1. Dahaka dainai Babulonia gavamani taudia be peroveta tauna Daniela idia ura henia?

 PEROVETA tauna Daniela be mero matamata neganai, tuari taudia ese idia abia bona Babulonia dekenai idia laohaia. To gavamani taudia idia itaia Daniela ena ‘tauanina bona toana be namo herea’ bona ia be lohia besena amo ia mai. (1 Sam. 16:7) Unai dainai, idia ese King ena ruma ai do ia gaukara totona idia hadibaia.​—Dan. 1:3, 4, 6.

2. Iehova be edena bamona Daniela ia laloa? (Esekiela 14:14)

² Iehova ese Daniela ia lalokau henia iena toana eiava dagi dainai lasi, to badina unai mero matamata ese abia hidi ia karaia Iehova do ia badinaia. Daniela ena mauri lagani be 20 bamona neganai, Iehova ia gwau ia be kara maoromaoro tauna Noa bona Iobu bamona—idia ruaosi be lagani momo lalonai Iehova idia hesiai henia. (Gen. 5:32; 6:9, 10; Iobu 42:16, 17; Esekiela 14:14 duahia.) Oibe, Daniela be lagani momo lalonai mai abidadama ida hesiai gaukara ia karaia bona Iehova ese ia lalokau henia.​—Dan. 10:11, 19.

3. Inai atikol ai dahaka do ita herevalaia?

³ Inai atikol ai, Daniela ena kara namodia rua dainai Iehova ese ia lalokau henia karana do ita stadilaia. Unai kara ta ta bona ia hahedinaraia negadia do ita herevalaia guna. Bena, do ita itaia dahaka ese Daniela ia durua unai kara namodia ia habadaia totona. Dokonai, Daniela ita tohotohoa diba dalana do ita herevalaia. Ena be inai atikol be matamata taudia totona, to Daniela ena haheitalai ese ita ibounai do ia durua.

4. Edena dala ai Daniela be gari lasi karana ia hahedinaraia? Haheitalai ta gwauraia.

⁴ Gari lasi taudia be gari mamina idia abia danu, to unai ese idia ia koua lasi kara maorona idia karaia totona. Daniela be gari lasi tauna. Gari lasi karana ia hahedinaraia negadia rua mani ita herevalaia. Babulonia besena ese Ierusalema ia hadikaia, bena lagani rua murinai Daniela be gari lasi karana ia hahedinaraia. Babulonia ena King Nebukanesa be ia nihi bona kaivakuku badana ta ia itaia dainai ia gari. Ena aonega taudia, Daniela danu, ia oda henidia ena nihi do idia herevalaia bona ena anina do idia gwauraia hedinarai, bema lasi, ia ese idia ibounai do ia alaia. (Dan. 2:3-5) Daniela ia karaharaga be namo, bema lasi, idia momo do idia mase. Unai dainai, Daniela be “king dekenai ia lao bona ia noia ia dekenai nega ia henia, unai amo Daniela ese king dekenai nihi ena anina do ia gwauraia.” (Dan. 2:16) Unai ia karaia totona, abidadama bona gari lasi karana ia hahedinaraia. Baibel ia hahedinaraia lasi Daniela be guna nihi edia anina ia gwauraia hedinarai. Iena turadia Sataraka, Misaka bona Abetenigo b “ia hamaoroa guba ena Dirava do idia noia idia ia hebogahisi henia totona, bona unai hehuni gauna be idia dekenai do ia hahedinaraia.” (Dan. 2:18) Iehova ese edia guriguri ia haerelaia, bona iena heduru amo Daniela be Nebukanesa ena nihi ia gwauraia hedinarai. Daniela ese ia bona iena turadia ia hamauria.

5. Edena nega ma ta ai Daniela be gari lasi karana ia hahedinaraia?

⁵ Daniela be king ese ia nihilaia kaivakuku badana ena anina ia gwauraia hedinarai murinai, hahetoho ma ta ia davaria. Nebukanesa be nihi ma ta ia abia bona ia gari bada. Inai nihi lalonai au badana ta ia itaia. Mai gari lasi ida Daniela ese king dekenai nihi ena anina ia gwauraia hedinarai, bona ia hadibaia danu king be do ia kavakava bona lagani haida lalonai do ia lohia lasi. (Dan. 4:25) Reana king do ia laloa Daniela be ia gwau-edeede bona ia hamasea diba. To, Daniela be mai ia gari lasi ida nihi ena anina ia gwauraia.

6. Dahaka ese Daniela ia durua ia gari lasi totona?

⁶ Dahaka ese Daniela ia durua iena mauri ibounai lalonai ia gari lasi totona? Ita diba ia  maragi neganai iena tama sina edia haheitalai ese idia durua. Idia be Iehova ese Israela tama sina dekenai ia henia hakaua hereva idia badinaia, bona Daniela dekenai Dirava ena Taravatu idia hadibaia. (Deu. 6:6-9) Daniela be Taravatu 10 sibona ia diba lasi, to Israela tauna be edena aniani do ia ania eiava ania lasi ena taravatu ia diba danu. c (Lev. 11:4-8; Dan. 1:8, 11-13) Danu, Daniela be Dirava ena taunimanima edia sivarai ia diba bona Iehova idia kamonai henia lasi dainai idia davaria hekwakwanai ia diba. (Dan. 9:10, 11) Daniela ena mauri ai idia vara gaudia dainai, ia diba herevana dahaka ia vara, Iehova bona iena aneru goadadia ese do idia durua.​—Dan. 2:19-24; 10:12, 18, 19.

7. Dahaka ese Daniela ia durua ia gari lasi totona? (Laulau itaia danu.)

⁷ Daniela be peroveta taudia, hegeregere Ieremia ena peroveta herevadia ia stadilaia. Unai amo ia laloparara Iuda taudia be Babulonia ai igui hesiai taudia bamona idia noho karana be do ia doko. (Dan. 9:2) Daniela ia itaia Baibel ena peroveta herevadia idia guguru neganai, ena abidadama Iehova dekenai ia goada. Oibe, Dirava dekenai idia abidadama goada taudia be idia gari diba lasi. (Roma 8:31, 32, 37-39 hahegeregerea.) Mai anina bada gauna be hanaihanai Daniela ese iena guba Tamana ia guriguri henia. (Dan. 6:10) Iehova dekenai iena kara dika bona hemami ia gwauraia hedinarai, bona heduru totona ia noinoi. (Dan. 9:4, 5, 19) Daniela be ita bamona, gari lasi karana ida ia vara lasi. To, stadi, guriguri bona Iehova abidadama henia karana amo gari lasi karana ia habadaia.

8. Edena dala ai gari lasi karana ita habadaia diba?

⁸ Gari lasi karana ita habadaia totona dahaka do ita karaia? Iseda tama sina ese ita idia hagoadaia ita gari lasi totona, to ita dekenai unai kara idia henia diba lasi. Gari lasi karana ita habadaia dalana be hegeregere gaukara matamata ta ita dibaia. Gaukara ta ita dibaia dalana ta be hadibaia tauna ena gaukara do ita itaia namonamo bona ita tohotohoa. Unai hegeregerena, unai gari lasi karana idia hahedinaraia taudia edia haheitalai ita itaia bona ita tohotohoa neganai, unai kara do ita manadalaia. Vadaeni, Daniela amo dahaka ita dibaia? Ia hegeregerena, Dirava ena Hereva do ita diba namonamo. Namona be Dirava ita tura henia namonamo bona hanaihanai ia dekenai iseda hemami ita gwauraia hedinarai. Bona Iehova do ita abidadama henia bona ita abia dae hanaihanai ita do ia durua. Bena hahetoho ita davaria neganai, do ita gari lasi.

9. Gari lasi karana ita hahedinaraia karana be mai ena namo, a?

⁹ Gari lasi karana ita hahedinaraia neganai, dala idauidau ai namo ita davaria. Mani Ben ena sivarai ita laloa. Ia be Germany ai sikuli ta dekenai ia lao bona ibounai be evolusen idia abia dae bona idia gwau Baibel ena sivarai Dirava ese gau ibounai ia havaraia be gori sibona. Dina ta, dala ia kehoa neganai, Ben be mai gari lasi ida klas vairanai ia gini bona Dirava ese gau ibounai ia havaraia ia abia dae ena badina ia gwauraia hedinarai. Dahaka ia vara? Ben ia gwau: “Egu tisa ia kamonai namonamo bona lau gaukaralaia pepana ena kopi ia karaia bona stiuden ta ta dekenai ia henia.” Ena klas turadia be dahaka idia karaia? Ben ia gwau: “Idia momo be egu hereva idia kamonai bona idia gwau lau idia matauraia.” Ben ena haheitalai hegeregerena, gari lasi taudia be haida ese idia matauraia. Danu kudou-maoro taudia  be Iehova dekenai idia veria mai diba. Oibe, badina namodia dainai gari lasi karana ita habadaia be namo.

10. Badinaia karana ena anina be dahaka?

¹⁰ Baibel lalonai, Heberu gado herevana idia hahanaia “badinaia karana,” eiava “noho hanaihanai lalokauna,” ena anina be ta be mai ena lalokau ida ena hebogahisi be tau ta dekenai ia hahedinaraia noho. Nega momo Baibel ese Dirava be iena turadia dekenai ia hahedinaraia “badinaia karana” eiava “noho hanaihanai lalokauna” ia herevalaia. Dirava ena hesiai taudia huanai idia hahedinaraia lalokauna ia herevalaia neganai, unai hereva ia gaukaralaia danu. (2 Sam. 9:6, 7) Lagani idia hanaia lalonai iseda badinaia karana be do ia goada ia lao. Daniela ese unai ia karaia dalana mani ita itaia.

11. Daniela ia buruka neganai, edena dala ai badinaia karana ia hahedinaraia noho? (Rau 1 ena laulau itaia.)

¹¹ Daniela ena mauri ibounai lalonai Dirava badinaia karana dekenai hahetoho momo ia davaria. Iena mauri lagani be 90 bamona neganai, hahetoho badana ia davaria. Unai nega ai, Mede bona Parasa besena ese Babulonia idia abia bona King Dariuse ia lohia. Gavamani taudia be Daniela idia ura henia lasi bona ia tomadiho henia Diravana idia matauraia lasi. Unai dainai palani idia karaia Daniela idia hamasea totona. Taravatu ta idia karaia unai amo Daniela idia tohoa iena Dirava eiava king do ia badinaia. Daniela be taunimanima ibounai hegeregerena, dina 30 lalonai Iehova do ia guriguri henia lasi, unai amo do ia hamomokania ia be king ia badinaia. Daniela be lalona ia hadaia Iehova do ia badinaia noho. Unai dainai, ia be laiona ena guri lalonai idia negea. To, Iehova ese Daniela ena badinaia karana ia hanamoa bona laiona edia uduna amo ia hamauria. (Dan. 6:12-15, 20-22) Edena dala ai Daniela bamona Iehova badinaia karana ita hahedinaraia diba?

12. Edena dala ai Daniela be Iehova badinaia karana ia goadalaia?

¹² Matamanai ita herevalaia hegeregerena, Iehova ita badinaia totona Ia ita lalokau henia be gau badana. Daniela ese Iehova ia badinaia goada, badina iena guba Tamana ia lalokau henia bada. Ita daradara lasi, Daniela be Iehova  ia lalokau henia bada, badina Iehova ena kara namodia bona ia hahedinaraia daladia ia laloa dobu. (Dan. 9:4) Danu, Iehova ese Daniela bona Iena taunimanima totona ia karaia kara namodia ia laloa dobu bona ia moale.​—Dan. 2:20-23; 9:15, 16.

13. (a) Matamata taudia be Dirava badinaia karana dekenai dahaka hahetoho idia davaria? Haheitalai gwauraia. (Laulau itaia danu.) (b) Vidio hegeregerena, edena bamona do oi haere bema haida idia henanadai: Iehova ena Witnes taudia be homosexual taudia idia abia dae, a?

¹³ Daniela hegeregerena, iseda matamata taudia be Iehova bona iena taravatu idia matauraia lasi taudia huanai idia noho. Idia ese Dirava idia lalokau henia taudia idia inai henidia. Idia haida ese iseda matamata taudia idia doria Iehova idia badinaia lasi totona. Australia dekenai mero matamata ta ladana Graeme dekenai ia vara gauna mani ita laloa. Haisikuli ai hahetoho ta ia davaria. Tisa ese klas ia nanadaia dahaka do idia karaia bema edia turana ta ese idia ia hamaoroa ia be homosexual tauna. Homosexual taudia be tatau rua eiava hahine rua idia mahuta hebou taudia. Tisa ia gwau homosexual tauna idia durua taudia be kahana ta ai do idia gini, bona idia durua lasi taudia be kahana ma ta ai do idia gini. Graeme ia gwau: “Klas ibounai be unai mauri dalana idia abia dae kahana ai idia gini, to lau bona Witnes merona ta be ai gini siri.” Unai hepapahuahu ia bada bona Graeme ena Iehova badinaia karana ia tohoa. Ia gwau: “Hora ta lalonai klas taudia bona tisa danu be ai ruaosi idia gwau-henia. Mai aonega bona manau dalanai lau abidadama henia gaudia lau gwauraia, to idia kamonai lasi.” Graeme ena hemami be edena bamona? Ia gwau: “Lau ura lasi lau idia badu henia, to lau abidadama henia gaudia lau gwauraia hedinarai bona Iehova lau badinaia dainai lau moale.” d

14. Edena dala ta ai Iehova badinaia karana ita hagoadaia diba?

¹⁴ Iehova badinaia karana ita goadalaia diba, bema Daniela bamona Ia ita lalokau henia bada. Iehova ena kara namodia ita dibaia neganai iseda lalokau do ita habadaia. Hegeregere, ia havaraia gaudia ita stadilaia diba. (Roma 1:20) Bema oi ura Iehova oi lalokau henia bona matauraia, “Was It Designed?” ena kahana ai idia hedinarai atikol oi duahia eiava vidio oi itaia diba. Danu buklet ladana Was Life Created? bona The Origin of Life—Five Questions Worth Asking oi duahia diba. Denmark amo taihu matamata ta ladana Esther ese unai buklet ia herevalaidia, ia gwau: “Idia torea dalana be namo herea. Oi idia doria lasi unai gaudia oi abia dae totona, to hereva momokani idia hahedinaraia bona oi sibona ese abia hidi do oi karaia.” Matamanai ita herevalaia tadikaka Ben, ia gwau: “Unai buklet ese egu abidadama idia hagoadaia. Idia hamomokania Dirava ese mauri gaudia ia havaraia.” Unai buklet oi stadilaia murinai, Baibel ena hereva do oi abia dae, ia gwau: “Iehova, aiemai Dirava e, oi be hegeregere momokani, hairai, hemataurai, bona siahu oi abia totona, badina oi ese gau ibounai oi havaraia.”​—Apok. 4:11. e

15. Edena dala ma ta ai iseda hetura karana Iehova ida ita hagoadaia diba?

¹⁵ Iseda lalokau Iehova dekenai ita hagoadaia dalana ma ta be Iena Natuna, Iesu ena mauri dalana do ita stadilaia namonamo. Germany ai taihu matamata ta ladana Samira be unai bamona ia karaia. Ia gwau: “Iesu amo Iehova ena kara lau dibaia namonamo.” Samira be ia maragi neganai, ia abia dae lasi Iehova be mai ena hemami. To Iesu ena hemami ia lalopararalaia, ia gwau: “Iesu lau ura henia badina  ia be tau namona bona natudia ia lalokau henidia.” Iesu ia diba namonamo neganai, ena hetura karana Iehova ida ia goada. Dahaka dainai? Ia gwau: “Metairametaira lau laloparara, Iesu be ena Tamana ena kara ia tohotohoa goevagoeva. Edia kara be hegeregere. Lau laloparara, Iehova ese Iesu be tanobada dekenai ia siaia mai ena badina ta be taunimanima do ia durua Iehova idia diba namonamo totona.” (Ioa. 14:9) Bema oi ura emu hetura karana Iehova ida ia goada, namona be nega oi atoa Iesu oi diba namonamo totona. Bema unai bamona oi karaia, emu lalokau bona badinaia karana Iehova dekenai do ia goada.

16. Iehova badinaia karana ena namo be dahaka? (Salamo 18:25; Mika 6:8)

¹⁶ Ma haida dekenai badinaia karana ita hahedinaraia neganai, ita idia badinaia tura namodia ita davaria. (Ruta 1:14-17) Danu, Iehova ita badinaia neganai lalomaino ai do ita noho. Dahaka dainai? Badina Iehova ia gwauhamata ia ese ia idia badinaia taudia do ia rakatania lasi. (Salamo 18:25; Mika 6:8 duahia.) Mani inai oi laloa: Siahu ibounai Havaraia Tauna ia gwauhamata hanaihanai ita do ia lalokau henia! Bona Iehova ita tura henia namonamo neganai, hahetoho ta, inai tauna ta, eiava mase ese iseda hetura karana do ia hadikaia lasi. (Dan. 12:13; Luka 20:37, 38; Roma 8:38, 39) Oibe, Daniela ita tohotohoa bona Iehova ita badinaia be mai anina bada!

17-18. Daniela amo dahaka gau ma ta ita dibaia?

¹⁷ Inai atikol lalonai, ita ese Daniela ena kara rua sibona ita herevalaia. To ia amo gau momo ita dibaia danu. Hegeregere, Iehova ese Daniela dekenai matahanai bona nihi idauidau ia hahedinaraia, bona aonega ia henia peroveta herevadia edia anina ia gwauraia hedinarai totona. Unai peroveta herevadia momo be idia guguru vadaeni. Haida be vaira negana ai taunimanima ibounai dekenai do ia vara gaudia idia herevalaia.

¹⁸ Stadi atikol 34 ai, Daniela ena peroveta herevadia rua do ita herevalaia. Unai peroveta herevadia ita lalopararalaia karana ese hari ita ibounai, matamata bona buruka, do ia durua abia hidi maorodia ita karaia totona. Danu, ita do idia hegaegaelaia unai amo do idia vara gaudia dainai do ita gari lasi bona Iehova do ita badinaia noho.