereva momokani ita ura henia bada?

³ Badina momo dainai hereva momokani ita ura henia bada. Mai anina bada gauna be, hereva momokani ia henia tauna, Iehova Dirava, ita lalokau henia. Baibel amo ita diba, Iehova  be tanobada ia Karaia Tauna sibona lasi, to danu ia be ita ia laloa bada lalokau guba tamana. (1 Pet. 5:7) Ita diba Iehova be ‘hebogahisi Diravana, ia badu haraga lasi, iena lalokau be bada herea bona nega ibounai ena hereva ia hamomokania.’ (Eso. 34:6) Iehova be kota maoromaorona ia ura henia bada. (Isa. 61:8) Metau ita davaria neganai, Iehova ia lalohisihisi, bona ia ura bada hisihisi ibounai ia haorea. (Ier. 29:11) Ita be unai nega namona ita naria danu! Unai badina dainai Iehova ita lalokau henia bada!

4-5. Dahaka dainai aposetolo Paulo ese iseda helaro be dogo ida ia hahegeregerea?

⁴ Dahaka badina ma ta dainai, hereva momokani ita ura henia bada? Hereva momokani dainai namo ita davaria. Mani haheitalai ta ita laloa. Baibel ena hereva momokani ta be, vaira nega ena helaro. Aposetolo Paulo ese haheitalai ta amo ia hahedinaraia unai helaro be mai anina bada, ia gwau: “Ita abia helaro be iseda mauri ena dogo bamona, ia be ia momokani bona ia goada.” (Heb. 6:19) Dogo ese bouti ia dogoatao hegeregerena, Baibel amo ita dibaia helaro ese hekwakwanai negadiai ita ia hagoadaia.

⁵ Heberu 6:19 ai, Paulo be horoa Keristani taudia ese idia laloa bada guba helarona ia herevalaia. To tanobada paradaisona ai mauri hanaihanai do idia abia Keristani taudia dekenai Paulo ena hereva be mai anina bada danu. (Ioa. 3:16) Momokani, iseda mauri be mai anina, badina mauri hanaihanai ena helaro ita dibaia.

6-7. Yvonne be vaira nega ena helaro ia dibaia dainai, dahaka namo ia davaria?

⁶ Taihu ta ladana Yvonne ena ekspiriens mani ita laloa. Ia be hereva momokani lalonai ia tubu daekau lasi, bona ia maragi neganai mase dekenai ia gari. Ia ese buka ta dekenai ia duahia herevana ia laloaboio lasi, unai hereva ia gwau: “Dina ta kerukeru do ia mai lasi.” Yvonne ia gwau: “Unai hereva dainai lau mahuta namonamo lasi bona vaira nega sibona lau laloa. Lau laloa ‘reana ita be do ita mauri hanaihanai lasi.’ ‘Dahaka dainai lau vara?’ Lau ura lasi lau mase!”

⁷ Yvonne be matamata neganai, Iehova ena Witnes taudia ia davaria. Ia gwau: “Hari lau abia dae momokani egu helaro be tanobada paradaiso ai mauri hanaihanai do lau abia.” Iseda taihu be vaira nega ena helaro ia dibaia dainai, dahaka namo ia davaria? Ia gwau: “Hari lau mahuta namonamo bona vaira nega o mase totona lau lalohekwarahi lasi.” Unai ese ia hahedinaraia, Yvonne be Baibel ena hereva momokani ia ura henia bada, bona ma haida dekenai ena helaro herevalaia karana ia moalelaia.​—1 Tim. 4:16.

8-9. (a) Iesu ese ia gwauraia parabolena ai, tau ta ese ia davaria dava bada kohuna be edena bamona ia laloa? (b) Oi ese hereva momokani be edena bamona oi laloa?

⁸ Baibel ena hereva momokani ma ta be, Dirava ena Basileia ena sivarai namona. Iesu ese unai Basileia be idia hunia dava bada kohuna ta ida ia hahegeregerea. Mataio 13:44 ai, Iesu ia gwau: “Guba Basileia be uma dekenai idia hunia dava bada kohuna ta bamona, tau ta ese ia davaria bona ia hunia lou. Bona ia moale dainai ia lao bona ena kohu ibounai ia hoihoilaia bona unai uma ia hoia.” Unai tau be dava bada kohuna ia tahua totona ia lao lasi, to unai ia davaria neganai, gau momo ia dadaraia, unai kohu ia abia totona. Oibe, ia dekenai idia noho gaudia ibounai ia hoihoilaia. Dahaka dainai? Badina ia diba ia davaria kohu be dava bada gauna. Bona ia dadaraia gaudia ibounai ia hereaia.

⁹ Oi ese hereva momokani be unai bamona oi laloa, a? Oibe! Iehova ita hesiai henia  moalena be tanobada ese ia henia moalena ia hereaia, badina vaira nega ai Dirava ena Basileia henunai mauri hanaihanai do ita moalelaia. Iehova ita tura henia karana be hahenamo badana, bona unai ese ita dadaraia gaudia ia hereaia. Bona ita ura bada ‘ia do ita hamoalea.’​—Kol. 1:10.

10-11. Dahaka ese Michael ia hagoadaia ena mauri ai senisi badadia ia karaia totona?

¹⁰ Momo be Iehova ena lalonamo idia abia totona idia ura henia bada gaudia idia dadaraia. Haida be pei bada moni gaukara idia rakatania. Haida be kohu momo tahua karana idia dadaraia. To ma haida be Iehova idia dibaia neganai, edia mauri dalana idia haidaua momokani. Michael be unai bamona ia karaia. Ia be hereva momokani lalonai ia tubu daekau lasi. Ia be matamata neganai, karati treinini ia abia. Ia gwau: “Egu tauanina ia goada noho totona lau treinini momo. Nega haida, lau mamia ta ese lau ia heatu henia diba lasi.” To Michael be Baibel ia stadilaia matamaia neganai, Iehova ena lalohadai dagedage karadia dekenai ia dibaia. (Sal. 11:5) Michael ese ia idia stadi henia headava tau bona hahine ia herevalaia, ia gwau: “Idia ese lau idia hamaoroa lasi karati lau rakatania totona, to lau dekenai Baibel ena hereva momokani idia hadibaia noho.”

¹¹ Michael be Iehova ia dibaia noho lalonai, Ia dekenai ena lalokau ia bada. Michael ia hagoadaia gauna ta be ia itaia Iehova be ia idia tomadiho henia taudia ia hebogahisi henia. Nega ia lao noho lalonai, Michael ia laloparara ena mauri ia haidaua totona disisen ta ia karaia be namo. Ia gwau, “Ia auka karati lau rakatania totona. To danu lau diba unai ese Iehova do ia hamoalea, bona lau abia dae momokani Ia hesiai henia karana ese lau dadaraia gaudia ia hereaia.” Michael be hereva momokani ia laloa bada, bona unai ese ia durua ena mauri ai senisi badadia ia karaia totona.​—Iam. 1:25.

12-13. Edena dala ai, Baibel ena hereva momokani ese Mayli ia durua?

¹² Baibel ese hereva momokani be dibura lalonai ia diari noho lamepa ta ida ia hahegeregerea, unai amo ia hahedinaraia hereva momokani be mai anina bada. (Sal. 119:105; Efe. 5:8) Azerbaijan taihuna ladana Mayli ese Baibel amo ia abia heduru ia laloa bada. Iena tama sina edia tomadiho be idauidau. Ena tamana be Muslim tomadiho ia badinaia, bona ena sinana be Jewish tomadiho ia badinaia. Mayli ia gwau: “Ena be lau abia dae Dirava ia noho, to gau momo dekenai lau daradara. Lau laloa, ‘Dahaka dainai Dirava ese taunimanima ia karaia? Bona dahaka dainai ta ia hisihisi noho bona gabeai hel dekenai do ia hisihisi hanaihanai?’ Taunimanima idia gwau idia vara gaudia ibounai be Dirava ena ura dainai idia vara, unai dainai lau laloa, ‘Dirava be taunimanima ia biagua noho bona idia hisihisi neganai ia moale, a?’”

¹³ Mayli be unai henanadai edia haere ia tahua noho. Gabeai, Baibel ia stadilaia bona Iehova ena Witnes ta ai ia lao. Ia gwau, “Baibel ena haere maorodia ese lau ia durua lau moale totona. Danu, unai ese lau dekenai lalomaino ia henia.” Mayli hegeregerena, ita ibounai ese Iehova ita hanamoa, badina “ia ese [ita] be dibura amo ena diari namo herea dekenai ia boiria mai.”​—1 Pet. 2:9.

14. Edena dala ai hereva momokani ita ura henia bada? (Maua itaia danu: “ Haheitalai Ma Haida.”)

¹⁴ Ita ese Baibel amo haheitalai haida sibona ita herevalaia, unai ese ia hahedinaraia hereva momokani be mai anina bada. Reana oi danu be unai bamona haheitalai momo oi laloa. Sibona iseda stadi lalonai hereva  momokani ita ura henia bada ena badina haida ita tahua, ani? Unai bamona ita karaia neganai, hereva momokani ita ura henia bada.

15. Edena dala ma ta ai ita hahedinaraia, hereva momokani ita ura henia bada?

¹⁵ Hanaihanai Baibel bona pablikeisen idauidau ita stadilaia neganai, ita hahedinaraia hereva momokani ita ura henia bada. Ena be lagani momo hereva momokani lalonai ita noho, to diba ita abia noho be namo. Magasin gunana ta ia gwau: “Hereva momokani be tano gagaena ai ia tubu flaoaflaoa bamona, unai flaoaflaoa be idia tubu haraga ava dikadia ese idia hagegea bona kahirakahira idia hamasea. Unai flaoaflaoa oi davaria totona, namona be oi tahua namonamo. . . . Bema oi davaria, oi igo diho bona oi abia. To, hereva momokani ena flaoaflaoa tamona sibona oi abia lasi. . . . Flaoaflaoa momo herea oi tahua bona gogoa be namo.” Ena be stadi karana be mai ena hekwarahi, to unai ese namo ia havaraia.

16. Edena stadi dalana oi moalelaia? (Aonega Herevadia 2:4-6)

¹⁶ Ita momo be duahiduahi bona stadi karana dekenai ita manada momokani lasi. To, Iehova ese ita ia boiria hereva momokani  ita “tahua noho,” unai amo ita lalopararalaia namonamo diba. (Aonega Herevadia 2:4-6 duahia.) Ita hekwarahi unai bamona ita karaia neganai, namo do ita davaria. Corey be Baibel duahiduahi ia karaia neganai, siri ta ia stadilaia namonamo. Ia gwau: “Futnout ta ta lau duahia, Baibel siri ibounai (cross-reference) lau sekea, bona tahua gaukara ma haida lau karaia. . . . Unai stadi dalana ese lau ia durua gau momo lau dibaia totona!” Ena be unai bamona stadi dalana o dala ma ta ita badinaia, to stadi totona iseda nega bona goada ita henia neganai, ita hahedinaraia hereva momokani be mai anina bada.​—Sal. 1:1-3.   

17. Hereva momokani ita stadilaia sibona lasi, to dahaka ita karaia be namo? (Iamesi 1:25)

¹⁷ Oibe, hereva momokani ita stadilaia sibona be hegeregere lasi. Namo ita davaria totona, ita dibaia gaudia ita badinaia be gau badana. Unai amo moale korikori do ita davaria. (Iamesi 1:25 duahia.) Edena dala ai, ita dibaia gaudia ita badinaia diba? Tadikaka ta ia gwau iseda mauri dalana ita sekea neganai, do ita itaia ita dibaia gaudia ita badinaia eiava lasi. Aposetolo Paulo ia gwau: “Hari ita goada hegeregerena, unai dala tamona ai do ita raka namonamo noho.”​—Fili. 3:16.

18. Dahaka dainai ita gaukara goada ‘hereva momokani ai ita raka noho’ totona?

¹⁸ Ita gaukara goada ‘hereva momokani ai ita raka noho’ neganai, ita ia durua dalana mani ita laloa! Hereva momokani ese iseda mauri dalana ia hanamoa sibona lasi, to Iehova bona tadikaka taihu ia hamoalea danu. (Aon. 27:11; 3 Ioa. 4) Oibe, badina namodia dainai hereva momokani ita ura henia bada bona iseda mauri dalana amo ita hahedinaraia ita dibaia gaudia ita badinaia noho!