• “Lau mamia egu adavana ia heudahanai loulou.”

• “Lau hemarai bona lau mamia lau be hairai lasi bona anina lasi.”

• “Tau ta dekenai lau herevalaia diba lasi. Lau lalohisihisi bona ta ese lau ia durua lasi.”

• “Lau mamia Iehova be lau ia laloa lasi.”

Ataiai idia noho herevadia ese idia hahedinaraia tau ta be ponografi ia itaia neganai ena hahine be ia lalohisihisi bada. Bona bema hua eiava lagani haida lalonai ia hunia bona unai ia karaia, hahine do ia mamia ena tau ia abidadama henia diba lasi. Hahine ta ia gwau: “Lau mamia egu adavana be lau diba lasi tauna bamona. Lau amo ma gau haida ia hunia noho, a?”

Inai atikol ai torea ponografi ia itaia tauna ena hahine durua totona. a Inai atikol ese hahine do ia hagoadaia, ia dekenai Iehova ena lalokau bona heduru ia hahedinaraia, bona ia durua Iehova kahirakahira do ia lao bona maino do ia davaria. b

Ena be emu adavana ese ia karaia gaudia ibounai oi biagua diba lasi, to gau haida oi karaia diba lalomaino oi davaria totona. Mani inai oi laloa.

Sibona oi bleim lasi. Reana hahine ia mamia ena adavana ese ponografi ia itaia karana be ena kerere. Alice c ia mamia ena adavana dekenai ia be hairai lasi. Ia laloa, ‘Dahaka dainai egu adavana be hahine ma haida ia raraia to lau ia itaia lasi?’ Hahine haida idia laloa idia ese hekwakwanai idia habadaia badina edia adavana idia badu henia. Danielle ia gwau: “Lau mamia lau moale lasi bona egu badu karana ese emai headava ia hadikaia.”

Bema unai bamona oi mamia, namona be oi diba emu adavana ena kerere dainai Iehova be oi ia bleim lasi. Iamesi 1:14 ia gwau: “Ta be sibona ena ura ese ia tohoa, unai ura ese ena lalona ia veria bona ia koia.” (Roma 14:12; Fil. 2:12) Iehova  be oi ia bleim lasi, to ia oi badinaia karana ia laloa bada.​—2 Siv. 16:9.

Reana hahine ia mamia ia be hairai lasi dainai, ena adavana be ponografi ia itaia. To, unai be momokani lasi. Diba bada taudia idia gwau, ponografi itaia karana ese mahuta hebou urana ia habadaia bona hahine ta ese unai ura ia hagugurua diba lasi.

Lalohekwarahi momo lasi. Catherine ia gwau, nega ibounai ena adavana be ponografi ia itaia karana ia lalohekwarahilaia. Frances ia gwau: “Egu adavana ia lao gabuna lau diba lasi neganai, lau laloa momo. Dina ibounai lalonai lau lalohekwarahi bada.” Taihu haida be edia adavana ena hekwakwanai idia diba taudia ida idia noho neganai, idia hemarai. To, ma haida idia gwau, idia mamia idia be sibona idia noho bamona, badina idia laloa ta be edia hekwakwanai ia lalopararalaia lasi.

Vaia unai bamona do oi mamia. To, unai gaudia sibona oi laloa neganai do oi lalohisihisi bada. Gau badana be emu hetura karana Iehova ida do oi atoa guna. Unai oi karaia neganai do oi lalogoada.​—Sal. 62:2; Efe. 6:10.

Oi do ia durua gauna be, Baibel lalonai hekwakwanai idia davaria bona Iehova idia guriguri henia hahine edia sivarai oi duahia bona laloa dobu. Edia hekwakwanai ia kokia lasi to idia dekenai lalomaino ia henia. Hegeregere, Hana be ena hekwakwanai dainai ia “lalohisihisi bada herea.” To, Hana be “nega daudau Iehova vairanai ia guriguri” murinai lalomaino ia abia, ena be ia diba lasi gabeai dahaka do ia vara.​—1 Sam. 1:10, 12, 18; 2 Kor. 1:3, 4.

Elda taudia amo heduru oi tahua. Idia be “lai bada negana ai . . . hunia gabuna” ta bamona. (Isa. 32:2) Reana taihu ta do idia abia hidi unai amo ia dekenai emu lalohekwarahi oi gwauraia hedinarai diba bena oi do ia hagoadaia.​—Aon. 17:17.

Emu adavana oi durua diba ponografi itaia karana ia dadaraia totona, a? Reana. Baibel ia gwau hekwakwanai hamaoromaoroa eiava inai tauna goadana tuari henia totona, “taunimanima rua ese tau tamona idia hereaia.” (Had. 4:9-12) Tahua gaukara haida amo idia davaria tau bona hahine be idia gaukara hebou neganai, tau  ese ponografi itaia momo karana ia rakatania bena ena hahine ese ia abidadama henia lou.

Momokani, bema emu adavana be ia hekwarahi ponografi itaia karana ia rakatania totona, ia oi durua diba. Iehova ia guriguri henia bona elda taudia amo heduru ia tahua, a? (2 Kor. 4:7; Iam. 5:14, 15) Hedibagani ia dadaraia totona, palani ia karaia vadaeni, a? Hegeregere, elektronik gaudia gaukaralaia lasi negadia ia makaia bona lalona veria gaudia ia dadaraia, a? (Aon. 27:12) Mai ura ida emu heduru ia abia dae bona oi dekenai hereva momokani ia gwauraia, a? Bema oibe, ia do oi durua diba.

Edena dala ai? Mani inai ekspiriens ita laloa. Felicia ena adavana Ethan be ia maragi neganai ponografi ia itaia momo. Ethan be ponografi itaia urana ia abia lou neganai, Felicia ia hadibaia. Ethan ia gwau: “Mai momokani ida egu adavana ida lau herevahereva. Ia be mai lalokau ida hanaihanai lau ia sekea bona lau ia durua hedibagani lau dadaraia totona. Bona intanet lau gaukaralaia momo lasi totona, lau ia durua.” Momokani, Ethan ia ura ponografi ia itaia karana ese Felicia ena lalona ia hahisia. To Felicia ia gwau: “Egu badu bona lalohisihisi ese Ethan ia durua lasi unai kara ia rakatania totona. Ena hekwakwanai ai herevalaia murinai, ia ese lau ia durua egu lalohisihisi lau hanaia totona.”

Unai bamona herevahereva karana ese tau ia durua ponografi itaia karana ia rakatania sibona lasi, to hahine ia durua danu ena adavana ia abidadama henia lou totona. Unai dainai, bema tau be mai momokani ida ena adavana dekenai ena manoka gaudia, ia lao gabuna eiava ia karaia gauna ia hamaoroa bona gau ta ia hunia lasi, vadaeni ena adavana ese do ia abidadama henia.   

Oi laloa unai dala amo emu adavana oi durua diba, a? Bema oibe, namona be inai atikol umui duahia bona herevalaia hebou. Iena tahua gauna be ponografi ia dadaraia bona ia hamomokania oi ese ia oi abidadama henia diba. Namo lasi tau ia badu badina unai hekwakwanai oi ura herevalaia, to emu lalohisihisi ia lalopararalaia be namo. Emu tahua gauna be, ia oi durua unai kara ia hadokoa bona kara haida do ia karaia oi abidadama henia lou totona. Namona be umui ruaosi ese taunimanima be ponografi idia itaia ena badina bona unai hekwakwanai hanaia dalana do umui tahua hebou. d

 Bema oi laloa oi bona emu adavana emui herevahereva lalonai do umui badu, reana umui manada elda ta umui noia diba umui ida do ia helai bona emui herevahereva karana do ia hakaua. Laloatao, ena be emu tau ese ponografi itaia karana ia rakatania, to reana nega daudau murinai do oi abidadama henia lou. Oi hesiku lasi. Umui hanamoa vadaeni gaudia oi moalelaia. Bona namona be oi abia dae nega ia hanaia lalonai, umui ruaosi umui haheauka neganai, emui headava do ia goada lou.​—Had. 7:8; 1 Kor. 13:4.

Bema emu adavana be ponografi ia dadaraia vadaeni, to ma ia itaia lou, anina be ia helalo-kerehai lasi eiava do ia rakatania diba lasi, a? Lasi. Bema ena mauri ibounai lalonai unai kara ia manadalaia, do ia hekwarahi bada ia rakatania totona. Ena be lagani momo lalonai ia dadaraia, to reana nega ta do ia itaia lou. Unai ia vara lasi totona, namona be taravatu aukadia ia atoa. Danu, ena be ponografi itaia karana ia hadokoa, to unai taravatu do ia badinaia noho. (Aon. 28:14; Mat. 5:29; 1 Kor. 10:12) Namona be ena ‘lalona do ia hamatamataia’ bona kara dika hegeregere ponografi eiava sibona ena kopina gadaralaia karana do ia “inai henia.” (Efe. 4:23; Sal. 97:10; Roma 12:9) Ia ura unai do ia karaia, a? Bema oibe, reana metairametaira ponografi itaia karana ia hadokoa diba. e    

To edena bamona, bema emu adavana ia ura lasi ena hekwakwanai ia hamaoromaoroa? Reana do oi lalohisihisi, badu bona oi mamia oi ia koia. Lalomaino oi abia totona, Iehova ena imana ai unai hekwakwanai oi rakatania. (1 Pet. 5:7) Stadi, guriguri bona laloa dobu karana amo Iehova kahirakahira oi lao. Unai bamona oi karaia neganai, Ia be oi kahirakahira do ia mai danu. Isaia 57:15 hegeregerena, Iehova be ‘lalometau bona lalomanoka taudia’ ida ia noho bona idia ia hagoadaia. Namona be oi hekwarahi Keristani hahine goadana ai do oi lao. Elda taudia amo heduru oi tahua. Bona oi haheauka noho, reana nega ta emu adavana be ena kara do ia senisia.​—Roma 2:4; 2 Pet. 3:9.