1. Dahaka dainai Iesu ese Iehova ia noia ena murinai idia raka taudia ia gimaia totona?

 IESU ia do mase lasi hanuaboina ai, iena guba Tamana dekenai mai anina bada noinoi ta ia karaia. Iehova ia noia ena murinai idia raka taudia ia gimaia totona. (Ioa. 17:15, 20) Oibe, Iehova be nega ibounai ena taunimanima ia naria bona gimaia. To, Iesu ia diba ena murinai idia raka taudia be Satani ese do ia dagedage henia. Danu ia laloparara Iehova ena heduru idia abia be namo, unai amo Diabolo ena dagedage karadia idia haheaukalaia diba.

2. Salamo 33:18-20 hegeregerena, dahaka dainai hekwakwanai negadiai ita gari lasi be namo?

² Satani ena taunimanima ese Keristani taudia momokanidia dekenai hekwakwanai momo idia havaraia. Ita davaria hekwakwanai ese ita ia hamanokaia diba, bona Iehova badinaia karana ia tohoa danu. To inai atikol ese ita do ia hagoadaia ita gari lasi totona. Iehova ese ita davaria hekwakwanai idauidau ia itaia noho, bona ia noho hegaegae ita ia durua totona. Mani Baibel ai idia noho sivarai rua ita herevalaia, unai ese ia hahedinaraia Iehova be “ia dekenai idia gari taudia ia itaia noho.”​—Salamo 33:18-20 duahia.

3. Edena bamona negadiai ita mamia ita be sibona ita noho?

³ Ena be kongrigeisen ai iseda tadikaka bona taihu be momo, to nega haida ita mamia ita be sibona ita noho. Hegeregere, sikuli ai matamata taudia be klas vairanai edia abidadama idia gwauraia hedinarai eiava kongrigeisen ma ta dekenai idia lao neganai, idia mamia ta be idia ia laloa bada lasi. Reana ita laloa ta ese ita ia durua lasi sibona ita noho ena hemami ita hanaia totona, unai dainai ita lalohisihisi eiava lalometau. Reana ita ura lasi ma haida dekenai iseda hemami ita gwauraia, badina  ita laloa do idia laloparara lasi. Bona nega haida, reana ita laloa haida ese ita idia laloa bada eiava lasi. Ena be badina idauidau dainai sibona ita noho ena hemami ita abia, to nega haida ita lalohisihisi bona lalohekwarahi danu. Iehova ia ura lasi unai bamona hemami ita abia. Dahaka dainai unai bamona ita hereva?

4. Dahaka dainai peroveta tauna Elia ia gwau: “Lau sibona lau do noho”?

⁴ Mani abidadama tauna Elia ena haheitalai ita laloa. Iesebele ia gwau Elia do ia alaia, unai dainai dina 40 mai kahana lalonai ia hunia. (1 Kin. 19:1-9) Dokonai, ia be kohua ta lalonai ia noho neganai, Iehova dekenai ia gwau: “Lau sibona lau do noho.” (1 Kin. 19:10) Israela ai peroveta taudia ma haida idia noho. Idia be Obadaia ese Iesebele amo ia hamauria peroveta taudia 100. (1 Kin. 18:7, 13) Dahaka dainai Elia ia mamia ia be sibona ia noho? Reana ia laloa Obadaia ese ia hamauria peroveta taudia ibounai idia mase vadaeni, a? Eiava ena be Karamele Ororona ai Iehova ia hamomokania ia be Dirava momokanina, to ta ia noho lasi Iehova ia hesiai henia dainai, Elia ia laloa ia be sibona ia noho, a? Eiava reana ia laloa ia davaria hekwakwanai be ta ia diba lasi, o ta ese ia laloa bada lasi, a? Unai sivarai ese Elia ena hemami ibounai ia gwauraia hedinarai lasi. To ita diba Iehova ese Elia ena hemami ia lalopararalaia bona ia durua dalana ia diba.

5. Edena dala ai, Iehova ese Elia ia hadibaia ia be sibona ia noho lasi?

⁵ Iehova ese dala idauidau ai Elia ia durua bona ia hagoadaia ena lalohadai ia gwauraia totona. Iehova ese nega rua Elia ia nanadaia: “Oi be iniseniai dahaka oi karaia?” (1 Kin. 19:9, 13) Nega ta ta ai, Elia ena hemami ia gwauraia neganai Iehova ia kamonai. Iehova ena siahu ia hahedinaraia karana amo ia hamomokania ia be Elia ida ia noho. Danu Iehova ese Elia ia hadibaia Israela taudia momo be Ia idia tomadiho henia noho. (1 Kin. 19:11, 12, 18) Oibe, Elia ena lalohadai ibounai ia gwauraia bona Iehova ese ia haere henia murinai, Elia ena hemami ia namo. Iehova ese Elia dekenai mai anina bada gaukara haida ia henia. Elia ia noia Hasaele be Suria ena king ai ia halaoa, Iehu be Israela ena king ai ia halaoa, bona  Elisaia be peroveta tauna ai ia halaoa. (1 Kin. 19:15, 16) Iehova ese Elia dekenai unai gaukara ia henia, unai amo Elia ia durua gau namodia ia laloa totona. Danu Dirava ese Elisaia ia abia hidi Elia ida idia gaukara hebou totona. Sibona oi noho ena hemami oi abia neganai, edena dala ai Iehova ese oi ia durua diba?

6. Sibona oi noho ena hemami oi abia neganai, dahaka gaudia totona oi guriguri diba? (Salamo 62:8)

⁶ Iehova ese oi ia boiria ia oi guriguri henia totona. Oi davaria hekwakwanai ia itaia, bona ia gwauhamata nega idauidau ai emu guriguri do ia kamonai. (1 Tes. 5:17) Ia moale ia idia tomadiho henia taudia ia kamonai henia totona. (Aon. 15:8) Sibona oi noho ena hemami oi abia neganai, dahaka gaudia totona oi guriguri be namo? Emu lalona ai idia noho gaudia ibounai be Iehova dekenai oi gwauraia, Elia ia karaia bamona. (Salamo 62:8 duahia.) Iehova dekenai emu lalohekwarahi bona hemami oi herevalaia. Ia oi noia oi ia durua oi haheauka totona. Hegeregere, sikuli dekenai oi haroro totona oi mamia oi be sibona bona oi gari neganai, Iehova oi noia goada ia henia, unai amo oi haroro diba. Danu Ia oi noia aonega ia henia, unai amo oi abia dae gaudia oi herevalaia namonamo. (Luka 21:14, 15) Bema oi lalometau eiava lalomanoka, Iehova oi noia oi ia durua lo tauna ta ida oi herevahereva totona. Iehova oi noia unai Keristani tauna ia durua emu hemami ia lalopararalaia totona. Iehova dekenai emu lalona ai idia noho gaudia ibounai oi gwauraia, emu guriguri ia haerelaia daladia oi itaia, bona ma haida edia heduru oi abia dae. Bema unai bamona oi karaia, sibona oi noho ena hemami do oi abia lasi.

7. Marisio ena haheitalai amo dahaka oi dibaia?

⁷ Iehova ese ita dekenai mai anina bada gaukarana ta ia henia. Oi abia dae momokani, kongrigeisen bona haroro gaukara lalonai oi karaia gaudia ibounai be Iehova ese ia itaia bona laloa bada. (Sal. 110:3) Oi mamia oi be sibona oi noho neganai, edena dala ai hesiai gaukara dekenai oi bisi karana ese oi ia durua? Mani tadikaka matamata, Marisio, ena haheitalai ita laloa. * Ia bapatiso bona daudau lasi murinai, ena turana namona ta be metairametaira hereva momokani ia rakatania matamaia. Marisio ia gwau, “Lau itaia egu turana be Iehova ia rakatania neganai, lau lalomanoka. Lau laloa Iehova hesiai henia totona lau karaia gwauhamata do lau hagugurua bona orea lalonai do lau noho eiava lasi. Lau mamia lau be sibona lau noho bona lau laloa ta be egu hemami ia lalopararalaia lasi.” Dahaka ese Marisio ia durua? Ia gwau, “Haroro gaukara lau habadaia. Unai ese lau ia durua sibona lau laloa bada lasi bona lalohadai kereredia lau dadaraia. Haroro gaukara ai ma haida ida lau gaukara hebou neganai, lau moale bona lau mamia lau be sibona lau noho lasi.” Momokani, ena be tadikaka taihu  ida ruma-ta-ruma-ta haroro gaukara ita karaia lasi, to revareva bona fon amo ita haroro hebou karana ese ita ia hagoadaia. Dahaka gaudia ma haida ese Marisio ia durua? Ia gwau: “Kongrigeisen ai gaukara ma haida lau karaia danu. Wiki ena hebou totona stiuden ena kahana lau hegaegaelaia namonamo bona lau karaia. Unai bamona lau karaia neganai, Iehova bona ma haida be lau dekenai idia moale.”

8. Hekwakwanai badadia idia vara neganai, iseda hemami be edena bamona?

⁸ Ita diba inai dina gabedia ai hekwakwanai momo do ita davaria. (2 Tim. 3:1) To, hekwakwanai ta ia vara neganai ita diba lasi dahaka do ita karaia. Reana moni ena hekwakwanai ita davaria haraga, eiava doketa ia gwau ita be gorere badana ta ita abia, eiava ita lalokau henia tauna ta ia mase. Unai bamona negadiai, reana do ita lalohisihisi bona lalometau bada, badina hekwakwanai ta ta idia vara eiava nega tamona idia vara. To laloatao, Iehova be ita dekenai idia vara gaudia ia itaia, bona Iena heduru amo hekwakwanai idauidau ita haheaukalaia diba.

9. Iobu ese ia davaria hekwakwanai haida oi herevalaia.

⁹ Iehova ese abidadama tauna Iobu ia durua dalana mani ita laloa. Iobu be nega kwadogina lalonai hekwakwanai badadia ia davaria. Dina tamona lalonai, Iobu ia kamonai ena animal ibounai idia henao eiava alaia, bona ena hesiai taudia bona ena natudia idia hamasea. (Iobu 1:13-19) Daudau lasi murina, Iobu ia do lalohisihisi noho lalonai gorere badana ta ia abia. (Iobu 2:7) Iobu ena noho dalana ia dika momokani dainai, ia gwau: “Egu mauri lau ura henia lasi momokani. Lau ura lasi lau mauri noho.”​—Iobu 7:16.

10. Edena dala ai, Iehova ese Iobu ia durua ena hekwakwanai ia haheaukalaia totona? (Rau 1 ena laulau itaia.)

¹⁰ Iehova ese Iobu ia itaia noho. Ia ese Iobu ia lalokau henia dainai, ia durua ena hekwakwanai ia haheaukalaia totona. Ia ese Iobu ia hereva henia, unai amo do ia laloatao, Iehova aonega be bada herea bona Ia havaraia gaudia ia laloa bada. Iehova ese animal idauidau ia herevalaia. (Iobu 38:1, 2; 39:9, 13, 19, 27; 40:15; 41:1, 2) Danu tau matamata ladana Elihu ia gaukaralaia Iobu ia durua bona hagoadaia totona. Elihu ese Iobu ia hamaoroa Iehova be nega ibounai ena hesiai taudia edia haheauka karana dainai idia ia hanamoa. To Iehova ese Elihu ia gaukaralaia mai lalokau ida Iobu ia sisiba henia totona. Elihu be Iobu ia hamaoroa bema ita be iunives ia Havaraia Tauna, Iehova, ida ita hahegeregerea, ita be maragi momokani, unai ese Iobu ia durua sibona ia laloa bada lasi totona. (Iobu 37:14) Iehova ese Iobu dekenai gaukara ta ia henia danu. Ia hamaoroa ena turadia toi be idia kara dika dainai idia totona ia guriguri be namo. (Iobu 42:8-10) Hekwakwanai badadia ita davaria neganai, edena dala ai Iehova ese ita ia durua?

11. Hekwakwanai idauidau ita davaria neganai, edena dala ai Baibel ese ita ia durua?

¹¹ Iehova be maoromaoro ita ia hereva henia lasi, Iobu ia hereva henia bamona, to Iena Hereva, Baibel, amo ita ia hereva henia. (Roma 15:4) Iehova ese vaira nega ena helaro ia henia, unai amo ita ia hagoadaia. Hekwakwanai ita davaria neganai, Baibel ena hereva haida ese ita ia hagoadaia dalana mani ita laloa. Baibel ai, Iehova ia gwauhamata gau ta eiava hekwakwanai badadia ese Iena “lalokau . . . amo, ita ia hapararaia diba lasi.” (Roma 8:38, 39) Danu Iehova ia gwau, ia be “ia dekenai idia boiboi taudia kahirakahira ia noho.” (Sal. 145:18) Iehova be ita ia hamaoroa bema ia dekenai ita tabekau, hekwakwanai idauidau do ita haheaukalaia bona ita moale noho. (1 Kor. 10:13; Iam. 1:2, 12) Danu Baibel ena hereva ese ita ia hadibaia ita davaria metau idauidau be  do idia noho daudau lasi, to Dirava ese vaira nega totona ia gwauraia hahenamo be do idia noho hanaihanai. (2 Kor. 4:16-18) Ita abia dae momokani, Iehova ese Satani Diabolo bona ia idia badinaia kara dika taudia do ia hadikaia ore. (Sal. 37:10) Vaira negai hahetoho idauidau oi haheaukalaia totona, oi ia hagoadaia Baibel siri haida oi laloatao, a?

12. Baibel amo heduru ita abia totona, Iehova ia ura dahaka ita karaia?

¹² Iehova ia ura nega ita atoa Baibel ita stadilaia hanaihanai bona ita duahia gaudia ita laloa dobu. Ita dibaia gaudia ita badinaia neganai, iseda abidadama ia goada bona iseda guba Tamana kahirakahira ita lao. Unai ese ita ia hagoadaia hekwakwanai idauidau ita haheaukalaia totona. Iehova ese ena Hereva idia badinaia taudia dekenai lauma helaga ia henia danu. Bona unai siahu, “taunimanima edia siahu ia hereaia gauna,” ese ita ia durua hekwakwanai ita haheaukalaia totona.​—2 Kor. 4:7-10.

13. Edena dala ai, “hesiai tauna mai ena kamonai bona mai ena aonega” ese ita ia durua hekwakwanai ita haheaukalaia totona?

¹³ Iehova ena heduru amo, “hesiai tauna mai ena kamonai bona mai ena aonega” ese atikol idauidau, vidio, bona miusiki momo ia halasia, unai ese iseda abidadama ia hagoadaia bona Iehova kahirakahira ita noho. (Mat. 24:45) Iehova ese ia henia gaudia ibounai ita laloa bada be namo. United States ai ia noho taihu ta be abidadama hagoadaia gaudia momo dainai ia moale bada. Ia gwau: “Lagani 40 lalonai Iehova lau hesiai henia neganai, gau momo ese egu Dirava badinaia karana ia tohoa loulou.” Unai taihu ese hekwakwanai badadia ia davaria, hegeregere ena tubuna tau be kekero tauna ta ese motuka amo ia bampaia, gorere badana ta dainai ena tama sina idia mase, bona ia be nega rua kensa gorere ia abia. Dahaka ese ia durua ia haheauka totona? Ia gwau: “Iehova be hanaihanai lau ia naria. Hesiai tauna mai ena kamonai bona mai ena aonega amo Iehova ese ia henia gaudia momo ese lau ia durua lau haheauka totona. Unai dainai Iobu hegeregerena lau gwau diba: ‘Lau ese egu Dirava do lau badinaia noho ela bona lau mase!’”​—Iobu 27:5.   

14. Edena dala ai Iehova ese tadikaka taihu ia gaukaralaia metau negadiai ita idia durua? (1 Tesalonika 4:9)

¹⁴ Iehova ese ena taunimanima ia treinia metau negadiai lalokau idia hahedinaraia bona idia hagoadaia heheni totona. (2 Kor. 1:3, 4; 1 Tesalonika 4:9 duahia.) Elihu hegeregerena, hekwakwanai ita davaria neganai iseda tadikaka  bona taihu be mai ura ida ita idia durua eda abidadama ia goada noho totona. (Kara 14:22) Hegeregere, Diane dekenai ia vara gauna mani ita laloa. Iena adavana ese gorere badana ta ia davaria neganai, kongrigeisen taudia ese Diane idia durua Dirava kahirakahira ia noho totona. Ia gwau: “Ena be ia auka, to unai nega aukadia lalonai Iehova ese ai ia hagoadaia bona durua. Emai kongrigeisen ese dala idauidau dekenai ai idia durua. Idia ese ai idia vadivadi henia, fon amo idia rini, bona ai idia rosia, unai ese ai ia durua ai haheauka totona. Motuka taria dalana lau diba lasi dainai, tadikaka bona taihu ese dala idia karaia hebou bona haroro dekenai lau lao totona.” Ita moale badina kongrigeisen ai tadikaka bona taihu be mai lalokau ida ita idia durua!

15. Dahaka dainai ita diba momokani hekwakwanai ita haheaukalaia?

¹⁵ Ita ibounai ese hekwakwanai idauidau do ita davaria. To, ita sibona ese unai hekwakwanai do ita haheaukalaia lasi. Iehova be tama lalokauna ta bamona, nega ibounai ita dekenai idia vara gaudia ia itaia. Ia be ita kahirakahira ia noho, ia noho hegaegae iseda noinoi ia kamonai totona, bona ia ura ita ia durua. (Isa. 43:2) Iehova ese ita dekenai heduru gaudia momo ia henia dainai, ita diba momokani hekwakwanai idauidau do ita haheaukalaia. Ia ura ita guriguri henia, ita dekenai Baibel bona abidadama hagoadaia gaudia momo ia henia, bona tadikaka taihu ia gaukaralaia metau negadiai ita idia durua totona.

16. Edena dala ai Dirava ese ita ia naria karana ita laloa bada?

¹⁶ Iseda guba Tamana ese ita ia naria karana be hahenamo badana! “Ia dainai iseda kudouna be ia moale.” (Sal. 33:21) Iehova ese ita ia durua totona ia henia gaudia ita abia dae neganai, ita ia naria karana ita laloa bada. To danu Dirava ese ia henia gaudia ita gaukaralaia bona badinaia be namo. Anina be, bema ita hekwarahi Iehova ita kamonai henia bona kara maorodia ita karaia, ia ese hanaihanai ita do ia naria!​—1 Pet. 3:12.